4
1 Twilizie kaka keebo mwe banakazi ba pa lupili lwa Samaria, mwe bali nga nghombe ya ku Basani,
mwe balibabiibikizia bapabi, ni mwe balibakita bibiipile ku babulilue,
ni kubaana balume benu nangue “tupeele bikolani!”
2 Yawe Kabezia Mpungu waalaile mu buzuuke bwakue nangue,
“Kisinka musita ulimukwiza
lubakaba kumifumia na ndobaano,
ni basyelepo pakati kenu baakaba kulobua na ndobaano nga lisabi.
3 Mwaakafumiziwa lya palia patutikile bibumba,
mwakapoozua panze lya ku Harmoni,”
koku i kulanda kwakua Yawe.
4 “Endo ku Beteli, muye mubale kibalo,
endo ku Gilgali, mulunduluke kubala.
Leete ngelelo yenu kubalua lukeelekeele,
kamo ka pa lyanondo mu nsiku itatu.
5 Zizie mukate ututumukile nga ngelelo ya kusantila,
iitasie palua bupe bumulimwapeela mu kutona kwenu,
iitantamune palua bebio byabupe mwe Baizraeli
pantu bebi i bimutonene kukita,”
koku i kulanda kwakua Yawe Kabezia Mpungu.
6 “Naaleetele kimina kya nzala mu mizi yenu yonse,
ni kubulua kwa bilio mu kubalua muzi.
Anzia kyaali evio temwambweleele,”
koku i kulanda kwakua Yawe.
7 “Ntanzi ya kufikiila kuzombola,
nsyaamipeele nvula pa myezi itatu.
Naanokiizie nvula mu muzi umo,
inzi mu unge muzi nsyaanokiiziemo.
Nvula yaanokeele mu bukaba bumo,
mu bunge mwaasyele mwaumine pantu nsyanokiiziemo.
8 Bantu baendookele mu mizi ni mizi balimukukeba menda a kumina
inzi tebasangilemo a kubakumana.
Anzia kyaali evio, temwambweleele,”
koku i kulanda kwakua Yawe.
9 “Lingi nainoonene makaba enu ni makaba a mizabibu,
naumiizie bimuti na mwela wa lyuza.
Luzie lwaaliile bilimbua byonse bya mu makaba enu ni bimuti bya mizeituni.
Anzia kyaali evio, temwambweleele,”
koku i kulanda kwakua Yawe.
10 “Naatumine kimina pakati kenu,
nga vinaakitile ku Bamisri.
Naipaile baana benu balumendo na kipanga.
Naamipokele farasi yenu.
Naizuziizie myona yenu na bunu bwa mibili ibolele mu mitanda yenu.
Anzia kyaali evio, temwambweleele,”
koku i kulanda kwakua Yawe.
11 ✡4.11: Kut 19.24“Nainoonene bamo pakati kenu
nga evelia vinainoonene Sodoma ni Gomora.
Naamisomwene nga kakooko ka-apulua pa mulilo.
Anzia kyaali evio, temwambweleele,”
koku i kulanda kwakua Yawe.
12 “Ni pakako, evi i vinaakamikitila mwe Baizraeli!
Kabili pantu naakamikitila evio mwe Baizraeli,
iiteanie kusaakaana ni Leza wenu.”
13 Olia waabumbile mpili
ni waalengele mwela,
olia aliwafyula malanga akue ku bantu,
aliwa-alula lukeelekeele kuba nfinzi
ni kwenda pa kyalo pa nkendo ilendukile,
Yawe, Leza wa Maka onse, i Liina lyakue.