1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, 2 “ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠝꠣꠛꠥꠖꠦ ꠡꠞꠤꠅꠔꠞ ꠢꠥꠇꠥꠝ ꠝꠣꠚꠤꠇ ꠛꠣꠔꠣꠁꠍꠂꠘ, ꠔꠥꠝꠞꠣ ꠙꠥꠞꠣꠙꠥꠞ ꠟꠣꠟ ꠞꠋꠉꠞ ꠄꠉꠥ ꠒꠦꠇꠤ ꠉꠞꠥ ꠟꠁꠀ ꠀꠝꠞꠣꠞ ꠉꠦꠍꠦ ꠀꠅ, ꠅꠃ ꠒꠦꠇꠤ ꠡꠥꠟ꠆ꠟꠀꠘꠣ ꠘꠤꠈꠥꠔ ꠅꠁꠔ, ꠀꠞ ꠔꠣꠁꠞ ꠇꠣꠘ꠆ꠖꠅ ꠇꠥꠘꠥꠖꠤꠘ ꠎꠥꠀꠟ ꠟꠣꠉꠣꠘꠤ ꠅꠁꠍꠦ ꠘꠣ। 3 ꠅꠉꠥ ꠀꠘꠤꠀ ꠔꠥꠝꠞꠣ ꠁꠝꠣꠝ ꠀꠟꠤ-ꠀꠎꠞꠞ ꠉꠦꠍꠦ ꠖꠤꠛꠣꠄ। ꠁꠝꠣꠝꠦ ꠁꠐꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠔꠣꠘ ꠍꠣꠝꠘꠦ ꠎꠛ ꠇꠞꠣꠁꠛꠣ। 4 ꠎꠛꠞ ꠛꠣꠖꠦ ꠔꠣꠘ ꠀꠋꠉꠥꠟꠅ ꠇꠤꠍꠥ ꠟꠃ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠣ ꠛꠣꠄ ꠡꠣꠔ ꠛꠣꠞ ꠍꠤꠐꠣꠁꠛꠣ। 5 ꠔꠣꠘ ꠍꠣꠝꠘꠦꠃ ꠅꠃ ꠉꠣꠁꠞ ꠈꠣꠟ, ꠉꠥꠡ꠆ꠔ, ꠟꠃ ꠀꠞ ꠉꠥꠚꠞ ꠡꠥꠖ꠆ꠖꠣ ꠀꠔ-ꠜꠠ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ। 6 ꠅꠃ ꠒꠦꠇꠤꠞꠦ ꠎꠣꠟꠣꠘꠤꠞ ꠡꠝꠄ ꠁꠝꠣꠝꠦ ꠖꠦꠛꠖꠣꠞꠥ ꠉꠣꠍꠞ ꠇꠤꠍꠥ ꠖꠣꠞꠥ, ꠄꠍꠥꠛ ꠉꠣꠍꠞ ꠒꠦꠐꠣ, ꠀꠞ ꠟꠣꠟ ꠞꠋꠉꠞ ꠇꠤꠍꠥ ꠡꠥꠔꠣꠞꠦ ꠅꠃ ꠀꠉꠥꠘꠤꠞ ꠝꠣꠎꠦ ꠚꠣꠟꠣꠁꠛꠣ। 7 ꠛꠣꠖꠦ ꠔꠣꠁꠘ ꠘꠣꠁꠛꠣ, ꠀꠞ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠꠅ ꠗꠁꠛꠣ। ꠘꠣꠁꠀ-ꠗꠁꠀ ꠢꠣꠞꠟꠦ ꠔꠣꠁꠘ ꠇꠦꠝ꠆ꠙꠞ ꠜꠤꠔꠞꠦ ꠎꠣꠁꠔꠣ ꠙꠣꠞꠛꠣ, ꠅꠁꠟꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠔꠣꠁꠘ ꠘꠣꠙꠣꠇ ꠢꠣꠟꠔꠦ ꠞꠁꠛꠣ। 8 ꠎꠦ ꠎꠘꠦ ꠅꠃ ꠒꠦꠇꠤꠞ ꠢꠇꠟꠔꠣ ꠎꠣꠟꠣꠁꠛ, ꠢꠦ-ꠅ ꠘꠣꠁꠀ ꠢꠣꠞꠤ ꠇꠣꠙꠠ-ꠌꠥꠙꠠ ꠗꠁꠛ ꠀꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ। 9 ꠅꠃ ꠒꠦꠇꠤꠞ ꠎꠣꠟꠣꠁꠟ ꠍꠣꠟꠤ ꠈꠣꠘꠣꠁꠘ ꠇꠥꠘꠥ ꠙꠣꠇ-ꠍꠣꠚ ꠝꠣꠘꠡꠦ ꠔꠥꠟꠤꠀ ꠘꠤꠀ, ꠇꠦꠝ꠆ꠙꠞ ꠛꠣꠞꠦ ꠇꠥꠘꠥ ꠙꠣꠇ ꠎꠣꠉꠣꠔ ꠕꠁꠛ। ꠛꠘꠤ ꠁꠍꠞꠣꠁꠟꠦ ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠔꠤꠀꠞ ꠇꠞꠣꠞ ꠟꠣꠉꠤ ꠅꠃ ꠍꠣꠟꠤꠞꠦ ꠎꠔꠘꠦ ꠕꠁꠛꠣ। ꠛꠣꠖꠦ ꠘꠣꠙꠣꠇ ꠕꠣꠇꠤ ꠙꠣꠇ-ꠍꠣꠚ ꠅꠀꠞ ꠇꠣꠟꠅ ꠅꠃ ꠙꠣꠘꠤ ꠇꠣꠝꠅ ꠟꠣꠉꠣꠁꠛꠣ। 10 ꠎꠦ ꠎꠘꠦ ꠅꠃ ꠍꠣꠟꠤ ꠔꠥꠟꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠔꠦ ꠅꠁꠛ ꠀꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ। ꠁꠐꠣ ꠛꠘꠤ ꠁꠍꠞꠣꠁꠟ ꠀꠞ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠢꠇꠟ ꠎꠣꠔꠤꠞ ꠟꠣꠉꠤ ꠌꠤꠞꠇꠣꠟꠤꠘ ꠘꠤꠅꠝ।

11 “ꠇꠦꠃ ꠎꠥꠖꠤ ꠇꠥꠘꠥ ꠝꠥꠞ꠆ꠖꠣꠞ ꠟꠣꠡ ꠍꠁꠟꠣꠄ, ꠔꠦ ꠡꠣꠔ ꠖꠤꠘ ꠜꠞꠣ ꠢꠦ ꠘꠣꠙꠣꠇ ꠞꠁꠛ। 12 ꠟꠣꠡ ꠍꠅꠀꠞ ꠔꠤꠘ ꠘꠝ꠆ꠛꠞ ꠀꠞ ꠡꠣꠔ ꠘꠝ꠆ꠛꠞ ꠖꠤꠘ, ꠙꠣꠇ-ꠍꠣꠚ ꠅꠀꠞ ꠙꠛꠤꠔ꠆ꠞ ꠙꠣꠘꠤ ꠖꠤꠀ ꠘꠤꠎꠞꠦ ꠗꠁꠀ ꠢꠣꠞꠟꠦ ꠢꠦ ꠙꠣꠇ-ꠍꠣꠚ ꠅꠁꠛ। ꠀꠞ ꠁ ꠘꠤꠅꠝ ꠘꠣ ꠝꠣꠘꠟꠦ ꠢꠦ ꠘꠣꠙꠣꠇꠃ ꠞꠁꠛ। 13 ꠟꠣꠡ ꠍꠅꠀꠞ ꠛꠣꠖꠦ ꠇꠦꠃ ꠎꠥꠖꠤ ꠙꠣꠇ-ꠍꠣꠚ ꠘꠣ ꠅꠄ, ꠔꠦ ꠢꠦ ꠝꠣꠛꠥꠖꠞ ꠊꠞꠞꠦ ꠘꠣꠙꠣꠇ ꠛꠣꠘꠣꠄ। ꠅꠃ ꠎꠘꠞꠦ ꠛꠘꠤ ꠁꠍꠞꠣꠁꠟꠞ ꠡꠝꠣꠎ ꠕꠣꠇꠤ ꠚꠥꠍꠤꠟꠤꠛꠣꠄ। ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠔꠣꠞ ꠡꠞꠤꠟꠅ ꠘꠣ ꠍꠤꠐꠣꠘꠤꠄ, ꠔꠣꠞ ꠘꠣꠙꠣꠇꠤ ꠔꠣꠞ ꠟꠉꠦ ꠞꠁꠛ।

14 “ꠀꠞ ꠔꠣꠝ꠆ꠛꠥꠞ ꠜꠤꠔꠞꠦ ꠇꠥꠘꠥ ꠝꠣꠘꠥꠡ ꠝꠞꠤꠉꠦꠟꠦ, ꠎꠦꠞꠣ ꠅꠃ ꠔꠣꠝ꠆ꠛꠥꠔ ꠢꠣꠝꠣꠁꠛꠣ ꠀꠞ ꠎꠦꠞꠣ ꠔꠣꠝ꠆ꠛꠥꠔ ꠀꠍꠟꠣ, ꠔꠣꠞꠣ ꠢꠇꠟꠃ ꠡꠣꠔ ꠖꠤꠘ ꠜꠞꠣ ꠘꠣꠙꠣꠇ ꠞꠁꠛꠣ। 15 ꠅꠃ ꠛꠡꠔ ꠔꠣꠝ꠆ꠛꠥꠞ ꠜꠤꠔꠞꠞ ꠎꠦꠔꠣ ꠕꠣꠟ-ꠛꠣꠡꠘ ꠢꠞꠣ ꠖꠤꠀ ꠉꠥꠞꠣ ꠀꠍꠤꠟ ꠘꠣ, ꠅꠔꠣꠅ ꠘꠣꠙꠣꠇ ꠅꠁꠎꠤꠛ।

16 “ꠛꠘ꠆ꠖꠞ ꠝꠣꠎꠦ ꠈꠥꠟꠣ ꠎꠣꠉꠣꠔ ꠚꠣꠟꠣꠁꠟ ꠇꠥꠘꠥ ꠟꠣꠡꠞꠦ ꠎꠥꠖꠤ ꠇꠦꠃ ꠍꠁꠟꠣꠄ, ꠔꠦ ꠢꠦ ꠡꠣꠔ ꠖꠤꠘ ꠜꠞꠣ ꠘꠣꠙꠣꠇ ꠞꠁꠛ। ꠁ ꠟꠣꠡ ꠇꠥꠘꠥ ꠟꠣꠠꠣꠁꠞ ꠇꠣꠞꠘꠦ ꠅꠃꠇ, ꠛꠣ ꠄꠝꠘꠦ ꠝꠞꠣ ꠅꠃꠇ, ꠎꠦꠞꠣ ꠍꠁꠛ ꠄꠞꠣ ꠘꠣꠙꠣꠇ। ꠇꠥꠘꠥ ꠝꠞꠣ ꠝꠣꠘꠡꠞ ꠀꠒ꠆ꠒꠤ ꠛꠣ ꠇꠄꠛꠞꠞꠦ ꠍꠁꠟꠦ, ꠢꠦ-ꠅ ꠡꠣꠔ ꠖꠤꠘ ꠜꠞꠣ ꠘꠣꠙꠣꠇ ꠞꠁꠛ।

17 “ꠅꠟꠣ ꠘꠣꠙꠣꠇ ꠝꠣꠘꠡꠞꠦ ꠙꠣꠇ-ꠍꠣꠚ ꠇꠞꠣꠞ ꠘꠤꠅꠔꠦ ꠎꠦ ꠟꠣꠟ ꠒꠦꠇꠤꠞ ꠉꠥꠡ꠆ꠔ ꠎꠣꠟꠣꠘꠤ ꠅꠁꠍꠦ, ꠅꠉꠥꠞ ꠇꠤꠍꠥ ꠍꠣꠟꠤ ꠄꠇꠐꠣ ꠉꠣꠝꠟꠣꠔ ꠟꠁꠀ, ꠅꠃ ꠉꠣꠝꠟꠣꠔ ꠚꠥꠔꠞ ꠙꠣꠘꠤ ꠜꠞꠔꠦ ꠅꠁꠛ। 18 ꠛꠣꠖꠦ ꠇꠥꠘꠥ ꠙꠣꠇ-ꠍꠣꠚ ꠝꠣꠘꠡꠦ ꠄꠍꠥꠛ ꠉꠣꠍꠞ ꠇꠄꠐꠣ ꠒꠦꠐꠣ ꠀꠘꠤꠀ ꠙꠣꠘꠤꠔ ꠛꠥꠠꠣꠁꠀ ꠢꠃ ꠝꠥꠞ꠆ꠖꠣꠞ ꠔꠣꠝ꠆ꠛꠥ, ꠄꠞ ꠜꠤꠔꠞꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠀꠞ ꠝꠣꠘꠡꠞ ꠃꠙꠞꠦ ꠍꠤꠐꠣꠁ ꠖꠤꠛꠣ। ꠎꠔ ꠎꠘꠦ ꠄꠝꠘꠦ ꠝꠞꠣ, ꠛꠣ ꠈꠥꠘ ꠅꠁꠀ ꠝꠞꠣ ꠇꠥꠘꠥ ꠝꠥꠞ꠆ꠖꠣꠞ ꠟꠣꠡ, ꠝꠞꠣꠞ ꠀꠒ꠆ꠒꠤ-ꠉꠥꠒ꠆ꠒꠤ ꠛꠣ ꠇꠄꠛꠞ ꠍꠁꠍꠦ, ꠔꠣꠞꠣꠞ ꠃꠙꠞꠦꠅ ꠅꠃ ꠙꠣꠘꠤ ꠍꠤꠐꠣꠁ ꠖꠤꠛꠣ। 19 ꠙꠣꠇ-ꠍꠣꠚ ꠅꠃ ꠎꠘꠦ ꠘꠣꠙꠣꠇ ꠝꠣꠘꠡꠞ ꠃꠙꠞꠦ ꠢꠣꠙ꠆ꠔꠣꠞ ꠔꠤꠘ ꠘꠝ꠆ꠛꠞ ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠙꠣꠘꠤ ꠍꠤꠐꠣꠁ ꠖꠤꠛꠣ, ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠔꠣꠞꠣ ꠙꠣꠇ-ꠍꠣꠚ ꠅꠁꠛꠣ। ꠔꠣꠞꠣ ꠉꠥꠍꠟ ꠇꠞꠤꠀ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠗꠁꠛꠣ, ꠀꠞ ꠅꠃ ꠡꠣꠔ ꠘꠝ꠆ꠛꠞ ꠖꠤꠘꠞ ꠢꠣꠁꠘ꠆ꠎꠣ ꠕꠣꠇꠤ ꠙꠣꠇ-ꠍꠣꠚ ꠛꠘꠛꠣ। 20 ꠅꠁꠟꠦ ꠘꠣꠙꠣꠇ ꠅꠀꠞ ꠛꠣꠖꠦ ꠇꠦꠃ ꠎꠥꠖꠤ ꠘꠤꠎꠞꠦ ꠙꠣꠇ-ꠍꠣꠚ ꠘꠣ ꠇꠞꠦ, ꠔꠦ ꠔꠣꠞꠦ ꠡꠝꠣꠎ ꠕꠣꠇꠤ ꠚꠥꠍꠤꠀ ꠚꠣꠟꠣꠁꠛꠣꠄ। ꠢꠦ ꠘꠤꠎꠞꠦ ꠘꠣꠙꠣꠇ ꠞꠣꠈꠤꠀ ꠝꠣꠛꠥꠖꠞ ꠢꠦꠞꠦꠝ ꠡꠞꠤꠚꠞꠦꠅ ꠘꠣꠙꠣꠇ ꠛꠣꠘꠣꠁꠍꠦ। ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠔꠣꠞ ꠃꠙꠞꠦ ꠘꠣ ꠍꠤꠐꠣꠘꠤꠄ, ꠢꠦ ꠘꠣꠙꠣꠇ ꠞꠁꠍꠦ। 21 ꠁꠔꠣ ꠅꠁꠛ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠄꠇꠐꠣ ꠌꠤꠞꠇꠣꠟꠤꠘ ꠘꠤꠅꠝ।

“ꠎꠦ ꠎꠘꠦ ꠅꠃ ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠍꠤꠐꠣꠁꠛꠣ, ꠄꠁꠘ ꠘꠤꠎꠦꠅ ꠔꠣꠘ ꠇꠣꠙꠠ-ꠌꠥꠙꠠ ꠗꠁꠔꠦ ꠅꠁꠛ। ꠁ ꠙꠣꠇ-ꠍꠣꠚ ꠅꠀꠞ ꠙꠣꠘꠤ ꠇꠥꠘꠥ ꠝꠣꠘꠡꠦ ꠍꠁꠟꠦ, ꠢꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ। 22 ꠘꠣꠙꠣꠇ ꠢꠣꠟꠔꠦ ꠁ ꠎꠘꠦ ꠎꠔꠔꠣ ꠍꠁꠛ, ꠁꠔꠣ ꠢꠇꠟꠔꠣ ꠘꠣꠙꠣꠇ ꠅꠁꠎꠤꠛ, ꠔꠣꠞ ꠍꠅꠀ ꠇꠥꠘꠥ ꠎꠤꠘꠤꠡ ꠎꠦꠉꠤꠄ ꠍꠁꠛ, ꠢꠦ-ꠅ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠞꠁꠛ।”