1 ꠄꠞꠛꠣꠖꠦ ꠛꠘꠤ ꠁꠍꠞꠣꠁꠟ ꠉꠤꠀ ꠎꠤꠞꠤꠢꠅ ꠐꠣꠃꠘꠞ ꠃꠟꠐꠣꠛꠣꠄ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ ꠔꠣꠝ꠆ꠛꠥ ꠐꠣꠋꠉꠣꠁꠟꠣ।

2 ꠛꠘꠤ ꠁꠍꠞꠣꠁꠟꠦ ꠀꠝꠥꠞꠤ ꠅꠇꠟꠞ ꠎꠦ ꠢꠣꠟꠔ ꠇꠞꠍꠤꠟ, ꠝꠥꠀꠛ ꠖꠦꠡꠞ ꠛꠣꠖꠡꠣ ꠛꠣꠟꠣꠇ ꠛꠤꠘ ꠡꠤꠙꠣꠞꠦ ꠁꠔꠣ ꠢꠇꠟꠔꠣ ꠖꠦꠈꠍꠂꠘ। 3 ꠛꠘꠤ ꠁꠍꠞꠣꠁꠟꠞ ꠅꠔ ꠝꠣꠘꠥꠡ ꠖꠦꠈꠤꠀ ꠝꠥꠀꠛꠤ ꠅꠇꠟ ꠒꠞꠣꠁꠉꠦꠟꠣ। ꠀꠍꠟꠦꠃ ꠔꠣꠞꠣ ꠈꠥꠛ ꠛꠦꠡꠤ ꠊꠣꠛꠠꠤ ꠉꠦꠟꠣ। 4 ꠔꠣꠞꠣ ꠝꠣꠖꠤꠀꠘ ꠖꠦꠡꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞꠦ ꠇꠁꠟꠣ, “ꠉꠞꠥꠄ ꠎꠦꠟꠣ ꠛꠘ꠆ꠖꠞ ꠈꠦꠍꠝꠣ ꠊꠣꠡꠞꠦ ꠟꠦꠁꠀ-ꠚꠥꠍꠤ ꠈꠣꠁꠟꠣꠄ, ꠅꠃ ꠖꠟꠦꠅ ꠅꠃꠟꠣ ꠀꠝꠞꠣꠞ ꠌꠣꠁꠞꠅ ꠉꠣꠟꠣꠞ ꠢꠇꠟꠔꠣ ꠟꠦꠁꠀ-ꠚꠥꠍꠤ ꠈꠣꠁꠟꠤꠛ।” ꠅꠃ ꠡꠝꠄ ꠝꠥꠀꠛ ꠖꠦꠡꠞ ꠛꠣꠖꠡꠣ ꠀꠍꠟꠣ ꠛꠣꠟꠣꠇ ꠛꠤꠘ ꠡꠤꠙꠣꠞ। 5 ꠛꠣꠖꠡꠣꠄ ꠒꠞꠣꠁꠀ ꠛꠣꠟꠣꠝ ꠛꠤꠘ ꠛꠣꠃꠞ ꠘꠣꠝꠞ ꠙꠤꠞ ꠍꠣꠛꠞꠦ ꠀꠘꠣꠞ ꠟꠣꠉꠤ ꠈꠛꠞꠤꠀ ꠙꠣꠑꠣꠁꠟꠣ। ꠛꠣꠟꠣꠝ ꠔ ꠅꠃ ꠡꠝꠄ ꠔꠣꠘ ꠘꠤꠎꠞ ꠖꠦꠡꠞ ꠚꠥꠞꠣꠔ ꠉꠣꠋꠉꠞ ꠙꠣꠞꠅ ꠚꠔꠥꠞ ꠐꠣꠃꠘꠅ ꠀꠍꠟꠣ। ꠛꠣꠟꠣꠇꠦ ꠈꠛꠞꠤꠀꠞꠦ ꠇꠁꠀ ꠖꠤꠟꠣ, “ꠔꠥꠝꠞꠣ ꠉꠤꠀ ꠔꠣꠘꠞꠦ ꠇꠁꠅ, ꠝꠤꠡꠞ ꠖꠦꠡ ꠕꠣꠇꠤ ꠄꠇꠖꠟ ꠝꠣꠘꠥꠡ ꠛꠣꠞ ꠅꠁꠀ ꠀꠁꠍꠦ। ꠀꠁꠀ ꠀꠡ꠆ꠔꠣ ꠎꠝꠤꠘ ꠜꠞꠤꠀ ꠈꠣꠟꠤ ꠉꠤꠍꠉꠤꠍ ꠇꠞꠞꠣ, ꠔꠣꠞꠣ ꠅꠈꠘ ꠀꠝꠣꠞ ꠍꠣꠝꠘꠦ ꠛꠡꠔ ꠇꠞꠞꠣ। 6 ꠁꠔꠣ ꠔ ꠀꠝꠞꠣ ꠕꠣꠇꠤ ꠛꠦꠡꠤ ꠛꠟꠛꠣꠘ। ꠄꠞꠟꠣꠉꠤ ꠀꠙꠘꠦ ꠀꠃꠇ꠆ꠇꠣ, ꠀꠁꠀ ꠅꠔꠣꠞꠦ ꠟꠣꠘ꠆ꠘꠔ ꠖꠦꠃꠇ꠆ꠇꠣ। ꠔꠦꠃ ꠀꠝꠤ ꠢꠄꠔ ꠔꠣꠞꠣꠞꠦ ꠝꠣꠞꠤꠀ ꠖꠦꠡ ꠕꠣꠇꠤ ꠈꠦꠖꠣꠁꠔꠣꠝ ꠙꠣꠞꠝꠥ। ꠀꠞ ꠀꠝꠤ ꠔ ꠎꠣꠘꠤ, ꠀꠙꠘꠦ ꠎꠣꠞꠦ ꠖꠥꠀ ꠖꠦꠁꠘ ꠢꠦ ꠑꠤꠇꠃ ꠖꠥꠀ ꠙꠣꠄ, ꠀꠞ ꠎꠣꠞꠦ ꠟꠣꠘ꠆ꠘꠔ ꠖꠦꠁꠘ ꠔꠣꠞ ꠃꠙꠞꠦ ꠢꠣꠍꠣꠃ ꠟꠣꠘ꠆ꠘꠔ ꠙꠠꠦ।”

7 ꠔꠦꠃ ꠝꠥꠀꠛ ꠀꠞ ꠝꠣꠖꠤꠀꠘꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠦ ꠁꠡ꠆ꠔꠦꠈꠣꠞꠣ-ꠀꠎꠤꠞꠣꠔ ꠇꠞꠣꠘꠤꠞ ꠐꠦꠇꠣ ꠟꠁꠀ ꠞꠅꠀꠘꠣ ꠅꠁꠉꠦꠟꠣ। ꠛꠣꠖꠡꠣ ꠛꠣꠟꠣꠇꠦ ꠎꠦꠟꠣ ꠢꠤꠇꠣꠁ ꠖꠤꠍꠟꠣ, ꠔꠣꠞꠣ ꠉꠤꠀ ꠛꠣꠟꠣꠝꠞ ꠉꠦꠍꠦ ꠅꠟꠣ ꠇꠁꠟꠣ। 8 ꠔꠦꠃ ꠛꠣꠟꠣꠝꠦ ꠔꠣꠞꠣꠞꠦ ꠇꠁꠟꠣ, “ꠔꠦ ꠀꠙꠘꠣꠞꠣ ꠀꠁꠎ ꠞꠣꠁꠔ ꠀꠝꠣꠞ ꠅꠘꠅ ꠞꠃꠇ꠆ꠇꠣ। ꠝꠣꠛꠥꠖꠦ ꠀꠝꠣꠞꠦ ꠎꠦꠔꠣ ꠎꠣꠘꠣꠁꠛꠣ, ꠀꠝꠤ ꠅꠔꠣ ꠀꠙꠘꠣꠞꠣꠞꠦ ꠎꠣꠘꠣꠁꠝꠥ।” ꠉꠔꠤꠇꠦꠃ ꠔꠣꠞꠣ ꠔꠣꠘ ꠅꠘꠅ ꠞꠁꠟꠣ।

9 ꠝꠣꠛꠥꠖꠦ ꠛꠣꠟꠣꠝꠞ ꠉꠦꠍꠦ ꠎꠣꠁꠞ ꠅꠁꠀ ꠎꠤꠇꠣꠁꠟꠣ, “ꠔꠥꠝꠣꠞ ꠟꠉꠦ ꠄꠞꠣ ꠇꠣꠞꠣ?”

10 ꠛꠣꠟꠣꠝꠦ ꠎꠥꠀꠙ ꠖꠤꠟꠣ, “ꠝꠥꠀꠛꠞ ꠛꠣꠖꠡꠣ ꠛꠣꠟꠣꠇ ꠛꠤꠘ ꠡꠤꠙꠣꠞꠦ ꠀꠝꠣꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠍꠂꠘ, 11 ꠇꠁꠍꠂꠘ, ꠝꠤꠡꠞ ꠖꠦꠡ ꠕꠣꠇꠤ ꠄꠇꠖꠟ ꠝꠣꠘꠥꠡ ꠀꠁꠀ ꠀꠡ꠆ꠔꠣ ꠖꠦꠡꠅ ꠉꠤꠍꠉꠤꠍ ꠇꠞꠞꠣ। ꠅꠈꠘ ꠀꠙꠘꠦ ꠀꠁꠀ ꠔꠣꠞꠣꠞꠦ ꠟꠣꠘ꠆ꠘꠔ ꠖꠦꠃꠇ꠆ꠇꠣ। ꠔꠦꠃ ꠀꠝꠤ ꠎꠥꠖ꠆ꠖ ꠇꠞꠤꠀ ꠔꠣꠞꠣꠞꠦ ꠛꠥꠟꠦ ꠈꠦꠖꠣꠁꠔꠣꠝ ꠙꠣꠞꠝꠥ।”

12 ꠅꠁꠟꠦ ꠝꠣꠛꠥꠖꠦ ꠛꠣꠟꠣꠝꠞꠦ ꠇꠁꠟꠣ, “ꠔꠥꠝꠤ ꠄꠞꠣꠞ ꠟꠉꠦ ꠎꠣꠁꠅ ꠘꠣ, ꠀꠞ ꠢꠤꠔꠣ ꠝꠣꠘꠡꠞꠦ ꠇꠥꠘꠥ ꠟꠣꠘ꠆ꠘꠔꠅ ꠖꠤꠅ ꠘꠣ। ꠝꠘꠅ ꠞꠣꠈꠤꠅ, ꠔꠣꠞꠣ ꠀꠝꠣꠞ ꠞꠢꠝ-ꠛꠞꠇꠔ ꠙꠣꠅꠀ ꠛꠘ꠆ꠖꠣ।”

13 ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠟꠣꠝ ꠊꠥꠝ ꠕꠣꠇꠤ ꠃꠑꠤꠀ ꠛꠣꠟꠣꠇꠞ ꠈꠛꠞꠤꠀ ꠅꠇꠟꠞꠦ ꠇꠁꠟꠣ, “ꠀꠙꠘꠣꠞꠣ ꠎꠣꠞꠎꠤꠞ ꠖꠦꠡꠅ ꠚꠤꠞꠔ ꠎꠣꠃꠇ꠆ꠇꠣꠉꠤ। ꠀꠞ ꠝꠣꠛꠥꠖꠦ ꠀꠝꠣꠞꠦ ꠝꠣꠘꠣ ꠇꠞꠍꠂꠘ, ꠀꠙꠘꠣꠞꠣꠞ ꠟꠉꠦ ꠘꠣ ꠎꠣꠅꠀꠞ ꠟꠣꠉꠤ।” 14 ꠔꠦꠃ ꠝꠥꠀꠛꠤ ꠘꠦꠔꠣ ꠅꠇꠟꠦ ꠚꠤꠞꠤꠀ ꠉꠤꠀ ꠛꠣꠖꠡꠣ ꠛꠣꠟꠣꠇꠞꠦ ꠇꠁꠟꠣ, “ꠛꠣꠟꠣꠝ ꠔ ꠀꠝꠞꠣꠞ ꠟꠉꠦ ꠀꠁꠔꠦ ꠞꠣꠎꠤ ꠅꠁꠍꠂꠘ ꠘꠣ।”

15 ꠅꠈꠣꠘ ꠢꠥꠘꠤꠀ ꠛꠣꠟꠣꠇꠦ ꠄꠞꠣꠞ ꠌꠣꠁꠔꠦ ꠀꠞꠅ ꠛꠦꠡꠤ, ꠀꠞꠅ ꠁꠎ꠆ꠎꠔꠤ ꠘꠦꠔꠣ ꠅꠇꠟꠞꠦ ꠙꠣꠑꠣꠁꠟꠣ। 16 ꠔꠣꠞꠣ ꠉꠤꠀ ꠛꠣꠟꠣꠝꠞꠦ ꠇꠁꠟꠣ, “ꠛꠣꠖꠡꠣ ꠛꠣꠟꠣꠇ ꠛꠤꠘ ꠡꠤꠙꠣꠞꠦ ꠇꠁꠍꠂꠘ, ꠀꠙꠘꠦ ꠔꠣꠘ ꠉꠦꠍꠦ ꠎꠣꠁꠔꠦ ꠇꠥꠘꠥꠎꠣꠔꠞ ꠇꠥꠘꠥ ꠛꠣꠗꠣ ꠝꠣꠘꠔꠣ ꠘꠣ। 17 ꠔꠣꠁꠘ ꠀꠙꠘꠣꠞꠦ ꠛꠃꠔ ꠁꠎ꠆ꠎꠔ-ꠛꠈꠡꠤꠡ ꠖꠤꠛꠣ, ꠀꠞ ꠀꠙꠘꠦ ꠎꠦꠟꠣ ꠇꠁꠛꠣ, ꠔꠣꠁꠘ ꠅꠟꠣꠃ ꠇꠞꠛꠣ। ꠈꠣꠟꠤ ꠀꠙꠘꠦ ꠎꠣꠘꠥ ꠔꠣꠘ ꠙꠇ꠆ꠇ ꠟꠁꠀ ꠅꠔꠣ ꠝꠣꠘꠡꠞꠦ ꠟꠣꠘ꠆ꠘꠔ ꠖꠦꠁꠘ, ꠔꠣꠁꠘ ꠅꠈꠣꠘꠃ ꠌꠣꠁꠞꠣ।”

18 ꠛꠣꠟꠣꠝꠦ ꠎꠥꠀꠙ ꠖꠤꠟꠣ, “ꠛꠣꠖꠡꠣ ꠛꠣꠟꠣꠇꠦ ꠎꠥꠖꠤ ꠔꠣꠘ ꠡꠥꠘꠣ-ꠞꠥꠙꠣꠄ ꠜꠞꠣ ꠞꠣꠎꠛꠣꠠꠤ ꠈꠣꠘꠅ ꠀꠝꠣꠞꠦ ꠖꠤꠟꠣꠁꠘ, ꠔꠣ-ꠅ ꠀꠝꠣꠞ ꠝꠣꠛꠥꠖꠞ ꠢꠥꠇꠥꠝꠞ ꠃꠟꠐꠣ ꠉꠤꠀ ꠀꠝꠤ ꠄꠇꠈꠣꠘ ꠇꠣꠝꠅ ꠇꠞꠔꠣꠝ ꠘꠣꠄ, ꠁꠔꠣ ꠢꠥꠞꠥ ꠇꠣꠝ ꠅꠃꠇ ꠛꠣ ꠛꠠ ꠇꠣꠝ ꠅꠃꠇ। 19 ꠅꠁꠟꠦ ꠀꠙꠘꠣꠞꠣꠅ ꠀꠉꠞ ꠄꠞꠣꠞ ꠟꠣꠈꠣꠘ ꠀꠁꠎꠇꠥꠞ ꠞꠣꠁꠔ ꠈꠣꠘ ꠅꠘꠅ ꠇꠣꠐꠣꠁ ꠟꠣꠃꠇ꠆ꠇꠣ। ꠀꠝꠤ ꠖꠦꠈꠤ, ꠝꠣꠛꠥꠖꠦ ꠀꠝꠣꠞꠦ ꠘꠄꠀ ꠇꠥꠘ꠆ꠔꠣ ꠇꠂꠘ ꠘꠤ।”

20 ꠢꠃ ꠞꠣꠁꠔ ꠀꠟ꠆ꠟꠣꠄ ꠎꠣꠁꠞ ꠅꠁꠀ ꠛꠣꠟꠣꠝꠞꠦ ꠇꠁꠟꠣ, “ꠄꠞꠣ ꠎꠦꠛꠟꠣ ꠔꠥꠝꠣꠞꠦ ꠘꠦꠅꠀꠔ ꠀꠁꠍꠦ, ꠔꠦ ꠔꠥꠝꠤ ꠔꠣꠞꠣꠞ ꠟꠉꠦ ꠎꠣꠅ। ꠉꠦꠟꠦ ꠀꠝꠤ ꠔꠥꠝꠣꠞꠦ ꠎꠦꠟꠣ ꠇꠁꠝꠥ, ꠔꠥꠝꠤ ꠈꠣꠟꠤ ꠅꠟꠣꠃ ꠇꠞꠤꠅ।”

21 ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠟꠣꠝ ꠙꠤꠞ ꠊꠥꠝ ꠕꠣꠇꠤ ꠃꠑꠤꠀ ꠔꠣꠘ ꠉꠣꠗꠤꠞ ꠃꠙꠞꠦ ꠉꠖꠤ ꠛꠤꠍꠣꠁꠀ ꠝꠥꠀꠛꠤ ꠘꠦꠔꠣ ꠅꠇꠟꠞ ꠟꠉꠦ ꠞꠅꠀꠘꠣ ꠅꠁꠟꠣ। 22 ꠔꠣꠘ ꠎꠣꠅꠀ ꠖꠦꠈꠤꠀ ꠀꠟ꠆ꠟꠣ ꠙꠣꠇ ꠔꠣꠘ ꠃꠙꠞꠦ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠔꠣꠘꠞꠦ ꠛꠣꠗꠣ ꠖꠤꠛꠣꠞ ꠈꠤꠀꠟꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠄ ꠙꠕ ꠀꠃꠉꠟꠤꠀ ꠃꠛꠣꠁ ꠞꠁꠟꠣ। ꠛꠣꠟꠣꠝ ꠔ ꠉꠣꠗꠤꠞ ꠃꠙꠞꠦ ꠌꠠꠤꠀ ꠎꠣꠁꠞꠣ, ꠔꠣꠘ ꠖꠥꠁꠎꠘ ꠌꠣꠇꠞ ꠔꠣꠘ ꠟꠉꠦ ꠀꠍꠤꠟ। 23 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠔꠟꠥꠀꠞ ꠀꠔꠅ ꠟꠁꠀ, ꠙꠕꠞ ꠝꠣꠎꠦ ꠃꠛꠣꠁ ꠞꠁꠍꠂꠘ ꠖꠦꠈꠤꠀ, ꠉꠣꠗꠤꠐꠣ ꠙꠕ ꠍꠣꠠꠤꠀ ꠎꠝꠤꠘꠦꠖꠤ ꠟꠣꠝꠤ ꠉꠦꠟ। ꠉꠣꠗꠤꠞꠦ ꠢꠤꠞꠛꠣꠞ ꠙꠕꠅ ꠔꠥꠟꠣꠞ ꠟꠣꠉꠤ ꠛꠣꠟꠣꠝꠦ ꠔꠣꠁꠞꠦ ꠝꠣꠁꠞ-ꠗꠁꠞ ꠇꠞꠟꠣ। 24 ꠛꠣꠖꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣ ꠎꠝꠤꠘꠞ ꠀꠋꠉꠥꠞ ꠛꠣꠉꠣꠘꠞ ꠖꠥꠁ ꠈꠦꠔꠞ ꠝꠣꠎꠞ ꠀꠁꠟꠞ ꠃꠙꠞꠦ ꠃꠛꠣꠁ ꠞꠁꠟꠣ। ꠀꠁꠟꠞ ꠖꠥꠁꠅ ꠉꠣꠟꠣꠛꠣꠄ ꠙꠣꠇꠣ ꠅꠀꠟ ꠖꠦꠅꠀ ꠀꠍꠤꠟ। 25 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠞꠦ ꠖꠦꠈꠤꠀ ꠉꠣꠗꠤꠄ ꠅꠀꠟꠞ ꠉꠣꠟꠣꠛꠣꠄ ꠊꠦꠡꠤꠀ ꠉꠦꠟ। ꠄꠞꠖꠣꠄ ꠛꠣꠟꠣꠝꠞ ꠄꠇ ꠙꠣꠅ-ꠅ ꠈꠥꠛ ꠊꠡꠣ ꠟꠣꠉꠟ। ꠔꠦꠃ ꠔꠣꠁꠘ ꠢꠤꠞꠛꠣꠞ ꠉꠣꠗꠤꠞꠦ ꠝꠣꠞꠟꠣ। 26 ꠄꠞꠛꠣꠖꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣ ꠀꠉꠥꠀꠁꠀ ꠉꠤꠀ ꠙꠕꠞ ꠝꠣꠎꠞ ꠅꠟꠣ ꠄꠇ ꠌꠤꠙꠣ ꠎꠣꠉꠣꠔ ꠃꠛꠣꠁꠟꠣ, ꠎꠦꠘꠅ ꠒꠣꠁꠘꠦ-ꠛꠣꠃꠄ ꠇꠥꠘꠥꠛꠣꠄ ꠢꠞꠣꠞ ꠃꠙꠣꠄ ꠘꠣꠁ। 27 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠞꠦ ꠖꠦꠈꠤꠀ ꠉꠣꠗꠤꠄ ꠛꠣꠟꠣꠝꠞꠦ ꠟꠁꠀ ꠝꠣꠐꠤꠔ ꠢꠥꠔꠤ ꠉꠦꠟ। ꠔꠦꠃ ꠛꠣꠟꠣꠝ ꠀꠞꠅ ꠉꠞꠝ ꠅꠁꠀ ꠟꠣꠑꠤ ꠖꠤꠀ ꠉꠣꠗꠤꠞꠦ ꠝꠣꠞꠟꠣ। 28 ꠅꠃ ꠡꠝꠄ ꠝꠣꠛꠥꠖꠦ ꠉꠣꠗꠤꠞ ꠝꠥꠈꠞ ꠎꠛꠣꠘ ꠈꠥꠟꠤ ꠖꠤꠟꠣ। ꠔꠣꠁ ꠛꠣꠟꠣꠝꠞꠦ ꠇꠁꠟ, “ꠀꠝꠤ ꠀꠙꠘꠣꠞꠦ ꠇꠤꠔꠣ ꠇꠞꠍꠤ, ꠀꠙꠘꠦ ꠔꠤꠘ-ꠔꠤꠘꠛꠣꠞ ꠀꠝꠣꠞꠦ ꠝꠣꠞꠟꠣ?” 29 ꠛꠣꠟꠣꠝꠦ ꠉꠣꠗꠤꠞꠦ ꠇꠁꠟꠣ, “ꠔꠥꠁ ꠀꠝꠣꠞꠦ ꠀꠃꠀ ꠛꠣꠘꠣꠁꠀ ꠈꠦꠁꠠ ꠈꠦꠟꠣꠁꠞꠦ ꠘꠤ? ꠢꠥꠘ, ꠀꠝꠣꠞ ꠀꠔꠅ ꠎꠥꠖꠤ ꠄꠇꠈꠣꠘ ꠔꠟꠥꠀꠞ ꠕꠣꠇꠔ, ꠔꠦ ꠔꠞꠦ ꠍꠦꠖ ꠝꠣꠞꠤ ꠅꠈꠘꠃ ꠇꠣꠐꠤꠟ꠆ꠟꠣꠝ ꠅꠘꠦ।”

30 ꠉꠣꠗꠤꠄ ꠛꠣꠟꠣꠝꠞꠦ ꠇꠁꠟ, “ꠀꠝꠤ ꠀꠙꠘꠣꠞ ꠢꠃ ꠉꠣꠗꠤ ꠘꠣꠄ ꠘꠤ, ꠎꠦꠉꠥꠞ ꠃꠙꠞꠦ ꠀꠙꠘꠦ ꠢꠣꠞꠣ ꠎꠘꠝ ꠗꠞꠤ ꠌꠠꠤꠀ ꠀꠁꠞꠣ, ꠀꠞ ꠀꠙꠘꠣꠞ ꠟꠉꠦ ꠀꠝꠤ ꠇꠥꠘꠥꠖꠤꠘ ꠁꠟꠣ ꠇꠞꠍꠤ ꠘꠤ?”

ꠛꠣꠟꠣꠝꠦ ꠇꠁꠟꠣ, “ꠘꠣ, ꠁꠟꠣ ꠇꠞꠍꠔ ꠘꠣ।”

31 ꠄꠞꠛꠣꠖꠦ ꠝꠣꠛꠥꠖꠦ ꠛꠣꠟꠣꠝꠞ ꠌꠃꠈ ꠈꠥꠟꠤꠀ ꠖꠤꠟꠣ, ꠔꠣꠁꠘ ꠖꠦꠈꠟꠣ, ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠔꠟꠥꠀꠞ ꠟꠁꠀ ꠙꠕ ꠛꠘ꠆ꠖ ꠇꠞꠤ ꠃꠛꠣꠁ ꠞꠁꠍꠂꠘ। ꠖꠦꠈꠤꠀ ꠔꠣꠁꠘ ꠝꠣꠕꠣ ꠘꠥꠀꠁꠀ ꠘꠣꠇ-ꠇꠙꠣꠟ ꠝꠣꠐꠤꠔ ꠟꠣꠉꠣꠁꠟꠣ।

32 ꠔꠦꠃ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠎꠤꠇꠣꠁꠟꠣ, “ꠔꠥꠝꠣꠞ ꠉꠣꠗꠤꠞꠦ ꠇꠦꠘꠦ ꠔꠤꠘ-ꠔꠤꠘꠛꠣꠞ ꠝꠣꠞꠟꠣꠄ? ꠔꠥꠝꠤ ꠀꠝꠣꠞ ꠍꠣꠝꠘꠦ ꠀꠝꠣꠞ ꠛꠤꠞꠥꠖ꠆ꠖꠦ ꠇꠣꠝ ꠇꠞꠣꠔ ꠎꠣꠁꠞꠣꠄꠉꠤ ꠖꠦꠈꠤꠀ, ꠀꠝꠤ ꠔꠥꠝꠣꠞꠦ ꠀꠐꠇꠣꠁꠛꠣꠞ ꠟꠣꠉꠤ ꠅꠘꠅ ꠀꠁꠍꠤ। 33 ꠔꠥꠝꠣꠞ ꠉꠣꠗꠤꠄ ꠀꠝꠣꠞꠦ ꠖꠦꠈꠤꠀ ꠔꠤꠘ-ꠔꠤꠘꠛꠣꠞ ꠢꠞꠤꠀ ꠉꠦꠍꠦꠉꠤ। ꠔꠣꠁ ꠎꠥꠖꠤ ꠘꠣ ꠢꠞꠔ, ꠔꠦ ꠀꠝꠤ ꠔꠥꠝꠣꠞꠦ ꠝꠣꠞꠤꠟ꠆ꠟꠣꠝ ꠅꠘꠦ, ꠀꠞ ꠔꠣꠁꠞꠦ ꠛꠣꠌꠣꠁ ꠞꠣꠈꠟꠣꠝ ꠅꠘꠦ।”

34 ꠅꠃ ꠡꠝꠄ ꠛꠣꠟꠣꠝꠦ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠞꠦ ꠇꠁꠟꠣ, “ꠀꠝꠤ ꠔ ꠉꠥꠘꠣ ꠇꠞꠍꠤ। ꠀꠍꠟꠦ ꠀꠝꠤ ꠛꠥꠎꠍꠤ ꠘꠣ, ꠀꠙꠘꠦ ꠀꠝꠣꠞꠦ ꠀꠐꠇꠣꠁꠛꠣꠞ ꠟꠣꠉꠤ ꠙꠕꠅ ꠃꠛꠣꠔ ꠀꠍꠂꠘ। ꠔꠦ ꠀꠙꠘꠦ ꠘꠣꠞꠣꠎ ꠅꠁꠟꠦ ꠀꠝꠤ ꠚꠤꠞꠤꠀ ꠎꠣꠁꠝꠥꠉꠤ।”

35 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠛꠣꠟꠣꠝꠞꠦ ꠇꠁꠟꠣ, “ꠑꠤꠇ ꠀꠍꠦ, ꠔꠥꠝꠤ ꠅꠔꠣ ꠝꠣꠘꠡꠞ ꠟꠉꠦ ꠎꠣꠅ। ꠅꠁꠟꠦ ꠀꠝꠤ ꠔꠥꠝꠣꠞꠦ ꠎꠦꠟꠣ ꠢꠤꠇꠣꠁ ꠖꠤꠝꠥ, ꠔꠥꠝꠤ ꠈꠣꠟꠤ ꠅꠟꠣꠃ ꠇꠁꠛꠣꠄ।” ꠔꠦꠃ ꠛꠣꠖꠡꠣ ꠛꠣꠟꠣꠇꠞ ꠙꠣꠑꠣꠁꠟ ꠘꠦꠔꠣ ꠅꠇꠟꠞ ꠟꠉꠦ ꠛꠣꠟꠣꠝ ꠙꠤꠞ ꠌꠟꠣꠔ ꠞꠁꠟꠣ।

36 ꠛꠣꠟꠣꠝ ꠙꠤꠞꠞ ꠀꠅꠀꠞ ꠈꠛꠞ ꠢꠥꠘꠤꠀ, ꠔꠣꠘꠞꠦ ꠀꠉꠥꠀꠁꠀ ꠀꠘꠣꠞ ꠟꠣꠉꠤ ꠛꠣꠖꠡꠣ ꠛꠣꠟꠣꠇ ꠅꠞꠘꠘ ꠈꠣꠟꠞ ꠙꠣꠞꠅ ꠝꠥꠀꠛ ꠖꠦꠡꠞ ꠄꠇ ꠐꠣꠃꠘꠅ ꠉꠦꠟꠣ। ꠁ ꠐꠣꠃꠘ ꠀꠍꠤꠟ ꠔꠣꠘ ꠖꠦꠡꠞ ꠢꠦꠡ ꠡꠤꠝꠣꠘꠣꠔ। 37 ꠛꠣꠖꠡꠣ ꠛꠣꠟꠣꠇꠦ ꠛꠣꠟꠣꠝ ꠙꠤꠞꠞꠦ ꠇꠁꠟꠣ, “ꠀꠝꠤ ꠔ ꠀꠙꠘꠣꠞꠦ ꠎꠞꠥꠞꠤ ꠔꠟꠛ ꠇꠞꠟꠣꠝ। ꠔꠦ ꠀꠙꠘꠦ ꠇꠦꠘꠦ ꠙꠄꠟꠣ ꠛꠣꠞ ꠀꠁꠟꠣ ꠘꠣ? ꠀꠙꠘꠣꠞꠦ ꠎꠁꠉ꠆ꠉ ꠛꠈꠡꠤꠡ ꠖꠤꠛꠣꠞ ꠈꠦꠝꠔꠣ ꠇꠥꠘꠥ ꠀꠝꠣꠞ ꠘꠣꠁ ꠘꠤ?”

38 ꠛꠣꠟꠣꠝꠦ ꠎꠥꠀꠙ ꠖꠤꠟꠣ, “ꠀꠝꠤ ꠅꠈꠘ ꠀꠙꠘꠣꠞ ꠉꠦꠍꠦ ꠀꠁꠍꠤ। ꠅꠁꠟꠦ ꠀꠝꠣꠞ ꠘꠤꠎꠞ ꠇꠥꠘꠥ ꠝꠣꠔ ꠝꠣꠔꠣꠞ ꠡꠣꠁꠖ꠆ꠖ ꠘꠣꠁ। ꠈꠣꠟꠤ ꠀꠟ꠆ꠟꠣꠄ ꠀꠝꠣꠞꠦꠖꠤ ꠎꠦꠔꠣ ꠇꠅꠀꠁꠛꠣ, ꠀꠝꠤ ꠈꠣꠟꠤ ꠅꠈꠣꠘꠃ ꠇꠁꠝꠥ।”

39 ꠄꠞꠛꠣꠖꠦ ꠛꠣꠟꠣꠇ ꠛꠣꠖꠡꠣꠞ ꠟꠉꠦ ꠅꠁꠀ ꠛꠣꠟꠣꠝ ꠙꠤꠞ ꠇꠤꠞꠤꠅꠔ-ꠢꠥꠍꠥꠔ ꠉꠣꠃꠔ ꠉꠦꠟꠣ। 40 ꠉꠤꠀ ꠛꠣꠖꠡꠣ ꠛꠣꠟꠣꠇꠦ ꠉꠞꠥ ꠀꠞ ꠝꠦꠠꠣ ꠇꠥꠞꠛꠣꠘꠤ ꠖꠤꠀ ꠇꠤꠍꠥ ꠉꠥꠡ꠆ꠔ ꠛꠣꠟꠣꠝ ꠙꠤꠞꠞꠦ ꠀꠞ ꠔꠣꠘ ꠟꠉꠞ ꠢꠃ ꠘꠦꠔꠣ ꠅꠇꠟꠞꠦ ꠖꠤꠟꠣ। 41 ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠖꠡꠣ ꠛꠣꠟꠣꠇꠦ ꠅꠃ ꠛꠣꠟꠣꠝꠞꠦ ꠟꠁꠀ ꠛꠣꠝꠥꠔ-ꠛꠣꠀꠟ ꠙꠣꠠꠅ ꠉꠦꠟꠣ। ꠢꠘꠅ ꠃꠛꠣꠁꠀ ꠛꠣꠟꠣꠝꠦ ꠛꠘꠤ ꠁꠍꠞꠣꠁꠟꠞ ꠄꠇ ꠅꠋꠡꠞꠦ ꠖꠦꠈꠟꠣ।