1 ꠝꠣꠛꠥꠖꠦ ꠢꠣꠞꠥꠘ ꠘꠛꠤꠞꠦ ꠇꠁꠟꠣ, “ꠙꠛꠤꠔ꠆ꠞ ꠄꠛꠣꠖꠔ ꠈꠣꠘꠣꠞ ꠛꠦꠙꠣꠞꠦ ꠎꠔ ꠘꠣꠚꠞꠝꠣꠘꠤ ꠇꠞꠣ ꠅꠁꠛ, ꠄꠞ ꠖꠣꠄ-ꠖꠣꠄꠁꠔ꠆ꠔ ꠛꠞ꠆ꠔꠤꠛ ꠔꠥꠝꠣꠞ ꠃꠙꠞꠦ, ꠔꠥꠝꠣꠞ ꠙꠥꠀꠂꠘ ꠀꠞ ꠔꠥꠝꠣꠞ ꠉꠥꠡ꠆ꠐꠤꠞ ꠢꠇꠟꠞ ꠃꠙꠞꠦꠅ। ꠀꠞ ꠁꠝꠣꠝꠔꠤ ꠇꠣꠝꠞ ꠛꠣꠟꠣ ꠎꠔ ꠟꠣꠈꠣꠘ ꠘꠣꠚꠞꠝꠣꠘꠤ ꠇꠞꠣ ꠅꠁꠛ, ꠁꠔꠣꠞ ꠖꠣꠄꠁ ꠅꠁꠛꠣꠄ ꠈꠣꠟꠤ ꠔꠥꠝꠤ ꠀꠞ ꠔꠥꠝꠣꠞ ꠙꠥꠀꠂꠘ। 2 ꠔꠦ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠈꠣꠘ꠆ꠖꠣꠘ ꠕꠣꠇꠤ ꠀꠞꠅ ꠟꠦꠛꠤ ꠅꠇꠟꠞꠦ ꠔꠥꠝꠤ ꠀꠘꠅ। ꠔꠣꠞꠣ ꠀꠁꠀ ꠔꠥꠝꠣꠞꠦ ꠀꠞ ꠔꠥꠝꠣꠞ ꠙꠥꠀꠂꠘꠞꠦ ꠡꠣꠢꠣꠖꠔ ꠔꠣꠝ꠆ꠛꠥꠞ ꠍꠣꠝꠘꠞ ꠄꠛꠣꠖꠔꠤ ꠇꠣꠝꠅ ꠡꠣꠁꠎ꠆ꠎ ꠇꠞꠛꠣ। ꠔꠣꠞꠣ ꠔꠥꠝꠣꠞ ꠎꠤꠝ꠆ꠝꠣꠄ ꠞꠁꠀ ꠡꠣꠢꠣꠖꠔ ꠔꠣꠝ꠆ꠛꠥꠞ ꠢꠇꠟ ꠇꠣꠝ-ꠇꠣꠎ ꠇꠞꠛꠣ। 3 ꠅꠁꠟꠦ ꠇꠥꠞꠛꠣꠘꠤ ꠈꠣꠘꠣ ꠛꠣ ꠀꠟ꠆ꠟꠣꠞ ꠊꠞꠞ ꠇꠥꠘꠥ ꠙꠛꠤꠔ꠆ꠞ ꠎꠤꠘꠤꠡꠞ ꠗꠣꠞꠅ ꠎꠣꠅꠀ ꠔꠣꠞꠣꠞ ꠟꠣꠉꠤ ꠘꠤꠡꠦꠗ। ꠘꠤꠡꠦꠗ ꠘꠣ ꠝꠣꠘꠟꠦ ꠔꠣꠞꠣ ꠀꠞ ꠔꠥꠝꠞꠣ ꠢꠇꠟꠃ ꠝꠞꠛꠣꠄ। 4 ꠔꠣꠞꠣ ꠔꠥꠝꠣꠞ ꠇꠣꠝꠅ ꠡꠞꠤꠇ ꠅꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠈꠣꠖꠤꠝꠖꠣꠞꠤ ꠇꠞꠛꠣ, ꠢꠇꠟ ꠎꠣꠔ ꠇꠣꠝꠞ ꠖꠣꠄ-ꠖꠣꠄꠁꠔ꠆ꠔ ꠘꠤꠛꠣ। ꠔꠣ-ꠅ ꠈꠣꠟꠤ ꠟꠦꠛꠤ ꠅꠇꠟ ꠍꠣꠠꠣ ꠖꠥꠍꠞꠣ ꠇꠦꠃ ꠔꠥꠝꠞꠣꠞ ꠉꠦꠍꠦ ꠎꠣꠅꠀ ꠘꠤꠡꠦꠗ। 5 ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠀꠝꠤ ꠎꠣꠘꠥ ꠢꠤꠞꠛꠣꠞ ꠘꠣꠞꠣꠎ ꠘꠣ ꠅꠁ, ꠄꠞꠟꠣꠉꠤ ꠄꠛꠣꠖꠔ ꠈꠣꠘꠣ ꠀꠞ ꠇꠥꠞꠛꠣꠘꠤ ꠈꠣꠘꠣ ꠖꠦꠈꠣ-ꠢꠥꠘꠣꠞ ꠜꠣꠞ ꠔꠥꠝꠞꠣꠞ ꠃꠙꠞꠦ ꠞꠁꠛ। 6 ꠀꠝꠤ ꠘꠤꠎꠦ ꠔꠥꠝꠞꠣꠞꠦ ꠃꠙꠢꠣꠞ ꠢꠤꠡꠣꠛꠦ ꠖꠤꠛꠣꠞ ꠟꠣꠉꠤ, ꠛꠘꠤ ꠁꠍꠞꠣꠁꠟꠞ ꠝꠣꠎꠞ ꠟꠦꠛꠤ ꠅꠇꠟꠞꠦ ꠙꠍꠘ꠆ꠖ ꠇꠞꠍꠤ। ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ ꠇꠞꠣꠞ ꠟꠣꠉꠤ ꠄꠞꠣꠞꠦ ꠝꠣꠛꠥꠖꠞ ꠘꠣꠝꠦ ꠡꠙꠤ ꠖꠦꠅꠀ ꠅꠁꠍꠦ। 7 ꠅꠁꠟꠦ ꠁꠝꠣꠝ ꠢꠤꠡꠣꠛꠦ ꠈꠣꠟꠤ ꠔꠥꠝꠤ ꠀꠞ ꠔꠥꠝꠣꠞ ꠙꠥꠀꠂꠘ꠆ꠔꠦ ꠇꠥꠞꠛꠣꠘꠤ ꠈꠣꠘꠣ ꠀꠞ ꠙꠞ꠆ꠖꠣꠞ ꠜꠤꠔꠞꠞ ꠢꠦꠞꠦꠝ ꠡꠞꠤꠚꠅ ꠈꠦꠎꠝꠔ ꠇꠣꠝ ꠇꠞꠛꠣꠄ। ꠁꠝꠣꠝꠔꠤꠞ ꠙꠖ ꠈꠣꠘ ꠀꠝꠤ ꠃꠙꠢꠣꠞ ꠢꠤꠡꠣꠛꠦ ꠔꠥꠝꠞꠣꠞꠦ ꠖꠤꠟꠣꠝ। ꠈꠣꠟꠤ ꠟꠦꠛꠤ ꠅꠇꠟ ꠍꠣꠠꠣ ꠖꠥꠍꠞꠣ ꠇꠦꠃ ꠎꠥꠖꠤ ꠝꠤꠟꠘ-ꠔꠣꠝ꠆ꠛꠥꠞ ꠡꠤꠝꠣꠘꠣꠔ ꠀꠄ, ꠔꠦ ꠔꠣꠞꠦ ꠎꠣꠘꠦ ꠝꠣꠞꠤꠟꠤꠔꠦ ꠅꠁꠛ।”

8 ꠄꠞꠛꠣꠖꠦ ꠝꠣꠛꠥꠖꠦ ꠢꠣꠞꠥꠘꠞꠦ ꠇꠁꠟꠣ, “ꠀꠝꠣꠞ ꠘꠣꠝꠦ ꠎꠔ ꠟꠣꠈꠣꠘ ꠇꠥꠞꠛꠣꠘꠤ ꠖꠦꠅꠀ ꠅꠄ, ꠁꠔꠣꠞ ꠢꠇꠟ ꠎꠤꠝ꠆ꠝꠣꠖꠣꠞꠤ ꠀꠝꠤ ꠘꠤꠎꠦꠃ ꠔꠥꠝꠣꠞ ꠀꠔꠅ ꠡꠝꠎꠣꠁꠍꠤ। ꠔꠦ ꠀꠝꠣꠞ ꠘꠣꠝꠦ ꠛꠘꠤ ꠁꠍꠞꠣꠁꠟꠞ ꠇꠥꠞꠛꠣꠘꠤ ꠇꠞꠣ ꠢꠇꠟ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ, ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡꠞ ꠙꠣꠅꠘꠣ ꠛꠦꠔꠘ ꠢꠤꠡꠣꠛꠦ ꠌꠤꠞꠇꠣꠟꠞ ꠟꠣꠉꠤ ꠖꠤꠟꠣꠁꠟꠣꠝ। 9 ꠈꠣꠍ ꠙꠛꠤꠔ꠆ꠞ ꠇꠥꠞꠛꠣꠘꠤꠞ ꠎꠦ ꠅꠋꠡ ꠀꠉꠥꠁꠘꠅ ꠎꠣꠟꠣꠘꠤ ꠟꠣꠉꠔ ꠘꠣꠄ, ꠅꠃ ꠛꠣꠐꠅ ꠔꠥꠝꠞꠣ ꠘꠤꠅꠉꠤ। ꠔꠦ ꠗꠣꠘ-ꠉꠝꠞ ꠍꠖꠉꠣ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠛꠘꠤ ꠁꠍꠞꠣꠁꠟꠦ ꠀꠝꠣꠞ ꠉꠦꠍꠦ ꠎꠔꠔꠣ ꠟꠁꠀ ꠀꠁꠛꠣ, ꠁꠔꠣ ꠔꠥꠝꠤ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞ ꠙꠣꠅꠘꠣ ꠢꠇ। 10 ꠁꠔꠣ ꠘꠤꠀ ꠢꠣꠞꠤ ꠈꠣꠍ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡ ꠛꠥꠎꠤꠀ ꠁꠎ꠆ꠎꠔ ꠇꠞꠤꠀ ꠔꠥꠝꠞꠣ ꠈꠣꠁꠅ। ꠔꠥꠝꠞꠣꠞ ꠢꠇꠟ ꠛꠦꠐꠣꠁꠘ꠆ꠔꠦ ꠁꠔꠣ ꠈꠣꠁꠔꠣꠄ ꠙꠣꠞꠛꠣꠄ। ꠁ ꠈꠣꠘꠤ ꠔꠥꠝꠞꠣꠞ ꠟꠣꠉꠤ ꠙꠛꠤꠔ꠆ꠞ। 11 ꠀꠞ ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠢꠇꠟ ꠖꠥꠟꠘꠣ ꠇꠥꠞꠛꠣꠘꠤꠞ ꠎꠤꠘꠤꠡꠅ ꠔꠥꠝꠞꠣꠞ ꠅꠁꠛ। ꠁꠔꠣ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠌꠤꠞꠇꠣꠟꠤꠘ ꠙꠣꠅꠘꠣ ꠢꠤꠡꠣꠛꠦ ꠖꠤꠞꠣꠝ। ꠔꠥꠝꠣꠞ ꠙꠞꠤꠛꠣꠞꠞ ꠎꠦꠞꠣ ꠙꠣꠇ-ꠙꠣꠇꠤꠎꠣ ꠢꠣꠟꠔꠦ ꠞꠁꠛꠣ, ꠔꠣꠞꠣ ꠁꠔꠣ ꠈꠣꠁꠔꠣ ꠙꠣꠞꠛꠣ।

12 “ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠈꠦꠔꠞ ꠢꠇꠟ ꠕꠣꠇꠤ ꠜꠣꠟꠣ ꠎꠦ ꠔꠦꠟ, ꠘꠄꠀ ꠀꠋꠉꠥꠞꠞ ꠡꠞꠛꠔ ꠀꠞ ꠚꠡꠟꠞ ꠎꠦ ꠅꠋꠡ ꠝꠣꠛꠥꠖꠞ ꠘꠣꠝꠦ ꠍꠖꠉꠣ ꠖꠤꠛꠣ, ꠁꠔꠣ ꠢꠇ꠆ꠇꠟꠔꠣ ꠀꠝꠤ ꠔꠥꠝꠣꠞꠦ ꠖꠤꠟꠣꠁꠟꠣꠝ। 13 ꠝꠣꠛꠥꠖꠞ ꠉꠦꠍꠦ ꠀꠘꠣ ꠔꠣꠞꠣꠞ ꠚꠟꠣꠁꠟ ꠚꠄ-ꠚꠡꠟꠞ ꠙꠄꠟꠣ ꠅꠋꠡ ꠔꠥꠝꠣꠞ ꠅꠁꠛ। ꠔꠥꠝꠣꠞ ꠙꠞꠤꠛꠣꠞꠞ ꠝꠣꠎꠞ ꠎꠦꠞꠣ ꠙꠣꠇ-ꠙꠣꠇꠤꠎꠣ ꠢꠣꠟꠔꠦ ꠕꠣꠇꠛꠣ, ꠔꠣꠞꠣ ꠁꠔꠣ ꠈꠣꠁꠛꠣ।

14 “ꠛꠘꠤ ꠁꠍꠞꠣꠁꠟꠦ ꠙꠥꠞꠣꠙꠥꠞ ꠖꠣꠛꠤ-ꠖꠣꠅꠀ ꠍꠣꠠꠤꠀ ꠝꠣꠘ꠆ꠘꠔ ꠢꠤꠡꠣꠛꠦ ꠎꠔ ꠎꠤꠘꠤꠡ ꠖꠤꠛꠣ, ꠁꠔꠣꠅ ꠔꠥꠝꠤ ꠙꠣꠁꠛꠣꠄ। 15 ꠝꠣꠛꠥꠖꠞ ꠘꠣꠝꠦ ꠡꠙꠤ ꠖꠦꠅꠀ ꠙꠞꠔꠦꠇ ꠙꠄꠟꠣ ꠛꠣꠁꠌ꠆ꠌꠣ ꠔꠥꠝꠣꠞ ꠅꠁꠛ, ꠁꠔꠣ ꠝꠣꠘꠡꠞ ꠀꠅꠟꠣꠖ ꠅꠃꠇ ꠛꠣ ꠙꠡꠥꠞ ꠛꠣꠁꠌ꠆ꠌꠣ ꠅꠃꠇ। ꠝꠣꠘꠡꠞ ꠙꠄꠟꠣ ꠙꠥꠀꠞꠦ ꠔꠥꠝꠤ ꠘꠤꠌ꠆ꠌꠄ ꠈꠣꠟꠣꠍ ꠇꠞꠤꠀ ꠘꠤꠔꠦ ꠖꠤꠅ, ꠀꠞ ꠘꠣꠙꠣꠇ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦꠅ ꠅꠟꠣ ꠈꠣꠟꠣꠍ ꠇꠞꠤ ꠘꠤꠔꠦ ꠖꠤꠅ। 16 ꠝꠣꠘꠡꠞ ꠙꠄꠟꠣ ꠙꠥꠀꠞ ꠛꠄꠅꠡ ꠄꠇ ꠝꠣꠡ ꠅꠁꠟꠦ ꠈꠣꠟꠣꠍ ꠇꠞꠣꠘꠤꠞ ꠎꠣꠘꠞ ꠛꠖꠟꠣ ꠛꠣꠛꠔ, ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠙꠣꠌ ꠔꠟꠣ ꠞꠥꠙꠣ ꠘꠤꠀ ꠀꠎꠣꠖ ꠇꠞꠤ ꠖꠤꠅ। 17 ꠅꠁꠟꠦ ꠉꠣꠁ-ꠉꠞꠥ ꠛꠣ ꠝꠦꠠꠣ-ꠍꠣꠉꠟꠞ ꠙꠄꠟꠣ ꠛꠣꠁꠌ꠆ꠌꠣꠞꠦ ꠈꠣꠟꠣꠍ ꠇꠞꠣꠁ ꠘꠤꠔꠦ ꠖꠤꠅ ꠘꠣ, ꠁꠉꠥꠁꠘ ꠔ ꠢꠣꠟꠣꠟ। ꠁꠔꠣꠞꠦ ꠇꠥꠞꠛꠣꠘꠤ ꠖꠤꠀ ꠔꠥꠝꠤ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠟꠃ ꠍꠤꠐꠣꠁꠀ ꠖꠤꠅ, ꠀꠞ ꠌꠞ꠆ꠛꠤꠞꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠎꠣꠟꠣꠁꠅ। ꠁ ꠇꠥꠞꠛꠣꠘꠤꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ। 18 ꠖꠥꠟꠘꠣ ꠇꠞꠣꠁꠟ ꠍꠤꠘꠣ ꠀꠞ ꠒꠣꠁꠘꠞ ꠞꠣꠘꠞ ꠉꠥꠡ꠆ꠔꠞ ꠟꠣꠈꠣꠘ, ꠅꠉꠥꠁꠘ꠆ꠔꠞ ꠉꠥꠡ꠆ꠔꠅ ꠔꠥꠝꠤ ꠙꠣꠁꠛꠣꠄ। 19 ꠝꠣꠛꠥꠖꠞ ꠘꠣꠝꠦ ꠛꠘꠤ ꠁꠍꠞꠣꠁꠟꠞ ꠇꠥꠞꠛꠣꠘꠤ ꠇꠞꠣ ꠢꠇꠟ ꠙꠛꠤꠔ꠆ꠞ ꠎꠤꠘꠤꠡ ꠔꠥꠝꠣꠞ ꠙꠣꠅꠘꠣ ꠛꠣꠛꠔ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠀꠅꠟꠣꠖ ꠅꠇꠟꠞꠦ ꠌꠤꠞꠇꠣꠟꠞ ꠟꠣꠉꠤ ꠖꠤꠟꠣꠁꠟꠣꠝ। ꠁꠔꠣ ꠅꠁꠟ ꠝꠣꠛꠥꠖꠞ ꠟꠉꠦ ꠔꠥꠝꠤ ꠀꠞ ꠔꠥꠝꠣꠞ ꠅꠀꠞꠤꠡꠞ ꠟꠣꠉꠤ ꠌꠤꠞꠇꠣꠟꠤꠘ ꠌꠥꠇ꠆ꠔꠤ, ꠄꠞ ꠇꠥꠘꠥ ꠞꠖ-ꠛꠖꠟ ꠅꠁꠔ ꠘꠣꠄ।”

20 ꠄꠞꠛꠣꠖꠦ ꠝꠣꠛꠥꠖꠦ ꠢꠣꠞꠥꠘꠞꠦ ꠇꠁꠟꠣ, “ꠛꠘꠤ ꠁꠍꠞꠣꠁꠟꠞ ꠖꠦꠡꠅ ꠔꠥꠝꠤ ꠇꠥꠘꠥ ꠗꠘ-ꠖꠃꠟꠔꠞ ꠝꠣꠟꠤꠇꠣꠘꠣ ꠛꠣ ꠎꠝꠤ-ꠎꠝꠣꠞ ꠇꠥꠘꠥ ꠛꠣꠐꠅ ꠙꠣꠁꠔꠣꠄ ꠘꠣꠄ। ꠄꠞꠣꠞ ꠝꠣꠎꠦ ꠔꠥꠝꠣꠞ ꠙꠣꠅꠘꠣ ꠛꠣꠐ ꠅꠁꠟꠣꠝ ꠡ꠆ꠛꠄꠅꠋ ꠀꠝꠤ, ꠀꠝꠤꠃ ꠔꠥꠝꠣꠞ ꠗꠘ-ꠖꠃꠟꠔ।”

21 ꠝꠣꠛꠥꠖꠦ ꠇꠁꠟꠣ, “ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠞꠥꠎꠤ-ꠞꠥꠎꠉꠣꠞꠞ ꠖꠡ ꠛꠣꠐꠞ ꠄꠇ ꠛꠣꠐ ꠔ ꠀꠝꠣꠞꠦ ꠖꠤꠛꠣ, ꠀꠝꠤꠅ ꠁꠔꠣ ꠟꠦꠛꠤ ꠈꠣꠘ꠆ꠖꠣꠘꠞ ꠙꠣꠅꠘꠣ ꠛꠦꠔꠘ ꠛꠣꠛꠔ ꠖꠤꠟꠣꠁꠟꠣꠝ। ꠝꠤꠟꠘ-ꠔꠣꠝ꠆ꠛꠥꠔ ꠄꠛꠣꠖꠔꠤ ꠇꠣꠝꠞ ꠝꠎꠥꠞꠤ ꠢꠤꠡꠣꠛꠦ ꠔꠣꠞꠣ ꠁꠔꠣ ꠙꠣꠁꠛꠣ। 22 ꠀꠞ ꠀꠁꠎ ꠕꠣꠇꠤ ꠛꠘꠤ ꠁꠍꠞꠣꠁꠟꠞ ꠖꠥꠍꠞꠣ ꠇꠥꠘꠥ ꠉꠥꠡ꠆ꠐꠤꠞ ꠝꠣꠘꠥꠡ ꠝꠤꠟꠘ-ꠔꠣꠝ꠆ꠛꠥꠞ ꠗꠣꠞꠅ ꠎꠣꠅꠀ ꠘꠤꠡꠦꠗ। ꠉꠦꠟꠦ ꠔꠣꠞꠣꠞ ꠘꠣꠚꠞꠝꠣꠘꠤꠞ ꠖꠣꠄ ꠔꠣꠞꠣ ꠝꠞꠛꠣ। 23 ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠈꠣꠟꠤ ꠟꠦꠛꠤ ꠈꠣꠘ꠆ꠖꠣꠘꠦ ꠇꠞꠛꠣ, ꠅꠃ ꠇꠣꠝꠅ ꠎꠦꠇꠥꠘꠥ ꠘꠣꠚꠞꠝꠣꠘꠤ ꠇꠞꠟꠦ ꠔꠣꠞꠣ ꠘꠤꠎꠦꠃ ꠖꠣꠄꠁ ꠅꠁꠛꠣ। ꠁꠔꠣ ꠅꠁꠛ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠄꠇꠐꠣ ꠌꠤꠞꠇꠣꠟꠤꠘ ꠘꠤꠅꠝ। ꠛꠘꠤ ꠁꠍꠞꠣꠁꠟꠞ ꠅꠁꠘ꠆ꠘꠣꠁꠘ꠆ꠘ ꠈꠣꠘ꠆ꠖꠣꠘꠞ ꠟꠉꠦ ꠇꠥꠘꠥ ꠗꠘ-ꠖꠃꠟꠔꠞ ꠝꠣꠟꠤꠇꠣꠘꠣ ꠟꠦꠛꠤ ꠈꠣꠘ꠆ꠖꠣꠘꠦ ꠙꠣꠁꠔ ꠘꠣꠄ। 24 ꠄꠞ ꠛꠖꠟꠣ ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠞꠥꠎꠤ-ꠞꠥꠎꠉꠣꠞꠞ ꠎꠦ ꠖꠡ ꠛꠣꠐꠞ ꠄꠇ ꠛꠣꠐ ꠝꠣꠛꠥꠖꠞ ꠖꠞꠛꠣꠞꠅ ꠀꠎꠤꠞ ꠇꠞꠛꠣ, ꠁꠔꠣ ꠀꠝꠤ ꠄꠞꠣꠞ ꠙꠣꠅꠘꠣ ꠢꠤꠡꠣꠛꠦ ꠖꠤꠟꠣꠁꠟꠣꠝ। ꠄꠞꠟꠣꠉꠤ ꠄꠞꠣꠞ ꠛꠦꠙꠣꠞꠦ ꠀꠝꠤ ꠝꠣꠛꠥꠖꠦ ꠇꠁꠍꠤ, ꠟꠦꠛꠤ ꠅꠇꠟꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠇꠥꠘꠥ ꠎꠝꠤ-ꠎꠝꠣꠞ ꠝꠣꠟꠤꠇꠣꠘꠣ ꠙꠣꠁꠔꠣ ꠘꠣꠄ।”

25 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 26 “ꠔꠥꠝꠤ ꠟꠦꠛꠤ ꠅꠇꠟꠞꠦ ꠇꠅ, ꠅꠁꠘ꠆ꠘꠣꠁꠘ꠆ꠘ ꠛꠘꠤ ꠁꠍꠞꠣꠁꠟꠞ ꠞꠥꠎꠤ-ꠞꠥꠎꠉꠣꠞꠞ ꠎꠦ ꠖꠡ ꠛꠣꠐꠞ ꠄꠇ ꠛꠣꠐ ꠙꠣꠅꠘꠣ ꠢꠤꠡꠣꠛꠦ ꠀꠝꠤ ꠔꠥꠝꠞꠣꠞꠦ ꠖꠤꠟꠣꠝ, ꠁꠔꠣ ꠙꠣꠁꠀ ꠢꠣꠞꠟꠦ ꠔꠥꠝꠞꠣꠅ ꠅꠔꠣꠞ ꠖꠡ ꠛꠣꠐꠞ ꠄꠇ ꠛꠣꠐꠞꠦ, ꠎꠇꠣꠔꠞ ꠎꠇꠣꠔ ꠛꠣꠛꠔ ꠝꠣꠛꠥꠖꠞ ꠘꠣꠝꠦ ꠖꠤꠟꠣꠁꠛꠣꠄ। 27 ꠅꠃ ꠎꠇꠣꠔꠞꠦꠃ ꠔꠥꠝꠞꠣꠞ ꠈꠦꠔꠞ ꠚꠡꠟꠞ ꠀꠞ ꠘꠤꠎꠞ ꠛꠣꠘꠣꠁꠟ ꠀꠋꠉꠥꠞꠞ ꠡꠞꠛꠔꠞ ꠎꠇꠣꠔ ꠢꠤꠡꠣꠛꠦ ꠉꠘꠣ ꠅꠁꠛ। 28 ꠛꠘꠤ ꠁꠍꠞꠣꠁꠟꠞ ꠛꠣꠇꠤ ꠄꠉꠣꠞꠅ ꠈꠣꠘ꠆ꠖꠣꠘꠞ ꠎꠇꠣꠔ ꠛꠣꠛꠔ ꠎꠦ ꠖꠡ ꠛꠣꠐꠞ ꠄꠇ ꠛꠣꠐ ꠔꠥꠝꠞꠣ ꠙꠣꠁꠛꠣꠄ, ꠅꠈꠣꠘ ꠕꠣꠇꠤ ꠔꠥꠝꠞꠣꠅ ꠅꠟꠣ ꠖꠡ ꠛꠣꠐꠞ ꠄꠇ ꠛꠣꠐ ꠝꠣꠛꠥꠖꠞ ꠘꠣꠝꠦ ꠎꠇꠣꠔ ꠖꠤꠛꠣꠄ। ꠝꠣꠛꠥꠖꠞ ꠘꠣꠝꠞ ꠅꠃ ꠅꠋꠡ ꠔꠥꠝꠞꠣ ꠁꠝꠣꠝ ꠢꠣꠞꠥꠘꠞ ꠀꠔꠅ ꠖꠤꠅ। 29 ꠔꠥꠝꠞꠣꠞꠦ ꠎꠔꠔꠣ ꠖꠦꠅꠀ ꠅꠁꠛ, ꠔꠥꠝꠞꠣꠅ ꠅꠔꠣꠞ ꠢꠇꠟ ꠕꠣꠇꠤ ꠜꠣꠟꠣ ꠀꠞ ꠙꠛꠤꠔ꠆ꠞ ꠅꠋꠡ, ꠝꠣꠛꠥꠖꠞ ꠙꠣꠅꠘꠣ ꠢꠤꠡꠣꠛꠦ ꠔꠣꠘꠞꠦ ꠖꠤꠅ।

30 “ꠢꠇꠟ ꠕꠣꠇꠤ ꠜꠣꠟꠣ ꠅꠋꠡ ꠝꠣꠛꠥꠖꠞꠦ ꠖꠦꠅꠀꠞ ꠛꠣꠖꠦ ꠎꠦꠔꠣ ꠛꠣꠇꠤ ꠞꠁꠛ, ꠅꠔꠣꠞꠦ ꠔꠥꠝꠞꠣꠞ ꠘꠤꠎꠞ ꠈꠦꠔꠞ ꠚꠡꠟ, ꠀꠞ ꠔꠥꠝꠞꠣꠞ ꠘꠤꠎꠞ ꠛꠣꠘꠣꠁꠟ ꠀꠋꠉꠥꠞꠞ ꠡꠞꠛꠔ ꠢꠤꠡꠣꠛꠦ ꠉꠘꠣ ꠅꠁꠛ। 31 ꠅꠃ ꠅꠋꠡ ꠔꠥꠝꠞꠣ ꠀꠞ ꠔꠥꠝꠞꠣꠞ ꠙꠞꠤꠛꠣꠞꠞ ꠝꠣꠘꠡꠦ ꠎꠦꠇꠥꠘꠥ ꠎꠣꠉꠣꠔ ꠈꠣꠁꠔꠣꠄ ꠙꠣꠞ, ꠁꠔꠣ ꠔ ꠔꠥꠝꠞꠣꠞ ꠇꠣꠝꠞ ꠛꠦꠔꠘ, ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔꠞ ꠛꠦꠔꠘ। 32 ꠢꠇꠟ ꠕꠣꠇꠤ ꠜꠣꠟꠣ ꠅꠋꠡ ꠝꠣꠛꠥꠖꠞ ꠘꠣꠝꠦ ꠖꠤꠟꠣꠁꠟꠦ, ꠛꠣꠇꠤꠔꠣ ꠈꠣꠁꠔꠦ ꠔꠥꠝꠞꠣꠞ ꠇꠥꠘꠥ ꠖꠥꠡ ꠘꠣꠁ। ꠀꠞ ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠙꠣꠇ-ꠙꠛꠤꠔ꠆ꠞ ꠝꠣꠟꠞꠦ ꠔꠥꠝꠞꠣ ꠅꠙꠛꠤꠔ꠆ꠞ ꠇꠞꠤꠅ ꠘꠣ, ꠔꠦꠃ ꠔꠥꠝꠞꠣ ꠝꠞꠔꠣꠄ ꠘꠣꠄ।”