1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠀꠝꠣꠞ ꠅꠃ ꠢꠥꠇꠥꠝ ꠎꠣꠘꠣꠁ ꠖꠦꠅ, ꠀꠝꠣꠞꠦ ꠈꠥꠡꠤ ꠇꠞꠣꠞ ꠘꠤꠅꠔꠦ ꠊꠦꠞꠣꠘ ꠀꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠝꠣꠞ ꠈꠣꠘꠤꠞ ꠟꠣꠉꠤ ꠡꠑꠤꠇ ꠡꠝꠄꠄ ꠀꠎꠤꠞ ꠇꠞꠔꠦ ꠅꠁꠛ। 3 ꠔꠣꠞꠣꠞꠦ ꠄꠅꠈꠣꠘ ꠇꠅ, ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠙꠞꠔꠤꠖꠤꠘꠞ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠘꠤꠅꠔꠦ ꠅꠃ ꠙꠡꠥ ꠅꠇꠟ ꠀꠘꠤꠅ, ꠙꠞꠔꠤꠖꠤꠘ ꠄꠇ ꠛꠍꠞ ꠛꠄꠅꠡꠤ ꠖꠥꠉꠥ ꠘꠤꠈꠥꠔ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠤꠅ। 4 ꠀꠘꠤꠀ ꠄꠉꠥ ꠛꠤꠀꠘꠦ ꠀꠞ ꠄꠉꠥ ꠢꠣꠁꠘ꠆ꠎꠣ ꠛꠣꠟꠣ ꠇꠥꠞꠛꠣꠘꠤ ꠖꠤꠛꠣꠄ। 5 ꠄꠞꠟꠉꠞ ꠙꠞꠔꠤꠖꠤꠘꠞ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠖꠥꠁ ꠡꠦꠞ ꠝꠄꠖꠣ ꠀꠞ ꠄꠇ ꠡꠦꠞ ꠎꠄꠔꠥꠘꠞ ꠙꠤꠡꠣ ꠔꠦꠟ ꠀꠘꠛꠣꠄ। 6 ꠁꠐꠣ ꠅꠁꠟ ꠢꠃ ꠙꠞꠔꠤꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠎꠦꠔꠣ ꠔꠥꠞ ꠙꠣꠠꠅ ꠡꠣꠁꠛꠡ꠆ꠔ ꠇꠞꠣ ꠅꠁꠍꠤꠟ। ꠀꠞ ꠁꠔꠣ ꠔ ꠀꠝꠣꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠄꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠈꠥꠡꠤ ꠅꠁ। 7 ꠙꠞꠔꠦꠇ ꠝꠦꠠꠣꠞ ꠟꠉꠦ ꠄꠇ ꠡꠦꠞ ꠀꠋꠉꠥꠞꠞ ꠡꠞꠛꠔ ꠖꠤꠀ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠀꠖꠣꠄ ꠇꠞꠤꠅ। ꠝꠣꠛꠥꠖꠞ ꠘꠣꠝꠞ ꠇꠥꠞꠛꠣꠘꠤꠞ ꠅꠃ ꠡꠞꠛꠔ ꠄꠛꠣꠖꠔ ꠈꠣꠘꠣꠞ ꠃꠑꠣꠘꠅ ꠓꠣꠟꠤ ꠖꠤꠛꠣꠄ। 8 ꠝꠦꠠꠣꠞ ꠀꠞꠇ ꠛꠣꠁꠌ꠆ꠌꠣꠞꠦ ꠢꠣꠁꠘ꠆ꠎꠣ ꠛꠣꠟꠣ ꠇꠥꠞꠛꠣꠘꠤ ꠖꠤꠛꠣꠄ। ꠄꠞꠟꠉꠦ ꠛꠤꠀꠘꠇꠥꠞ ꠟꠣꠈꠣꠘ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠀꠖꠣꠄ ꠇꠞꠛꠣꠄ। ꠁꠔꠣ ꠅꠁꠟ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠄꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ।

9 “ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠄꠇ ꠛꠍꠞ ꠛꠄꠅꠡꠤ ꠖꠥꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ। ꠄꠞꠟꠉꠦ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠍꠣꠝꠣꠘꠣ ꠀꠞ ꠗꠣꠘ-ꠉꠝꠞ ꠍꠖꠉꠣꠞ ꠔꠦꠟ ꠝꠣꠈꠣꠁꠟ ꠌꠣꠁꠞ ꠡꠦꠞ ꠝꠄꠖꠣꠅ ꠖꠤꠛꠣꠄ। 10 ꠙꠞꠔꠤꠖꠤꠘꠞ ꠎꠣꠟꠣꠁꠟ ꠙꠡꠥ ꠇꠥꠞꠛꠣꠘꠤ ꠀꠞ ꠄꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠍꠣꠠꠣꠅ ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠅꠃ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣꠄ।

11 “ꠙꠞꠔꠦꠇ ꠌꠣꠘ꠆ꠖꠞ ꠙꠄꠟꠣ ꠖꠤꠘ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠖꠥꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ ꠀꠞ ꠄꠇ ꠛꠍꠞ ꠛꠄꠅꠡꠤ ꠡꠣꠔꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠞꠛꠣꠘꠤ ꠖꠤꠛꠣꠄ, ꠁ ꠢꠇꠟ ꠙꠡꠥ ꠙꠥꠞꠣ ꠘꠤꠈꠥꠔ ꠅꠁꠔ। 12 ꠅꠃ ꠙꠞꠔꠦꠇ ꠛꠤꠍꠣꠟꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠔꠦꠟ ꠝꠣꠈꠣꠁꠟ ꠍꠄ ꠡꠦꠞ ꠝꠄꠖꠣ ꠖꠤꠛꠣꠄ, ꠀꠞ ꠝꠦꠠꠣꠞ ꠟꠉꠦ ꠌꠣꠁꠞ ꠡꠦꠞ ꠝꠄꠖꠣ ꠖꠤꠅ, 13 ꠀꠞ ꠙꠞꠔꠦꠇ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠔꠦꠟ ꠝꠣꠈꠣꠁꠟ ꠖꠥꠁ ꠡꠦꠞ ꠝꠄꠖꠣ ꠖꠤꠅ। ꠁꠔꠣ ꠅꠁꠟ ꠀꠝꠣꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ। 14 ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠣꠉꠤ ꠙꠞꠔꠦꠇ ꠛꠤꠍꠣꠟꠞ ꠟꠉꠦ ꠖꠥꠁ ꠡꠦꠞ ꠀꠋꠉꠥꠞꠞ ꠡꠞꠛꠔ ꠖꠤꠛꠣꠄ। ꠙꠞꠔꠦꠇ ꠝꠦꠠꠣꠞ ꠟꠉꠦ ꠡꠥꠀ ꠡꠦꠞ ꠀꠞ ꠙꠞꠔꠦꠇ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠄꠇ ꠡꠦꠞ ꠡꠞꠛꠔ ꠖꠤꠅ। ꠁꠔꠣ ꠅꠁꠟ ꠝꠣꠡꠤꠇ ꠎꠣꠟꠣꠁꠟ ꠇꠥꠞꠛꠣꠘꠤ, ꠛꠍꠞꠞ ꠙꠞꠔꠦꠇ ꠌꠣꠘ꠆ꠖꠅ ꠁꠔꠣ ꠀꠖꠣꠄ ꠇꠞꠛꠣꠄ। 15 ꠁꠔꠣꠞ ꠟꠉꠦ ꠉꠥꠘꠣꠞ ꠇꠚꠞꠣꠞ ꠘꠤꠅꠔꠦ ꠀꠝꠣꠞ ꠘꠣꠝꠦ ꠄꠉꠥ ꠍꠣꠉꠟ ꠇꠥꠞꠛꠣꠘꠤ ꠖꠤꠅ। ꠔꠣ-ꠅ ꠙꠞꠔꠦꠇ ꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠀꠞ ꠄꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠅ ꠀꠖꠣꠄ ꠇꠞꠤꠅ।

16 “ꠙꠞꠔꠦꠇ ꠛꠍꠞꠞ ꠙꠄꠟꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖ ꠀꠖꠣꠄ ꠇꠞꠤꠅ। 17 ꠅꠃ ꠌꠣꠘ꠆ꠖꠞ ꠙꠘꠞ ꠔꠣꠞꠤꠈ ꠕꠣꠇꠤ ꠡꠣꠔ ꠖꠤꠘ ꠜꠞꠣ ꠀꠞꠇ ꠁꠖ ꠀꠖꠣꠄ ꠇꠞꠤꠅ, ꠁꠇꠐꠣꠞ ꠘꠣꠝ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ। 18 ꠄꠞ ꠙꠄꠟꠣ ꠖꠤꠘ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ, ꠁ ꠖꠤꠘ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠣ ꠘꠣꠎꠣꠁꠎ। 19 ꠅꠃ ꠖꠤꠘ ꠀꠝꠣꠞ ꠘꠣꠝꠦ ꠖꠥꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ ꠀꠞ ꠄꠇ ꠛꠍꠞ ꠛꠄꠅꠡꠤ ꠡꠣꠔꠉꠥ ꠝꠦꠠꠣ-ꠛꠣꠁꠌ꠆ꠌꠣꠖꠤ ꠀꠉꠥꠘꠤꠔ ꠖꠦꠅꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ। ꠇꠥꠞꠛꠣꠘꠤꠞ ꠙꠞꠔꠦꠇ ꠙꠡꠥ ꠘꠤꠈꠥꠔ ꠅꠁꠔꠦ ꠅꠁꠛ। 20 ꠅꠃ ꠙꠡꠥꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠔꠦꠟ ꠝꠣꠈꠣꠁꠟ ꠝꠄꠖꠣ ꠖꠤꠛꠣꠄ, ꠄꠇꠅꠐꠣ ꠛꠤꠍꠣꠟꠞ ꠟꠉꠦ ꠍꠄ ꠡꠦꠞ, ꠝꠦꠠꠣ ꠙꠣꠑꠣꠞ ꠟꠉꠦ ꠌꠣꠁꠞ ꠡꠦꠞ, 21 ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠖꠥꠁ ꠡꠦꠞ ꠖꠤꠛꠣꠄ। 22 ꠁꠔꠣꠞ ꠟꠉꠦ ꠔꠥꠝꠞꠣꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠄꠉꠥ ꠙꠣꠑꠣ ꠍꠣꠉꠟꠅ ꠇꠥꠞꠛꠣꠘꠤ ꠖꠤꠅ। 23 ꠙꠞꠔꠦꠇ ꠖꠤꠘꠞ ꠛꠤꠀꠘꠇꠥꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠔ ꠖꠤꠛꠣꠄꠃ, ꠄꠞꠟꠉꠦ ꠅꠃ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠛꠣꠄ। 24 ꠅꠃ ꠟꠣꠈꠣꠘ ꠙꠥꠞꠣ ꠢꠣꠙ꠆ꠔꠣꠞ ꠡꠣꠔꠅꠖꠤꠘ ꠀꠝꠣꠞꠦ ꠈꠥꠡꠤ ꠇꠞꠣꠞ ꠊꠦꠞꠣꠘ ꠀꠟꠣ ꠈꠣꠘꠤ ꠢꠤꠡꠣꠛꠦ ꠙꠞꠔꠦꠇ ꠖꠤꠘ ꠅꠃ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣꠄ। ꠙꠞꠔꠤꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠄꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠉꠦ ꠅꠃ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠛꠣꠄ। 25 ꠢꠦꠡꠦ ꠡꠣꠔ ꠘꠝ꠆ꠛꠞ ꠖꠤꠘꠅ ꠔꠥꠝꠞꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠤꠅ, ꠅꠃ ꠖꠤꠘ ꠖꠥꠘꠤꠀꠛꠤ ꠘꠤꠅꠔꠦ ꠇꠥꠘꠥ ꠇꠣꠝ-ꠇꠣꠎ ꠇꠞꠣ ꠘꠣꠎꠣꠁꠎ।

26 “ꠙꠘ꠆ꠌꠣꠁꠡꠣ ꠁꠖꠞ ꠖꠤꠘ, ꠝꠣꠘꠤ ꠈꠦꠔꠞ ꠙꠄꠟꠣ ꠖꠣꠅꠀ ꠚꠡꠟ ꠖꠤꠀ ꠎꠦꠖꠤꠘ ꠔꠥꠝꠞꠣ ꠀꠝꠣꠞ ꠘꠣꠝꠦ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠇꠞꠛꠣꠄ, ꠢꠤ ꠖꠤꠘ ꠇꠥꠘꠥ ꠖꠥꠘꠤꠀꠛꠤ ꠘꠤꠅꠔꠦ ꠇꠣꠝ ꠇꠞꠤꠅ ꠘꠣ। 27 ꠅꠃ ꠖꠤꠘ ꠔꠥꠝꠞꠣ ꠖꠥꠉꠥ ꠛꠤꠍꠣꠟ, ꠄꠉꠥ ꠝꠦꠠꠣ ꠀꠞ ꠄꠇ ꠛꠍꠞ ꠛꠄꠅꠡꠤ ꠡꠣꠔꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ, ꠅꠃ ꠇꠥꠞꠛꠣꠘꠤꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠝꠣꠛꠥꠖ ꠈꠥꠡꠤ ꠅꠁ। 28 ꠀꠞ ꠅꠔꠣꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠄꠇꠅꠐꠣ ꠛꠤꠍꠣꠟꠞ ꠟꠉꠦ ꠔꠦꠟ ꠝꠣꠈꠣꠁꠟ ꠍꠄ ꠡꠦꠞ ꠝꠄꠖꠣ, ꠝꠦꠠꠣꠞ ꠟꠉꠦ ꠌꠣꠁꠞ ꠡꠦꠞ, 29 ꠀꠞ ꠝꠦꠠꠣ-ꠛꠣꠁꠌ꠆ꠌꠣꠞ ꠟꠉꠦ ꠖꠥꠁ ꠡꠦꠞ ꠖꠤꠛꠣꠄ। 30 ꠅꠔꠣꠞ ꠟꠉꠦ ꠄꠉꠥ ꠙꠣꠑꠣ ꠍꠣꠉꠟꠅ ꠇꠥꠞꠛꠣꠘꠤ ꠖꠤꠅ ꠔꠥꠝꠞꠣꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ। 31 ꠅꠃ ꠢꠇꠟ ꠇꠥꠞꠛꠣꠘꠤ ꠀꠞ ꠁꠔꠣꠞ ꠟꠉꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠉꠦ ꠙꠞꠔꠤꠖꠤꠘꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠞ ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠀꠖꠣꠄ ꠇꠞꠛꠣꠄ। ꠈꠤꠀꠟ ꠞꠣꠈꠤꠅ, ꠇꠥꠞꠛꠣꠘꠤꠞ ꠢꠇꠟ ꠙꠡꠥ ꠎꠣꠘꠥ ꠙꠥꠞꠣꠙꠥꠞ ꠘꠤꠈꠥꠔ ꠅꠄ।