1 ꠞꠥꠛꠦꠘ ꠀꠞ ꠍꠣꠖꠥ ꠈꠣꠘ꠆ꠖꠣꠘꠞ ꠝꠣꠘꠡꠞ ꠉꠞꠥ-ꠍꠣꠉꠟꠞ ꠛꠠ ꠛꠠ ꠙꠣꠟ ꠀꠍꠤꠟ। ꠔꠣꠞꠣ ꠖꠦꠈꠟꠣ, ꠎꠣꠎꠤꠞꠣ ꠀꠞ ꠉꠤꠟꠤꠅꠖ ꠄꠟꠣꠇꠣ ꠙꠡꠥ ꠙꠣꠟꠤꠛꠣꠞ ꠟꠣꠉꠤ ꠈꠥꠛ ꠜꠣꠟꠣ ꠎꠣꠉꠣ। 2 ꠔꠦꠃ ꠔꠣꠞꠣ ꠝꠥꠍꠣ ꠘꠛꠤ, ꠁꠝꠣꠝ ꠀꠟꠤ-ꠀꠎꠞ ꠀꠞ ꠛꠘꠤ ꠁꠍꠞꠣꠁꠟꠞ ꠙꠞꠗꠣꠘ ꠝꠥꠞꠛ꠆ꠛꠤ ꠅꠇꠟꠞꠦ ꠇꠁꠟꠣ, 3-4 “ꠀꠙꠘꠣꠁꠘ꠆ꠔꠞ ꠁ ꠉꠥꠟꠣꠝ ꠅꠇꠟꠦ ꠔ ꠉꠞꠥ-ꠍꠣꠉꠟ ꠙꠣꠟꠤ। ꠀꠞ ꠀꠝꠞꠣꠞ ꠝꠣꠛꠥꠖꠦ ꠅꠐꠣꠞꠥꠔ, ꠖꠤꠛꠣꠘ, ꠎꠣꠎꠤꠞꠣ, ꠘꠤꠝ꠆ꠞꠣ, ꠢꠤꠡꠛꠘ, ꠁꠟꠤꠀꠟꠤ, ꠍꠦꠛꠣꠝ, ꠘꠛꠅ ꠀꠞ ꠛꠤꠃꠘ ꠘꠣꠝꠞ ꠎꠦꠔꠣ ꠎꠣꠉꠣ ꠛꠘꠤ ꠁꠍꠞꠣꠁꠟꠞ ꠖꠈꠟꠅ ꠀꠘꠍꠂꠘ, ꠁꠔꠣ ꠔ ꠙꠡꠥ ꠙꠣꠟꠤꠛꠣꠞ ꠟꠣꠉꠤ ꠈꠥꠛ ꠜꠣꠟꠣ ꠎꠣꠉꠣ। 5 ꠅꠈꠘ ꠀꠙꠘꠦ ꠎꠥꠖꠤ ꠀꠝꠞꠣꠞꠦ ꠖꠄꠀ ꠇꠞꠂꠘ, ꠔꠦ ꠅꠃ ꠎꠣꠉꠣ ꠈꠣꠘꠣꠁꠘ ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ ꠖꠤꠟꠣꠃꠇ꠆ꠇꠣ। ꠀꠝꠞꠣꠞꠦ ꠎꠞ꠆ꠖꠣꠘ ꠉꠣꠋꠉꠞ ꠢꠤꠙꠣꠞꠅ ꠘꠦꠁꠘ ꠘꠣ ꠎꠣꠘꠥ।”

6 ꠝꠥꠍꠣ ꠘꠛꠤꠄ ꠔꠣꠞꠣꠞꠦ ꠎꠥꠀꠙ ꠖꠤꠟꠣ, “ꠔꠥꠝꠞꠣꠞ ꠜꠣꠁꠀꠁꠘ ꠎꠥꠖ꠆ꠖ ꠇꠞꠣꠔ ꠎꠣꠁꠛꠣ, ꠀꠞ ꠔꠥꠝꠞꠣ ꠅꠘꠅ ꠛꠁ ꠞꠁꠛꠣꠄ ꠘꠤ? 7 ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞꠦ ꠎꠦ ꠎꠣꠉꠣ ꠈꠣꠘꠣꠁꠘ ꠖꠤꠍꠂꠘ, ꠢꠤꠘꠅ ꠎꠣꠁꠔꠦ ꠔꠥꠝꠞꠣ ꠇꠦꠘꠦ ꠔꠣꠞꠣꠞ ꠝꠘꠅꠛꠟ ꠜꠣꠋꠉꠤ ꠖꠤꠞꠣꠄ? 8 ꠢꠥꠘꠅ, ꠀꠉꠦ ꠎꠦꠛꠟꠣ ꠅꠃ ꠖꠦꠡ ꠖꠦꠈꠣꠞ ꠟꠣꠉꠤ ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘꠞꠦ ꠀꠝꠤ ꠇꠣꠖꠦꠡ-ꠛꠞꠘꠦꠀ ꠕꠣꠇꠤ ꠙꠣꠑꠣꠁꠍꠟꠣꠝ, ꠢꠃ ꠡꠝꠄ ꠔꠣꠞꠣꠅ ꠅꠟꠣ ꠇꠞꠍꠟꠣ। 9 ꠔꠣꠞꠣ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠝꠣꠛꠥꠖꠞ ꠖꠣꠘ ꠇꠞꠣ ꠖꠦꠡ ꠖꠦꠈꠣꠔ ꠉꠦꠍꠤꠟ, ꠉꠤꠀ ꠀꠡꠇꠥꠟꠞ ꠙꠣꠠꠤꠀ ꠈꠣꠟ ꠙꠞ꠆ꠎꠘ꠆ꠔ ꠖꠦꠈꠍꠤꠟ, ꠖꠦꠈꠤꠀ ꠀꠁꠀ ꠢꠃ ꠖꠦꠡꠅ ꠎꠣꠁꠔꠦ ꠄꠞꠣꠞ ꠝꠘꠅꠛꠟ ꠜꠣꠋꠉꠤ ꠖꠤꠍꠤꠟ। 10 ꠄꠞꠟꠣꠉꠤ ꠢꠃ ꠖꠤꠘ ꠉꠥꠍꠣꠄ ꠀꠉꠥꠁꠘ ꠅꠁꠀ ꠝꠣꠛꠥꠖꠦ ꠇꠍꠝ ꠈꠣꠁꠀ ꠇꠁꠍꠟꠣ, 11 ꠀꠝꠤ ꠝꠣꠛꠥꠖꠦ ꠎꠦ ꠖꠦꠡ ꠖꠤꠛꠣꠞ ꠟꠣꠉꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠇꠍꠝ ꠈꠣꠁꠍꠟꠣꠝ, ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠅꠀ ꠝꠣꠘꠡꠞ ꠝꠣꠎꠦ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠤ ꠇꠥꠘꠥ ꠎꠘꠦ ꠁ ꠖꠦꠡ ꠖꠦꠈꠣꠞ ꠡꠥꠎꠥꠉ ꠙꠣꠁꠔꠣ ꠘꠣꠄ, ꠇꠦꠘꠦꠘꠣ ꠔꠣꠞꠣ ꠀꠝꠣꠞ ꠇꠕꠣ ꠙꠥꠞꠣꠙꠥꠞ ꠡꠥꠟ꠆ꠟꠀꠘꠣ ꠝꠣꠘꠍꠦ ꠘꠣ। 12 ꠈꠣꠟꠤ ꠇꠘꠤꠎꠤ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠀꠞ ꠘꠥꠘꠞ ꠙꠥꠔ ꠁꠃꠍꠣꠄ ꠅꠃ ꠖꠦꠡ ꠖꠦꠈꠣꠞ ꠡꠥꠎꠥꠉ ꠙꠣꠁꠛꠣ। ꠔꠣꠞꠣ ꠔ ꠀꠝꠣꠞ ꠇꠕꠣꠞꠦ ꠡꠥꠟ꠆ꠟꠀꠘꠣ ꠝꠣꠘꠍꠦ। 13 ꠢꠃ ꠡꠝꠄ ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠍꠟꠣ, ꠄꠞꠟꠣꠉꠤ ꠔꠣꠘ ꠘꠎꠞꠅ ꠘꠣꠚꠞꠝꠣꠘꠤ ꠇꠞꠞꠣ ꠅꠔꠣ ꠝꠣꠘꠡꠞ ꠛꠤꠘꠣꠡ ꠘꠣ ꠅꠀ ꠙꠞ꠆ꠎꠘ꠆ꠔ, ꠌꠣꠟ꠆ꠟꠤꠡ ꠛꠍꠞ ꠗꠞꠤ ꠝꠞꠥꠜꠥꠝꠤꠞ ꠘꠣꠘꠣꠘ ꠎꠣꠉꠣꠔ ꠁꠔꠣꠞꠦ ꠌꠇ꠆ꠇꠞ ꠖꠦꠅꠀꠁꠟꠣ।

14 “ꠀꠞ ꠢꠃ ꠉꠥꠘꠣꠉꠣꠞ ꠅꠇꠟꠞ ꠀꠅꠟꠣꠖ ꠅꠀꠄ, ꠅꠈꠘ ꠔꠥꠝꠞꠣꠅ ꠎꠣꠞꠎꠤꠞ ꠛꠣꠚ-ꠖꠣꠖꠣꠞ ꠈꠣꠁꠍꠟꠔ ꠙꠣꠁꠍ, ꠄꠞꠟꠣꠉꠤ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠝꠣꠛꠥꠖꠞ ꠉꠥꠍꠣꠞ ꠀꠉꠥꠁꠘꠞꠦ ꠀꠞꠅ ꠛꠣꠠꠣꠁꠛꠣꠄ। 15 ꠅꠈꠘ ꠔꠥꠝꠞꠣ ꠎꠥꠖꠤ ꠔꠣꠘ ꠢꠥꠇꠥꠝ ꠝꠣꠚꠤꠇ ꠘꠣ ꠌꠟꠅ, ꠔꠦ ꠔꠣꠁꠘ ꠢꠤꠞꠛꠣꠞ ꠅꠔꠣ ꠝꠣꠘꠡꠞꠦ ꠝꠞꠥꠜꠥꠝꠤꠔ ꠚꠣꠟꠣꠁ ꠕꠁꠛꠣ, ꠔꠣꠘ ꠁ ꠟꠣꠘ꠆ꠘꠔꠞ ꠇꠣꠞꠘ ꠅꠁꠛꠣꠄ ꠔꠥꠝꠞꠣꠃ।”

16 ꠁꠔꠣ ꠢꠥꠘꠤꠀ ꠔꠣꠞꠣ ꠝꠥꠍꠣꠞ ꠗꠣꠞꠅ ꠜꠤꠠꠤꠀ ꠇꠁꠟꠣ, “ꠍꠣꠛ, ꠀꠝꠞꠣ ꠔ ꠈꠣꠟꠤ ꠙꠡꠥꠞ ꠙꠣꠟ ꠞꠣꠈꠣꠞ ꠎꠣꠉꠣ ꠛꠣꠘꠣꠘꠤ ꠀꠞ ꠀꠝꠞꠣꠞ ꠛꠃ-ꠛꠣꠁꠌ꠆ꠌꠣꠞꠦ ꠕꠅꠀꠞ ꠟꠣꠉꠤ ꠅꠘꠅ ꠐꠣꠃꠘ ꠅꠇꠟ ꠛꠣꠘꠣꠘꠤꠞ ꠁꠎꠣꠎꠔ ꠌꠣꠁꠍꠤ। 17 ꠅꠁꠟꠦ ꠛꠘꠤ ꠁꠍꠞꠣꠁꠟꠞꠦ ꠘꠤꠎꠞ ꠎꠣꠉꠣꠔ ꠘꠣ ꠙꠃꠍꠣꠘꠤ ꠙꠞ꠆ꠎꠘ꠆ꠔ ꠀꠝꠞꠣ ꠎꠥꠖ꠆ꠖꠞ ꠍꠤꠙꠣꠁꠞ ꠟꠣꠈꠣꠘ ꠔꠣꠞꠣꠞ ꠀꠉꠦ ꠀꠉꠦ ꠎꠣꠁꠝꠥ। ꠄꠞꠝꠣꠎꠦ ꠀꠝꠞꠣꠞ ꠛꠃ-ꠛꠣꠁꠌ꠆ꠌꠣꠁꠘ ꠛꠣꠃꠘ꠆ꠒꠞꠤ ꠇꠞꠣ ꠅꠃ ꠐꠣꠃꠘꠅ ꠞꠁꠟꠦ, ꠅꠔꠣ ꠖꠦꠡꠞ ꠝꠣꠘꠡꠞ ꠀꠔ ꠕꠣꠇꠤ ꠔꠣꠞꠣ ꠘꠤꠞꠣꠙꠖꠦ ꠞꠁꠛꠣ। 18 ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠞꠎꠤꠞ ꠎꠝꠤ-ꠝꠤꠞꠣꠡ ꠘꠣ ꠡꠝꠎꠣꠘꠤ ꠙꠞ꠆ꠎꠘ꠆ꠔ ꠀꠝꠞꠣ ꠘꠤꠎꠞ ꠊꠞꠅ ꠚꠤꠞꠤꠀ ꠀꠁꠔꠣꠝ ꠘꠣꠄ। 19 ꠀꠞ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠛꠘꠤ ꠁꠍꠞꠣꠁꠟꠞ ꠟꠉꠦ ꠀꠝꠞꠣ ꠇꠥꠘꠥ ꠎꠝꠤ-ꠎꠝꠣꠞ ꠛꠣꠐꠅ ꠘꠤꠔꠣꠝ ꠘꠣꠄ, ꠇꠦꠘꠦꠘꠣ ꠀꠝꠞꠣꠞ ꠛꠣꠐ ꠔ ꠉꠣꠋꠉꠞ ꠅꠃ ꠙꠥꠛꠞ ꠙꠣꠞꠅꠃ ꠝꠤꠟꠤꠉꠦꠍꠦ।”

20 ꠁꠈꠣꠘ ꠢꠥꠘꠤꠀ ꠝꠥꠍꠣꠄ ꠇꠁꠟꠣ, “ꠀꠁꠌ꠆ꠍꠣ, ꠔꠥꠝꠞꠣ ꠎꠥꠖꠤ ꠢꠣꠍꠣꠃ ꠁꠟꠣ ꠇꠞꠅ, ꠀꠟ꠆ꠟꠣꠞꠦ ꠀꠎꠤꠞ-ꠘꠣꠎꠤꠞ ꠎꠣꠘꠤꠀ ꠎꠥꠖ꠆ꠖꠞ ꠢꠣꠎꠦ ꠀꠔꠤꠀꠞ ꠟꠁꠀ ꠎꠥꠖꠤ ꠢꠘꠅ ꠟꠣꠠꠣꠁꠔ ꠎꠣꠅ, 21 ꠀꠞ ꠀꠟ꠆ꠟꠣꠄ ꠎꠔꠛꠁꠟ ꠔꠣꠘ ꠖꠥꠡꠝꠘ ꠅꠇꠟꠞꠦ ꠔꠣꠘ ꠍꠣꠝꠘꠦ ꠕꠣꠇꠤ ꠈꠦꠖꠣꠁꠀ ꠘꠣ ꠖꠦꠁꠘ ꠅꠔꠛꠁꠟ ꠔꠥꠝꠞꠣ ꠎꠥꠖ꠆ꠖꠞ ꠢꠣꠎꠦ ꠔꠣꠘ ꠟꠣꠉꠤ ꠉꠣꠋ ꠙꠣꠞ ꠅꠁꠀ ꠢꠙꠣꠞꠅ ꠎꠥꠖꠤ ꠎꠣꠅ, 22 ꠔꠦ ꠢꠃ ꠖꠦꠡꠅ ꠝꠣꠛꠥꠖꠞ ꠖꠈꠟꠖꠣꠞꠤ ꠇꠣꠁꠝ ꠅꠁꠀ ꠢꠣꠞꠟꠦ ꠔꠥꠝꠞꠣ ꠅꠘꠅ ꠚꠤꠞꠔ ꠀꠁꠔꠣꠄ ꠙꠣꠞꠛꠣꠄ। ꠔꠦꠃ ꠝꠣꠛꠥꠖ ꠀꠞ ꠛꠣꠖ-ꠛꠣꠇꠤ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠔꠥꠝꠞꠣꠞ ꠎꠦ ꠖꠣꠄ-ꠖꠣꠄꠁꠔ꠆ꠔ ꠀꠍꠤꠟ, ꠁꠔꠣ ꠕꠣꠇꠤ ꠈꠣꠟꠣꠍ ꠅꠁꠛꠣꠄ; ꠀꠞ ꠝꠣꠛꠥꠖꠞ ꠈꠥꠡꠤ ꠝꠣꠚꠤꠇ ꠅꠃ ꠎꠝꠤꠘꠅ ꠔꠥꠝꠞꠣꠞ ꠝꠣꠟꠤꠇꠣꠘꠣ ꠇꠣꠁꠝ ꠅꠁꠛ। 23 ꠅꠁꠟꠦ ꠔꠥꠝꠞꠣ ꠎꠥꠖꠤ ꠁꠟꠣ ꠘꠣ ꠇꠞꠅ, ꠔꠦ ꠔꠥꠝꠞꠣ ꠝꠣꠛꠥꠖꠞ ꠉꠦꠍꠦ ꠉꠥꠘꠣꠉꠣꠞ ꠛꠘꠛꠣꠄ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠙꠣꠙꠦ ꠔꠥꠝꠞꠣꠞꠦ ꠍꠣꠠꠔ ꠘꠣꠄ। 24 ꠅꠈꠘ ꠔꠥꠝꠞꠣꠞ ꠛꠃ-ꠛꠣꠁꠌ꠆ꠌꠣꠞ ꠟꠣꠉꠤ ꠐꠣꠃꠘ ꠅꠇꠟ ꠀꠞ ꠉꠞꠥ-ꠍꠣꠉꠟ ꠕꠅꠀꠞ ꠟꠣꠉꠤ ꠎꠣꠉꠣꠅ ꠛꠣꠘꠣꠁꠔꠣꠄ ꠙꠣꠞꠅ, ꠅꠁꠟꠦ ꠔꠥꠝꠞꠣ ꠎꠦꠈꠣꠘ ꠅꠀꠖꠣ ꠇꠞꠍ, ꠁꠔꠣ ꠙꠥꠞꠘ ꠇꠞꠣ ꠟꠣꠉꠛ।”

25 ꠔꠦꠃ ꠍꠣꠖꠥ ꠀꠞ ꠞꠥꠛꠦꠘ ꠈꠣꠘ꠆ꠖꠣꠘꠞ ꠝꠣꠘꠡꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, “ꠀꠙꠘꠦ ꠔ ꠀꠝꠞꠣꠞ ꠝꠣꠟꠤꠇ, ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ ꠀꠙꠘꠦ ꠎꠦꠟꠣ ꠢꠥꠇꠥꠝ ꠖꠤꠍꠂꠘ, ꠀꠝꠞꠣ ꠅꠟꠣꠃ ꠌꠟꠝꠥ। 26 ꠀꠝꠞꠣꠞ ꠛꠃ-ꠛꠣꠁꠌ꠆ꠌꠣꠁꠘ ꠀꠞ ꠉꠞꠥ-ꠍꠣꠉꠟꠞ ꠙꠣꠟ ꠅꠘꠞ ꠉꠤꠟꠤꠅꠖ ꠄꠟꠣꠇꠣꠞ ꠐꠣꠃꠘ ꠅꠇꠟꠅ ꠞꠁꠛꠣ। 27 ꠅꠁꠟꠦ ꠀꠝꠞꠣ ꠀꠝꠞꠣꠞ ꠝꠣꠟꠤꠇꠞ ꠢꠥꠇꠥꠝ ꠝꠣꠚꠤꠇ ꠎꠥꠖ꠆ꠖꠞ ꠡꠣꠎ-ꠡꠞꠘ꠆ꠎꠣꠝ ꠟꠁꠀ ꠉꠣꠋ ꠙꠣꠞ ꠅꠁꠀ ꠝꠣꠛꠥꠖꠞ ꠘꠣꠝꠦ ꠟꠣꠠꠣꠁ ꠇꠞꠣꠔ ꠎꠣꠁꠝꠥ।”

28 ꠔꠦꠃ ꠝꠥꠍꠣꠄ ꠅꠔꠣ ꠝꠣꠘꠡꠞ ꠛꠦꠙꠣꠞꠦ ꠁꠝꠣꠝ ꠀꠟꠤ-ꠀꠎꠞ, ꠘꠥꠘꠞ ꠙꠥꠀ ꠁꠃꠍꠣ, ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘꠞ ꠘꠣꠘꠣꠘ ꠉꠥꠡ꠆ꠐꠤꠞ ꠝꠥꠞꠛ꠆ꠛꠤ ꠅꠇꠟꠞꠦ ꠢꠥꠇꠥꠝ ꠖꠤꠟꠣ। 29 ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠍꠣꠖꠥ ꠀꠞ ꠞꠥꠛꠦꠘ ꠈꠣꠘ꠆ꠖꠣꠘꠞ ꠢꠇꠟ ꠛꠦꠐꠣꠁꠘ ꠎꠥꠖꠤ ꠢꠣꠍꠣꠃ ꠎꠥꠖ꠆ꠖꠞ ꠡꠣꠎ-ꠡꠞꠘ꠆ꠎꠣꠝ ꠟꠁꠀ ꠝꠣꠛꠥꠖꠞ ꠘꠣꠝꠦ ꠟꠣꠠꠣꠁ ꠇꠞꠣꠞ ꠘꠤꠅꠔꠦ ꠔꠥꠝꠞꠣꠞ ꠟꠉꠦ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠎꠣꠁꠘ, ꠔꠦ ꠢꠃ ꠖꠦꠡ ꠎꠦꠛꠟꠣ ꠔꠥꠝꠞꠣꠞ ꠖꠈꠟꠅ ꠀꠁꠛ, ꠅꠃ ꠡꠝꠄ ꠔꠥꠝꠞꠣ ꠉꠤꠟꠤꠅꠖ ꠄꠟꠣꠇꠣꠞꠦ ꠔꠣꠞꠣꠞ ꠝꠣꠟꠤꠇꠣꠘꠣꠄ ꠡꠝꠎꠣꠁ ꠖꠤꠅ। 30 ꠅꠁꠟꠦ ꠔꠣꠞꠣ ꠎꠥꠖꠤ ꠁꠟꠣ ꠘꠣ ꠇꠞꠂꠘ, ꠔꠦ ꠢꠃ ꠇꠦꠘꠣꠘ ꠖꠦꠡꠅꠃ ꠔꠥꠝꠞꠣꠞ ꠟꠉꠦ ꠔꠣꠞꠣꠞ ꠛꠣꠐ ꠘꠤꠛꠣ।”

31 ꠁꠈꠣꠘ ꠢꠥꠘꠤꠀ ꠍꠣꠖꠥ ꠀꠞ ꠞꠥꠛꠦꠘ ꠈꠣꠘ꠆ꠖꠣꠘꠞ ꠝꠣꠘꠡꠦ ꠇꠁꠟꠣ, “ꠝꠣꠛꠥꠖꠦ ꠔꠣꠘ ꠁ ꠉꠥꠟꠣꠝ ꠅꠇꠟꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠂꠘ, ꠀꠝꠞꠣ ꠅꠟꠣꠃ ꠇꠞꠝꠥ। 32 ꠀꠝꠞꠣ ꠝꠣꠛꠥꠖꠞ ꠘꠣꠝꠦ ꠎꠥꠖ꠆ꠖꠞ ꠡꠣꠎ-ꠡꠞꠘ꠆ꠎꠣꠝ ꠟꠁꠀ ꠎꠞ꠆ꠖꠣꠘ ꠉꠣꠋ ꠙꠣꠞ ꠅꠁꠀ ꠇꠦꠘꠣꠘ ꠖꠦꠡꠅ ꠎꠣꠁꠝꠥ, ꠅꠁꠟꠦ ꠀꠝꠞꠣꠞ ꠎꠝꠤ-ꠎꠝꠣꠞ ꠛꠣꠐ ꠉꠣꠋꠉꠞ ꠅꠙꠣꠞꠅ ꠞꠁꠟ।”

33 ꠁꠈꠣꠘ ꠢꠥꠘꠤꠀ ꠝꠥꠍꠣ ꠘꠛꠤ ꠞꠣꠎꠤ ꠅꠁꠟꠣ। ꠔꠣꠁꠘ ꠍꠣꠖꠥ ꠀꠞ ꠞꠥꠛꠦꠘ ꠈꠣꠘ꠆ꠖꠣꠘꠞꠦ, ꠄꠞꠟꠉꠦ ꠁꠃꠍꠥꠚꠞ ꠙꠥꠀ ꠝꠣꠘꠡꠣ ꠈꠣꠘ꠆ꠖꠣꠘꠞ ꠅꠞ꠆ꠗꠦꠇ ꠝꠣꠘꠡꠞꠦ, ꠅꠃ ꠎꠣꠉꠣꠁꠘ ꠖꠤꠟꠣ। ꠝꠥꠍꠣꠄ ꠀꠝꠥꠞꠤ ꠅꠇꠟꠞ ꠛꠣꠖꠡꠣ ꠍꠤꠢꠥꠘ ꠀꠞ ꠛꠣꠡꠘꠞ ꠛꠣꠖꠡꠣ ꠃꠎꠞ ꠀꠡ꠆ꠔꠣ ꠞꠣꠎꠔ꠆ꠔꠞ ꠢꠇꠟ ꠐꠣꠃꠘ ꠀꠞ ꠉꠣꠃ-ꠉꠦꠞꠣꠝ ꠡꠢ ꠡꠛ ꠎꠝꠤ-ꠝꠤꠞꠣꠡ ꠔꠣꠞꠣꠞ ꠟꠣꠉꠤ ꠕꠁꠟꠣ। 34 ꠔꠦꠃ ꠍꠣꠖꠥ ꠈꠣꠘ꠆ꠖꠣꠘꠞ ꠝꠣꠘꠡꠦ ꠖꠤꠛꠣꠘ, ꠅꠐꠣꠞꠥꠔ, ꠀꠞꠥꠀꠞ, 35 ꠀꠐꠞꠥꠔ-ꠡꠥꠚꠣꠘ, ꠎꠣꠎꠤꠞꠣ, ꠎꠉꠛꠤꠀ, 36 ꠛꠣꠄꠔ-ꠘꠤꠝꠞꠣ, ꠛꠣꠄꠔ-ꠢꠣꠞꠣꠘ ꠘꠣꠝꠞ ꠉꠣꠃꠀꠁꠘ ꠀꠞ ꠐꠣꠃꠘ ꠅꠇꠟꠞꠦ ꠃꠌꠣ ꠃꠌꠣ ꠛꠣꠃꠘ꠆ꠒꠞꠤ ꠅꠀꠟ ꠉꠣꠕꠤꠀ ꠝꠎꠛꠥꠔ ꠇꠞꠟꠣ। ꠄꠞꠟꠉꠦ ꠔꠣꠞꠣꠞ ꠉꠞꠥ-ꠍꠣꠉꠟ ꠕꠁꠛꠣꠞ ꠎꠣꠉꠣꠅ ꠛꠣꠘꠣꠁꠟꠣ। 37 ꠞꠥꠛꠦꠘ ꠈꠣꠘ꠆ꠖꠣꠘꠞ ꠝꠣꠘꠡꠦ ꠢꠤꠡꠛꠘ, ꠁꠟꠤꠀꠟꠤ, ꠇꠤꠞꠤꠀꠔꠣꠁꠝ ꠐꠣꠃꠘ, 38 ꠀꠞ ꠘꠛꠅ, ꠛꠣꠀꠟ-ꠝꠤꠃꠘ, ꠍꠤꠛꠝꠣ ꠘꠣꠝꠞ ꠉꠣꠃꠀꠁꠘ ꠑꠤꠇ-ꠑꠣꠇ ꠇꠞꠟꠣ। ꠇꠞꠤꠀ ꠔꠣꠞꠣ ꠁꠔꠣꠞ ꠘꠄꠀ ꠘꠣꠝ ꠕꠁꠟꠣ। 39 ꠝꠣꠘꠡꠣꠞ ꠙꠥꠀ ꠝꠣꠈꠤꠞꠞ ꠀꠅꠟꠣꠖ ꠅꠇꠟꠦ ꠉꠤꠟꠤꠅꠖꠅ ꠉꠤꠀ ꠀꠉꠦꠃ ꠁꠔꠣ ꠖꠈꠟ ꠇꠞꠤꠟꠤꠍꠤꠟ, ꠀꠞ ꠢꠘꠞ ꠛꠣꠡꠤꠘ꠆ꠖꠣ ꠀꠝꠥꠞꠤ ꠅꠇꠟꠞꠦ ꠈꠦꠖꠣꠁ ꠖꠤꠍꠤꠟ। 40 ꠄꠞꠟꠣꠉꠤ ꠝꠥꠍꠣꠄ ꠝꠣꠘꠡꠣꠞ ꠅꠃ ꠀꠅꠟꠣꠖ ꠝꠣꠈꠤꠞꠤ ꠅꠇꠟꠞ ꠛꠣꠐꠅ ꠉꠤꠟꠤꠅꠖ ꠄꠟꠣꠇꠣꠞꠦ ꠖꠤꠟꠣꠁꠟꠣ, ꠔꠣꠞꠣ ꠅꠘꠅ ꠛꠡꠔ ꠇꠞꠟꠣ। 41 ꠄꠞꠝꠣꠎꠦ ꠝꠣꠘꠡꠣ ꠈꠣꠘ꠆ꠖꠣꠘꠞ ꠎꠣꠄꠁꠞ ꠘꠣꠝꠞ ꠄꠇꠎꠘꠦ ꠉꠤꠀ ꠀꠝꠥꠞꠤ ꠅꠇꠟꠞ ꠢꠇꠟ ꠉꠣꠃ-ꠉꠦꠞꠣꠝ ꠖꠈꠟ ꠇꠞꠤꠟꠤꠍꠤꠟ, ꠀꠞ ꠁꠔꠣꠞ ꠘꠣꠝ ꠖꠤꠍꠤꠟ ꠢꠣꠛ꠆ꠛꠥꠔ-ꠎꠣꠄꠁꠞ। 42 ꠀꠞ ꠘꠥꠛꠣ ꠘꠣꠝꠞ ꠄꠇꠎꠘꠦ ꠉꠤꠀ ꠇꠘꠣꠔ ꠀꠞ ꠄꠞ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃ-ꠉꠦꠞꠣꠝ ꠅꠇꠟ ꠖꠈꠟ ꠇꠞꠤꠀ, ꠔꠣꠞ ꠘꠤꠎꠞ ꠘꠣꠝꠦ ꠁ ꠎꠣꠉꠣꠞ ꠘꠣꠝ ꠖꠤꠟ ꠘꠥꠛꠣ।