ꠡꠣꠔꠅ ꠎꠝꠣꠔꠞ ꠟꠣꠉꠤ ꠃꠙꠖꠦꠡ (২:১-৩:২২)
2
(১) ꠁꠚꠤꠍꠤꠀ ꠎꠝꠣꠔꠞ ꠉꠦꠍꠦ
1 “ꠁꠚꠤꠍ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠟꠦꠈꠅ: ꠎꠦꠁꠘ ꠘꠤꠎꠞ ꠒꠣꠁꠘ ꠀꠔꠅ ꠀꠍꠝꠣꠘꠞ ꠡꠣꠔꠐꠣ ꠔꠦꠞꠣ ꠗꠞꠤꠀ, ꠡꠥꠘꠣꠞ ꠡꠣꠔꠐꠣ ꠌꠦꠞꠣꠉꠖꠣꠘꠤꠞ ꠝꠣꠎꠈꠣꠘꠅ ꠌꠟꠣ-ꠚꠤꠞꠣ ꠇꠞꠂꠘ, ꠔꠣꠁꠘ ꠅꠃ ꠇꠕꠣ ꠇꠁꠞꠣ,
2 “ꠀꠝꠤ ꠔ ꠔꠥꠝꠞꠣꠞ ꠇꠣꠝ-ꠇꠣꠎ, ꠔꠥꠝꠞꠣꠞ ꠝꠦꠘꠔ ꠀꠞ ꠔꠥꠝꠞꠣꠞ ꠍꠛꠞꠞ ꠇꠕꠣꠅ ꠎꠣꠘꠤ। ꠀꠝꠤ ꠎꠣꠘꠤ, ꠔꠥꠝꠞꠣ ꠇꠥꠘꠥꠎꠣꠔ ꠛꠖ ꠝꠣꠘꠡꠞꠦ ꠡꠁꠎ꠆ꠎ ꠇꠞꠔꠣꠄ ꠙꠣꠞ ꠘꠣ, ꠀꠞ ꠍꠣꠢꠣꠛꠤ ꠘꠣ ꠅꠁꠀꠅ ꠎꠦꠉꠥꠁꠘ꠆ꠔꠦ ꠘꠤꠎꠞꠦ ꠍꠣꠢꠣꠛꠤ ꠇꠁꠀ ꠙꠞꠤꠌꠄ ꠖꠦꠁꠘ, ꠔꠣꠞꠣꠞꠦ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠍ, ꠀꠞ ꠙꠞꠝꠣꠘꠅ ꠙꠣꠁꠍ ꠔꠣꠞꠣ ꠎꠦꠘ ꠛꠦꠁꠝꠣꠘꠤ ꠝꠣꠔꠦꠞ। 3 ꠔꠥꠝꠞꠣꠞ ꠛꠃꠔ ꠍꠛꠞ ꠀꠍꠦ, ꠔꠥꠝꠞꠣ ꠀꠝꠣꠞ ꠟꠣꠉꠤ ꠛꠃꠔ ꠇꠡ꠆ꠐ ꠇꠞꠞꠣꠄ, ꠇꠥꠘꠥꠝꠘ꠆ꠔꠦ ꠢꠦꠞꠣꠘ ꠅꠁꠍ ꠘꠣ।
4 “ꠅꠁꠟꠦ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠔ ꠀꠝꠣꠞ ꠘꠣꠟꠤꠡ ꠀꠍꠦ, ꠔꠥꠝꠞꠣ ꠙꠄꠟꠣ ꠀꠝꠣꠞꠦ ꠎꠦꠟꠣ ꠝꠢꠛ꠆ꠛꠔ ꠇꠞꠔꠣꠄ, ꠅꠈꠘ ꠁꠔꠣ ꠛꠣꠖ ꠖꠤꠟꠣꠁꠍ। 5 ꠕꠥꠠꠣ ꠌꠤꠘ꠆ꠔꠣ ꠇꠞꠤ ꠖꠦꠈꠅ, ꠔꠥꠝꠞꠣ ꠇꠔ ꠃꠌꠣ ꠕꠣꠇꠤ ꠇꠔ ꠟꠣꠝꠣꠔ ꠟꠣꠝꠤ ꠉꠦꠍ। ꠁ ꠢꠣꠟꠔ ꠕꠣꠇꠤ ꠖꠤꠟ ꠛꠖꠟꠣꠁꠀ, ꠀꠉꠦ ꠎꠦꠔꠣ ꠇꠞꠔꠣꠄ ꠅꠈꠘ ꠢꠤꠞꠛꠣꠞ ꠅꠟꠣ ꠇꠞꠅ। ꠀꠞ ꠎꠥꠖꠤ ꠖꠤꠟ ꠘꠣ ꠚꠤꠞꠣꠅ, ꠔꠦ ꠀꠝꠤ ꠔꠥꠝꠞꠣꠞ ꠉꠦꠍꠦ ꠀꠁꠀ ꠔꠥꠝꠞꠣꠞ ꠌꠦꠞꠣꠉ ꠖꠣꠘꠤꠈꠣꠘ ꠎꠣꠉꠣ ꠕꠣꠇꠤ ꠢꠞꠣꠁꠟꠤꠝꠥ। 6 ꠔꠥꠝꠞꠣꠞ ꠔ ꠄꠇꠐꠣ ꠉꠥꠘ ꠀꠍꠦ, ꠘꠤꠇꠥꠟꠣꠄꠔꠤ ꠅꠇꠟꠦ ꠎꠦꠔꠣ ꠇꠣꠝ ꠇꠞꠂꠘ ꠔꠥꠝꠞꠣ ꠁꠔꠣꠞꠦ ꠊꠤꠘ꠆ꠘꠣ ꠇꠞ, ꠀꠞ ꠀꠝꠤꠅ ꠁꠔꠣꠞꠦ ꠊꠤꠘ ꠇꠞꠤ।
7 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ। ꠎꠦ ꠎꠘ ꠎꠄꠁ ꠅꠁꠛ ꠔꠣꠞꠦ ꠀꠝꠤ ꠀꠟ꠆ꠟꠣ ꠙꠣꠇꠞ ꠎꠣꠘ꠆ꠘꠣꠔꠥꠟ-ꠚꠦꠞꠖꠃꠍꠞ ꠎꠤꠘ꠆ꠖꠦꠉꠤ-ꠉꠣꠍꠞ ꠚꠟ ꠈꠣꠁꠔꠦ ꠖꠤꠝꠥ।
(২) ꠁꠎꠝꠤꠞ ꠎꠝꠣꠔꠞ ꠉꠦꠍꠦ
8 “ꠁꠎꠝꠤꠞ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠅꠃ ꠇꠕꠣ ꠟꠦꠈꠅ: ꠎꠦꠁꠘ ꠀꠃꠀꠟ ꠀꠞ ꠀꠈꠦꠞ, ꠎꠦꠁꠘ ꠝꠣꠞꠣ ꠉꠦꠍꠟꠣ, ꠛꠣꠖꠦ ꠎꠤꠘ꠆ꠖꠣ ꠅꠁꠍꠂꠘ, ꠔꠣꠁꠘ ꠅꠈꠣꠘ ꠇꠁꠞꠣ,
9 “ꠀꠝꠤ ꠔ ꠔꠥꠝꠞꠣꠞ ꠅꠜꠣꠛ-ꠅꠘꠐꠘ ꠀꠞ ꠇꠡ꠆ꠐꠞ ꠇꠕꠣ ꠎꠣꠘꠤ, ꠅꠁꠟꠦ ꠄꠞꠛꠣꠖꠦꠅ ꠔꠥꠝꠞꠣ ꠗꠘꠤ। ꠎꠦꠔꠣ ꠝꠣꠘꠡꠦ ꠈꠣꠐꠤ ꠁꠢꠥꠖꠤ ꠘꠣꠝꠦ ꠘꠤꠎꠞ ꠙꠞꠤꠌꠄ ꠖꠦꠄ, ꠅꠕꠌ ꠁꠢꠥꠖꠤꠞ ꠀꠝꠟ ꠘꠣꠁ, ꠛꠞꠋ ꠁꠛꠟꠤꠍꠞ ꠖꠟꠞ ꠝꠣꠘꠥꠡ, ꠁꠔꠣꠄ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠇꠤꠔꠣ ꠝꠣꠔꠤꠞꠣ ꠀꠝꠤ ꠔ ꠎꠣꠘꠤ। 10 ꠔꠥꠝꠞꠣ ꠎꠦ ꠝꠍꠤꠛꠔꠞ ꠝꠣꠎꠦ ꠙꠠꠛꠣꠄ, ꠁ ꠝꠍꠤꠛꠔꠞꠦ ꠄꠇꠖꠝ ꠒꠞꠣꠁꠅ ꠘꠣ। ꠎꠣꠘ ꠘꠤ, ꠁꠛꠟꠤꠍꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦ ꠔꠥꠝꠞꠣꠞ ꠝꠣꠎꠞ ꠇꠄꠎꠘꠞꠦ ꠎꠦꠟꠅ ꠖꠤꠛ, ꠢꠘꠅ ꠔꠥꠝꠞꠣ ꠖꠡ ꠖꠤꠘ ꠇꠡ꠆ꠐ ꠙꠣꠁꠛꠣꠄ। ꠢꠥꠘꠅ, ꠁꠝꠣꠘꠞ ꠙꠕꠦ ꠔꠥꠝꠞꠣ ꠝꠞꠘ ꠙꠞ꠆ꠎꠘ꠆ꠔ ꠢꠇ-ꠢꠣꠟꠣꠟ ꠞꠁꠅ, ꠔꠦꠃ ꠎꠄꠅꠞ ꠝꠣꠟꠣ ꠢꠤꠡꠣꠛꠦ ꠀꠝꠤ ꠔꠥꠝꠞꠣꠞꠦ ꠀꠈꠦꠞꠞ ꠎꠤꠘ꠆ꠖꠦꠉꠤ ꠖꠤꠝꠥ।
11 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ। ꠎꠦ ꠎꠘ ꠎꠄꠁ ꠅꠁꠛ, ꠖꠥꠍꠞꠣꠛꠣꠞꠞ ꠝꠃꠔꠦ, ꠝꠣꠘꠤ ꠖꠥꠎꠈꠦ ꠔꠣꠞ ꠈꠦꠔꠤ ꠇꠞꠣꠞ ꠇꠥꠘꠥ ꠡꠣꠁꠖ꠆ꠖ ꠘꠣꠁ।
(৩) ꠚꠞꠉꠣꠝ ꠎꠝꠣꠔꠞ ꠉꠦꠍꠦ
12 “ꠚꠞꠉꠣꠝ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠅꠃ ꠇꠕꠣ ꠟꠦꠈꠅ: ꠗꠣꠞꠀꠟꠣ ꠎꠦ ꠔꠟꠥꠀꠞꠞ ꠖꠥꠁꠅ ꠉꠣꠟꠣꠛꠣꠄ ꠗꠣꠞ ꠀꠍꠦ, ꠅꠃ ꠔꠟꠥꠀꠞꠞ ꠝꠣꠟꠤꠇꠦ ꠅꠈꠣꠘ ꠇꠁꠞꠣ,
13 “ꠔꠥꠝꠞꠣ ꠇꠥꠘ ꠎꠣꠉꠣꠔ ꠛꠡꠔ ꠇꠞꠞꠣꠄ ꠁꠔꠣ ꠔ ꠀꠝꠤ ꠎꠣꠘꠤ, ꠁꠈꠣꠘꠅ ꠁꠛꠟꠤꠍꠞ ꠡꠤꠋꠢꠣꠡꠘ ꠀꠍꠦ। ꠅꠁꠟꠦ ꠀꠝꠣꠞ ꠛꠦꠙꠣꠞꠦ ꠔꠥꠝꠞꠣ ꠢꠇ-ꠢꠣꠟꠣꠟ ꠀꠍ, ꠀꠝꠣꠞ ꠃꠙꠞꠞ ꠁꠝꠣꠘꠞꠦ ꠅꠡ꠆ꠛꠤꠇꠣꠞ ꠇꠞꠍ ꠘꠣ। ꠀꠝꠣꠞ ꠔꠛꠟꠤꠉ ꠇꠞꠞꠣ ꠢꠃ ꠢꠇ-ꠢꠣꠟꠣꠟ ꠎꠘ ꠀꠘ꠆ꠔꠤꠙꠣꠍꠞꠦ ꠎꠦꠛꠟꠣ ꠡꠢꠤꠖ ꠇꠞꠣ ꠅꠁꠍꠤꠟ, ꠁꠛꠟꠤꠍꠞ ꠀꠈꠠꠣꠞ ꠝꠣꠎꠦ, ꠔꠥꠝꠞꠣꠞ ꠐꠣꠃꠘꠅ ꠔꠣꠞꠦ ꠈꠥꠘ ꠇꠞꠣ ꠅꠁꠍꠤꠟ, ꠢꠃ ꠡꠝꠄꠅ ꠔꠥꠝꠞꠣꠞ ꠁꠝꠣꠘꠞꠦ ꠅꠡ꠆ꠛꠤꠇꠣꠞ ꠇꠞꠍ ꠘꠣ।
14 “ꠔꠣ-ꠅ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠀꠝꠣꠞ ꠇꠤꠍꠥ ꠝꠣꠔ ꠀꠍꠦ। ꠔꠥꠝꠞꠣꠞ ꠅꠘꠅ ꠅꠟꠣ ꠇꠤꠍꠥ ꠝꠣꠘꠥꠡ ꠀꠍꠂꠘ, ꠎꠦꠔꠣꠄ ꠝꠥꠍꠣ ꠘꠛꠤꠞ ꠀꠝꠟꠞ ꠜꠘ꠆ꠒ ꠘꠛꠤ ꠛꠣꠟꠣꠝꠞ ꠔꠣꠟꠤꠝꠦ ꠌꠟꠂꠘ। ꠅꠃ ꠛꠣꠟꠣꠝꠦ ꠛꠣꠖꠡꠣ ꠛꠣꠟꠣꠇꠞꠦ ꠢꠤꠇꠣꠁꠍꠤꠟ, ꠎꠣꠔꠦ ꠢꠦ ꠖꠦꠛꠔꠣꠞ ꠝꠥꠞ꠆ꠔꠤꠞ ꠍꠣꠝꠘꠞ ꠙꠡꠣꠖ ꠈꠣꠅꠀꠁꠀ ꠀꠞ ꠎꠤꠘꠣ ꠇꠞꠣꠁꠀ, ꠛꠘꠤ ꠁꠍꠞꠣꠁꠟꠞꠦ ꠉꠥꠘꠣꠞ ꠙꠕꠦ ꠘꠦꠄ। 15 ꠁꠔꠣ ꠍꠣꠠꠣꠅ ꠘꠤꠇꠥꠟꠣꠄꠔꠤ ꠅꠇꠟꠞ ꠔꠣꠟꠤꠝꠦ ꠎꠦꠔꠣ ꠌꠟꠂꠘ, ꠅꠔꠣ ꠇꠄꠉꠥꠅ ꠔꠥꠝꠞꠣꠞ ꠅꠘꠅ ꠀꠍꠂꠘ। 16 ꠄꠞꠟꠣꠉꠤ ꠁ ꠢꠣꠟꠔ ꠕꠣꠇꠤ ꠔꠥꠝꠞꠣ ꠖꠤꠟ ꠛꠖꠟꠣꠅ, ꠀꠞ ꠘꠣ ꠛꠖꠟꠤꠟꠦ ꠀꠝꠤ ꠈꠥꠛ ꠎꠟꠖꠤ ꠔꠥꠝꠞꠣꠞ ꠗꠣꠞꠅ ꠀꠁꠝꠥ, ꠀꠁꠀ ꠀꠝꠣꠞ ꠝꠥꠈꠞ ꠔꠟꠥꠀꠞꠖꠤ ꠔꠣꠞꠣꠞ ꠟꠉꠦ ꠎꠤꠢꠣꠖ ꠇꠞꠝꠥ।
17 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ। ꠎꠦ ꠎꠘ ꠎꠄꠁ ꠅꠁꠛ, ꠀꠝꠤ ꠔꠣꠞꠦ ꠟꠥꠇꠣꠁꠟ ꠛꠦꠢꠦꠡ꠆ꠔꠤ ꠝꠣꠘ꠆ꠘꠣ ꠕꠣꠇꠤ ꠕꠥꠠꠣ ꠝꠣꠘ꠆ꠘꠣ ꠀꠞ ꠄꠇꠐꠣ ꠗꠟꠣ ꠙꠣꠔ꠆ꠔꠞ ꠖꠤꠝꠥ। ꠅꠃ ꠙꠣꠔ꠆ꠔꠞꠞ ꠃꠙꠞꠦ ꠅꠝꠘ ꠄꠇ ꠘꠣꠝ ꠟꠦꠈꠣ ꠕꠣꠇꠛ, ꠁ ꠘꠣꠝ ꠇꠦꠃ ꠌꠤꠘꠦ ꠘꠣ; ꠎꠦ ꠎꠘꠦ ꠅꠃ ꠙꠣꠔ꠆ꠔꠞ ꠙꠣꠁꠛ, ꠈꠣꠟꠤ ꠢꠦ-ꠃ ꠁ ꠘꠣꠝ ꠌꠤꠘꠛ।
(৪) ꠕꠥꠀꠔꠤꠞꠣ ꠎꠝꠣꠔꠞ ꠉꠦꠍꠦ
18 “ꠕꠥꠀꠔꠤꠞꠣ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠅꠃ ꠇꠕꠣ ꠟꠦꠈꠅ: ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠔꠣꠘ ꠌꠃꠈ ꠅꠁꠟ ꠀꠉꠥꠘꠤꠞ ꠟꠥꠇ꠆ꠇꠣꠞ ꠟꠣꠈꠣꠘ, ꠙꠣꠅ ꠖꠥꠁꠅꠈꠣꠘ ꠝꠣꠘ꠆ꠎꠤꠀ ꠙꠞꠤꠡ꠆ꠇꠣꠞ ꠇꠞꠣ ꠌꠇꠌꠇꠣ ꠙꠤꠔꠟꠞ ꠟꠣꠈꠣꠘ, ꠔꠣꠁꠘ ꠅꠈꠣꠘ ꠇꠁꠞꠣ,
19 “ꠀꠝꠤ ꠔ ꠔꠥꠝꠞꠣꠞ ꠇꠣꠝ-ꠇꠣꠎ, ꠔꠥꠝꠞꠣꠞ ꠝꠣꠄꠀ-ꠝꠢꠛ꠆ꠛꠔ, ꠁꠝꠣꠘ, ꠈꠦꠎꠝꠔ ꠀꠞ ꠔꠥꠝꠞꠣꠞ ꠍꠛꠞꠞ ꠇꠕꠣ ꠎꠣꠘꠤ। ꠀꠞ ꠄꠅꠈꠣꠘꠅ ꠎꠣꠘꠤ, ꠔꠥꠝꠞꠣ ꠀꠉꠦ ꠎꠦꠔꠣ ꠇꠣꠝ ꠇꠞꠍ, ꠅꠈꠘ ꠄꠞ ꠕꠣꠇꠤ ꠀꠞꠅ ꠛꠦꠡꠤ ꠇꠣꠝ ꠇꠞꠞꠣꠄ।
20 “ꠅꠁꠟꠦ ꠔꠥꠝꠞꠣ ꠔ ꠁꠎꠣꠛꠦꠟ ꠘꠣꠝꠞ ꠅꠃ ꠛꠦꠐꠤꠞꠦ ꠀꠡꠞꠄ ꠖꠤꠞꠣꠄ, ꠄꠞꠟꠣꠉꠤ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠀꠝꠣꠞ ꠄꠇꠈꠣꠘ ꠇꠕꠣ ꠀꠍꠦ, ꠔꠣꠁ ꠘꠤꠎꠞꠦ ꠘꠛꠤ ꠇꠁꠀ ꠙꠞꠤꠌꠄ ꠖꠦꠄ। ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠔꠣꠁ ꠎꠤꠘꠣ ꠇꠞꠣ ꠀꠞ ꠖꠦꠛꠔꠣꠞ ꠍꠣꠝꠘꠞ ꠙꠡꠣꠖ ꠈꠣꠅꠀ ꠢꠤꠇꠣꠁꠀ ꠛꠦ-ꠙꠕꠦ ꠘꠦꠞꠉꠤ। 21 ꠅꠃ ꠎꠤꠘꠣ ꠕꠣꠇꠤ ꠔꠃꠛꠣ ꠇꠞꠣꠞ ꠟꠣꠉꠤ ꠀꠝꠤ ꠔꠣꠁꠞꠦ ꠡꠝꠄ ꠖꠤꠍꠟꠣꠝ, ꠅꠁꠟꠦ ꠔꠣꠁ ꠔꠃꠛꠣ ꠇꠞꠔꠦ ꠞꠣꠎꠤ ꠘꠣꠄ। 22 ꠢꠥꠘꠅ, ꠄꠞꠟꠣꠉꠤ ꠀꠝꠤ ꠔꠣꠁꠞꠦ ꠄꠇ ꠛꠤꠍꠘꠣꠔ ꠚꠣꠟꠣꠁꠀ ꠕꠁꠝꠥ, ꠔꠣꠁꠞ ꠟꠉꠦ ꠎꠦꠔꠣꠄ ꠎꠤꠘꠣ ꠇꠞꠂꠘ, ꠁꠔꠣꠄ ꠎꠥꠖꠤ ꠔꠃꠛꠣ ꠘꠣ ꠇꠞꠂꠘ, ꠔꠦ ꠔꠣꠞꠣꠞꠦꠅ ꠛꠠ ꠝꠍꠤꠛꠔꠅ ꠚꠣꠟꠣꠁꠝꠥ। 23 ꠔꠣꠁꠞ ꠙꠥꠀ-ꠙꠥꠠꠤꠘꠞꠦꠅ ꠀꠝꠤ ꠝꠣꠞꠤꠟꠤꠝꠥ। ꠔꠦꠃ ꠢꠇꠟ ꠎꠝꠣꠔꠦ ꠎꠣꠘꠤꠟꠤꠛꠣ, ꠀꠝꠤ ꠔ ꠝꠣꠘꠡꠞ ꠖꠤꠟꠞ ꠀꠞ ꠝꠘꠞ ꠈꠛꠞ ꠞꠣꠈꠤ। ꠀꠝꠤ ꠀꠝꠟ-ꠘꠣꠝꠣ ꠖꠦꠈꠤꠀ ꠔꠥꠝꠞꠣ ꠙꠞꠔꠦꠇ ꠎꠘꠞ ꠚꠟ ꠖꠤꠝꠥ। 24 ꠕꠥꠀꠔꠤꠞꠣ ꠎꠝꠣꠔꠞ ꠛꠣꠇꠤ ꠝꠥꠝꠤꠘ ꠅꠇꠟꠞꠦ ꠇꠁꠞꠣꠝ, ꠔꠥꠝꠞꠣ ꠎꠦꠞꠣ ꠅꠃ ꠛꠦꠐꠤꠞ ꠇꠕꠣꠄ ꠌꠟ ꠘꠣ, ꠝꠣꠘꠡꠦ ꠎꠦꠔꠣꠞꠦ ꠁꠛꠟꠤꠍꠞ ꠉꠁꠘ ꠔꠣꠟꠤꠝ ꠇꠂꠘ, ꠔꠥꠝꠞꠣ ꠎꠦꠞꠣ ꠢꠃ ꠙꠕ ꠌꠤꠘ ꠘꠣ, ꠀꠝꠤ ꠔꠥꠝꠞꠣꠞꠦ ꠖꠥꠍꠞꠣ ꠇꠥꠘꠥ ꠜꠣꠞ ꠖꠤꠔꠣꠝ ꠘꠣꠄ। 25 ꠈꠣꠟꠤ ꠔꠥꠝꠞꠣꠞ ꠎꠦꠔꠣ ꠀꠍꠦ, ꠀꠝꠤ ꠘꠣ ꠀꠅꠀ ꠙꠞ꠆ꠎꠘ꠆ꠔ ꠅꠈꠘꠣꠁꠘꠞꠦ ꠔꠥꠝꠞꠣ ꠝꠎꠛꠥꠔ ꠇꠞꠤ ꠗꠞꠤꠀ ꠞꠁꠅ।
26 “ꠀꠝꠣꠞ ꠉꠣꠁꠛꠤ ꠛꠣꠚꠦ ꠎꠦꠟꠣ ꠢꠇ꠆ꠇꠟ ꠎꠣꠔꠤꠞ ꠃꠙꠞꠦ ꠀꠝꠣꠞꠦ ꠈꠦꠝꠔꠣ ꠖꠤꠍꠂꠘ, ꠎꠦꠞꠣ ꠎꠄꠁ ꠅꠁꠛ, ꠔꠣꠞꠣꠞꠦꠅ ꠀꠝꠤ ꠅꠃ ꠈꠦꠝꠔꠣ ꠖꠤꠝꠥ। ꠀꠝꠤ ꠎꠦ ꠇꠣꠝꠦ ꠈꠥꠡꠤ ꠅꠁ ꠅꠃ ꠇꠣꠝ ꠎꠦꠞꠣ ꠀꠈꠦꠞ ꠙꠞ꠆ꠎꠘ꠆ꠔ ꠇꠞꠛ, ꠔꠣꠞꠣ ꠁ ꠈꠦꠝꠔꠣ ꠙꠣꠁꠛꠣ। 27 ꠔꠣꠞꠣ ꠟꠥꠀꠞ ꠟꠣꠑꠤ ꠖꠤꠀ ꠁꠔꠣꠞ ꠡꠣꠡꠘ ꠇꠞꠛꠣ, ꠀꠞ ꠝꠣꠐꠤꠞ ꠙꠣꠔꠤꠟꠞ ꠟꠣꠈꠣꠘ ꠁꠔꠣꠞꠦ ꠌꠥꠞꠝꠣꠞ ꠇꠞꠛꠣ। 28 ꠎꠦꠞꠣ ꠎꠄꠁ ꠅꠁꠛ, ꠀꠝꠤ ꠔꠣꠞꠦ ꠚꠎꠞꠞ ꠡꠥꠇ-ꠔꠦꠞꠣꠅ ꠖꠤꠝꠥ।
29 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ।