1 Baizraeli bonse baafumine mu kaseeba ka Sini ni kuya kukuukila ku inge nkendo kukonkana ni viba-aninue na Yawe. Baile kukuula mitanda ku Refidimu, inzi koko ku Refidimu tekwaali menda a kumina bantu. 2 Ni pakako, baamusakukiile Musa balanda nangue, “Lenga utupeele menda a kumina.”

Musa waabaasukile evi, “Ale kimulimukungitendookela ni kiki? Mulimukumweziiziaki Yawe?”

3 Inzi bantu baakilile kunvua kyaka ni kukila kumwitendookela balanda nangue, “Eyo wakitufumia mu Misri ni kwiza kutwipaila mono na kyaka, fwe ni baana betu pamo ni nama yetu!”

4 Kabili Musa waamuliliile Yawe walanda nangue, “Ale baba bantu ndikubakitilaki? Evi tebakeba kuntoota mabue.”

5 Yawe waamwanine Musa nangue, “Twamapo masiiko amo a Baizraeli uye nao ku ntanzi ya libumba. Utwame ni kabango kawaumine pa Mwenzi wa Nile. 6 Ndikuya kwimana pa ntanzi yobe pa mwalala ku Horebu. Uye uume mwalala, evi menda a kumina bantu afume.” Musa waakitile evio pa menso a masiiko a Baizraeli.

7 Pa ezio nkendo Musa wainikilepo liina lya Masa*17.7 MasaLelio liina mu Kiebrania i kulanda nangue Kwezia. ni Meriba†17.7 MeribaLelio liina mu Kiebrania i kulanda nangue Kusakukila. pantu Baizraeli baamusakukiile Musa ni kumwezia Yawe lubaipuziizie nangue, “Ati emwe, kubako Yawe ali pamo ni fwefue ao abe?”

8 Baizraeli lubaali ku Refidimu, baizile kusakukilua na Ba-amaleki. 9 Musa waamwanine Yoshua nangue, “Saakulapo balalume pa bantu betu uye ulue na Ba-amaleki. Nene lukeele nakaba kuya kwimana pa lupili nakwete kabango kana-aninue na Leza kuba nako mu minue yane.” 10 Ni pakako, Yoshua waile kulua na Ba-amaleki nga mwa-aniinue na Musa. Ozo musita Musa ni Haruni pamo ni Huri baaselele peulu lupili. 11 Musa lyonse lu-aali walendula maboko akue waakwete ni kabango, Baizraeli baali ba-anzia. Inzi lu-aali wakoosia maboko akue, Ba-amaleki i baali ba-anzia. 12 Maboko akua Musa teakokwele kunaka ni ye waali wasya-andua kulendula maboko. Ni pakako, Haruni ni Huri baamuleeteele Musa libue lya kuti ekalepo. Kabili baimeene umo kulio ni unge kuso bakwatiliile maboko akua Musa aali alendukile mpaka kyungulo. 13 Ni pakako, Yoshua wa-anziizie balukale ba Ba-amaleki ku bului.

14 ✡17.14: Mam 25.17-19; 1 Sam 15.2-9 Pa kyamba kya kwanzia, Yawe waamwanine Musa nangue, “Lemba totu twebo twa bwanzio mu kitabu, evi kikabe kyalangulukua lyonse, ni pa kyamba umwane Yoshua nangue naakalovia Ba-amaleki, kabili tekuli muntu waakaba wabalanguluka pano pa kyalo.” 15 Musa waakuulile kitale ki-ainikile, “Yawe-Nisi.”‡17.15: Yawe-Nisi Mu Kiebrania i kulanda nangue, Yawe i bwanzio bwane. 16 Musa waalandile evi, “Yawe walapa nangue waakaba watwaliliile kulua na Ba-amaleki, pantu maboko akilendulua ku kitebe kya bukolo kyakua Yawe.”