1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 2 “ꠝꠣꠖꠤꠀꠘꠤ ꠅꠇꠟꠦ ꠛꠘꠤ ꠁꠍꠞꠣꠁꠟꠞ ꠟꠉꠦ ꠎꠦꠔꠣ ꠇꠞꠍꠦ, ꠔꠥꠝꠤ ꠅꠔꠣꠞ ꠅꠙꠞꠣꠗꠞ ꠛꠖꠟꠣ ꠖꠦꠅ। ꠄꠞꠛꠣꠖꠦ ꠔꠥꠝꠤ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠌꠤꠞꠇꠣꠟꠞ ꠟꠣꠉꠤ ꠢꠥꠔꠤ ꠞꠁꠛꠣꠄ।”

3 ꠔꠦꠃ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠇꠁꠟꠣ, “ꠝꠣꠖꠤꠀꠘꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠔꠥꠝꠞꠣꠞ ꠇꠤꠍꠥ ꠍꠤꠙꠣꠁꠞꠦ ꠎꠥꠁꠔ ꠇꠞꠅ, ꠔꠣꠞꠣ ꠝꠣꠛꠥꠖꠞ ꠔꠞꠚ ꠕꠣꠇꠤ ꠝꠣꠖꠤꠀꠘꠤ ꠅꠇꠟꠞ ꠙꠣꠅꠘꠣ ꠡꠣꠎꠣ ꠖꠤꠛꠣ। 4 ꠅꠈꠘ ꠔꠥꠝꠞꠣ ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠈꠣꠘ꠆ꠖꠣꠘ ꠕꠣꠇꠤ ꠄꠇ ꠀꠎꠣꠞ ꠇꠞꠤ ꠍꠤꠙꠣꠁꠞꠦ ꠎꠥꠖ꠆ꠖꠔ ꠙꠣꠑꠣꠅ।”

5 ꠔꠦꠃ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘ ꠕꠣꠇꠤ ꠄꠇꠅ ꠀꠎꠣꠞ ꠇꠞꠤ ꠝꠥꠐ ꠛꠣꠞꠅ ꠀꠎꠣꠞ ꠍꠤꠙꠣꠁꠞꠦ ꠎꠥꠖ꠆ꠖꠞ ꠟꠣꠉꠤ ꠎꠥꠁꠔ ꠇꠞꠣ ꠅꠁꠟ। 6 ꠝꠥꠍꠣꠄ ꠙꠞꠔꠦꠇ ꠈꠣꠘ꠆ꠖꠣꠘ ꠕꠣꠇꠤ ꠄꠇ ꠀꠎꠣꠞ ꠎꠘ ꠍꠤꠙꠣꠁꠞꠦ ꠎꠥꠖ꠆ꠖꠔ ꠙꠣꠑꠣꠁꠟꠣ। ꠄꠞꠣꠞ ꠟꠉꠦ ꠁꠝꠣꠝ ꠀꠟꠤ-ꠀꠎꠞꠞ ꠙꠥꠀ ꠙꠤꠘꠢꠡꠅ ꠉꠦꠟꠣ, ꠎꠣꠁꠔꠦ ꠙꠛꠤꠔ꠆ꠞ ꠇꠣꠛꠣ ꠊꠞꠞ ꠇꠤꠍꠥ ꠍꠣꠝꠣꠘꠣ ꠟꠉꠦ ꠇꠞꠤ ꠘꠤꠟꠣ ꠀꠞ ꠔꠣꠘ ꠀꠔꠅ ꠇꠞꠤ ꠎꠥꠖ꠆ꠖꠞ ꠀꠅꠀꠎꠞ ꠌꠥꠋꠉꠣ ꠅꠇꠟꠅ ꠘꠤꠟꠣ।

7 ꠝꠥꠍꠣ ꠘꠛꠤꠞꠦ ꠖꠦꠅꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠝꠣꠖꠤꠀꠘꠤ ꠅꠇꠟꠞ ꠟꠉꠦ ꠎꠥꠖ꠆ꠖ ꠇꠞꠤꠀ ꠅꠔꠣꠞ ꠢꠇꠟ ꠛꠦꠐꠣꠁꠘ꠆ꠔꠞꠦ ꠝꠣꠞꠤꠟꠤꠟꠣ। 8 ꠡꠣꠗꠣꠞꠘ ꠝꠣꠘꠡꠞ ꠟꠉꠦ ꠝꠣꠖꠤꠀꠘꠤ ꠅꠇꠟꠞ ꠙꠣꠌ ꠎꠘ ꠛꠣꠖꠡꠣꠞꠦꠅ ꠔꠣꠞꠣ ꠝꠣꠞꠤꠟꠤꠟꠣ। ꠅꠃ ꠛꠣꠖꠡꠣꠁꠘ ꠅꠁꠟꠣ, ꠁꠛꠤ, ꠞꠦꠇꠝ, ꠡꠥꠞ, ꠢꠥꠞ ꠀꠞ ꠞꠦꠛꠣ। ꠀꠞ ꠄꠞꠣꠞ ꠟꠉꠦ ꠛꠣꠟꠣꠝ ꠛꠤꠘ ꠛꠣꠃꠞ ꠘꠣꠝꠞ ꠢꠃ ꠙꠤꠞꠞꠦꠅ ꠔꠣꠞꠣ ꠎꠣꠘꠦ ꠝꠣꠞꠤꠟꠤꠟꠣ। 9 ꠔꠣꠞꠣ ꠝꠣꠖꠤꠀꠘ ꠖꠦꠡꠞ ꠢꠇꠟ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠁꠘꠞꠦ ꠛꠘ꠆ꠖꠤ ꠇꠞꠟꠣ, ꠔꠣꠞꠣꠞ ꠉꠞꠥ-ꠍꠣꠉꠟ ꠀꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ ꠟꠥꠐꠤꠀ ꠀꠘꠤꠟ꠆ꠟꠣ। 10 ꠝꠣꠖꠤꠀꠘꠤ ꠅꠇꠟ ꠎꠔ ꠐꠣꠃꠘꠅ ꠛꠡꠔ ꠇꠞꠔꠣ, ꠅꠃ ꠐꠣꠃꠘ ꠅꠇꠟ ꠀꠞ ꠐꠣꠃꠘꠞ ꠛꠣꠞꠞ ꠢꠇꠟ ꠔꠣꠝ꠆ꠛꠥ ꠔꠣꠞꠣ ꠀꠉꠥꠁꠘꠖꠤ ꠎꠣꠟꠣꠁꠟꠤꠟꠣ। 11 ꠎꠥꠖ꠆ꠖꠞ ꠛꠣꠖꠦ ꠔꠣꠞꠣꠞ ꠛꠘ꠆ꠖꠤ ꠇꠞꠣ ꠢꠇꠟ ꠝꠣꠘꠥꠡ, ꠉꠘꠤꠝꠔꠞ ꠝꠣꠟ-ꠍꠣꠝꠣꠘꠣ, ꠀꠞ ꠙꠡꠥꠞ ꠙꠣꠟ ꠟꠁꠀ ꠞꠅꠀꠘꠣ ꠅꠁꠟꠣ। 12 ꠔꠣꠞꠣ ꠝꠥꠍꠣ ꠘꠛꠤ, ꠁꠝꠣꠝ ꠀꠟꠤ-ꠀꠎꠞ ꠀꠞ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠅ ꠚꠤꠞꠣꠞ ꠘꠤꠅꠔꠦ ꠞꠅꠀꠘꠣ ꠖꠤꠟꠣ। ꠅꠃ ꠡꠝꠄ ꠔꠣꠞꠣꠞ ꠔꠣꠝ꠆ꠛꠥ ꠀꠍꠤꠟ ꠎꠤꠞꠤꠢꠅ ꠄꠟꠣꠇꠣꠞ ꠎꠞ꠆ꠖꠣꠘ ꠉꠣꠋꠉꠞ ꠗꠣꠞꠅ ꠝꠥꠀꠛ ꠖꠦꠡꠞ ꠔꠟ ꠎꠣꠉꠣꠔ। 13 ꠔꠣꠞꠣꠞ ꠈꠛꠞ ꠙꠣꠁꠀ ꠝꠥꠍꠣ ꠘꠛꠤ, ꠁꠝꠣꠝ ꠀꠟꠤ-ꠀꠎꠞ ꠀꠞ ꠛꠘꠤ ꠁꠍꠞꠣꠁꠟꠞ ꠢꠇꠟ ꠝꠥꠞꠛ꠆ꠛꠤ ꠇꠦꠝ꠆ꠙ ꠕꠣꠇꠤ ꠛꠣꠞ ꠅꠁꠀ ꠔꠣꠞꠣꠞ ꠟꠉꠦ ꠖꠦꠈꠣ ꠇꠞꠣꠔ ꠉꠦꠟꠣ।

14 ꠉꠤꠀ ꠎꠥꠖ꠆ꠖ ꠕꠣꠇꠤ ꠚꠤꠞꠔ ꠀꠅꠀ ꠢꠇꠟ ꠇꠣꠝꠣꠘ꠆ꠒꠣꠞꠞ ꠃꠙꠞꠦ ꠝꠣꠘꠤ ꠀꠎꠣꠞ ꠍꠤꠙꠣꠁꠞ ꠀꠞ ꠡ-ꠍꠤꠙꠣꠁꠞ ꠇꠣꠝꠣꠘ꠆ꠒꠣꠞ ꠅꠇꠟꠞ ꠃꠙꠞꠦ ꠝꠥꠍꠣꠄ ꠈꠥꠛ ꠉꠞꠝ ꠅꠁꠀ 15 ꠇꠁꠟꠣ, “ꠔꠥꠝꠞꠣ ꠖꠥꠡꠝꠘꠞ ꠢꠇꠟ ꠛꠦꠐꠤꠘ꠆ꠔꠞꠦ ꠎꠤꠘ꠆ꠖꠣ ꠞꠣꠈꠟꠣꠄ ꠇꠦꠘꠦ? 16 ꠝꠘꠅ ꠘꠣꠁ ꠘꠤ, ꠅꠉꠥꠁꠘ꠆ꠔꠦ ꠙꠤꠃꠞ ꠙꠣꠠꠞ ꠃꠙꠞꠦ ꠛꠣꠟꠣꠝ ꠙꠤꠞꠞ ꠙꠞꠣꠝꠤꠡꠦ, ꠛꠘꠤ ꠁꠍꠞꠣꠁꠟꠞꠦ ꠝꠣꠛꠥꠖꠞ ꠉꠦꠍ ꠕꠣꠇꠤ ꠖꠥꠞꠁ ꠢꠞꠣꠁꠍꠤꠟ, ꠄꠞꠟꠣꠉꠤ ꠔ ꠝꠣꠛꠥꠖꠞ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠉꠎꠛꠤ ꠛꠦꠝꠣꠞ ꠘꠣꠎꠤꠟ ꠅꠁꠍꠤꠟ। 17 ꠔꠦ ꠅꠈꠘ ꠔꠥꠝꠞꠣ ꠅꠔꠣꠞ ꠢꠇꠟ ꠙꠥꠀꠂꠘ꠆ꠔꠞꠦ ꠎꠣꠘꠦ ꠝꠣꠞꠤꠟꠣꠅ, ꠛꠤꠀꠔꠤ ꠛꠣ ꠅꠡꠔꠤ ꠢꠇꠟ ꠛꠦꠐꠤꠘ꠆ꠔꠞꠦꠅ ꠝꠣꠞꠤꠟꠣꠅ। 18 ꠈꠣꠟꠤ ꠀꠛꠤꠀꠔꠤ ꠡꠔꠤ ꠙꠥꠠꠤꠘ꠆ꠔꠞꠦ ꠔꠥꠝꠞꠣꠞ ꠟꠣꠉꠤ ꠎꠤꠔꠣ ꠞꠣꠈꠤꠅ।

19 “ꠀꠞ ꠔꠥꠝꠞꠣ ꠎꠦꠞꠣ ꠇꠥꠘꠥ ꠝꠣꠘꠡꠞꠦ ꠎꠣꠘꠦ ꠝꠣꠞꠍ ꠛꠣ ꠝꠥꠞ꠆ꠖꠣꠞ ꠟꠣꠡ ꠍꠁꠍ, ꠔꠥꠝꠞꠣ ꠡꠣꠔꠖꠤꠘ ꠜꠞꠣ ꠇꠦꠝ꠆ꠙꠞ ꠛꠣꠞꠦ ꠞꠁꠅ। ꠄꠞꠝꠣꠎꠦ ꠔꠤꠘ ꠘꠝ꠆ꠛꠞ ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠔꠥꠝꠞꠣ ꠘꠤꠎꠦ ꠀꠞ ꠛꠘ꠆ꠖꠤ ꠇꠞꠤ ꠀꠘꠣ ꠝꠣꠘꠡꠞꠦꠅ ꠙꠣꠇ-ꠍꠣꠚ ꠇꠞꠛꠣꠄ। 20 ꠔꠥꠝꠞꠣꠞ ꠢꠇꠟ ꠇꠣꠙꠠ-ꠌꠥꠙꠠ, ꠌꠣꠝꠠꠣꠞ ꠝꠣꠟ-ꠍꠣꠝꠣꠘꠣ, ꠟꠣꠇꠠꠤ ꠀꠞ ꠍꠣꠉꠟꠞ ꠞꠥꠝꠣꠖꠤ ꠛꠣꠘꠣꠁꠟ ꠢꠇ꠆ꠇꠟ ꠍꠣꠝꠣꠘꠞꠦꠅ ꠙꠣꠇ-ꠍꠣꠚ ꠇꠞꠛꠣꠄ।”

21 ꠎꠦꠔꠣ ꠍꠤꠙꠣꠁ ꠅꠇꠟ ꠎꠥꠖ꠆ꠖꠔ ꠉꠦꠍꠟꠣ, ꠁꠝꠣꠝ ꠀꠟꠤ-ꠀꠎꠞꠦ ꠔꠣꠞꠣꠞꠦ ꠇꠁꠟꠣ, “ꠁꠔꠣ ꠅꠁꠟ ꠝꠥꠍꠣ ꠘꠛꠤꠞ ꠀꠔꠦ ꠖꠦꠅꠀ ꠝꠣꠛꠥꠖꠞ ꠡꠞꠤꠅꠔꠞ ꠄꠇꠈꠣꠘ ꠀꠁꠘ: 22 ꠔꠥꠝꠞꠣ ꠡꠥꠘꠣ, ꠞꠥꠙꠣ, ꠙꠤꠔꠟ, ꠟꠥꠀ, ꠐꠤꠘ, ꠡꠤꠡꠣꠖꠤ ꠛꠣꠘꠣꠁꠟ ꠢꠇꠟ ꠝꠣꠟ-ꠍꠣꠝꠣꠘꠣ, 23 ꠝꠣꠘꠤ ꠎꠦꠔꠣ ꠝꠣꠟ ꠀꠉꠥꠘꠤꠔ ꠖꠤꠟꠦ ꠎꠟꠦ ꠘꠣ, ꠁꠔꠣ ꠢꠇꠟꠔꠣ ꠀꠉꠥꠘꠤꠞ ꠝꠣꠎꠦ ꠖꠤꠛꠣꠄ, ꠔꠦꠃ ꠁꠔꠣ ꠙꠣꠇ-ꠍꠣꠚ ꠅꠁꠛ। ꠅꠁꠟꠦ ꠎꠣꠟꠣꠘꠤꠞ ꠛꠣꠖꠦ ꠁꠔꠣꠞꠦ ꠙꠣꠇ-ꠍꠣꠚ ꠇꠞꠣꠞ ꠙꠣꠘꠤꠖꠤ ꠗꠁꠀ ꠙꠣꠇ-ꠙꠣꠇꠤꠎꠣ ꠇꠞꠣ ꠟꠣꠉꠛ। ꠀꠞ ꠎꠦꠔꠣ ꠀꠉꠥꠁꠘꠦ ꠘꠡ꠆ꠐ ꠅꠁꠎꠣꠄ, ꠁꠔꠣꠞꠦ ꠈꠣꠟꠤ ꠙꠣꠇ-ꠍꠣꠚ ꠇꠞꠣꠞ ꠙꠣꠘꠤꠖꠤ ꠗꠁꠟꠤꠛꠣꠄ। 24 ꠛꠣꠖꠦ ꠡꠣꠔ ꠘꠝ꠆ꠛꠞ ꠖꠤꠘ ꠔꠥꠝꠞꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠢꠣꠞꠟꠦ, ꠙꠣꠇ-ꠙꠣꠇꠤꠎꠣ ꠛꠘꠤꠀ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠛꠣꠄ।”

25 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 26 “ꠔꠥꠝꠤ ꠀꠞ ꠁꠝꠣꠝ ꠀꠟꠤ-ꠀꠎꠞ ꠀꠞ ꠡꠝꠣꠎꠞ ꠝꠥꠞꠛ꠆ꠛꠤ ꠅꠇꠟꠦ ꠝꠤꠟꠤꠀ, ꠛꠘ꠆ꠖꠤ ꠇꠞꠤ ꠀꠘꠣ ꠢꠇꠟ ꠝꠣꠘꠥꠡ ꠀꠞ ꠙꠡꠥꠁꠘ꠆ꠔꠞꠦ ꠉꠘꠅ। 27 ꠉꠘꠤꠀ ꠢꠇꠟ ꠝꠣꠟ ꠖꠥꠁ ꠛꠣꠐ ꠇꠞꠅ। ꠁꠔꠣꠞ ꠄꠇ ꠛꠣꠐ ꠖꠤꠛꠣꠄ ꠎꠥꠖ꠆ꠖꠔ ꠎꠦꠔꠣ ꠍꠤꠙꠣꠁ ꠅꠇꠟ ꠉꠦꠍꠤꠟ ꠔꠣꠞꠣꠞꠦ, ꠀꠞ ꠖꠥꠍꠞꠣ ꠛꠣꠐ ꠛꠣꠖ-ꠛꠣꠇꠤ ꠝꠣꠘꠡꠞꠦ ꠖꠤꠅ। 28 ꠅꠃ ꠍꠤꠙꠣꠁ ꠅꠇꠟꠞ ꠛꠣꠐꠅ ꠎꠔ ꠝꠣꠘꠥꠡ, ꠉꠞꠥ-ꠍꠣꠉꠟ ꠙꠠꠛ, ꠁꠔꠣꠞ ꠙꠞꠔꠦꠇ ꠙꠣꠌ-ꠡꠐꠣ ꠕꠣꠇꠤ ꠄꠇꠐꠣꠞꠦ ꠝꠣꠛꠥꠖꠞ ꠟꠣꠉꠤ ꠀꠟꠉꠣꠁ ꠕꠁꠅ। 29 ꠀꠟꠉꠣꠁꠀ ꠝꠣꠛꠥꠖꠞ ꠙꠣꠅꠘꠣ ꠅꠃ ꠛꠣꠐꠞꠦ ꠔꠥꠝꠤ ꠁꠝꠣꠝ ꠀꠟꠤ-ꠀꠎꠞꠞ ꠀꠔꠅ ꠖꠤꠛꠣꠄ। 30 ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠐꠅ ꠎꠦꠔꠣ ꠝꠣꠘꠥꠡ, ꠉꠞꠥ-ꠍꠣꠉꠟ ꠙꠣꠁꠛꠣ, ꠁꠔꠣꠞ ꠙꠞꠔꠦꠇ ꠙꠁꠘ꠆ꠌꠣꠡꠐꠣ ꠕꠣꠇꠤ ꠄꠇꠐꠣꠞꠦ ꠀꠟꠉ ꠇꠞꠤ ꠕꠁꠅ। ꠕꠁꠀ ꠀꠟ꠆ꠟꠣꠞ ꠛꠡꠔ ꠈꠣꠘꠣ, ꠛꠣꠄꠔꠥꠟ꠆ꠟꠣ ꠔꠣꠝ꠆ꠛꠥꠞ ꠈꠣꠖꠤꠝ ꠟꠦꠛꠤ ꠅꠇꠟꠞ ꠀꠔꠅ ꠁꠔꠣ ꠡꠝꠎꠣꠁꠅ।” 31 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠔꠣꠁꠘ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠅꠟꠣꠃ ꠇꠞꠟꠣ।

32 ꠍꠤꠙꠣꠁ ꠅꠇꠟꠦ ꠎꠤꠔꠤꠀ ꠀꠘꠣ ꠉꠘꠤꠝꠔꠞ ꠝꠣꠟ-ꠍꠣꠝꠣꠘꠣ ꠍꠣꠠꠣꠅ ꠀꠞꠅ ꠀꠍꠤꠟ, ꠍꠄ ꠟꠣꠈ ꠙꠌꠔ꠆ꠔꠁꠞ ꠀꠎꠣꠞ ꠝꠦꠠꠣ ꠀꠞ ꠍꠣꠉꠟ, 33 ꠛꠣꠅꠔ꠆ꠔꠁꠞ ꠀꠎꠣꠞ ꠉꠞꠥ, 34 ꠄꠇꠡꠐ꠆ꠐꠤ ꠀꠎꠣꠞ ꠉꠣꠗꠣ 35 ꠀꠞ ꠛꠔ꠆ꠔꠤꠡ ꠀꠎꠣꠞ ꠀꠛꠤꠀꠔꠤ ꠡꠔꠤ ꠙꠥꠠꠤꠘ। 36 ꠔꠦꠃ ꠎꠥꠖ꠆ꠖ ꠇꠞꠞꠣ ꠍꠤꠙꠣꠁ ꠅꠇꠟꠞ ꠛꠣꠐꠅ ꠙꠠꠟ, ꠔꠤꠘ ꠟꠣꠈ ꠡꠣꠠꠔꠤꠡ ꠀꠎꠣꠞ ꠙꠣꠌ-ꠡꠐꠣ ꠝꠦꠠꠣ ꠀꠞ ꠍꠣꠉꠟ, 37 ꠁꠔꠣ ꠕꠣꠇꠤ ꠝꠣꠛꠥꠖꠞ ꠙꠣꠅꠘꠣ ꠛꠣꠐꠅ ꠙꠠꠟ, ꠍꠄ-ꠡ ꠙꠌꠔ꠆ꠔꠁꠞꠉꠥ ꠍꠣꠉꠟ-ꠝꠦꠠꠣ। 38 ꠀꠞ ꠉꠞꠥ ꠀꠍꠤꠟ ꠍꠄꠔꠤꠡ ꠀꠎꠣꠞ, ꠁꠔꠣ ꠕꠣꠇꠤ ꠝꠣꠛꠥꠖꠞ ꠛꠣꠐꠅ ꠙꠠꠟ ꠛꠣꠅꠔ꠆ꠔꠁꠞꠐꠣ। 39 ꠄꠞꠝꠣꠎꠦ ꠉꠣꠗꠣ ꠀꠍꠤꠟ ꠔꠤꠡ ꠀꠎꠣꠞ ꠙꠣꠌ-ꠡꠐꠣ, ꠁꠔꠣ ꠕꠣꠇꠤ ꠝꠣꠛꠥꠖꠞ ꠛꠣꠐꠅ ꠙꠠꠟ ꠄꠇꠡꠐ꠆ꠐꠤꠉꠥ। 40 ꠀꠞ ꠀꠛꠤꠀꠔꠤ ꠡꠔꠤ ꠙꠥꠠꠤꠘ ꠀꠍꠟꠣ ꠡꠥꠟ꠆ꠟ ꠀꠎꠣꠞ, ꠁꠔꠣ ꠕꠣꠇꠤ ꠝꠣꠛꠥꠖꠞ ꠛꠣꠐꠅ ꠙꠠꠟ ꠛꠔ꠆ꠔꠤꠡꠐꠣ। 41 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠔꠣꠁꠘ ꠝꠣꠛꠥꠖꠞ ꠙꠣꠅꠘꠣ ꠛꠣꠐ ꠘꠤꠀ ꠁꠝꠣꠝ ꠀꠟꠤ-ꠀꠎꠞꠞ ꠀꠔꠅ ꠅꠟꠣ ꠡꠝꠎꠣꠁ ꠖꠤꠟꠣ। 42 ꠀꠞ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞ ꠛꠣꠖ-ꠛꠣꠇꠤ ꠝꠣꠘꠡꠞ ꠟꠣꠉꠤ ꠎꠦ ꠛꠣꠐ ꠍꠤꠙꠣꠁ ꠅꠇꠟꠞ ꠉꠦꠍ ꠕꠣꠇꠤ ꠘꠤꠍꠟꠣ, 43 ꠁ ꠛꠣꠐꠅ ꠔꠤꠘ ꠟꠣꠈ ꠡꠣꠠꠔꠤꠡ ꠀꠎꠣꠞ ꠙꠣꠌ-ꠡꠉꠥ ꠝꠦꠠꠣ ꠀꠞ ꠍꠣꠉꠟ, 44 ꠍꠄꠔꠤꠡ ꠀꠎꠣꠞ ꠉꠞꠥ, 45 ꠔꠤꠡ ꠀꠎꠣꠞ ꠙꠣꠌ-ꠡꠐꠣ ꠉꠣꠗꠣ, 46 ꠀꠞ ꠡꠥꠟ꠆ꠟ ꠀꠎꠣꠞ ꠀꠛꠤꠀꠔꠤ ꠡꠔꠤ ꠙꠥꠠꠤꠘ ꠀꠍꠟꠣ। 47 ꠛꠣꠖꠦ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞ ꠙꠣꠅꠀ ꠛꠣꠐꠞ, ꠙꠞꠔꠦꠇ ꠙꠁꠘ꠆ꠌꠣꠡ ꠎꠘ ꠀꠛꠤꠀꠔꠤ ꠙꠥꠠꠤꠘ ꠀꠞ ꠙꠡꠥꠁꠘ ꠕꠣꠇꠤꠅ, ꠄꠉꠥ ꠇꠞꠤ ꠙꠥꠠꠤ ꠀꠞ ꠙꠡꠥ ꠘꠤꠀ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠞꠦ ꠖꠤꠟꠣ, ꠎꠦꠞꠣꠞ ꠃꠙꠞꠦ ꠝꠣꠛꠥꠖꠞ ꠇꠣꠛꠣ ꠊꠞꠞ ꠖꠦꠈꠣ-ꠢꠥꠘꠣꠞ ꠎꠤꠝ꠆ꠝꠣꠖꠣꠞꠤ ꠀꠍꠤꠟ।

48 ꠄꠞꠛꠣꠖꠦ ꠍꠤꠙꠣꠁ ꠖꠟꠞ ꠀꠎꠣꠞ ꠍꠤꠙꠣꠁꠞ ꠀꠞ ꠡ-ꠍꠤꠙꠣꠁꠞ ꠇꠣꠝꠣꠘ꠆ꠒꠣꠞ ꠅꠇꠟ ꠝꠥꠍꠣꠞ ꠉꠦꠍꠦ ꠀꠁꠟꠣ, 49 ꠀꠁꠀ ꠇꠁꠟꠣ, “ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠦ ꠀꠝꠞꠣꠞ ꠎꠤꠝ꠆ꠝꠣꠄ ꠕꠣꠇꠣ ꠍꠤꠙꠣꠁ ꠅꠇꠟꠞꠦ ꠉꠘꠤꠟꠣꠝ। ꠉꠘꠤꠀ ꠖꠦꠈꠟꠣꠝ, ꠔꠣꠞꠣ ꠢꠇꠟ ꠙꠥꠞꠣ ꠀꠍꠂꠘ, ꠎꠥꠖ꠆ꠖꠔ ꠇꠦꠃ ꠝꠞꠍꠦ ꠘꠣ। 50 ꠄꠞꠟꠣꠉꠤ ꠀꠝꠞꠣ ꠙꠞꠔꠦꠇꠞ ꠛꠣꠐꠅ ꠎꠦꠔꠣ ꠡꠥꠘꠣꠞ ꠛꠣꠎꠥ, ꠛꠣꠟꠣ, ꠀꠔꠞ ꠀꠋꠐꠤ, ꠇꠣꠘꠞ ꠖꠥꠟ ꠀꠞ ꠉꠟꠣꠞ ꠢꠣꠞ ꠙꠣꠁꠍꠤ, ꠀꠝꠞꠣ ꠁꠔꠣ ꠢꠇꠟꠔꠣ ꠟꠁꠀ ꠀꠁꠍꠤ। ꠀꠝꠞꠣꠞ ꠎꠣꠘꠞ ꠇꠚꠞꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠅꠔꠣ ꠝꠣꠛꠥꠖꠞ ꠖꠞꠛꠣꠞꠅ ꠖꠤꠟꠣꠁꠔꠣꠝ।” 51 ꠔꠦꠃ ꠝꠥꠍꠣ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠔꠣꠞꠣꠞ ꠉꠦꠍ ꠕꠣꠇꠤ ꠡꠥꠘꠣꠞ ꠢꠇꠟ ꠉꠄꠘꠣ ꠡꠝꠎꠤꠀ ꠙꠣꠁꠟꠣ। 52 ꠔꠣꠞꠣ ꠀꠎꠣꠞ ꠍꠤꠙꠣꠁꠞ ꠀꠞ ꠡ-ꠍꠤꠙꠣꠁꠞ ꠇꠣꠝꠣꠘ꠆ꠒꠣꠞ ꠅꠇꠟꠞ ꠉꠦꠍ ꠕꠣꠇꠤ ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠎꠦ ꠡꠥꠘꠣꠞ ꠉꠄꠘꠣ ꠡꠝꠎꠤꠀ ꠙꠣꠁꠟꠣ, ꠁꠔꠣꠞ ꠃꠎꠘ ꠀꠍꠤꠟ ꠡꠥꠟ꠆ꠟ ꠀꠎꠣꠞ ꠡꠣꠔ-ꠡ ꠙꠁꠘ꠆ꠌꠣꠡ ꠔꠟꠣ। 53-54 ꠝꠥꠍꠣ ꠘꠛꠤ ꠀꠞ ꠁꠝꠣꠝ ꠀꠟꠤ-ꠀꠎꠞꠦ ꠀꠎꠣꠞ ꠍꠤꠙꠣꠁ ꠀꠞ ꠡ-ꠍꠤꠙꠣꠁꠞ ꠇꠣꠝꠣꠘ꠆ꠒꠣꠞ ꠅꠇꠟꠞ ꠉꠦꠍ ꠕꠣꠇꠤ ꠅꠃ ꠡꠥꠘꠣ ꠅꠇꠟ ꠡꠝꠎꠤꠀ ꠞꠣꠈꠟꠣ। ꠞꠣꠈꠤꠀ ꠝꠣꠛꠥꠖꠞ ꠍꠣꠝꠘꠦ ꠛꠘꠤ ꠁꠍꠞꠣꠁꠟꠞ ꠁꠀꠖꠉꠣꠞꠤꠞ ꠘꠤꠡꠣꠘꠣ ꠢꠤꠡꠣꠛꠦ ꠅꠔꠣ ꠡꠥꠘꠣ ꠅꠇꠟ ꠇꠣꠛꠣ ꠊꠞꠞ ꠜꠤꠔꠞꠦ ꠕꠁꠟꠣ।

ꠁꠔꠣ ꠍꠣꠠꠣꠅ ꠍꠤꠙꠣꠁ ꠅꠇꠟꠦ ꠉꠘꠤꠝꠔꠞ ꠀꠞꠅ ꠝꠣꠟ-ꠍꠣꠝꠣꠘꠣ ꠎꠣꠞꠎꠤꠞ ꠉꠦꠍꠦ ꠞꠣꠈꠍꠤꠟꠣ।