3
(৫) ꠍꠣꠞ꠆ꠖꠤ ꠎꠝꠣꠔꠞ ꠉꠦꠍꠦ
1 “ꠍꠣꠞ꠆ꠖꠤ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠟꠦꠈꠅ: ꠀꠟ꠆ꠟꠣꠞ ꠡꠣꠔ ꠘꠝꠥꠘꠣꠞ ꠞꠥꠢꠥ ꠀꠞ ꠡꠣꠔꠐꠣ ꠔꠦꠞꠣ ꠎꠦꠁꠘ ꠗꠞꠤꠀ ꠞꠣꠈꠍꠂꠘ, ꠔꠣꠁꠘ ꠅꠈꠣꠘ ꠇꠁꠞꠣ,
“ꠔꠥꠝꠞꠣꠞ ꠇꠣꠝ-ꠇꠣꠎ ꠔ ꠀꠝꠤ ꠎꠣꠘꠤ। ꠔꠥꠝꠞꠣ ꠎꠤꠘ꠆ꠖꠣ ꠀꠍ ꠇꠞꠤꠀ ꠔꠥꠝꠞꠣꠞ ꠛꠃꠔ ꠡꠥꠘꠣꠝ ꠀꠍꠦ, ꠅꠁꠟꠦ ꠀꠍꠟꠦ ꠔ ꠔꠥꠝꠞꠣ ꠝꠥꠞ꠆ꠖꠣ। 2 ꠔꠥꠝꠞꠣ ꠢꠎꠣꠉ ꠅꠁꠀ ꠃꠑꠅ, ꠀꠞ ꠛꠣꠖ-ꠛꠣꠇꠤ ꠎꠔꠔꠣ ꠝꠞꠣꠞ ꠙꠕꠤ ꠅꠁꠉꠦꠍꠦ, ꠁꠔꠣꠞꠦ ꠛꠟ ꠎꠥꠉꠣꠅ। ꠢꠥꠘꠅ, ꠀꠝꠣꠞ ꠀꠟ꠆ꠟꠣꠞ ꠍꠣꠝꠘꠦ ꠔꠥꠝꠞꠣꠞ ꠄꠇꠈꠣꠘ ꠇꠣꠝꠅ ꠀꠝꠤ ꠡꠑꠤꠇ ꠖꠦꠈꠍꠤ ꠘꠣ। 3 ꠄꠞꠟꠣꠉꠤ ꠔꠥꠝꠞꠣ ꠎꠦꠔꠣ ꠙꠣꠁꠍ ꠀꠞ ꠎꠦꠔꠣ ꠢꠥꠘꠍ, ꠅꠔꠣ ꠁꠀꠖ ꠞꠣꠈꠅ ꠀꠞ ꠀꠝꠟ ꠇꠞꠅ। ꠔꠥꠝꠞꠣꠞ ꠅꠈꠘꠇꠥꠞ ꠢꠣꠟꠔ ꠕꠣꠇꠤ ꠖꠤꠟ ꠛꠖꠟꠣꠅ। ꠔꠥꠝꠞꠣ ꠎꠥꠖꠤ ꠢꠎꠣꠉ ꠘꠣ ꠅꠅ, ꠔꠦ ꠀꠝꠤ ꠌꠥꠞꠞ ꠟꠣꠈꠣꠘ ꠟꠥꠇꠣꠁꠀ ꠀꠁꠝꠥ, ꠇꠥꠘ ꠛꠣꠟꠣ ꠔꠥꠝꠞꠣꠞ ꠉꠦꠍꠦ ꠀꠁꠝꠥ, ꠔꠥꠝꠞꠣ ꠐꠦꠞꠃ ꠙꠣꠁꠔꠣꠄ ꠘꠣꠄ। 4 ꠔꠦ ꠅꠃ ꠍꠣꠞ꠆ꠖꠤ ꠎꠝꠣꠔꠅ ꠔꠥꠝꠞꠣꠞ ꠅꠟꠣ ꠇꠄꠎꠘ ꠝꠣꠘꠥꠡ ꠀꠍꠂꠘ ꠎꠦꠞꠣꠞ ꠟꠦꠛꠣꠍꠅ ꠇꠥꠘꠥ ꠈꠥꠔ ꠘꠣꠁ, ꠝꠣꠘꠤ ꠔꠣꠞꠣꠞ ꠌꠣꠟ-ꠌꠟꠘ ꠈꠣꠞꠣꠙꠤꠞ ꠛꠣꠄ ꠉꠦꠍꠦ ꠘꠣ। ꠔꠣꠞꠣ ꠙꠞꠦꠎꠉꠣꠞ ꠛꠘ꠆ꠖꠣ, ꠄꠞꠟꠣꠉꠤ ꠔꠣꠞꠣ ꠙꠞꠤꠡ꠆ꠇꠣꠞ ꠗꠟꠣ ꠟꠦꠛꠣꠍ ꠚꠤꠘ꠆ꠖꠤꠀ ꠀꠝꠣꠞ ꠟꠉꠦ ꠌꠟꠣ-ꠚꠤꠞꠣ ꠇꠞꠛꠣ। 5 ꠎꠦ ꠎꠘ ꠎꠄꠁ ꠅꠁꠛ, ꠢꠦ ꠅꠟꠣ ꠗꠟꠣ ꠟꠦꠛꠣꠍ ꠚꠤꠘꠛ। ꠀꠈꠦꠞꠣꠔꠞ ꠎꠤꠘ꠆ꠖꠦꠉꠤ ꠈꠣꠔꠣ ꠕꠣꠇꠤ ꠔꠣꠞ ꠘꠣꠝ ꠀꠝꠤ ꠇꠥꠘꠥꠖꠤꠘꠅ ꠚꠥꠍꠔꠣꠝ ꠘꠣꠄ। ꠛꠞꠋ ꠀꠝꠣꠞ ꠉꠣꠁꠛꠤ ꠛꠣꠚ ꠀꠞ ꠔꠣꠘ ꠚꠤꠞꠤꠡ꠆ꠔꠣ ꠅꠇꠟꠞ ꠍꠣꠝꠘꠦ ꠀꠝꠤ ꠔꠣꠞꠦ ꠀꠝꠣꠞ ꠇꠁꠀ ꠡ꠆ꠛꠤꠇꠣꠞ ꠇꠞꠝꠥ।
6 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ।
(৬) ꠚꠤꠟꠣꠖꠤꠟꠚꠤꠀ ꠎꠝꠣꠔꠞ ꠉꠦꠍꠦ
7 “ꠚꠤꠟꠣꠖꠤꠟꠚꠤꠀ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠟꠦꠈꠅ: ꠎꠦꠁꠘ ꠢꠇ ꠀꠞ ꠙꠣꠇ-ꠙꠛꠤꠔ꠆ꠞ, ꠎꠦꠘ ꠀꠔꠅ ꠛꠣꠖꠡꠣ ꠖꠣꠃꠖ ꠘꠛꠤꠞ ꠌꠣꠛꠤ ꠀꠍꠦ, ꠎꠦꠁꠘ ꠈꠥꠟꠟꠦ ꠀꠞ ꠇꠦꠃ ꠛꠘ꠆ꠖ ꠇꠞꠔ ꠙꠣꠞꠦ ꠘꠣ, ꠀꠞ ꠛꠘ꠆ꠖ ꠇꠞꠟꠦ ꠇꠦꠃ ꠈꠥꠟꠔ ꠙꠣꠞꠦ ꠘꠣ, ꠔꠣꠁꠘ ꠅꠈꠣꠘ ꠇꠁꠞꠣ,
8 “ꠀꠝꠤ ꠔ ꠔꠥꠝꠞꠣꠞ ꠇꠣꠝ-ꠇꠣꠎ ꠎꠣꠘꠤ। ꠢꠥꠘꠅ, ꠀꠝꠤ ꠔꠥꠝꠞꠣꠞ ꠍꠣꠝꠘꠦ ꠄꠇꠈꠣꠘ ꠖꠥꠀꠞ ꠈꠥꠟꠣ ꠞꠣꠈꠟꠣꠝ, ꠁꠈꠣꠘ ꠛꠘ꠆ꠖ ꠇꠞꠣꠞ ꠈꠦꠝꠔꠣ ꠇꠦꠃꠞꠞ ꠘꠣꠁ। ꠀꠝꠤ ꠔ ꠎꠣꠘꠤ, ꠔꠥꠝꠞꠣ ꠈꠥꠛ ꠇꠝꠎꠥꠞ, ꠄꠞꠛꠣꠖꠦꠅ ꠔꠥꠝꠞꠣ ꠀꠝꠣꠞ ꠢꠥꠇꠥꠝ ꠀꠝꠟ ꠇꠞꠍ ꠀꠞ ꠀꠝꠣꠞꠦ ꠅꠡ꠆ꠛꠤꠇꠣꠞ ꠇꠞꠍ ꠘꠣ। 9 ꠎꠦꠞꠣ ꠁꠢꠥꠖꠤ ꠇꠁꠀ ꠘꠤꠎꠞ ꠙꠞꠤꠌꠄ ꠖꠦꠄ ꠅꠕꠌ ꠀꠍꠟ ꠁꠢꠥꠖꠤ ꠘꠣꠄ, ꠁꠛꠟꠤꠍ-ꠡꠄꠔꠣꠘꠞ ꠖꠟꠞ ꠢꠃ ꠛꠦꠁꠝꠣꠘ ꠅꠇꠟꠞꠦ ꠀꠝꠤ ꠔꠥꠝꠞꠣꠞ ꠉꠦꠍꠦ ꠀꠘꠣꠁꠝꠥ, ꠔꠥꠝꠞꠣꠞ ꠙꠣꠅ-ꠅ ꠗꠞꠣꠁ ꠇꠖꠝꠛꠥꠍꠤ ꠇꠞꠣꠁꠝꠥ, ꠀꠞ ꠔꠣꠞꠣꠞꠦ ꠎꠣꠘꠣꠁ ꠖꠤꠝꠥ ꠀꠝꠤ ꠔꠥꠝꠞꠣꠞꠦ ꠝꠢꠛ꠆ꠛꠔ ꠇꠞꠤ। 10 ꠔꠥꠝꠞꠣꠞꠦ ꠍꠛꠞ ꠇꠞꠣꠞ ꠟꠣꠉꠤ ꠀꠝꠤ ꠎꠦ ꠢꠥꠇꠥꠝ ꠖꠤꠍꠟꠣꠝ ꠁꠔꠣ ꠔꠥꠝꠞꠣ ꠝꠣꠘꠍ; ꠄꠞꠟꠣꠉꠤ ꠁ ꠖꠥꠘꠤꠀꠞ ꠃꠙꠞꠦ ꠝꠍꠤꠛꠔꠞ ꠎꠦ ꠡꠝꠄ ꠀꠁꠀ ꠀꠎꠦꠞ, ꠢꠃ ꠡꠝꠄ ꠕꠣꠇꠤ ꠀꠝꠤ ꠔꠥꠝꠞꠣꠞꠦ ꠢꠦꠚꠣꠎꠔ ꠇꠞꠝꠥ। ꠖꠥꠘꠤꠀꠞ ꠝꠣꠘꠡꠞꠦ ꠙꠞꠤꠇ꠆ꠇꠣ ꠇꠞꠣꠞ ꠟꠣꠉꠤ ꠅꠃ ꠝꠍꠤꠛꠔꠞ ꠡꠝꠄ ꠀꠁꠛ।
11 “ꠢꠥꠘꠅ, ꠀꠝꠤ ꠈꠥꠛ ꠎꠟꠖꠤ ꠀꠁꠞꠣꠝ। ꠔꠥꠝꠞꠣꠞ ꠎꠦꠔꠣ ꠀꠍꠦ ꠅꠔꠣꠞꠦ ꠝꠎꠛꠥꠔ ꠇꠞꠤ ꠗꠞꠤꠀ ꠞꠣꠈꠅ, ꠎꠣꠔꠦ ꠔꠥꠝꠞꠣꠞ ꠎꠄꠅꠞ ꠝꠣꠟꠣ ꠇꠦꠃ ꠇꠣꠠꠤꠀ ꠘꠤꠔ ꠘꠣ ꠙꠣꠞꠦ। 12 ꠎꠦ ꠎꠘ ꠎꠄꠁ ꠅꠁꠛ, ꠔꠣꠞꠦ ꠀꠝꠤ ꠀꠝꠣꠞ ꠀꠟ꠆ꠟꠣꠞ ꠊꠞꠞ ꠄꠇꠐꠣ ꠈꠥꠐꠤ ꠛꠣꠘꠣꠁꠝꠥ, ꠢꠦ ꠀꠞ ꠇꠥꠘꠥꠖꠤꠘ ꠛꠣꠞ ꠅꠁꠀ ꠎꠣꠁꠔ ꠘꠣꠄ। ꠀꠝꠤ ꠔꠣꠞ ꠃꠙꠞꠦ ꠀꠝꠣꠞ ꠀꠟ꠆ꠟꠣꠞ ꠘꠣꠝ ꠀꠞ ꠀꠟ꠆ꠟꠣꠞ ꠐꠣꠃꠘꠞ ꠘꠣꠝꠅ ꠟꠦꠈꠝꠥ। ꠢꠃ ꠐꠣꠃꠘ ꠅꠁꠟꠉꠤ ꠘꠄꠀ ꠎꠦꠞꠥꠎꠣꠟꠦꠝ। ꠛꠦꠢꠦꠡ꠆ꠔꠞ ꠝꠣꠎ ꠕꠣꠇꠤ, ꠀꠝꠣꠞ ꠀꠟ꠆ꠟꠣꠞ ꠗꠣꠞꠅ ꠕꠣꠇꠤ ꠢꠃ ꠐꠣꠃꠘ ꠟꠣꠝꠤꠀ ꠀꠁꠛ। ꠀꠞ ꠎꠦ ꠎꠘ ꠎꠄꠁ ꠅꠁꠛ, ꠔꠣꠞ ꠃꠙꠞꠦ ꠀꠝꠤ ꠀꠝꠣꠞ ꠘꠄꠀ ꠘꠣꠝꠈꠣꠘꠅ ꠟꠦꠈꠝꠥ।
13 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ।
(৭) ꠟꠣꠅꠖꠤꠇꠦꠀ ꠎꠝꠣꠔꠞ ꠉꠦꠍꠦ
14 “ꠟꠣꠅꠖꠤꠇꠦꠀ ꠐꠣꠃꠘꠞ ꠎꠝꠣꠔꠞ ꠚꠤꠞꠤꠡ꠆ꠔꠣꠞ ꠉꠦꠍꠦ ꠟꠦꠈꠅ: ꠎꠦꠘ ꠘꠣꠝ ꠀꠝꠤꠘ, ꠎꠦꠁꠘ ꠢꠇ-ꠢꠣꠟꠣꠟ ꠡꠣꠇ꠆ꠇꠤ, ꠎꠦꠁꠘ ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠢꠇ꠆ꠇꠟꠔꠣꠞ ꠝꠥꠟ ꠈꠥꠐꠤ, ꠔꠣꠁꠘ ꠅꠈꠣꠘ ꠇꠁꠞꠣ,
15 “ꠔꠥꠝꠞꠣꠞ ꠇꠣꠝ-ꠇꠣꠎꠞ ꠇꠕꠣ ꠔ ꠀꠝꠤ ꠎꠣꠘꠤ। ꠔꠥꠝꠞꠣ ꠅꠁꠟꠣꠄ ꠘꠣ ꠑꠣꠘ꠆ꠒꠣ, ꠘꠣ ꠉꠞꠝ। ꠔꠥꠝꠞꠣ ꠢꠄ ꠑꠣꠘ꠆ꠒꠣ ꠘꠣ ꠅꠄ ꠉꠞꠝ ꠅꠁꠟꠦ ꠜꠣꠟꠣ ꠅꠁꠟ ꠅꠘꠦ। 16 ꠅꠁꠟꠦ ꠔꠥꠝꠞꠣ ꠔ ꠃꠝꠟꠤ ꠉꠞꠝ, ꠘꠣ ꠑꠣꠘ꠆ꠒꠣ, ꠘꠣ ꠉꠞꠝ, ꠄꠞꠟꠣꠉꠤ ꠀꠝꠤ ꠀꠝꠣꠞ ꠝꠥꠈꠞ ꠍꠦꠚꠞ ꠟꠣꠈꠣꠘ ꠕꠥ ꠇꠞꠤ ꠔꠥꠝꠞꠣꠞꠦ ꠚꠣꠟꠣꠁ ꠖꠤꠝꠥ। 17 ꠔꠥꠝꠞꠣ ꠔ ꠇꠁꠞꠣꠄ, ꠔꠥꠝꠞꠣ ꠛꠃꠔ ꠗꠘꠤ, ꠔꠥꠝꠞꠣ ꠛꠠꠟꠥꠇ ꠅꠁꠉꠦꠍ, ꠄꠞꠟꠣꠉꠤ ꠔꠥꠝꠞꠣꠞ ꠇꠥꠘ꠆ꠔꠣꠞ ꠅꠜꠣꠛ ꠘꠣꠁ। ꠁꠔꠣ ꠈꠥꠛ ꠜꠣꠟꠣ ꠇꠕꠣ, ꠅꠁꠟꠦ ꠀꠍꠟꠦ ꠔ ꠔꠥꠝꠞꠣ ꠛꠥꠎꠞꠣꠄ ꠘꠣ, ꠔꠥꠝꠞꠣ ꠈꠥꠛ ꠖꠥꠈꠤ, ꠇꠣꠋꠉꠣꠟ, ꠉꠞꠤꠛ, ꠀꠘ꠆ꠖꠣ ꠀꠞ ꠟꠦꠝꠐꠣ ꠀꠍ। 18 ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞꠦ ꠅꠃ ꠃꠙꠖꠦꠡ ꠖꠤꠞꠣꠝ, ꠀꠉꠥꠁꠘꠖꠤ ꠎꠣꠟꠣꠁꠟ ꠈꠣꠐꠤ ꠡꠥꠘꠣ ꠔꠥꠝꠞꠣ ꠀꠝꠣꠞ ꠉꠦꠍ ꠕꠣꠇꠤ ꠟꠁꠀ ꠘꠦꠅ, ꠎꠣꠔꠦ ꠔꠥꠝꠞꠣ ꠢꠣꠍꠣꠞꠞ ꠗꠘꠤ ꠅꠁꠔꠣꠄ ꠙꠣꠞ। ꠀꠝꠣꠞ ꠉꠦꠍ ꠕꠣꠇꠤ ꠗꠟꠣ ꠟꠦꠛꠣꠍ ꠟꠁꠀ ꠘꠤꠀ ꠚꠤꠘ꠆ꠖꠅ, ꠔꠦꠃ ꠔꠥꠝꠞꠣꠞꠦ ꠀꠞ ꠟꠦꠝꠐꠣ ꠖꠦꠈꠣ ꠎꠣꠁꠔ ꠘꠣꠄ। ꠀꠝꠣꠞ ꠉꠦꠍ ꠕꠣꠇꠤ ꠌꠈꠥꠔ ꠟꠣꠉꠣꠘꠤꠞ ꠡꠥꠞꠝꠣ ꠟꠁꠀ ꠘꠦꠅ, ꠔꠦꠃ ꠔꠥꠝꠞꠣ ꠢꠣꠍꠣꠞꠞ ꠌꠃꠈꠦ ꠖꠦꠈꠛꠣꠄ।
19 “ꠢꠥꠘꠅ, ꠀꠝꠤ ꠎꠦꠞꠣꠞꠦ ꠝꠣꠄꠀ ꠇꠞꠤ, ꠔꠣꠞꠣꠞ ꠖꠥꠡ-ꠔꠤꠞꠥꠐꠤ ꠖꠦꠈꠣꠁ ꠖꠦꠁ ꠀꠞ ꠡꠣꠡꠘꠅ ꠇꠞꠤ। ꠄꠞꠟꠣꠉꠤ ꠔꠥꠝꠞꠣ ꠃꠝꠟꠤ ꠉꠞꠝ ꠕꠣꠇꠤ ꠙꠥꠞꠣ ꠉꠞꠝ ꠅꠁꠀ ꠔꠃꠛꠣ ꠇꠞꠅ। 20 ꠎꠣꠘ ꠘꠤ, ꠀꠝꠤ ꠖꠥꠀꠞꠞ ꠉꠦꠍꠦ ꠃꠛꠣꠁꠀ ꠖꠥꠀꠞꠅ ꠑꠥꠇꠣꠁꠞꠣꠝ। ꠀꠝꠣꠞ ꠉꠟꠣꠞ ꠀꠅꠀꠎ ꠢꠥꠘꠤꠀ ꠎꠥꠖꠤ ꠇꠦꠃ ꠔꠣꠞ ꠖꠥꠀꠞ ꠈꠥꠟꠤꠀ ꠖꠦꠄ, ꠔꠦ ꠀꠝꠤ ꠔꠣꠞ ꠜꠤꠔꠞꠦ ꠢꠣꠝꠣꠁꠝꠥ, ꠔꠣꠞ ꠟꠉꠦ ꠈꠣꠘꠣ-ꠖꠣꠘꠣ ꠈꠣꠁꠝꠥ ꠀꠞ ꠢꠦ-ꠅ ꠀꠝꠣꠞ ꠟꠉꠦ ꠈꠣꠘꠣ-ꠖꠣꠘꠣ ꠈꠣꠁꠛ। 21 ꠀꠝꠤ ꠎꠦꠟꠣ ꠎꠄꠁ ꠅꠁꠀ ꠀꠝꠣꠞ ꠉꠣꠁꠛꠤ ꠛꠣꠚꠞ ꠟꠉꠦ ꠔꠣꠘ ꠙꠛꠤꠔ꠆ꠞ ꠀꠞꠡꠞ ꠇꠥꠞꠍꠤꠔ ꠛꠁꠍꠤ, ꠑꠤꠇ ꠅꠃ ꠟꠣꠈꠣꠘ ꠎꠦ ꠎꠘ ꠎꠄꠁ ꠅꠁꠛ, ꠔꠣꠞꠦꠅ ꠀꠝꠤ ꠀꠝꠣꠞ ꠟꠉꠦ ꠀꠝꠣꠞ ꠇꠥꠞꠍꠤꠔ ꠛꠅꠀꠞ ꠅꠗꠤꠇꠣꠞ ꠖꠤꠝꠥ।
22 “ꠎꠣꠞ ꠇꠣꠘ ꠀꠍꠦ ꠢꠦ ꠢꠥꠘꠃꠇ, ꠙꠣꠇ ꠞꠥꠢꠦ ꠎꠝꠣꠔ ꠅꠇꠟꠞꠦ ꠇꠤꠔꠣ ꠛꠣꠔꠣꠁꠞꠣ।”