KITABU KYAKUA
OBADIA
BULONDOLOZI
Keki kitabu kili na mbiko yakua Obadia. Mpunda yakua Obadia, ni bulanzi bwa kukanda bantu ba ku Edomu ba mu luvyalo lwakua Esau. Bantu basambiliile tebamanine bwinobwino musita waalembeeluepo kitabu kyakua Obadia. Kuti kyavindikika kulanda nangue koku kukandua i kolia kwaakitikile musita waasakukiilue Yeruzalemu na Babiloni, ni Edomu pasili kumukwasia Izraeli. Kine keki ni kisinka, kansi keki kitabu kyaalembelue pepi mu myaka 600 NK.
Obadia alandiilenke palua kukandua kwakua Edomu bunke, inzi pa kyamba, mu mulongo wa 15, abiikilemo kukandua kwa ntundu yonse. Pa mpeleezio, Obadia alandile nangue busiku bumo Baizraeli bateekelue buzia baakabwela ni kupoka kyalo kyabo.
Bwipi bwa bili mu kitabu kyakua Obadia
1. Mu mulonga wa 1-14 kukandua kwakua Edomu kwazimbulua.
2. Mu mulongo wa 15-21 mulandilue palua ntundu viyaakapingulua palua kiitoni kyayo ni palua Baizraeli bateekelue buzia vibaakabwela ni kupoka kyalo kyabo ni kuteeka kyalo kya Edomu.
1
Kukandua kwakua Edomu
1 ✡1.1: Isa 34.5-17; 63.1-6; Yer 49.7-22; Eze 25.12-14; 35.1-15; Amo 1.11-12; Mal 1.2-5Kimonua kyakua Obadia.
Kaka i keebo kalandile Yawe Kabezia Mpungu palwakua Edomu:
Twakyunvua mpunda kufuma kuli Yawe.
Mukenzi wakitumua ku ntundu walanda nangue,
“Buuke tuye tulue na Edomu!”
2 Yawe wamwana Edomu nangue,
“Mona nakaba kukukeefia pa ntundu.
Wakaba kukila kuleebulua na bonse.
3 Kiitoni kya mutima obe kikubeepele,
we ekeele mu milunda ya mabue,
we akitile ni bwikazi bobe peulu,
we aliwaiana nangue,
‘Kubako nani alikuvinda kunkoosiizia pansi?’
4 Anzia kine uselele mu muulu nga nzwiba
ni kukita busalala bobe pa bukata bwa ntanda,
naakakufumiapo ni kukukoosiizia pansi,”
koku i kulanda kwakua Yawe.
5 “Bakabooko ao bapoti lubalibakwingilila musita wa busiku,
kubako tebezi kwibamo sie belia bibatonene?
Bazombozi ba mizabibu lubalibaiza kuzombola,
kubako tebalibasiamo mizabibu iniini?
Inzi balwani bobe bakeeza kutwama byonse.
6 Mwe nvyalo yakua Esau, bunonsi bwenu bwakipokua,
bukonto bwenu bonse bwakiba bwafiikilue bwakifyulua.
7 Bonse bawaali waunvwana nabo,
bakaba kukukumba mpaka ku mipaka.
Babibuza bobe bakaba kukwalukila ni kukupoka kyalo kyobe.
Balia balibalia mukate obe bakaba kukuteyela muteo.
Inzi ozo muteo teukaba ku-umona.
8 “Ne Yawe naipuzia evi:
Kubako mu bobo busiku, nsikaba kwinoona, bantu ba mulangue ba mu Edomu,
ni bakengezi ba mu mpili yakua Esau?
9 We muzi wa Temani, balukale bobe bakaba kutiiniiwa,
kubalua muntu ali mu mpili yakua Esau wakaba kusinzua.
Kafi ka kukandua kwakua Edomu
10 Wewe Edomu wakimukitila bubi mwalaobe Yakobo,
ni pakako, wakaba kumoniiwa busoni
ni kwinoonua muyayaya.
11 Pa bobo busiku, wewe Edomu waali waimeene lwa kule wakenteleele
baeni lubaali balimukutwama bunonsi bwakua Yakobo,
ni bantu ba mu kinge kyalo lubaali baingila mu milyango yakue,
ni kukasana bunonsi bwa mu Yeruzalemu na kutea bubale.
Wewe waali wali nga bene.
12 Wewe tewaali wapalile kuleebula wa kobe
mu nsiku ya lyenda lyakue.
Tewaali wapalile kuwaminua pa mulandu wa Bayuda,
mu nsiku ya kwinoonua kwabo,
ao kukila kwitantamuna musita wa maavia abo.
13 Tewaali wapalile kupita mu milyango ya bantu bane
mu nsiku ya busanzo bwabo,
ao kusansamukila maavia abo
mu nsiku ya busanzo bwabo,
ao kupoka bunonsi bwabo
mu nsiku ya busanzo bwabo.
14 Tewaali wapalile kwimana mu masanzio nzila
kuti wipaye bantu babo babutukile,
ao kubapaana ku balwani babo
mu nsiku ya lyemo lyabo.
15 “Busiku bwakua Yawe bwapalama,
bwa kupingula ntundu yonse.
Wewe Edomu waakakitilua nga viwakikitilana.
Bikitua byobe biwakikita byaakakubwelelela.
16 Mwe bantu bane! Nga vimwakimina kikombe kya lyemo pa lupili lwane luzuuke,
ntundu yonse ni yo i viyaakaba yamina.
Yaakaba yaminamina sie ni kulobelela.
17 Inzi pa Lupili lwa Sayuni paakaba bupusuko.
Lolo lupili lwaakaba luzuuke.
Ni Yakobo waakapyana bupyani bwakue.
18 Nghanda yakua Yakobo yaakaba mulilo,
ni nghanda yakua Yusufu yaakaba libeebe lya mulilo.
Nghanda yakua Esau yaakaba bikusi byume,
bebio byaakaziziiwa ni kwinoonua.
Tepakaba muntu waakasyalapo,”
koku i kulanda kwane ne Yawe.
19 “Bantu ba kufuma ku kyalo kya ku Negebu baakapoka kyalo kya mpili kyakua Esau,
ni bantu ba mwinsina mpili baakakwata kyalo kya Bafilistini.
Baakapoka kyalo kya Efraimu ni kya Samaria,
Benyamina ni ye waakakwata kyalo kya Gileadi.
20 Libumba lya Baizraeli lyaali lyabutukiile ku Kanaani
lyaakabwela ni kupoka kyalo mpaka ku Sarepta.
Balia baafumine ku Yeruzalemu ni kubutukila ku Sefaradi,
baakakwata muzi wa Negebu.
21 Bapususi baakasela pa Lupili lwa Sayuni,
ni kuteeka kyalo kya mpili kyakua Esau.
Ni bobo bukolo bwaakaba bwakua Yawe.”