21
ꠅꠞꠣꠖꠞ ꠛꠣꠖꠡꠣꠞ ꠟꠉꠦ ꠟꠣꠠꠣꠁ
1 ꠀꠞ ꠇꠦꠘꠣꠘꠤ ꠎꠣꠔꠤꠞ ꠅꠞꠣꠖ ꠖꠦꠡꠞ ꠛꠣꠖꠡꠣ ꠘꠦꠉꠦꠜ ꠝꠞꠥꠜꠥꠝꠤꠔ ꠛꠡꠔ ꠇꠞꠂꠘ, ꠄꠁꠘ ꠈꠛꠞ ꠙꠣꠁꠟꠣ, ꠛꠘꠤ ꠁꠍꠞꠣꠁꠟ ꠎꠣꠔꠤ ꠅꠕꠣꠞꠤꠝꠞ ꠙꠕꠦꠖꠤ ꠀꠐꠤꠀ ꠀꠁꠞꠣ, ꠅꠈꠣꠘ ꠢꠥꠘꠤꠀ ꠛꠣꠖꠡꠣꠄ ꠔꠣꠞꠣꠞ ꠃꠙꠞꠦ ꠢꠣꠝꠟꠣ ꠇꠞꠤꠀ ꠇꠄꠎꠘꠞꠦ ꠗꠞꠤꠀ ꠘꠤꠟꠣꠉꠤ। 2 ꠔꠦꠃ ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠖꠞꠛꠣꠞꠅ ꠝꠣꠘ꠆ꠘꠔ ꠝꠣꠘꠤꠀ ꠇꠁꠟ, “ꠅ ꠝꠣꠛꠥꠖ, ꠔꠥꠝꠤ ꠎꠥꠖꠤ ꠅꠞꠣꠖꠞ ꠅꠃ ꠛꠣꠡꠤꠘ꠆ꠖꠣ ꠅꠇꠟꠞꠦ ꠀꠝꠞꠣꠞ ꠀꠔꠅ ꠡꠙꠤꠀ ꠖꠦꠅ, ꠔꠦ ꠀꠝꠞꠣ ꠔꠣꠞꠣꠞ ꠉꠣꠃ-ꠉꠦꠞꠣꠝ ꠀꠞ ꠐꠣꠃꠘ ꠅꠇꠟ ꠄꠇ꠆ꠇꠦꠛꠣꠞꠦ ꠛꠤꠘꠣꠡ ꠇꠞꠤꠟꠤꠝꠥ।” 3 ꠝꠣꠛꠥꠖꠦ ꠔꠣꠞꠣꠞ ꠝꠤꠘꠔꠤ ꠇꠛꠥꠟ ꠇꠞꠟꠣ, ꠀꠞ ꠅꠘꠞ ꠇꠦꠘꠣꠘꠤ ꠅꠇꠟꠞꠦ ꠔꠣꠞꠣꠞ ꠀꠔꠅ ꠡꠙꠤ ꠖꠤꠟꠣ। ꠔꠣꠞꠣ ꠄꠞꠣ ꠢꠇ꠆ꠇꠟꠞꠦ ꠀꠞ ꠄꠞꠣꠞ ꠐꠣꠃꠘ ꠅꠇꠟꠞꠦ ꠄꠇ꠆ꠇꠦꠛꠣꠞꠦ ꠛꠤꠘꠣꠡ ꠇꠞꠤꠟ꠆ꠟ। ꠄꠞꠟꠣꠉꠤ ꠅꠃ ꠎꠣꠉꠣꠞ ꠘꠣꠝ ꠅꠁꠟ ꠢꠞ꠆ꠝꠣ, ꠝꠣꠘꠤ ꠛꠤꠘꠣꠡ।
ꠔꠣꠝꠣꠞ ꠢꠣꠚ ꠛꠣꠘꠣꠘꠤꠞ ꠊꠐꠘꠣ
4 ꠄꠞꠛꠣꠖꠦ ꠛꠘꠤ ꠁꠍꠞꠣꠁꠟꠦ ꠁꠖꠥꠝ ꠖꠦꠡꠞ ꠉꠣꠟꠣꠛꠣꠄ ꠊꠥꠞꠤꠀ ꠎꠣꠅꠀꠞ ꠟꠣꠉꠤ ꠢꠥꠞ ꠙꠣꠠꠞ ꠉꠦꠍ ꠕꠣꠇꠤ ꠘꠤꠟ ꠖꠞꠤꠀꠞ ꠙꠣꠞꠦꠖꠤ ꠞꠅꠀꠘꠣ ꠖꠤꠟꠣ। ꠅꠁꠟꠦ ꠙꠕꠞ ꠝꠣꠎꠦ ꠔꠣꠞꠣ ꠅꠗꠂꠞ꠆ꠎ ꠅꠁꠀ, 5 ꠝꠥꠍꠣ ꠘꠛꠤ ꠀꠞ ꠀꠟ꠆ꠟꠣ ꠙꠣꠇꠞ ꠛꠤꠞꠥꠖ꠆ꠖꠦ ꠝꠣꠔꠣ-ꠝꠣꠔꠤ ꠟꠣꠉꠣꠁꠟꠣ, ꠔꠣꠞꠣ ꠇꠁꠟꠣ, “ꠀꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠇꠦꠘꠦ ꠛꠣꠞ ꠇꠞꠤ ꠀꠘꠟꠣꠄ, ꠅꠃ ꠝꠞꠥꠜꠥꠝꠤꠔ ꠀꠘꠤꠀ ꠝꠣꠞꠣꠞ ꠟꠣꠉꠤ ꠘꠤ? ꠁꠘꠅ ꠔ ꠈꠣꠘꠤꠅ ꠘꠣꠁ, ꠙꠣꠘꠤꠅ ꠘꠣꠁ। ꠀꠞ ꠅꠟꠣ ꠛꠣꠎꠦ ꠈꠣꠘꠤ ꠀꠝꠞꠣ ꠖꠥꠁ ꠌꠃꠈꠦ ꠖꠦꠈꠔꠣꠝ ꠙꠣꠞꠤ ꠘꠣ।”
6 ꠅꠃ ꠡꠝꠄ ꠝꠣꠛꠥꠖꠦ ꠔꠣꠞꠣꠞ ꠝꠣꠎꠦ ꠛꠃꠔ ꠛꠤꠡꠣꠇ꠆ꠔ ꠢꠣꠚ ꠙꠣꠑꠣꠁꠟꠣ। ꠢꠣꠚꠞ ꠇꠣꠝꠠꠦ ꠔꠣꠞꠣꠞ ꠛꠃꠔ ꠎꠘ ꠝꠣꠞꠣ ꠉꠦꠟꠣ। 7 ꠔꠦꠃ ꠝꠣꠘꠡꠦ ꠉꠤꠀ ꠝꠥꠍꠣꠞꠦ ꠇꠁꠟꠣ, “ꠀꠝꠞꠣ ꠔ ꠀꠙꠘꠣꠞ ꠀꠞ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠝꠣꠔꠤꠀ ꠉꠥꠘꠣ ꠇꠞꠤꠟꠤꠍꠤ। ꠔꠦ ꠀꠙꠘꠦ ꠅꠈꠘ ꠝꠣꠛꠥꠖꠞ ꠖꠞꠛꠣꠞꠅ ꠝꠤꠘꠔꠤ ꠇꠞꠃꠇ꠆ꠇꠣ, ꠎꠣꠔꠦ ꠅꠃ ꠢꠣꠚ ꠉꠥꠁꠘ ꠀꠝꠞꠣꠞ ꠉꠦꠍ ꠕꠣꠇꠤ ꠢꠞꠣꠁꠀ ꠘꠦꠁꠘꠉꠤ।” ꠔꠦꠃ ꠝꠥꠍꠣꠄ ꠔꠣꠞꠣꠞ ꠟꠣꠉꠤ ꠝꠤꠘꠔꠤ ꠇꠞꠟꠣ।
8 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠄꠇꠐꠣ ꠢꠣꠚ ꠛꠣꠘꠣꠁꠀ ꠃꠌꠣ ꠄꠇ ꠈꠥꠐꠤꠞ ꠃꠙꠞꠦ ꠕꠅ। ꠎꠦ ꠝꠣꠘꠡꠞꠦ ꠢꠣꠚꠦ ꠇꠣꠝꠠꠣꠁꠛ, ꠢꠦ ꠔꠥꠝꠣꠞ ꠅꠃ ꠢꠣꠚꠞ ꠛꠣꠄ ꠌꠣꠁꠟꠦ ꠜꠣꠟꠣ ꠅꠁꠎꠤꠛ।” 9 ꠔꠦꠃ ꠝꠥꠍꠣꠄ ꠈꠣꠐꠤ ꠔꠣꠝꠣꠖꠤ ꠄꠇ ꠢꠣꠚ ꠛꠣꠘꠣꠁꠀ ꠈꠥꠐꠤꠞ ꠃꠙꠞꠦ ꠕꠁꠟꠣ। ꠇꠥꠘꠥ ꠎꠘꠞꠦ ꠢꠣꠚꠦ ꠇꠣꠝꠠꠣꠁꠟꠦ ꠢꠦ ꠅꠃ ꠔꠣꠝꠣꠞ ꠢꠣꠚꠞ ꠛꠣꠄ ꠌꠣꠁꠔ, ꠀꠞ ꠛꠣꠌꠤꠎꠤꠔ।
ꠝꠥꠀꠛ ꠖꠦꠡꠅ ꠎꠣꠅꠀ
10 ꠛꠣꠖꠦ ꠛꠘꠤ ꠁꠍꠞꠣꠁꠟꠦ ꠞꠅꠀꠘꠣ ꠖꠤꠟꠣ, ꠀꠞ ꠅꠛꠥꠔ ꠘꠣꠝꠞ ꠎꠣꠉꠣꠔ ꠉꠤꠀ ꠔꠣꠝ꠆ꠛꠥ ꠉꠣꠠꠤꠟꠣ। 11 ꠀꠞ ꠅꠛꠥꠔ ꠕꠣꠇꠤ ꠞꠅꠀꠘꠣ ꠅꠁꠀ ꠝꠥꠀꠛ ꠖꠦꠡꠞ ꠙꠥꠛꠞ ꠡꠤꠝꠣꠘꠣꠔ, ꠝꠞꠥꠜꠥꠝꠤꠞ ꠁꠀ-ꠀꠛꠣꠞꠤꠝꠅ ꠀꠁꠀ ꠔꠣꠝ꠆ꠛꠥ ꠐꠣꠘꠣꠁꠟꠣ। 12 ꠅꠈꠣꠘ ꠕꠣꠇꠤ ꠞꠅꠀꠘꠣ ꠅꠁꠀ ꠎꠦꠞꠦꠖ ꠘꠣꠝꠞ ꠢꠥꠇꠘꠣ ꠈꠣꠟꠞ ꠙꠣꠞꠅ ꠉꠤꠀ ꠔꠣꠝ꠆ꠛꠥ ꠉꠣꠠꠤꠟꠣ। 13 ꠎꠦꠞꠦꠖ ꠕꠣꠇꠤ ꠞꠅꠀꠘꠣ ꠖꠤꠀ ꠅꠞꠘꠘ ꠢꠥꠇꠘꠣ ꠈꠣꠟꠞ ꠢꠙꠣꠞꠅ ꠉꠤꠀ ꠔꠣꠝ꠆ꠛꠥ ꠐꠣꠘꠣꠁꠟꠣ। ꠀꠝꠥꠞꠤ ꠅꠇꠟꠞ ꠖꠦꠡꠅ ꠕꠣꠇꠤ ꠎꠦ ꠝꠞꠥꠜꠥꠝꠤ ꠡꠥꠞꠥ ꠅꠁꠍꠦ, ꠁ ꠈꠣꠟ ꠀꠍꠤꠟ ꠅꠃ ꠝꠞꠥꠜꠥꠝꠤꠔ। ꠈꠣꠟꠞ ꠄꠇ ꠙꠣꠞꠅ ꠝꠥꠀꠛ ꠖꠦꠡ, ꠅꠁꠘ꠆ꠘ ꠙꠣꠞꠅ ꠀꠝꠥꠞꠤ ꠅꠇꠟꠞ ꠖꠦꠡ। 14 ꠝꠣꠛꠥꠖꠞ ꠎꠤꠢꠣꠖ ꠘꠣꠝꠞ ꠇꠤꠔꠣꠛꠅ ꠔ ꠀꠍꠦ,
“ꠡꠥꠚꠣ ꠄꠟꠣꠇꠣꠞ ꠛꠣꠢꠦꠛ ꠀꠞ ꠅꠞꠘꠘ ꠢꠥꠇꠘꠣ ꠈꠣꠟ,
15 ꠀꠃꠞ ꠐꠣꠃꠘꠞ ꠝꠥꠈꠣ ꠎꠣꠅꠞꠣ ꠃꠌꠣ-ꠘꠤꠌꠣ ꠘꠣꠟ,
ꠁꠔꠣ ꠔ ꠝꠥꠀꠛ ꠖꠦꠡꠞ ꠄꠇ ꠡꠤꠝꠣꠘꠣ।”
16 ꠅꠈꠣꠘ ꠕꠘꠦ ꠞꠅꠀꠘꠣ ꠅꠁꠀ ꠔꠣꠞꠣ ꠛꠦꠞ ꠘꠣꠝꠞ ꠄꠇ ꠇꠥꠀꠞ ꠉꠦꠍꠦ ꠀꠁꠟꠣ। ꠅꠘꠅ ꠀꠁꠀ ꠢꠣꠞꠟꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠢꠇꠟ ꠝꠣꠘꠡꠞꠦ ꠄꠇꠈꠣꠘꠅ ꠖꠟꠣ ꠇꠞꠅ, ꠀꠝꠤ ꠔꠣꠞꠣꠞꠦ ꠙꠣꠘꠤ ꠖꠤꠝꠥ।” 17 ꠁꠈꠣꠘ ꠢꠥꠘꠤꠀ ꠛꠘꠤ ꠁꠍꠞꠣꠁꠟꠦ ꠅꠃ ꠉꠎꠟ ꠉꠣꠁꠟ,
“ꠅ ꠇꠥꠀ, ꠔꠥꠝꠣꠞ ꠙꠣꠘꠤ ꠃꠕꠟꠤꠀ ꠙꠠꠃꠇ।
ꠔꠥꠝꠞꠣ ꠇꠥꠀꠞ ꠈꠣꠔꠤꠞꠦ ꠉꠎꠟ ꠉꠣꠅ।
18 ꠁꠇꠐꠣ ꠔ ꠢꠃ ꠡꠞ꠆ꠖꠣꠞ ꠅꠇꠟꠞ ꠇꠥꠀ,
ꠞꠣꠎꠣ ꠅꠇꠟꠦ ꠔꠣꠞꠣꠞ ꠟꠣꠑꠤꠞ ꠛꠟꠦ ꠈꠥꠖꠤꠍꠂꠘ,
ꠈꠣꠘ꠆ꠖꠣꠘꠤ ꠉꠟ꠆ꠟꠣꠞ ꠎꠥꠞꠦ ꠇꠞꠍꠂꠘ।”
ꠛꠣꠖꠦ ꠔꠣꠞꠣ ꠝꠞꠥꠜꠥꠝꠤ ꠕꠣꠇꠤ ꠝꠔ꠆ꠔꠣꠘꠣ ꠘꠣꠝꠞ ꠎꠣꠉꠣꠔ ꠉꠦꠟꠣ। 19 ꠝꠔ꠆ꠔꠣꠘꠣ ꠕꠣꠇꠤ ꠘꠢꠟꠤꠄꠟ, ꠘꠢꠟꠤꠄꠟ ꠕꠣꠇꠤ ꠛꠣꠝꠥꠔ, 20 ꠛꠣꠝꠥꠔ ꠕꠣꠇꠤ ꠝꠥꠀꠛꠞ ꠙꠣꠠꠤꠀ ꠄꠇ ꠈꠣꠟꠞ ꠙꠣꠞꠅ ꠉꠦꠟꠣ। ꠅꠃ ꠈꠣꠟꠞ ꠇꠣꠘ꠆ꠖꠣꠞ ꠙꠤꠍꠉꠣ ꠙꠣꠠꠞ ꠃꠌꠣ ꠐꠤꠟ꠆ꠟꠣ ꠕꠣꠇꠤ ꠝꠞꠥꠜꠥꠝꠤ ꠖꠦꠈꠣ ꠎꠣꠄ।
ꠛꠣꠖꠡꠣ ꠍꠤꠢꠥꠘ ꠀꠞ ꠃꠎꠞ ꠛꠤꠘꠣꠡ
21 ꠛꠘꠤ ꠁꠍꠞꠣꠁꠟꠦ ꠀꠝꠥꠞꠤ ꠅꠇꠟꠞ ꠛꠣꠖꠡꠣ ꠍꠤꠢꠥꠘꠞ ꠉꠦꠍꠦ ꠝꠣꠘꠥꠡ ꠙꠣꠑꠣꠁꠀ ꠝꠤꠘꠔ ꠇꠞꠟꠣ, 22 “ꠀꠝꠞꠣ ꠀꠙꠘꠣꠞ ꠖꠦꠡꠞ ꠜꠤꠔꠞꠦꠖꠤ ꠙꠣꠞ ꠅꠁ ꠎꠣꠁꠔꠣꠝ ꠌꠣꠁꠞꠣꠝ, ꠀꠝꠞꠣꠞꠦ ꠎꠣꠁꠛꠣꠞ ꠖꠤꠛꠣ ꠘꠤ? ꠀꠝꠞꠣ ꠔ ꠞꠣꠎ ꠙꠕ ꠍꠣꠠꠤꠀ ꠈꠦꠔ-ꠇꠤꠡꠤ ꠛꠣꠄ ꠛꠣ ꠀꠋꠉꠥꠞ ꠛꠣꠉꠣꠘꠦꠖꠤ ꠎꠣꠁꠔꠣꠝ ꠘꠣꠄ, ꠇꠥꠘꠥ ꠇꠥꠀꠞ ꠙꠣꠘꠤꠅ ꠈꠣꠁꠔꠣꠝ ꠘꠣꠄ। ꠀꠙꠘꠣꠞ ꠖꠦꠡꠞ ꠡꠤꠝꠣꠘꠣ ꠙꠣꠞꠘꠤꠞ ꠀꠉ ꠙꠞ꠆ꠎꠘ꠆ꠔ ꠢꠣꠝꠦꠡꠣ ꠞꠣꠎ ꠙꠕꠦꠖꠤ ꠀꠐꠣꠔ ꠞꠁꠝꠥ।”
23 ꠅꠁꠟꠦ ꠛꠣꠖꠡꠣ ꠍꠤꠢꠥꠘꠦ ꠔꠣꠘ ꠖꠦꠡꠞ ꠜꠤꠔꠞꠦꠖꠤ ꠔꠣꠞꠣꠞꠦ ꠎꠣꠁꠔꠦ ꠖꠤꠟꠣ ꠘꠣ। ꠔꠣꠁꠘ ꠔꠣꠘ ꠍꠤꠙꠣꠁ ꠖꠟ ꠟꠁꠀ ꠝꠞꠥꠜꠥꠝꠤꠞ ꠝꠣꠎꠦ ꠛꠘꠤ ꠁꠍꠞꠣꠁꠟꠞ ꠟꠉꠦ ꠎꠥꠖ꠆ꠖꠔ ꠛꠣꠞ ꠅꠁꠟꠣ। ꠔꠣꠁꠘ ꠁꠀꠢꠣꠎ ꠐꠣꠃꠘꠅ ꠀꠁꠀ ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠟꠣꠉꠣꠁꠟꠣ। 24 ꠎꠥꠖ꠆ꠖꠔ ꠛꠘꠤ ꠁꠍꠞꠣꠁꠟꠦ ꠢꠃ ꠛꠣꠖꠡꠣꠞꠦ ꠔꠟꠥꠀꠞꠖꠤ ꠇꠣꠐꠤꠀ ꠅꠞꠘꠘ ꠈꠣꠟ ꠕꠣꠇꠤ ꠎꠣꠛ꠆ꠛꠥꠇ ꠈꠣꠟ ꠙꠞ꠆ꠎꠘ꠆ꠔ ꠔꠣꠞ ꠀꠡ꠆ꠔꠣ ꠖꠦꠡ ꠖꠈꠟ ꠇꠞꠤꠟꠤꠟꠣ। ꠔꠣꠞꠣ ꠛꠘꠤ-ꠀꠝ꠆ꠝꠣꠘꠞ ꠡꠤꠝꠣꠘꠣ ꠙꠞ꠆ꠎꠘ꠆ꠔ ꠢꠇꠟ ꠎꠣꠉꠣ ꠖꠈꠟ ꠇꠞꠟꠣ, ꠅꠁꠟꠦ ꠛꠘꠤ-ꠀꠝ꠆ꠝꠣꠘꠞ ꠡꠤꠝꠣꠘꠣ ꠀꠍꠤꠟ ꠈꠥꠛ ꠝꠎꠛꠥꠔ, ꠁꠈꠣꠘꠞꠦ ꠒꠤꠋꠉꠣꠁꠀ ꠎꠣꠅꠀ ꠇꠑꠤꠘ। 25 ꠛꠘꠤ ꠁꠍꠞꠣꠁꠟꠦ ꠢꠤꠡꠛꠘ ꠀꠞ ꠄꠞ ꠀꠡ-ꠙꠣꠡꠞ ꠉꠣꠃ-ꠉꠦꠞꠣꠝ ꠡꠥꠖ꠆ꠖꠣ ꠀꠝꠥꠞꠤ ꠅꠇꠟꠞ ꠢꠇꠟ ꠐꠣꠃꠘ ꠖꠈꠟ ꠇꠞꠤꠀ ꠢꠘꠅ ꠛꠡꠔꠤ ꠉꠣꠠꠤꠟꠣ। 26 ꠢꠤꠡꠛꠘ ꠀꠍꠤꠟ ꠔ ꠀꠝꠥꠞꠤ ꠛꠣꠖꠡꠣ ꠍꠤꠢꠥꠘꠞ ꠞꠣꠎꠗꠣꠘꠤ। ꠔꠣꠁꠘ ꠝꠥꠀꠛ ꠖꠦꠡꠞ ꠀꠉꠞ ꠛꠣꠖꠡꠣꠞ ꠟꠉꠦ ꠎꠥꠖ꠆ꠖ ꠇꠞꠤꠀ ꠅꠞꠘꠘ ꠈꠣꠟ ꠙꠞ꠆ꠎꠘ꠆ꠔ ꠀꠡ꠆ꠔꠣ ꠖꠦꠡ ꠖꠈꠟ ꠇꠞꠍꠤꠟꠣ।
27 ꠄꠞꠟꠣꠉꠤ ꠇꠛꠤ ꠅꠇꠟꠦ ꠇꠂꠘ,
“ꠀꠅ ꠔꠥꠝꠞꠣ ꠢꠇꠟ, ꠢꠤꠡꠛꠘ ꠐꠣꠃꠘꠅ ꠀꠅ,
ꠞꠣꠎꠣ ꠍꠤꠢꠥꠘꠞ ꠐꠣꠃꠘꠞꠦ ꠘꠄꠀ ꠇꠞꠤ ꠛꠣꠘꠣꠅ।
28 ꠍꠤꠢꠥꠘꠞ ꠅꠃ ꠐꠣꠃꠘ ꠕꠣꠇꠤ ꠀꠉꠥꠁꠘ ꠛꠣꠞ ꠅꠁꠀ,
ꠝꠥꠀꠛꠞ ꠀꠃꠞ ꠐꠣꠃꠘꠞꠦ ꠍꠣꠞꠈꠣꠞ ꠇꠞꠟ ꠎꠣꠟꠣꠁꠀ,
ꠅꠞꠘꠘ ꠈꠣꠟꠞ ꠃꠌꠣ ꠎꠣꠉꠣ ꠛꠤꠘꠣꠡ ꠅꠁꠉꠦꠟ,
ꠢꠘꠞ ꠢꠇꠟ ꠑꠣꠇꠥꠞꠞꠦ ꠎꠣꠟꠣꠁꠀ ꠝꠣꠔꠤꠟ꠆ꠟ।
29 ꠢꠣꠄꠞꠦ ꠝꠥꠀꠛ, ꠡꠞ꠆ꠛꠘꠣꠡ!
ꠅ ꠇꠝꠥꠡ-ꠖꠦꠛꠔꠣꠞ ꠜꠇ꠆ꠔ ꠅꠇꠟ
ꠔꠥꠝꠞꠣ ꠔ ꠛꠤꠘꠣꠡ ꠅꠁꠉꠦꠟꠣꠄ।
ꠇꠝꠥꠡꠞ ꠙꠥꠀꠂꠘ ꠜꠣꠉꠤꠀ ꠢꠞꠤꠉꠦꠍꠦ,
ꠔꠣꠞ ꠙꠥꠠꠤꠘ ꠅꠇꠟ ꠛꠘ꠆ꠖꠤ ꠅꠁꠍꠦ,
ꠀꠝꠥꠞꠤ ꠛꠣꠖꠡꠣ ꠍꠤꠢꠥꠘꠞ ꠀꠔꠅ ꠛꠘ꠆ꠖꠤ ꠔꠣꠞꠣ।
30 ꠀꠝꠞꠣꠃ ꠔ ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠇꠞꠍꠤ,
ꠖꠤꠛꠣꠘ ꠙꠞ꠆ꠎꠘ꠆ꠔ ꠀꠡ꠆ꠔꠣ ꠢꠤꠡꠛꠘ ꠛꠤꠘꠣꠡ ꠇꠞꠍꠤ,
ꠔꠣꠞꠣꠞ ꠛꠣꠔ꠆ꠔꠤ ꠀꠝꠞꠣ ꠘꠤꠜꠣꠁꠟꠤꠍꠤ,
ꠘꠥꠚꠣ ꠀꠞ ꠝꠤꠖꠦꠛꠣ ꠙꠞ꠆ꠎꠘ꠆ꠔ ꠗꠋꠡ-ꠟꠤꠟꠣ ꠌꠣꠟꠣꠁꠍꠤ।”
31 ꠄꠞꠛꠣꠖ ꠕꠣꠇꠤ ꠛꠘꠤ ꠁꠍꠞꠣꠁꠟꠦ ꠀꠝꠥꠞꠤ ꠅꠇꠟꠞ ꠖꠦꠡꠅ ꠛꠡꠔ ꠇꠞꠣꠔ ꠞꠁꠟꠣ।
32 ꠢꠎꠞꠔ ꠝꠥꠍꠣꠄ ꠎꠣꠎꠤꠞꠣ ꠐꠣꠃꠘꠅ ꠉꠥꠁꠀ ꠙꠣꠑꠣꠘꠤꠞ ꠛꠣꠖꠦ ꠛꠘꠤ ꠁꠍꠞꠣꠁꠟꠦ ꠅꠃ ꠐꠣꠃꠘꠞ ꠀꠡ-ꠙꠣꠡꠞ ꠉꠣꠃ-ꠉꠦꠞꠣꠝ ꠢꠇꠟꠔꠣ ꠖꠈꠟ ꠇꠞꠟꠣ, ꠀꠞ ꠢꠘꠞ ꠛꠣꠡꠤꠘ꠆ꠖꠣ ꠀꠝꠥꠞꠤ ꠅꠇꠟꠞꠦ ꠈꠦꠖꠣꠁ ꠖꠤꠟꠣ। 33 ꠛꠣꠖꠦ ꠔꠣꠞꠣ ꠚꠤꠞꠤꠀ ꠛꠣꠡꠘ ꠖꠦꠡꠞ ꠛꠣꠄ ꠞꠅꠀꠘꠣ ꠅꠁꠟꠣ। ꠔꠦꠃ ꠛꠣꠡꠘꠞ ꠛꠣꠖꠡꠣ ꠃꠎꠦ ꠔꠣꠞ ꠢꠇꠟ ꠍꠤꠙꠣꠁ ꠟꠁꠀ ꠔꠣꠞꠣꠞ ꠟꠉꠦ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠁꠖꠞꠤ ꠐꠣꠃꠘꠅ ꠀꠁꠀ ꠀꠎꠤꠟ।
34 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠛꠣꠖꠡꠣ ꠃꠎꠞꠦ ꠒꠞꠣꠁꠅ ꠘꠣ, ꠀꠝꠤ ꠔꠣꠞꠦ, ꠔꠣꠞ ꠀꠡ꠆ꠔꠣ ꠖꠦꠡꠞꠦ ꠀꠞ ꠢꠇꠟ ꠍꠤꠙꠣꠁꠞꠦ ꠔꠥꠝꠣꠞ ꠀꠔꠅ ꠔꠥꠟꠤ ꠖꠤꠍꠤ। ꠄꠞꠟꠣꠉꠤ ꠢꠤꠡꠛꠘꠞ ꠀꠝꠥꠞꠤ ꠅꠇꠟꠞ ꠛꠣꠖꠡꠣ ꠍꠤꠢꠥꠘꠞꠦ ꠔꠥꠝꠤ ꠎꠦ ꠖꠡꠣ ꠊꠐꠣꠁꠍꠟꠣꠄ, ꠅꠉꠥꠞꠦꠅ ꠅꠟꠣ ꠇꠞꠤꠅ।”
35 ꠔꠦꠃ ꠔꠣꠞꠣ ꠛꠣꠖꠡꠣ ꠃꠎ, ꠔꠣꠞ ꠙꠥꠀꠂꠘ ꠀꠞ ꠢꠇꠟ ꠝꠣꠘꠡꠞꠦ ꠛꠤꠘꠣꠡ ꠇꠞꠟꠣ। ꠢꠦꠡ-ꠝꠦꠡ ꠔꠣꠞꠣ ꠇꠦꠃ ꠀꠞ ꠎꠤꠘ꠆ꠖꠣ ꠞꠁꠟ ꠘꠣ। ꠛꠘꠤ ꠁꠍꠞꠣꠁꠟꠦ ꠅꠃ ꠙꠥꠞꠣ ꠖꠦꠡ ꠖꠈꠟ ꠇꠞꠟꠣ।