9
Bupinguzi bwakua Yawe
1 Naamwene Yawe waimeene mumbali kitale. Waalandile nangue,
“Uma ku bisulo,
evi mapumpu atente.
Biponiizie pa mitue ya bantu bonse.
Ni balia baakasyalapo naakabeepaya na kipanga.
Tekuli muntu waakabutuka.
Tekuli waakapanda.
2 Anzia beimbila nzila ya kuya kumbo,
nakaba kubafumiamo na kuboko kwane.
Anzia basela mu myulu,
nakaba kubakoosiizia pansi.
3 Anzia befiika peulu lupili lwa Karmeli,
nakaba kubakeba ni kubakwata.
Anzia banfyama kwinsina lyezi,
nakaba kwana kizoka kikabe kubasumina koko kwenka.
4 Anzia batwalua ku buzia na balwani babo,
nakaba kulengia bakeepailue koko kwenka.
“Nakaba kuya nabakenteleele na menso ane,
pakuti n'mbakitile bibiipile tekuba biweme.”
5 Mulopue, Yawe wa Maka onse aliwakumia kyalo, ni kyo kilikyasunguluka.
Bonse bekeelemo balibaloosia.
Kyalo kyalingi kilikyalenduka ni kukooka nga mabimbi a Mwenzi wa Nile.
Ni pa kyamba kilikyakooka nga mabimbi a mwenzi wa ku Misri.
6 Ozu Yawe aliwakuula nghanda yakue ya bukolo mu myulu
ni aliwaimika biputa byakue pa kyalo,
ozu aliwakuuta menda a mu lyezi
ni aliwa-etila pa kyalo,
Liina lyakue ni Yawe.
7 Yawe waipuzia evi, “Mwe Baizraeli!
Kubako nsimipendele nga vin'mpendele bantu ba ku Etyopia?”*9.7 Etyopia: Leli liina mu Kiebrania ikulanda nangue Kushi
“Kubako te nene waamifumiizie mu Misri?
Te nene waafumiizie Bafilistini ku Kaftori?
Te nene waafumiizie Bashamu ku Kiri?
8 “Kisinka menso ane ne Yawe Kabezia Mpungu,
akentele pa bukolo bwa bibalo.
Nakaba kubwinoona pa kyalo,
inzi nsikeenoona nvyalo yonse yakua Yakobo,”
koku i kulanda kwakua Yawe.
9 “Pantu naakafumia nsambu ya kuuluzia Baizraeli pa ntundu yonse,
naakabauluzia nga nghano iliyauluziiwa mu kipanda.
Tekuli lubezu lwa nghano lwaakaponena pansi.
10 Bantu bonse ba bibalo pa bantu bane,
baakeepawa na kipanga,
balia bonse balibalanda nangue,
‘Tetukasanzua.’
Kuwamiwa paakale pa kyamba kya kwinoonua
11 ✡9.11: Mii 15.16-18“Mu bobo busiku
“naakabwezia nghanda iponene yakua Daudi,
naakawamia palia penoonekele,
naakeemika paakale bituuti byakue,
naakakuula paakale nga viyaali pa mambo,
12 evi Baizraeli bakapoke nkendo yaasyeleko mu kyalo kya Edomu,
pamo ni ntundu yane yonse,”
koku i kulanda kwakua Yawe ozo waakakita bebi bintu.
13 Yawe walanda evi,
“Nsiku ilimukwiza, muzombozi lu-aliwaakaba wakitwaliile kuzombola
musita wa kulima wasyafikile,
ni aliwatika mizabibu lu-aliwaakaba wakitwaliilile kutika musita wa kulimba wasyafikile,
mpili yaakatoonia divai ya lenu,
ni tupili ni to twaakaipongola.
14 Naakafumia bantu bane, Baizraeli, mu buzia ni kubabwezia.
“Baakakuula paakale mizi ituutikile ni kwikalamo.
Baakalimba mizabibu ni kuminako divai.
Baakalima makaba ni kulia bibaakabyalamo.
15 Naakalimba Izraeli mu kyalo kyakue,
kabili tekuli muntu waakamunukula mu kyalo kinaamupeele,”
koku i kulanda kwakua Yawe Leza wenu.