24
1 ꠛꠣꠟꠣꠝ ꠙꠤꠞꠦ ꠎꠦꠛꠟꠣ ꠛꠥꠎꠟꠣ, ꠛꠘꠤ ꠁꠍꠞꠣꠁꠟꠞꠦ ꠖꠥꠀ ꠖꠦꠅꠀꠃ ꠅꠁꠟ ꠝꠣꠛꠥꠖꠞ ꠁꠌ꠆ꠍꠣ, ꠛꠥꠎꠤꠀ ꠔꠣꠁꠘ ꠀꠉꠞ ꠟꠣꠈꠣꠘ ꠀꠞ ꠁꠡ꠆ꠔꠦꠈꠣꠞꠣ-ꠀꠎꠤꠞꠣꠔꠞ ꠌꠦꠡ꠆ꠐꠣ ꠇꠞꠟꠣ ꠘꠣ। ꠛꠞꠋ ꠔꠣꠘ ꠘꠤꠎꠞ ꠝꠥꠈ ꠝꠞꠥꠜꠥꠝꠤꠞ ꠛꠣꠄ ꠚꠤꠞꠣꠁꠟ꠆ꠟꠣ। 2 ꠚꠤꠞꠣꠁꠀ ꠖꠦꠈꠟꠣ, ꠛꠘꠤ ꠁꠍꠞꠣꠁꠟꠞ ꠘꠣꠘꠣꠘ ꠈꠣꠘ꠆ꠖꠣꠘꠞ ꠔꠣꠝ꠆ꠛꠥ ꠄꠇ ꠄꠇ ꠇꠞꠤ ꠐꠣꠋꠉꠣꠘꠤ ꠅꠁꠍꠦ। ꠅꠃ ꠡꠝꠄ ꠔꠣꠘ ꠃꠙꠞꠦ ꠀꠟ꠆ꠟꠣꠞ ꠞꠥꠢꠥ ꠟꠣꠝꠤꠀ ꠀꠁꠟꠣ, 3 ꠔꠣꠁꠘ ꠀꠟ꠆ꠟꠣꠞ ꠖꠦꠅꠀ ꠅꠃ ꠅꠢꠤ ꠇꠁꠟꠣ,
“ꠛꠣꠃꠞꠞ ꠙꠥꠔ ꠛꠣꠟꠣꠝꠦ ꠇꠁꠞꠣ,
ꠌꠃꠈ ꠎꠣꠞ ꠈꠥꠟꠣ ꠀꠍꠦ ꠄꠁꠘ ꠅꠃ ꠛꠥꠟꠤ ꠇꠁꠞꠣ।
4 ꠎꠦ ꠎꠘꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠞꠣ,
ꠡꠞ꠆ꠛ-ꠡꠇ꠆ꠔꠤꠝꠣꠘꠞ ꠖꠤꠖꠣꠞ ꠙꠣꠁꠞꠣ,
ꠎꠦꠁꠘ ꠍꠁꠎꠖꠣꠔ ꠙꠠꠤꠀ ꠛꠣꠔꠥꠘꠤ ꠈꠛꠞ ꠖꠦꠈꠂꠘ,
ꠄꠁꠘ ꠅꠈꠣꠘ ꠇꠁꠞꠣ।
5 ꠅ ꠁꠀꠇꠥꠛ ꠛꠋꠡ, ꠔꠥꠝꠣꠞ ꠔꠣꠝ꠆ꠛꠥ ꠅꠇꠟ ꠈꠥꠛ ꠌꠇꠌꠇꠣ!
ꠅ ꠛꠘꠤ ꠁꠍꠞꠣꠁꠟ, ꠔꠥꠝꠣꠞ ꠞꠅꠀꠞ ꠎꠣꠉꠣ ꠇꠔ ꠜꠣꠟꠣ!
6 ꠁꠔꠣ ꠔ ꠖꠦꠈꠣꠞ ꠝꠔ ꠛꠠ ꠈꠦꠎꠥꠞ ꠛꠣꠉꠣꠘꠞ ꠟꠣꠈꠣꠘ,
ꠉꠣꠋꠉꠞ ꠙꠣꠞꠞ ꠢꠣꠎꠣꠁꠟ-ꠙꠣꠠꠣꠁꠟ ꠛꠘꠞ ꠟꠣꠈꠣꠘ,
ꠝꠣꠛꠥꠖꠞ ꠟꠣꠉꠣꠁꠟ ꠀꠉꠞꠞ ꠉꠣꠍꠞ ꠟꠣꠈꠣꠘ ꠔꠞꠔꠣꠎꠣ,
ꠙꠣꠘꠤꠞ ꠗꠣꠞꠞ ꠖꠦꠛꠖꠣꠞꠥ ꠉꠣꠍꠞ ꠟꠣꠈꠣꠘ ꠡꠥꠘ꠆ꠖꠞ।
7 ꠔꠣꠞꠣꠞ ꠜꠞꠣ ꠇꠟꠡꠤ ꠕꠣꠇꠤ ꠙꠣꠘꠤ ꠃꠕꠟꠤꠀ ꠙꠠꠛ,
ꠛꠤꠌꠤ ꠀꠞ ꠌꠦꠞꠣꠄ ꠛꠃꠔ ꠙꠣꠘꠤ ꠙꠣꠁꠛ।
ꠔꠣꠞꠣꠞ ꠛꠣꠖꠡꠣ ꠅꠁꠛꠣ ꠅꠉꠣꠉ ꠛꠣꠖꠡꠣ ꠕꠣꠇꠤꠅ ꠢꠤꠝ꠆ꠝꠔꠤ,
ꠔꠣꠞꠣꠞ ꠖꠦꠡ ꠅꠁꠛ ꠘꠣꠝꠇꠞꠣ ꠁꠎ꠆ꠎꠔꠤ।
8 ꠀꠟ꠆ꠟꠣꠄ ꠝꠤꠡꠞ ꠕꠣꠇꠤ ꠔꠣꠞꠣꠞꠦ ꠛꠣꠞ ꠇꠞꠤ ꠀꠘꠍꠂꠘ,
ꠔꠣꠁꠘ ꠅꠁꠟꠣ ꠔꠣꠞꠣꠞ ꠙꠇ꠆ꠇꠦ ꠛꠟꠀꠟꠣ ꠎꠋꠟꠤ ꠛꠄꠞꠣ,
ꠔꠣꠞꠣꠞ ꠟꠉꠦ ꠎꠔ ꠎꠣꠔꠤꠄ ꠟꠣꠉꠛꠣ,
ꠁꠔꠣꠞꠦ ꠔꠣꠞꠣ ꠉꠤꠟꠤꠀ ꠈꠣꠁꠟꠤꠛꠣ,
ꠔꠣꠞꠣꠞ ꠀꠒ꠆ꠒꠤ-ꠉꠥꠒ꠆ꠒꠤꠞꠦ ꠉꠥꠠꠣ ꠉꠥꠠꠣ ꠇꠞꠛꠣ,
ꠔꠤꠞ-ꠗꠘꠥꠇꠖꠤ ꠔꠣꠞꠣꠞꠦ ꠉꠣꠕꠤꠛꠣ।
9 ꠡꠤꠋꠢꠞ ꠟꠣꠈꠣꠘ ꠔꠣꠞꠣ ꠈꠣꠙ ꠗꠞꠤ ꠢꠥꠔꠤꠛ,
ꠔꠣꠞꠣꠞꠦ ꠟꠣꠠꠣꠘꠤꠞ ꠡꠣꠅꠡ ꠅꠁꠛ ꠇꠥꠘ ꠛꠦꠐꠣꠞ?
ꠔꠥꠝꠞꠣꠞꠦ ꠎꠦꠞꠣ ꠖꠥꠀ ꠖꠤꠛꠣ,
ꠄꠞꠣꠞ ꠃꠙꠞꠦ ꠖꠥꠀ ꠟꠣꠝꠃꠇ;
ꠔꠥꠝꠞꠣꠞꠦ ꠎꠦꠔꠣꠄ ꠟꠣꠘ꠆ꠘꠔ ꠖꠤꠛꠣ,
ꠁꠔꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ।”
10 ꠁꠔꠣ ꠢꠥꠘꠤꠀ ꠛꠣꠖꠡꠣ ꠛꠣꠟꠣꠇꠦ ꠛꠣꠟꠣꠝ ꠙꠤꠞꠞ ꠃꠙꠞꠦ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠔꠣꠘ ꠘꠤꠎꠞ ꠀꠔꠞ ꠙꠤꠑꠤꠔ ꠔꠣꠛꠠꠣꠁ ꠔꠣꠛꠠꠣꠁ ꠇꠤꠠꠤꠝꠤꠠꠤ ꠈꠣꠁꠀ ꠇꠁꠟꠣ, “ꠀꠝꠤ ꠀꠙꠘꠣꠞꠦ ꠀꠘꠣꠁꠟꠣꠝ ꠀꠝꠣꠞ ꠖꠥꠡꠝꠘꠞꠦ ꠟꠣꠘ꠆ꠘꠔ ꠖꠤꠛꠣꠞ ꠟꠣꠉꠤ, ꠀꠞ ꠀꠙꠘꠦ ꠔꠣꠞꠣꠞꠦ ꠅꠃ ꠟꠣꠉꠣꠁꠀ ꠔꠤꠘ-ꠔꠤꠘꠛꠣꠞ ꠖꠥꠀ ꠖꠤꠟꠣ। 11 ꠀꠙꠘꠦ ꠀꠝꠣꠞ ꠍꠣꠝꠘ ꠕꠣꠇꠤ ꠢꠞꠃꠇ꠆ꠇꠣ, ꠘꠤꠎꠞ ꠎꠣꠉꠣꠔ ꠎꠣꠃꠇ꠆ꠇꠣ। ꠀꠝꠤ ꠀꠙꠘꠣꠞꠦ ꠛꠃꠔ ꠙꠥꠞꠥꠡ꠆ꠇꠣꠞ ꠖꠤꠝꠥ ꠇꠁꠍꠟꠣꠝ, ꠅꠁꠟꠦ ꠝꠣꠛꠥꠖꠦ ꠖꠤꠟꠣ ꠘꠣ।”
12 ꠔꠦꠃ ꠛꠣꠟꠣꠝ ꠙꠤꠞꠦ ꠛꠣꠖꠡꠣ ꠛꠣꠟꠣꠇꠞꠦ ꠇꠁꠟꠣ, “ꠀꠙꠘꠣꠞ ꠙꠣꠑꠣꠁꠟ ꠝꠣꠘꠡꠞꠦ ꠀꠝꠤ ꠀꠉꠦꠃ ꠇꠁꠍꠤ ꠘꠣ ꠘꠤ, 13 ꠛꠣꠖꠡꠣꠄ ꠎꠥꠖꠤ ꠡꠥꠘꠣ-ꠞꠥꠙꠣꠄ ꠜꠞꠣ ꠔꠣꠘ ꠀꠡ꠆ꠔꠣ ꠞꠣꠎꠛꠣꠠꠤ ꠈꠣꠘꠃ ꠀꠝꠣꠞꠦ ꠖꠤꠟꠣꠁꠘ, ꠔꠦꠛꠃ ꠀꠝꠤ ꠀꠝꠣꠞ ꠘꠤꠎꠞ ꠁꠌ꠆ꠍꠣꠄ ꠜꠣꠟꠣ-ꠛꠥꠞꠣ ꠇꠥꠘ꠆ꠔꠣ ꠇꠞꠔꠣꠝ ꠙꠣꠞꠔꠣꠝ ꠘꠣꠄ, ꠀꠝꠤ ꠝꠣꠛꠥꠖꠞ ꠛꠤꠞꠥꠖ꠆ꠖꠦ ꠎꠣꠁꠔꠣꠝ ꠘꠣꠄ। ꠝꠣꠛꠥꠖꠦ ꠀꠝꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠛꠣ, ꠀꠝꠤ ꠈꠣꠟꠤ ꠅꠟꠣꠃ ꠇꠁꠝꠥ। 14 ꠔꠦ ꠀꠝꠤ ꠅꠈꠘ ꠀꠝꠣꠞ ꠝꠣꠘꠡꠞ ꠉꠦꠍꠦ ꠚꠤꠞꠔ ꠎꠣꠁꠞꠣꠝꠉꠤ, ꠅꠁꠟꠦ ꠅꠃ ꠎꠣꠔꠤꠄ ꠜꠛꠤꠡꠔꠦ ꠀꠙꠘꠣꠞ ꠎꠣꠔꠤꠞ ꠟꠉꠦ ꠇꠤꠔꠣ ꠇꠤꠔꠣ ꠇꠞꠛꠣ, ꠀꠙꠘꠣꠞ ꠢꠥꠡꠤꠀꠞꠤꠞ ꠟꠣꠉꠤ ꠁꠔꠣ ꠀꠉꠣꠝ ꠎꠣꠘꠣꠁ ꠖꠤꠀꠞ।”
ꠛꠣꠟꠣꠝ ꠙꠤꠞꠞ ꠝꠥꠈꠅ ꠀꠟ꠆ꠟꠣꠞ ꠌꠃꠔꠣ ꠅꠢꠤ
15 ꠛꠣꠟꠣꠝ ꠙꠤꠞꠦ ꠀꠟ꠆ꠟꠣꠞ ꠖꠦꠅꠀ ꠅꠃ ꠀꠞꠇ ꠅꠢꠤ ꠇꠁꠟꠣ,
“ꠛꠣꠃꠞꠞ ꠙꠥꠔ ꠛꠣꠟꠣꠝꠦ ꠇꠁꠞꠣ,
ꠌꠃꠈ ꠎꠣꠞ ꠈꠥꠟꠣ ꠀꠍꠦ ꠄꠁꠘ ꠅꠃ ꠛꠥꠟꠤ ꠇꠁꠞꠣ,
16 ꠎꠦ ꠎꠘꠦ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠞꠣ,
ꠎꠦꠁꠘ ꠉꠦꠍꠦ ꠀꠟ꠆ꠟꠣꠔꠣꠟꠣꠞ ꠀꠈꠟ-ꠢꠦꠇꠝꠔ ꠀꠍꠦ,
ꠎꠦꠁꠘ ꠡꠞ꠆ꠛ-ꠡꠇ꠆ꠔꠤꠝꠣꠘꠞ ꠖꠤꠖꠣꠞ ꠙꠣꠁꠞꠣ,
ꠎꠦꠁꠘ ꠍꠁꠎꠖꠣꠔ ꠙꠠꠤꠀ ꠛꠣꠔꠥꠘꠤ ꠈꠛꠞ ꠖꠦꠈꠂꠘ,
ꠄꠁꠘ ꠅꠈꠣꠘ ꠇꠁꠞꠣ।
17 ꠀꠝꠤ ꠔ ꠢꠃ ꠎꠘꠞꠦ ꠖꠦꠈꠤꠀꠞ,
ꠅꠈꠘ ꠍꠣꠝꠘꠦ ꠘꠣ ꠕꠣꠇꠟꠦꠅ ꠖꠦꠈꠤꠀꠞ।
ꠔꠣꠁꠘ ꠀꠝꠣꠞ ꠇꠣꠍꠣꠔ ꠘꠣ ꠅꠁꠟꠦꠅ,
ꠀꠝꠣꠞ ꠌꠃꠈ ꠉꠤꠀ ꠔꠣꠘ ꠃꠙꠞꠦ ꠙꠠꠍꠦ।
ꠁꠀꠇꠥꠛꠞ ꠛꠋꠡꠔ ꠀꠁꠛꠣ ꠀꠍꠝꠣꠘꠞ ꠄꠇ ꠔꠦꠞꠣ,
ꠛꠘꠤ ꠁꠍꠞꠣꠁꠟꠞ ꠝꠣꠎꠦꠃ ꠄꠇ ꠞꠣꠎ-ꠟꠣꠑꠤ ꠎꠘꠝꠤꠛꠣ।
ꠄꠁꠘ ꠝꠥꠀꠛ ꠎꠣꠔꠤꠞ ꠝꠣꠕꠣ ꠚꠣꠐꠣꠁꠀ ꠖꠥꠁ ꠐꠥꠇꠞꠣ ꠇꠞꠛꠣ,
ꠡꠤꠡ ꠘꠛꠤꠞ ꠀꠅꠟꠣꠖꠞ ꠇꠟ꠆ꠟꠣ ꠌꠥꠞꠝꠣꠞ ꠇꠞꠛꠣ।
18 ꠁꠖꠥꠝ ꠖꠦꠡꠞꠦ ꠄꠘꠞ ꠖꠈꠟꠅ ꠀꠘꠛꠣ,
ꠔꠣꠘ ꠖꠥꠡꠝꠘꠞ ꠅꠃ ꠍꠦꠁꠞ ꠙꠣꠠꠞꠦ ꠇꠛꠎꠣ ꠇꠞꠛꠣ,
ꠀꠞ ꠛꠘꠤ ꠁꠍꠞꠣꠁꠟ ꠎꠣꠔꠤꠄ ꠙꠄꠟꠥꠀꠘꠤ ꠇꠞꠛꠣ।
19 ꠁꠀꠇꠥꠛꠞ ꠛꠋꠡꠞ ꠄꠇꠎꠘꠦ ꠞꠣꠎ-ꠉꠖꠤ ꠌꠣꠟꠣꠁꠛꠣ,
ꠁꠞ ꠐꠣꠃꠘꠅ ꠎꠣꠞꠣ ꠎꠤꠘ꠆ꠖꠣ ꠞꠁꠛꠣ ꠄꠁꠘ ꠔꠣꠞꠣꠞꠦꠅ ꠛꠤꠘꠣꠡ ꠇꠞꠤꠟꠤꠛꠣ।”
20 ꠅꠈꠘꠣꠁꠘ ꠇꠅꠀꠞ ꠛꠣꠖꠦ ꠛꠣꠟꠣꠝ ꠙꠤꠞꠦ ꠌꠃꠈ ꠝꠦꠟꠤꠀ ꠀꠝꠣꠟꠦꠇꠤ ꠅꠇꠟꠞꠦ ꠖꠦꠈꠟꠣ। ꠖꠦꠈꠤꠀ ꠀꠟ꠆ꠟꠣꠞ ꠅꠃ ꠅꠢꠤ ꠇꠁꠟꠣ,
“ꠀꠝꠣꠟꠦꠇ ꠔ ꠢꠇꠟ ꠎꠣꠔꠤꠞ ꠝꠣꠎꠦ ꠀꠍꠤꠟ ꠙꠞꠗꠣꠘ,
ꠅꠁꠟꠦ ꠔꠣꠞꠣꠞ ꠡꠦꠡ ꠖꠡꠣ ꠅꠁꠛ ꠡꠞ꠆ꠛꠘꠣꠡ।”
21 ꠛꠣꠖꠦ ꠔꠣꠁꠘ ꠇꠦꠘꠤ ꠅꠇꠟꠞꠦ ꠖꠦꠈꠟꠣ, ꠖꠦꠈꠤꠀ ꠀꠟ꠆ꠟꠣꠞ ꠅꠃ ꠅꠢꠤ ꠇꠁꠟꠣ,
“ꠔꠥꠝꠞꠣꠞ ꠛꠡꠔ ꠈꠣꠘꠣ ꠈꠥꠛ ꠝꠎꠛꠥꠔ,
ꠔꠥꠝꠞꠣ ꠔ ꠙꠣꠔ꠆ꠔꠞꠞ ꠙꠣꠠꠅ ꠛꠣꠡꠣ ꠛꠣꠘꠣꠁꠍ,
22 ꠅꠁꠟꠦ ꠀꠉꠦꠖꠤ ꠔꠥꠝꠞꠣꠞ ꠛꠤꠘꠣꠡ ꠊꠐꠤꠛ,
ꠔꠥꠝꠞꠣꠞꠦ ꠛꠣꠘ꠆ꠖꠤꠀ ꠀꠡꠤꠞꠤꠀ ꠖꠦꠡꠅ ꠘꠦꠅꠀ ꠅꠁꠛ।”
23 ꠛꠣꠖꠦ ꠛꠣꠟꠣꠝ ꠙꠤꠞꠦ ꠀꠟ꠆ꠟꠣꠞ ꠖꠦꠅꠀ ꠅꠃ ꠡꠦꠡ ꠅꠢꠤ ꠇꠁꠟꠣ,
“ꠢꠣꠄꠞꠦ ꠢꠣꠄ! ꠀꠟ꠆ꠟꠣꠄ ꠎꠦꠛꠟꠣ ꠅꠔꠣ ꠊꠐꠣꠁꠛꠣ,
ꠅꠃ ꠡꠝꠄ ꠇꠦꠃ ꠀꠞ ꠎꠤꠘ꠆ꠖꠣ ꠞꠁꠛ ꠘꠤ?
24 ꠍꠣꠁꠙ꠆ꠞꠣꠍ ꠖꠤꠙꠞ ꠎꠣꠎ ꠅꠇꠟ ꠀꠁꠛ,
ꠀꠁꠀ ꠀꠡꠤꠞꠤꠀꠞꠦ ꠖꠥꠞ꠆ꠖꠡꠣ ꠖꠤꠛ,
ꠀꠛꠦꠞꠞ ꠝꠣꠘꠡꠞꠦꠅ ꠖꠝꠣꠁꠛ,
ꠅꠁꠟꠦ ꠅꠃ ꠖꠤꠙ ꠘꠤꠎꠦꠅ ꠛꠣꠖꠦ ꠛꠤꠘꠣꠡ ꠅꠁꠎꠤꠛ।”
25 ꠅꠈꠣꠘ ꠇꠁꠀ ꠢꠣꠞꠤ ꠛꠣꠟꠣꠝ ꠙꠤꠞ ꠃꠑꠤꠀ ꠘꠤꠎꠞ ꠊꠞꠅ ꠉꠦꠟꠣꠉꠤ, ꠛꠣꠟꠣꠇ ꠛꠣꠖꠡꠣꠅ ꠔꠣꠘ ꠙꠕꠦ ꠞꠅꠀꠘꠣ ꠖꠤꠟꠣ।