ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ২৭ ꠘꠝ꠆ꠛꠞ ꠍꠤꠙꠣꠞꠣ
ꠎꠣꠁꠞꠣ ꠇꠣꠟꠣꠝ
ꠙꠞꠤꠌꠤꠔꠤ
ꠎꠣꠁꠞꠣ ꠇꠣꠟꠣꠝ ꠍꠤꠙꠣꠞꠣꠈꠣꠘ ꠅꠁꠟ, ꠀꠍꠝꠣꠘꠤ ꠇꠤꠔꠣꠛ ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚꠞ ꠡꠦꠡ ꠍꠤꠙꠣꠞꠣ। ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠅꠃ ꠍꠤꠙꠣꠞꠣ ꠟꠦꠈꠍꠂꠘ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠝꠣꠄꠀꠞ ꠍꠣꠢꠣꠛꠤ ꠢꠎꠞꠔ ꠢꠣꠘ꠆ꠘꠣꠘ (ꠞꠣ꠩)। ꠢꠎꠞꠔ ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠛꠣꠖꠦ ৬০-৬৫ ꠛꠍꠞꠞ ꠇꠣꠟꠅ ꠁꠈꠣꠘ ꠟꠦꠈꠣ ꠅꠁꠍꠦ। ꠅꠃ ꠍꠤꠙꠣꠞꠣ ꠟꠦꠈꠣꠞ ꠡꠝꠄ ꠀꠟ-ꠝꠍꠤꠞ ꠃꠝ꠆ꠝꠔ ꠅꠇꠟꠞ ꠃꠙꠞꠦ ꠈꠥꠛ ꠛꠦꠡꠤ ꠎꠥꠟꠥꠝ-ꠅꠔꠣꠌꠣꠞ ꠀꠍꠤꠟ। ꠅꠃ ꠢꠣꠟꠔꠞ ꠝꠣꠎꠦ ꠝꠥꠝꠤꠘ ꠅꠇꠟꠞꠦ ꠀꠡꠣ-ꠃꠔꠡꠣꠢ ꠎꠥꠉꠣꠘꠤ, ꠍꠛꠞ ꠇꠞꠣ, ꠀꠞ ꠅꠃ ꠎꠥꠟꠥꠝꠞ ꠝꠣꠎꠦꠅ ꠁꠝꠣꠘꠦ ꠝꠎꠛꠥꠔ ꠞꠁꠀ ꠀꠟ꠆ꠟꠣꠞ ꠖꠞꠛꠣꠞꠞ ꠙꠥꠞꠥꠡ꠆ꠇꠣꠞꠞ ꠟꠣꠉꠤ ꠎꠥꠁꠔ ꠞꠁꠔꠦ ꠙꠞꠣꠝꠤꠡ ꠖꠦꠅꠀ ꠅꠁꠍꠦ। ꠅꠃ ꠍꠤꠙꠣꠞꠣꠞ ꠟꠉꠦ ꠀꠉꠞ ꠎꠝꠣꠘꠣꠞ ꠘꠛꠤ ꠢꠎꠞꠔ ꠖꠣꠘꠤꠀꠟ, ꠢꠎꠞꠔ ꠢꠦꠎꠇꠤꠟ ꠀꠞ ꠢꠎꠞꠔ ꠎꠣꠇꠣꠞꠤꠀ (ꠀ꠩) ꠅꠞ ꠇꠤꠔꠣꠛꠞ ꠟꠉꠦ ꠛꠃꠔ ꠝꠤꠟ ꠀꠍꠦ। ꠄꠞ ꠝꠣꠎꠦ ꠟꠦꠈꠣ ꠀꠍꠦ, ꠇꠤꠀꠝꠔꠞ ꠀꠉꠦ ꠝꠥꠝꠤꠘ ꠅꠇꠟꠞ ꠢꠣꠟ-ꠢꠇꠤꠇꠔ ꠇꠤꠟꠣ ꠅꠁꠛ, ꠇꠔ ꠛꠦꠡꠤ ꠎꠥꠟꠥꠝ-ꠝꠍꠤꠛꠔ ꠅꠁꠛ, ꠛꠣꠖꠦ ꠀꠟ꠆ꠟꠣ ꠙꠣꠇꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠟꠣꠘ꠆ꠘꠔꠤ ꠡꠄꠔꠣꠘꠞꠦ ꠄꠇ꠆ꠇꠦꠛꠣꠞꠦ ꠛꠤꠘꠣꠡ ꠇꠞꠤꠟꠤꠛꠣ, ꠀꠞ ꠅꠃ ꠡꠝꠄ ꠎꠦꠞꠣ ꠁꠝꠣꠘꠦ ꠝꠎꠛꠥꠔ ꠞꠁꠛꠣ, ꠔꠣꠞꠣ ꠀꠟ꠆ꠟꠣꠞ ꠖꠞꠛꠣꠞ ꠕꠣꠇꠤ ꠙꠥꠞꠥꠡ꠆ꠇꠣꠞ ꠙꠣꠁꠛꠣ।
ꠁ ꠍꠤꠙꠣꠞꠣꠔ ꠙꠣꠁꠛꠣ, ꠡꠣꠔꠐꠣ ꠁꠍꠣꠄꠁ ꠎꠝꠣꠔꠞ ꠉꠦꠍꠦ ꠌꠤꠑꠤꠞ ꠜꠣꠡꠣꠄ ꠛꠄꠀꠘꠤ ꠟꠦꠈꠣ ꠀꠍꠦ। ꠅꠃ ꠡꠣꠔꠅ ꠎꠝꠣꠔꠞ ꠑꠤꠇꠣꠘꠣ ꠅꠁꠟꠉꠤ, ꠢꠃ ꠀꠝꠟꠞ ꠞꠥꠝꠣꠘ ꠛꠣꠖꠡꠣꠁꠞ ꠀꠍꠤꠀ ꠖꠦꠡ, ꠛꠞ꠆ꠔꠝꠣꠘ ꠔꠥꠞꠡ꠆ꠇ ꠖꠦꠡꠞ ꠙꠌ꠆ꠌꠤꠝ ꠄꠟꠣꠇꠣ। ꠎꠝꠣꠔꠞ ꠢꠣꠟ-ꠢꠇꠤꠇꠔ ꠛꠥꠎꠣ, ꠀꠞ ꠀꠝꠞꠣ ꠎꠣꠘꠤꠀ ꠢꠣꠞꠤ ꠘꠤꠎꠞ ꠎꠤꠘ꠆ꠖꠦꠉꠤꠔ ꠀꠝꠟ ꠇꠞꠣ ꠎꠞꠥꠞ।
ꠅꠃ ꠍꠤꠙꠣꠞꠣꠔ ꠛꠃꠔ ꠛꠣꠔꠥꠘꠤ ꠘꠝ꠆ꠛꠞ ꠟꠦꠈꠣ ꠀꠍꠦ। ꠅꠃ ꠘꠝ꠆ꠛꠞꠞ ꠇꠤꠍꠥ ꠝꠣꠘꠤ ꠅꠃꠟꠣ ꠅꠁꠔ ꠙꠣꠞꠦ:
২ = ꠢꠇꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠦꠅꠀ; ꠢꠣꠝꠦꠡꠣ ꠖꠥꠁꠎꠘꠞ ꠡꠣꠇ꠆ꠇꠤ ꠎꠞꠥꠞ।
৪ = ꠀꠟ꠆ꠟꠣꠞ ꠀꠞꠡ ꠀꠞ ꠅꠃ ꠛꠦꠙꠣꠞꠦ; ꠄꠞꠟꠣꠉꠤ ꠇꠣꠛꠣ ꠡꠞꠤꠚ ꠅꠁꠟ ꠌꠣꠁꠞꠇꠥꠘꠤ, ꠎꠣꠔꠦ ꠅꠃ ꠀꠞꠡꠞ ꠟꠉꠦ ꠝꠤꠟ ꠖꠦꠈꠣ ꠎꠣꠄ।
৬ = ꠝꠣꠘꠥꠡ ꠀꠞ ꠉꠥꠘꠣꠉꠣꠞ ꠝꠣꠘꠡꠞ ꠛꠦꠙꠣꠞꠦ; ꠍꠄ ꠘꠝ꠆ꠛꠞ ꠖꠤꠘ ꠝꠣꠘꠥꠡ ꠙꠄꠖꠣ, ꠀꠞ ꠍꠄ ꠅꠁꠟ ꠙꠛꠤꠔ꠆ꠞ ꠘꠝ꠆ꠛꠞ ৭ ꠕꠣꠇꠤ ꠇꠝ। ꠄꠞꠟꠣꠉꠤ ৬৬৬ ꠛꠥꠎꠣꠄ, ꠇꠤꠀꠝꠔꠞ ꠀꠉꠦ ꠀꠡ꠆ꠔꠣ ꠖꠥꠘꠤꠀꠞꠦ ꠛꠦ-ꠙꠕꠦ ꠘꠤꠛꠣꠞ ꠟꠣꠉꠤ ꠎꠦ ꠖꠞ꠆ꠎꠣꠟ ꠀꠁꠛ ꠔꠣꠞ ꠘꠣꠝꠞ ꠝꠣꠞ꠆ꠇꠣ ꠛꠣ ꠘꠝ꠆ꠛꠞ।
৭ = ꠀꠟ꠆ꠟꠣꠞ ꠙꠛꠤꠔ꠆ꠞ ꠘꠝ꠆ꠛꠞ, ꠈꠣꠍ ꠇꠞꠤ ꠔꠣꠘ ꠘꠤꠎꠞ ꠙꠥꠞꠣꠙꠥꠞ ꠇꠣꠝꠞ ꠛꠦꠙꠣꠞꠦ; ꠡꠣꠔ ꠖꠤꠘꠦ ꠀꠍꠝꠣꠘ-ꠎꠝꠤꠘꠞ ꠢꠇꠟꠔꠣ ꠙꠄꠖꠣ, ꠅꠃ ꠍꠤꠙꠣꠞꠣꠞ ꠝꠣꠎꠦ ꠀꠟ꠆ꠟꠣꠞ ꠙꠥꠞꠣꠙꠥꠞ ꠙꠛꠤꠔ꠆ꠞ ꠙ꠆ꠞꠎꠣꠞ ꠡꠣꠔ ꠎꠝꠣꠔ, ꠀꠞ ꠔꠣꠘ ꠙꠥꠞꠣꠙꠥꠞ ꠉꠎꠛ ꠓꠣꠟꠤꠛꠣꠞ ꠡꠣꠔ ꠘꠝꠥꠘꠣ ꠛꠣꠞ ꠛꠣꠞ ꠃꠟ꠆ꠟꠦꠈ ꠇꠞꠣ ꠅꠁꠍꠦ।
১২ = ꠀꠟ꠆ꠟꠣꠞ ꠈꠣꠍ ꠙ꠆ꠞꠎꠣ; ꠢꠎꠞꠔ ꠁꠍꠣꠞ ꠀꠉꠦ ꠀꠍꠤꠟ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘ, ꠛꠣꠖꠦ ꠢꠎꠞꠔ ꠁꠍꠣꠞ ꠛꠣꠞꠅꠎꠘ ꠈꠣꠍ ꠍꠣꠢꠣꠛꠤ, ꠄꠞꠟꠣꠉꠤ ১২+১২=২৪ ꠀꠞ ১২×১২=১৪৪ ꠛꠥꠎꠣꠄ, ꠢꠇꠟ ꠎꠝꠣꠘꠣꠞ ꠀꠟ꠆ꠟꠣꠞ ꠈꠣꠍ ꠙ꠆ꠞꠎꠣ ꠅꠇꠟ।
১০০০ = ꠀꠡ꠆ꠔꠣ ꠖꠥꠘꠤꠀ ꠛꠣ ꠙꠥꠞꠣ ꠄꠇ ꠎꠥꠉ; ꠄꠞꠟꠣꠉꠤ ১৪৪০০০ ꠛꠥꠎꠣꠄ ꠢꠇꠟ ꠎꠝꠣꠘꠣꠞ ꠀꠞ ꠀꠡ꠆ꠔꠣ ꠖꠥꠘꠤꠀꠞ ꠀꠟ꠆ꠟꠣꠞ ꠈꠣꠍ ꠙ꠆ꠞꠎꠣ ꠅꠇꠟ।
১২৬০ = ꠡꠣꠔ ꠛꠍꠞꠞ ꠅꠞ꠆ꠗꠦꠇ ꠖꠤꠘ। ꠃꠙꠞꠞ ꠡꠣꠔ ꠖꠦꠈꠛꠣ।
ꠎꠣꠁꠞꠣ ꠇꠣꠟꠣꠝ ꠍꠤꠙꠣꠞꠣꠞ ꠝꠣꠎꠦ ꠘꠣꠘꠣꠘ ꠘꠝꠥꠘꠣꠞ ꠖꠞꠡꠘꠞ ꠝꠣꠎꠖꠤ, ꠅꠔꠤꠔ, ꠛꠞ꠆ꠔꠝꠣꠘ, ꠜꠛꠤꠡꠔ ꠢꠇꠟ ꠎꠝꠣꠘꠣꠞ ꠇꠕꠣ ꠟꠦꠈꠣ ꠅꠁꠍꠦ। ১ ꠞꠥꠇꠥ ১৯ ꠀꠄꠀꠔꠅ ꠀꠍꠦ, “ꠄꠞꠟꠣꠉꠤꠃ ꠔꠥꠝꠤ ꠅꠈꠘ ꠎꠦꠔꠣ ꠖꠦꠈꠞꠣꠄ, ꠄꠞ ꠀꠉꠦ ꠎꠦꠔꠣ ꠊꠐꠤꠍꠦ ꠀꠞ ꠛꠣꠖꠦ ꠎꠦꠔꠣ ꠊꠐꠤꠛ, ꠁꠔꠣ ꠢꠇ꠆ꠇꠟꠔꠣ ꠔꠥꠝꠤ ꠟꠦꠈꠤꠀ ꠕꠅ।”
ꠄꠞꠝꠣꠎꠦ ꠀꠍꠦ,
(ꠇ) ꠍꠣꠢꠣꠛꠤ ꠢꠣꠘ꠆ꠘꠣꠘꠞ ꠛꠦꠢꠦꠡ꠆ꠔꠤ ꠖꠞꠡꠘ ১ ꠞꠥꠇꠥ
(ꠈ) ꠡꠣꠔꠅ ꠎꠝꠣꠔꠞ ꠟꠣꠉꠤ ꠃꠙꠖꠦꠡ ২—৩ ꠞꠥꠇꠥ
(ꠉ) ꠀꠟ꠆ꠟꠣꠞ ꠙꠛꠤꠔ꠆ꠞ ꠔꠈ꠆ꠔꠞ ꠖꠞꠡꠘ ৪—৫ ꠞꠥꠇꠥ
(ꠊ) ꠉꠎꠛꠤ ꠡꠣꠔꠐꠣ ꠡꠤꠟ-ꠌꠣꠙ꠆ꠙꠠ ꠀꠞ ꠡꠣꠔꠐꠣ ꠡꠤꠋꠉꠣ ৬—১১ ꠞꠥꠇꠥ
(ꠌ) ꠡꠄꠔꠣꠘ ꠖꠣꠘꠛꠞ ꠟꠉꠦ ꠀꠟ꠆ꠟꠣꠞ ꠈꠣꠍ ꠛꠘ꠆ꠖꠣꠞ ꠎꠥꠖ꠆ꠖ ১২:১—১৪:৫ ꠀꠄꠀꠔ
(ꠍ) ꠀꠈꠦꠞꠤ ꠡꠣꠔꠐꠣ ꠉꠎꠛ ১৪:৬—১৬:২১
(ꠎ) ꠘꠣꠚꠞꠝꠣꠘ ꠛꠣꠛꠤꠟ ꠐꠣꠃꠘꠞ ꠛꠤꠌꠣꠞ ১৭:১—১৯:১০
(ꠏ) ꠀꠈꠦꠞꠣꠔꠞ ꠛꠤꠌꠣꠞ ১৯:১১—২০:১৫
(ꠐ) ꠘꠄꠀ ꠙꠄꠖꠣ ২১—২২ ꠞꠥꠇꠥ
ꠍꠣꠢꠣꠛꠤ ꠢꠣꠘ꠆ꠘꠣꠘꠞ ꠛꠦꠢꠦꠡ꠆ꠔꠤ ꠖꠞꠡꠘ (১:১-২০)
1
ꠍꠣꠟꠣꠝ ꠀꠞ ꠖꠥꠀ
1 ꠅꠃ ꠇꠤꠔꠣꠛꠅ ꠎꠔꠔꠣ ꠟꠦꠈꠣ ꠅꠁꠍꠦ, ꠁꠔꠣ ꠀꠟ꠆ꠟꠣ ꠙꠣꠇꠦ ꠁꠍꠣ ꠀꠟ-ꠝꠍꠤꠞꠦ ꠎꠣꠘꠣꠁꠍꠂꠘ, ꠀꠞ ꠀꠟ-ꠝꠍꠤꠄ ꠁꠔꠣ ꠎꠣꠁꠞ ꠇꠞꠍꠂꠘ। ꠕꠥꠠꠣ ꠖꠤꠘꠞ ꠜꠤꠔꠞꠦ ꠎꠦꠔꠣ ꠎꠦꠔꠣ ꠛꠦꠙꠣꠞ ꠘꠤꠌ꠆ꠌꠤꠔ ꠊꠐꠤꠛ, ꠁꠔꠣ ꠎꠣꠔꠦ ꠔꠣꠘ ꠉꠥꠟꠣꠝ ꠅꠇꠟꠦ ꠎꠣꠘꠂꠘ। ꠀꠟ-ꠝꠍꠤꠄ ꠔꠣꠘ ꠚꠤꠞꠤꠡ꠆ꠔꠣ ꠙꠣꠑꠣꠁꠀ ꠘꠤꠎꠞ ꠉꠥꠟꠣꠝ ꠍꠣꠢꠣꠛꠤ ꠢꠣꠘ꠆ꠘꠣꠘꠞꠦ ꠁꠔꠣ ꠢꠇꠟꠔꠣ ꠎꠣꠘꠣꠁꠟꠣ। 2 ꠍꠣꠢꠣꠛꠤ ꠢꠣꠘ꠆ꠘꠣꠘꠦ ꠀꠟ꠆ꠟꠣꠞ ꠇꠣꠟꠣꠝ ꠀꠞ ꠁꠍꠣ ꠀꠟ-ꠝꠍꠤꠞ ꠡꠣꠇ꠆ꠇꠤꠞ ꠛꠦꠙꠣꠞꠦ ꠎꠔ ꠖꠞꠡꠘ ꠖꠦꠈꠟꠣ, ꠅꠃ ꠖꠞꠡꠘꠞ ꠛꠦꠙꠣꠞꠦꠃ ꠔꠣꠁꠘ ꠎꠛꠣꠘꠛꠘ꠆ꠖꠤ ꠖꠤꠟꠣ। 3 ꠀꠞ ꠢꠃ ꠎꠘꠃ ꠘꠦꠇ-ꠇꠙꠣꠟꠤ, ꠎꠦꠁꠘ ꠁ ꠇꠣꠟꠣꠝꠞ ꠀꠉꠣꠝ ꠈꠛꠞ ꠅꠇꠟ ꠔꠤꠟꠣꠅꠔ ꠇꠞꠂꠘ, ꠀꠞ ꠔꠣꠞꠣꠅ ꠘꠦꠇ-ꠇꠙꠣꠟꠤ, ꠎꠦꠞꠣ ꠁ ꠇꠣꠟꠣꠝ ꠢꠥꠘꠂꠘ, ꠢꠥꠘꠤꠀ ꠢꠣꠞꠤ ꠀꠝꠟ ꠇꠞꠂꠘ; ꠇꠣꠞꠘ ꠡꠝꠄ ꠔ ꠗꠣꠞꠅ ꠀꠁꠌ꠆ꠍꠦ।
4-5 ꠔꠦ ꠀꠝꠤ ꠢꠣꠘ꠆ꠘꠣꠘꠦ ꠞꠥꠝꠣꠘ ꠛꠣꠖꠡꠣꠁꠞ ꠀꠍꠤꠀ ꠖꠦꠡꠞ ꠡꠣꠔꠅ ꠎꠝꠣꠔꠞ ꠉꠦꠍꠦ ꠅꠃ ꠎꠛꠣꠘꠛꠘ꠆ꠖꠤ ꠟꠦꠈꠞꠣꠝ। ꠎꠦꠁꠘ ꠀꠍꠟꠣ, ꠎꠦꠁꠘ ꠀꠍꠂꠘ ꠀꠞ ꠎꠦꠁꠘ ꠢꠣꠝꠦꠡꠣ ꠞꠁꠛꠣ ꠢꠃ ꠀꠟ꠆ꠟꠣ ꠙꠣꠇ, ꠀꠞ ꠔꠣꠘ ꠔꠈ꠆ꠔꠞ ꠍꠣꠝꠘꠦ ꠎꠦ ꠡꠣꠔ ꠘꠝꠥꠘꠣꠞ ꠞꠥꠢꠥ ꠕꠣꠇꠂꠘ, ꠄꠞꠣ ꠀꠞ ꠎꠦꠁꠘ ꠢꠇ-ꠢꠣꠟꠣꠟ ꠡꠣꠇ꠆ꠇꠤ ꠢꠃ ꠁꠍꠣ ꠀꠟ-ꠝꠍꠤꠄ ꠔꠥꠝꠞꠣꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠖꠣꠘ ꠇꠞꠃꠇ꠆ꠇꠣ। ꠔꠣꠁꠘ ꠔ ꠝꠥꠞ꠆ꠖꠣ ꠅꠇꠟꠞ ꠝꠣꠎ ꠕꠣꠇꠤ ꠙꠄꠟꠣ ꠎꠤꠘ꠆ꠖꠣ ꠅꠁꠀ ꠃꠑꠤꠍꠂꠘ, ꠔꠣꠁꠘꠃ ꠖꠥꠘꠤꠀꠞ ꠞꠣꠎꠣ ꠅꠇꠟꠞ ꠛꠣꠖꠡꠣ। ꠔꠣꠁꠘ ꠀꠝꠞꠣꠞꠦ ꠝꠢꠛ꠆ꠛꠔ ꠇꠞꠂꠘ, ꠄꠞꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠀ, ꠀꠝꠞꠣꠞꠦ ꠉꠥꠘꠣꠞ ꠡꠣꠎꠣ ꠕꠣꠇꠤ ꠛꠣꠌꠣꠁꠍꠂꠘ। 6 ꠔꠣꠁꠘ ꠀꠝꠞꠣꠞꠦ ꠟꠁꠀ ꠄꠇ ꠛꠣꠖꠡꠣꠁ ꠔꠤꠀꠞ ꠇꠞꠤꠀ, ꠔꠣꠘ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠄꠛꠣꠖꠔꠤꠞ ꠟꠣꠉꠤ ꠁꠝꠣꠝ ꠛꠣꠘꠣꠁꠍꠂꠘ। ꠔꠣꠘ ꠝꠢꠤꠝꠣ ꠀꠞ ꠇꠥꠖꠞꠔꠤ ꠛꠟ ꠢꠞ-ꠢꠣꠝꠦꠡꠣ ꠛꠅꠀꠁꠟ ꠞꠃꠇ। ꠀꠝꠤꠘ।
7 ꠢꠥꠘꠅ, ꠔꠣꠁꠘ ꠝꠦꠊꠞ ꠌꠣꠇꠣꠔ ꠅꠁꠀ ꠔꠡꠞꠤꠚ ꠀꠘꠞꠣ, ꠙꠞꠔꠦꠇꠦ ꠔꠣꠘꠞꠦ ꠌꠃꠈꠖꠤ ꠖꠦꠈꠛ, ꠎꠣꠞꠣ ꠟꠣꠇꠠꠤꠖꠤ ꠛꠣꠘꠣꠁꠟ ꠍꠟꠤꠛꠅ ꠉꠣꠕꠤꠀ ꠔꠣꠘꠞꠦ ꠎꠣꠘꠦ ꠝꠣꠞꠤꠟꠤꠍꠤꠟ ꠔꠣꠞꠣꠅ ꠖꠦꠈꠛ, ꠀꠞ ꠔꠣꠘ ꠟꠣꠉꠤ ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠎꠥꠞꠦ ꠎꠥꠞꠦ ꠇꠣꠘ꠆ꠖꠤꠛꠣ। ꠅꠃꠟꠣꠃ ꠅꠃꠇ, ꠀꠝꠤꠘ। 8 ꠀꠟ꠆ꠟꠣ ꠝꠣꠛꠥꠖꠦ ꠛꠣꠔꠣꠁꠞꠣ, “ꠀꠝꠤꠃ ꠀꠟꠤꠚ ꠀꠞ ꠁꠀ, ꠎꠦꠁꠘ ꠀꠍꠂꠘ, ꠎꠦꠁꠘ ꠀꠍꠟꠣ ꠀꠞ ꠎꠦꠁꠘ ꠢꠣꠝꠦꠡꠣ ꠞꠁꠛꠣ। ꠀꠝꠤꠃ ꠡꠞ꠆ꠛ-ꠡꠇ꠆ꠔꠤꠝꠣꠘ।”
ꠢꠎꠞꠔ ꠁꠍꠣꠞ ꠘꠥꠞꠞ ꠍꠥꠞꠔ
9 ꠀꠝꠤ ꠔ ꠔꠥꠝꠞꠣꠞ ꠜꠣꠁ ꠢꠣꠘ꠆ꠘꠣꠘ, ꠢꠎꠞꠔ ꠁꠍꠣꠞ ꠃꠝ꠆ꠝꠔ ꠅꠀꠄ ꠀꠝꠤꠅ ꠔꠥꠝꠞꠣꠞ ꠟꠣꠈꠣꠘ ꠄꠇꠁ ꠇꠡ꠆ꠐ, ꠄꠇꠁ ꠛꠣꠖꠡꠣꠁ ꠀꠞ ꠄꠇꠁ ꠍꠛꠞꠞ ꠜꠣꠉꠤ ꠅꠁꠍꠤ। ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠣꠄ ꠀꠞ ꠁꠍꠣꠞ ꠙꠇ꠆ꠇꠦ ꠎꠛꠣꠘꠛꠘ꠆ꠖꠤ ꠖꠦꠅꠀꠄ ꠀꠝꠣꠞꠦ ꠙꠣꠔꠝꠥꠍ ꠘꠣꠝꠞ ꠖꠤꠙꠅ ꠘꠤꠀ ꠛꠘꠛꠣꠡ ꠖꠦꠅꠀ ꠅꠁꠍꠤꠟ। 10 ꠄꠞꠝꠣꠎꠦ ꠢꠎꠞꠔ ꠁꠍꠣꠞ ꠙꠛꠤꠔ꠆ꠞ ꠖꠤꠘ, ꠄꠇ ꠞꠛꠤꠛꠣꠞꠦ ꠀꠝꠤ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠝꠣꠎꠦ ꠙꠥꠞꠣꠙꠥꠞ ꠒꠥꠛꠤ ꠉꠦꠟꠣꠝ, ꠅꠝꠘ ꠡꠝꠄ ꠀꠝꠣꠞ ꠈꠞꠦꠖꠤ ꠡꠤꠋꠉꠣꠞ ꠀꠅꠀꠎꠞ ꠟꠣꠈꠣꠘ ꠄꠇ ꠀꠅꠀꠎ ꠢꠥꠘꠟꠣꠝ। 11 ꠢꠥꠘꠟꠣꠝ, ꠇꠥꠘꠥ ꠄꠇ ꠎꠘꠦ ꠀꠝꠣꠞꠦ ꠇꠁꠞꠣ, “ꠢꠥꠘꠅ, ꠔꠥꠝꠤ ꠅꠈꠘ ꠎꠦꠔꠣ ꠖꠦꠈꠞꠣꠄ, ꠁꠔꠣ ꠄꠇ ꠇꠤꠔꠣꠛꠅ ꠟꠦꠈꠅ, ꠟꠦꠈꠤꠀ ꠁꠚꠤꠍ, ꠁꠎꠝꠤꠞ, ꠚꠞꠉꠣꠝ, ꠕꠥꠀꠔꠤꠞꠣ, ꠍꠣꠞ꠆ꠖꠤ, ꠚꠤꠟꠣꠖꠤꠟꠚꠤꠀ ꠀꠞ ꠟꠣꠅꠖꠤꠇꠦꠀ ꠐꠣꠃꠘꠞ ꠡꠣꠔꠅ ꠎꠝꠣꠔꠞ ꠉꠦꠍꠦ ꠙꠣꠑꠣꠅ।”
12 ꠀꠝꠣꠞ ꠟꠉꠦ ꠎꠦꠁꠘ ꠝꠣꠔꠤꠞꠣ, ꠔꠣꠘꠞꠦ ꠖꠦꠈꠣꠞ ꠈꠤꠀꠟꠦ ꠀꠝꠤ ꠈꠞꠦꠖꠤ ꠊꠥꠞꠟꠣꠝ, ꠊꠥꠞꠤꠀ ꠖꠦꠈꠤ, ꠡꠥꠘꠣꠞ ꠡꠣꠔꠐꠣ ꠌꠦꠞꠣꠉꠖꠣꠘꠤ। 13 ꠅꠃ ꠌꠦꠞꠣꠉꠖꠣꠘꠤꠞ ꠝꠣꠎꠈꠣꠘꠅ ꠛꠤꠘ-ꠀꠖꠝꠞ ꠟꠣꠈꠣꠘ ꠄꠇꠎꠘꠞꠦ ꠖꠦꠈꠟꠣꠝ। ꠔꠣꠘ ꠚꠤꠘ꠆ꠘ ꠙꠣꠅ ꠙꠞ꠆ꠎꠘ꠆ꠔ ꠟꠣꠝ꠆ꠛꠣ ꠙꠣꠁꠘ꠆ꠎꠣꠛꠤ, ꠀꠞ ꠛꠥꠇꠥꠞ ꠃꠙꠞꠦ ꠡꠥꠘꠣꠟꠤ ꠄꠇ ꠙꠐ꠆ꠐꠤ। 14 ꠔꠣꠘ ꠝꠣꠕꠣꠞ ꠌꠥꠟ ꠖꠥꠗꠞ ꠟꠣꠈꠣꠘ ꠗꠟꠣ ꠌꠇꠌꠇꠣ। ꠔꠣꠘ ꠌꠃꠈ ꠀꠉꠥꠘꠤꠞ ꠟꠥꠇ꠆ꠇꠣꠞ ꠟꠣꠈꠣꠘ। 15 ꠙꠣꠅ ꠅꠁꠟꠉꠤ, ꠀꠉꠥꠁꠘꠖꠤ ꠎꠣꠟꠣꠁꠀ ꠝꠣꠘ꠆ꠎꠤꠀ ꠙꠞꠤꠡ꠆ꠇꠣꠞ ꠇꠞꠣ ꠌꠇꠌꠇꠣ ꠙꠤꠔꠟꠞ ꠟꠣꠈꠣꠘ, ꠀꠞ ꠔꠣꠘ ꠉꠟꠣꠞ ꠀꠅꠀꠎ ꠅꠁꠟ, ꠎꠥꠞꠦ ꠎꠥꠞꠦ ꠇꠟ-ꠇꠟꠣꠁꠀ ꠎꠣꠅꠀ ꠙꠣꠘꠤꠞ ꠚꠥꠔꠞ ꠟꠣꠈꠣꠘ। 16 ꠔꠣꠘ ꠝꠥꠈꠞ ꠍꠥꠞꠔ ꠀꠍꠤꠟ ꠙꠥꠞꠣ ꠏꠟꠝꠟ ꠇꠞꠞꠣ ꠡꠥꠞꠥꠎꠞ ꠟꠣꠈꠣꠘ। ꠔꠣꠘ ꠝꠥꠈ ꠕꠣꠇꠤ ꠗꠣꠞꠣꠁꠟ ꠄꠇꠈꠣꠘ ꠔꠟꠥꠀꠞ ꠛꠣꠞ ꠅꠁꠟ, ꠁ ꠔꠟꠥꠀꠞꠞ ꠖꠥꠁꠅ ꠉꠣꠟꠣꠛꠣꠄ ꠗꠣꠞ ꠀꠍꠤꠟ, ꠀꠞ ꠔꠣꠘ ꠒꠣꠁꠘ ꠀꠔꠅ ꠀꠍꠤꠟ ꠀꠍꠝꠣꠘꠞ ꠡꠣꠔꠐꠣ ꠔꠦꠞꠣ।
17 ꠔꠣꠘꠦ ꠖꠦꠈꠤꠀ ꠀꠝꠤ ꠝꠞꠣꠞ ꠟꠣꠈꠣꠘ ꠔꠣꠘ ꠙꠣꠅꠞ ꠇꠣꠘ꠆ꠖꠣꠔ ꠙꠠꠤ ꠞꠁꠟꠣꠝ। ꠔꠦꠃ ꠔꠣꠘ ꠘꠤꠎꠞ ꠒꠣꠁꠘꠞ ꠀꠔ ꠀꠝꠣꠞ ꠃꠙꠞꠦ ꠕꠁꠀ ꠇꠁꠟꠣ, “ꠒꠞꠣꠁꠅ ꠘꠣ। ꠀꠝꠤꠃ ꠀꠃꠀꠟ ꠀꠞ ꠀꠝꠤꠃ ꠀꠈꠦꠞ, 18 ꠀꠝꠤꠃ ꠢꠣꠁꠃꠟ-ꠇꠣꠁꠃꠝ, ꠎꠦꠁꠘ ꠘꠤꠎꠦ ꠘꠤꠎꠦ ꠢꠞ-ꠢꠣꠝꠦꠡꠣ ꠀꠍꠤ। ꠀꠝꠣꠞ ꠝꠃꠔ ꠅꠁꠍꠤꠟ, ꠅꠁꠟꠦ ꠅꠈꠘ ꠀꠝꠤ ꠎꠥꠉ ꠎꠥꠉ ꠗꠞꠤ ꠌꠤꠞꠇꠣꠟ ꠎꠤꠘ꠆ꠖꠣ ꠀꠍꠤ। ꠝꠃꠔ ꠀꠞ ꠇꠄꠛꠞꠞ ꠌꠣꠛꠤ ꠀꠝꠣꠞ ꠀꠔꠅ ꠀꠍꠦ। 19 ꠄꠞꠟꠣꠉꠤꠃ ꠔꠥꠝꠤ ꠅꠈꠘ ꠎꠦꠔꠣ ꠖꠦꠈꠞꠣꠄ, ꠄꠞ ꠀꠉꠦ ꠎꠦꠔꠣ ꠊꠐꠤꠍꠦ ꠀꠞ ꠛꠣꠖꠦ ꠎꠦꠔꠣ ꠊꠐꠤꠛ, ꠁꠔꠣ ꠢꠇ꠆ꠇꠟꠔꠣ ꠔꠥꠝꠤ ꠟꠦꠈꠤꠀ ꠕꠅ। 20 ꠔꠥꠝꠤ ꠡꠥꠘꠣꠞ ꠎꠦ ꠡꠣꠔꠐꠣ ꠌꠦꠞꠣꠉꠖꠣꠘꠤ ꠖꠦꠈꠍ ꠀꠞ ꠀꠝꠣꠞ ꠒꠣꠁꠘ ꠀꠔꠅ ꠡꠣꠔꠐꠣ ꠔꠦꠞꠣ ꠖꠦꠈꠍ, ꠁꠔꠣꠞ ꠝꠣꠘꠤ ꠅꠁꠟ, ꠡꠣꠔꠅ ꠔꠦꠞꠣ ꠅꠁꠟ ꠡꠣꠔ ꠎꠝꠣꠔꠞ ꠡꠣꠔꠎꠘ ꠚꠤꠞꠤꠡ꠆ꠔꠣ, ꠡꠣꠔꠐꠣ ꠌꠦꠞꠣꠉꠖꠣꠘꠤ ꠅꠁꠟ ꠢꠃ ꠡꠣꠔꠅ ꠎꠝꠣꠔ।