1 Pa busiku bwa lyanondo ni isaano bwa mwezi wa bubili pa kyamba kya kufuma ku Misri, libumba lyonse lya Baizraeli lyaafumine ku Elimu ni kuya kufika ku kaseeba ka Sini kali pa bukata bwa Elimu ni Sinai. 2 Lubaafikile mu kaseeba, baabambile kumwitendookela Musa ni Haruni balanda nangue, 3 “Kansi Yawe nga waatwipaile sie mu kyalo kya Misri, koko kutwaali twaikeele twazyungulukiile mipika iizuzimo minofu ya nama, ni kulia bilio byonse bitwatonene kulia. Inzi evi mwakituleeta kono kufuma Misri kuti mwize mutwipaye na nzala mono mu kaseeba.”

4 ✡16.4: Yoa 6.31Yawe i lu-aamwanine Musa nangue, “Unvua, nakaba kuya nabanokiizia bilio kufuma mwiulu, evi kubalua busiku bantu bakabe kuya bafuma ni kutoolapo bilio bya kulia bobo busiku, pakuti nkabe kubeezia ni kumona kine kuti bakonka mizilo yane ao abe. 5 Inzi busiku bwa mutanda baakaba bateania bilio bya kulia nsiku ibili.”

6 Ni pakako, Musa ni Haruni baabaanine Baizraeli nangue, “Lelo kyungulo mulikwinika nangue Yawe i wakimifumia mu kyalo kya Misri. 7 Ni lukeelekeele mwakaba kumona bulumba bwakua Yawe, pantu wakyunvua vimwakiba mwamwitendookela. Ale fwefue tuli bani pakuti mutwitendookele?” 8 Kabili Musa waatwaliliile kulanda nangue, “Mwakaba kumona bulumba bwakua Yawe pa-akaba kumipeela munani wa kulia musita wa kyungulo, ni bilio bya kulia ni kwikuta musita wa lukeelekeele, pantu Yawe waunvua kwitendooka kwenu kumulimukumwitendookela. Ale fwefue tuli bani pakuti mutwitendookele? Mwemue mulimukwitendookela Yawe.”

9 Kabili Musa waamwanine Haruni nangue, “Ana Baizraeli bonse baye kuli Yawe pantu wakyunvua kwitendooka kwabo.” 10 Haruni lu-aali walanda na Baizraeli, penka papo bakenta kale ku kaseeba ni kumona bulumba bwakua Yawe bwalimuku-unguzima mu lilezi. 11 Yawe waamwanine Musa nangue, 12 “Nakyunvua kwitendooka kwa Baizraeli. Ale baane nangue kubalua kyungulo mwakaba kuya mwalia munani wa nama, ni kubalua lukeelekeele mwakaba kuya mwalia mikate. I pamwakaba kwinika nangue nene ndi Yawe Leza wenu.”

13 Musita wa kyungulo nkwale ingi yaizile kwikala monse mwaali mitanda. Ni lukeele lwakue lukeelekeele lume lwakumeene monse mwaali mitanda. 14 Lume palwaakunkikile, mu kaseeba mwaamwenekele tuntu twaali twamaatikile twaswetele nga kibue. 15 ✡16.15: 1 Bak 10.3Baizraeli lubaamwene toto tuntu, baapapile ni kwipuzyania nangue, “Ale totu tuntu ni tuki?” Pantu tebaali batumanine.

Musa waabaasukile evi, “Bebi i bilio bimwapeelua na Yawe kuti mulie. 16 Yawe waafumiizie mwano walanda nangue, ‘Kubalua lupua lutoole kukonkana ni vilulikuvinda kulia. Kubalua muntu ali mu mutanda apeelue tupe tubili.’ ”

17 Ni pakako, Baizraeli baakitile muba-aniinue. Bange baatolele bingi, ni bange baatoolele sie biniini. 18 ✡16.18: 2 Bak 8.15Inzi lubaabiikile mu kalingo, kubalua muntu byaali byamukumeene, olia waatoolele bingi taali na bivuliisie, ni olia waatoolele biniini taali na bikeepeesie. Kubalua lupua lwaatoolele bya kuti bekute. 19 Ni pakako, Musa waabaanine nangue, “Tekusiepo bya kufika lukeele lukeelekeele.” 20 Anzia kyaali evio, tebaamunvwile Musa, bange pakati kabo baasiilepo mpaka lukeelekeele, inzi ni byo byaabolele, bya-alukamo myolo ni kutendeka kununka. Ni pakako, Musa waabafiitiilue. 21 Lyonse lukeelekeele kubalua muntu waali watoola bya kulia bya kuti ekute, ni koba lukaali kasaama, byaali byasunguluka.

22 Busiku bwa mutanda baatolele libili, kubalua muntu tupe tubili. Ni bakulu bonse ba libumba baizile kumubwila Musa. 23 ✡16.23: Kuf 20.8-11Musa waabaanine nangue, “Yawe walanda evi, ‘Lukeele i busiku bwa kutuuzia, Sabata izuuke yakua Yawe. Kansi apike bimulikuvinda kwapika, ni kufulumia bimulikuvinda kufulumia. Bilikusyalapo mubisunge mpaka lukeelekeele.’ ” 24 Ni bo baasungile mpaka lukeelekeele nga muba-aniinue na Musa. Bebio bilio tebyaanunkile, kabili temwa-alukile myolo. 25 Musa waabaanine nangue, “Evi lelo vibuli busiku bwa Sabata, busiku buzuuke bwa kutuuzia bwakua Yawe, bebi bilio bilie lelo lyenka pantu lelo temutoola bilio. 26 Mwakaba kuya mwatoola bya kulia mu nsiku mutanda, inzi busiku bwa kilooba, busiku bwa Sabata tebikaba byamonekamo.”

27 Lubwaafikile busiku bwa kilooba, bantu bamo baile bakeba kutoola, inzi tebaabimwene. 28 Yawe waamwipuziizie Musa nangue, “Eba, mwaakaba mwakaanakaana sie kusunga milao ni mizilo yane mpaka musitaki? 29 Mupalile kumana nangue Yawe wakimipeela busiku bwa Sabata, ni pakako, pa busiku bwa mutanda i ki-akimipeelela bilio bya nsiku ibili. Kansi kubalua muntu apalile sie kuya waikeele mu busiku bwa kilooba. Tekuli muntu ali ni nsambu ya kufuma kuya mu kutoola bilio.” 30 Ni pakako, bantu tebaatoole bilio pa busiku bwa kilooba.

31 ✡16.31: Mpe 11.7-8Baizraeli baabiinikile bebio bilio nangue maana.*16.31 maana: Kaka keebo kalikaunvwika nga ka mu Kiebrania, i kulanda nangue “Totu tuntu ni tuki?” (Mona mulongo wa 15). Byaali byaswetele nga masaka. Byaali ni mulio wakue waali wasonsele nga mukate umaatikile ukitiliilue na kapelo. 32 Musa waabaanine nangue, “Yawe wakitwana evi, ‘Sungepo kalingo kamo ka maana pa mulandu wa nvyalo yenu, evi ikamoneko bilio binaamilisiizie mu kaseeba, lunaamifumiizie mu kyalo kya Misri.’ ” 33 ✡16.33: Bae 9.4Musa waamwanine Haruni nangue, “Buula kape kamo ubiikemo kalingo kamo ka maana ni kukateeka pa ntanzi yakua Yawe, evi maana alabukilue bwino pa mulandu wa nvyalo ya ku ntanzi.” 34 Haruni waakitile mwa-aniinue Musa na Yawe, waabuulile kape kalimo maana ni kukateeka mu Lisanduku lya Kipingo pakuti azo maana alabukilue bwino. 35 ✡16.35: Yos 5.12Ni pakako, Baizraeli baaliile maana mu myaka 40, mpaka musita ubaile kufika mu kyalo kibaile kwikalamo. Baaliile maana mpaka kuya kufika ku mipaka ya kyalo kya Kanaani. 36 (Kako kape kaali kalingo kamo ka lyanondo mu efa imo.)