3
1 Unvue keebo kakilandua na Yawe pa mulandu wenu mwe Baizraeli, mwe lupua lwalingi lunaafumiizie mu Misri:
2 “Mwemue sie i banaasaakwile pa ntundu yonse ya pa kyalo.
Ni pakako, naakamikanda pa mulandu wa bibalo byenu.”
Mwilo wakua kabika
3 Ati, kubako bantu babili kuti baenda pamo
tekuba baunvwenenke?
4 Ati, kubako nkalamu aliwabuluma mu musitu lu-asinakwate nama?
Kubako mwina nkalamu kuti wabuluma mu lisele lu-asinakwate kantu?
5 Ati, kubako kooni kuti kakwatua mu muteo ute-elue
pasili kabembo?
Ati, kubako muteo kuti wapusa
tekuba mwali kya kukwatuamo?
6 Ati, kubako musita uliwaliziiwa ntandala ya bului mu muzi
bantu tebezi kutiina?
Ati, kubako musita uliwafika busanzo mu muzi,
te Yawe aliwabuleeta?
7 Kisinka Yawe Kabezia Mpungu tezi kukita kantu
pasili kutubula mapange akue ku babombi bakue bakabika.
8 Nkalamu lu-aliwabuluma,
nani asivinda kutiina?
Yawe Kabezia Mpungu lu-aliwalanda,
nani asivinda kubikula?
9 Ele mukunda mu byubo bya mu Ashdodi,
ni mu byubo bya mu Misri nangue,
“Kolonghane peulu mpili ya ku Samaria,
mone lubebue viluvulilemo,
ni kubiibikiziwa mukati mwakue.”
10 Yawe walanda evi, “Bantu ba ku Samaria tebamanine kukita biweme.
Bezuziizie bintu mu byubo byabo,
bintu bibapokele mu bukabooko ni mu bungipaani.”
11 Ni pakako, evi i vilimukulanda Yawe Kabezia Mpungu nangue,
“Basamaria baakazyungulukila kyalo kyenu,
baakatuuta byubo byenu
ni kupoka nghanda yenu ya kufyamamo.”
12 Yawe walanda evi,
“Nga evelia musungi vi-aliwasompola mu kanua ka nkalamu, myendo ibili ao kiputu kya kutui,
i vikyaakaba ni ku Baizraeli bekeele mu Samaria,
balia baleele pa bulita bwabo,
ni ku bantu ba mu Damaski,
bantu bekeele mu bitebe byabo bya mutengo.”
13 “Ale twilizie ni kusininkizia palua luvyalo lwakua Yakobo,” koku i kulanda kwakua Mulopue, Yawe Leza wa Maka onse.
14 ✡3.14: 2 Mak 23.15“Busiku bunakakanda Baizraeli pa mulandu wa bibalo byabo,
naakatuuta bitale bya ku Beteli.
Tutunfi twa bitale twaakeenoonua
ni kuponena pansi.
15 Naakatuuta nghanda ya pa musita wa mainza,
ni nghanda ya pa musita wa kipua.
Nghanda ifwaniiziwe na meno a nzovu yaakatuutua,
ni nghanda yonse ikata yaakeenoonua,”
koku i kulanda kwakua Yawe.