8
Kimonua kya kipanda kilimo mazabo.
1 Yawe Kabezia Mpungu wanangisiizie kinge kimonua kinaamwenemo kipanda kilimo mazabo apiile. 2 Yawe wangipuziizie evi, “Ati Amosi, umweneki?”
Na-asukile nangue, “Kipanda kilimo mazabo apiile.”
Yawe i lu-anghanine, “Musita wa kukaana kweleela bantu bane wakumana.”
3 Yawe Kabezia Mpungu walanda evi, “Mu bobo busiku nghimbo mu Nghanda yakua Leza yaakaaluka nghimbo ya malilo. Mibili ingi mu nkendo ingi yaakaba yapoozua sie tondolo!”
Leza waakakanda Izraeli
4 Unvue mwe balibabiibikizia bantu babuliilue,
ni kuluvia bapabi ba mu kyalo.
5 Mwemue mulimwalanda evi,
“Kubako kubaluka kwa kwezi kwakaba kupua musitaki pakuti tukabe kusisia mbezu?
Sabata ni yo yakaba kupua musitaki pakuti tukabe kusisia nghano?”
Mulimwakeefia tulingo,
mulimwasezia mutengo,
mulimwapompola na kalingo ka bufi,
6 mulimwasita mupabi na mutofue,
abuliilue ni ye mulimwamusita na mpe imo ya nkwabilo,
mulimwasisia nghano mwabikiliilemo ni busapia.
7 Yawe, bwitanko bwakua Yakobo, wakilapa mu Liina lyakue walanda nangue, “Nsikalaba kubalua kantu kabakita.
8 “Kubako kyalo tekikasunkaana palua ozu mulandu,
ni bantu bekeelemo tebakaloosia?
Kyalo kyalingi kyaakatungupila nga Mwenzi wa Nile.
Kyaakatuulama ni kukooka nga mabimbi a mwenzi wa ku Misri.
9 “Yawe Kabezia Mpungu walanda nangue,
“Mu bobo busiku waakalengia busiku kwila koba kali pakati mutue,
ni kukupa kyalo na nfinzi koba kaseeme.
10 Naakaalula nsikunkulu ya mpupo yenu kuba ndoosio,
ni nghimbo yenu yonse kuba nghimbo ya malilo.
Naakamilengia mwe bonse kuvwala masaaka,
ni kumitebula kakuuzu ku mitue yenu.
Ozo musita naakaukita kuba nga musita wa kuloosia mwana lyonga,
ni mpeleezio ya bobo busiku yaakaba yakilile kubiipa.
11 “Yawe Kabezia Mpungu walanda evi, ‘Nsiku ilimukwiza,
lunaakatuma nzala pa kyalo.
Teikaba nzala ya bilio ao kyaka kya menda,
inzi yaakaba nzala ya kunvua keebo kakua Yawe.
12 Bantu baakaba basakaana kufuma ku Lyezi lya Mukele kuya ku Lyezi lya Mediterania,
ni kupitaana kufuma ku nkungua kuya ku kabanga,
balimukukeba keebo kakua Yawe,
inzi tebakakasanga.’
13 Mu bobo busiku,
bakazyana baweme ni balumendo ba maka,
baakapenzuka na kyaka.
14 Balia balibalapa mu meena a mikisi ya ku Samaria,
balia balibalanda nangue, ‘Mu liina lyakua leza mukose wa ku Dani,’
ao nangue, ‘Mu liina lyakua leza mukose wa ku Bersheba,’
baakapona pasili kubuuka.”