1 ✡23.1: Kuf 20.16; Bal 19.11-12; Mam 5.20“Tekuvumia mpunda ya bufi ni kwampana na muntu mubi mu kusininkizia bya bufi. 2 Tekukonkelela bantu bengi mu kukita bibiipile. Luuliwakuutua kusininkizia mu kilie, tekubembua na bwingi bwa bantu mukwinoona nsambu. 3 ✡23.3: Bal 19.15Kabili tekumupeela mupabi nsambu pantu ni mupabi.

4 ✡23.4: Mam 22.1-4“Kine wamona nghombe ndume ao punda wakua mulwani obe wazeezele, upalile kumubweziizia mwine. 5 Kine punda wakua mulwani obe wamusanga waponene wailikiilue na bitwamo, tekumulekeela pa-aponenanga. Sininkizia nangue wamukwasia mulwani obe na kubuusia ozo punda.

6 ✡23.6: Bal 19.15; Mam 16.19“Tekumubiibikizia mupabi mu milandu yakue. 7 Iikeke ku busongezi bwa bufi, kabili te kwipaya muntu asili na kilubo ao mulunghami, pantu muntu ali ni bubi nsikamupenda kuba asili na bubi. 8 Tekupoka bituulilo pantu bituulilo bilibyazibatika menso ni kukalanghania twebo twa balunghami.

9 ✡23.9: Kuf 22.21; Bal 19.33-34; Mam 24.17-18; 27.19“Tekwemia mweni pantu mumanine vili mutima wa mweni, pantu ni mwemue mwaali baeni mu kyalo kya Misri.

10 ✡23.10: Bal 25.1-7“Mu myaka mutanda ukabe wabyalamo ni kuzombola. 11 Inzi mu mwaka wa kilooba upalile kulekela bukaba butuuzie, evi bapabi bali pakati kobe bakabe basololamo, ni byaakaba byasyalamo bikabe byaliiwa na nama ya mu kisonso. Evi i vyakuti ukabe wakita mu bukaba bobe bwa mizabibu ni bwa mizeituni.

12 ✡23.12: Kuf 20.9-11; 31.15; 34.21; 35.2; Bal 23.3; Mam 5.13-14“Nsiku mutanda waya wabombamo miilo yobe, inzi busiku bwa kilooba upalile kutuuzia, evi nghombe yobe ni bapunda bobe batuuzie. Bazia bobe ni baeni bonse bawikeele nabo ni bo batuuzie.

13 “Pooze maano ku twebo tunaamyanine. Tekwezie kuzimbula liina lya baleza bange, kabili tekuti lyunvwiwe mu tunua twenu.

14 “Kubalua mwaka mukabe mwankitilamo nsikunkulu itatu. 15 ✡23.15: Kuf 12.14-20; Bal 23.6-8; Mpe 28.17-25 Mukabe mwakita nsikunkulu ya mukate usiliko ntutumusi. Mu nsiku kilooba mukabe mwalia mukate usiliko ntutumusi nga vinaakwanine, mukabe mwakita evio pa nsita ipalile mu mwezi wa Abibu, (pantu mu ozu mwezi i mwezi umwaafumiinemo mu Misri) tekuti kukabe kwali muntu waakaba waiza kuli nene tekuba wali na kantu ka kun'mpeela.

16 ✡23.16: Bal 23.15-21,39-43; Mpe 28.26-31“Mukabe mwakita nsikunkulu ya kuzombola mazabo a mambo a mu belia bimwaabyele mu makaba enu.

“Mukabe mwakita nsikunkulu ya kuzombola kwa ku mpeleezio ya mwaka kine mwafumia bimwaabyele mu makaba. 17 Kubalua nghendo itatu pa mwaka, balalume bonse bapalile bakabe baiza kun'mpupa ne Yawe Kabezia Mpungu.

18 “Tekungelele ngelelo ya nama pamo ni kintu kisanziziweko ntutumusi. Mafuta a nama ya ngelelo yane ya kyungulo teapalile akabe asungua mpaka lukeele lwakue lukeelekeele.

19 ✡23.19: Kuf 34.26; Mam 14.21; 26.2“Buzombozi bwa mambo bwa mu makaba enu mupalile mukabe mwabutwala mu Nghanda yakua Yawe Leza wenu.

“Tekuti mukabe mwaeleka mwina mbuzi mu mabeele akua nghina.

20 “Unvue, ndikumitumina malaika wakumitangilila ni kumisunga mu lwendo evi akabe kumifikia bwino ku nkendo inakimiteaniizia. 21 Kansi poozeko maano a kumunakila, tekumulengie kufiitua evi akamyeleele bilubo byenu, pantu aliwakita byonse mu Liina lyane. 22 Inzi kisinka kine mwemue mwaunvua ni kukita byonse bindimukulanda, ndikuya nali mulwani wa balwani benu, ni kulua na balia balibalwana nenu. 23 Malaika wane wakaba kumitangilila ni kumitwala ku kyalo kya Ba-amori, ni kya Bahiti, ni kya Baperizi, ni kya Bakanaani, ni kya Bahivi pamo ni kya Bayebusi, ni bo nakaba kubalovia. 24 Tekuti mukabe mwafukamina baleza babo ao kubapupa, tekuti mukabe mwakita mubalibakitila. Inzi mukabe kubeenoona, ni kuvunghania mapumpu abo. 25 Mwemue mupalile kumubombela sie Yawe Leza wenu, ni ye waakaba wapaalile bilio byenu, ni menda enu, ni ne naakamikingilila ku malwele. 26 Mu kyalo kyenu temukaba mwanakazi wa kupisia liimi, kabili temukaba nghumba. Mwaakeekala nsiku ingi

27 “Naakatuma bya kutiinia byane bikabe byamitangiliile ni kuvulunghania bantu bonse konse kumwaakalunghama, ni balwani benu bonse baakamifunghamina ni kubutuka. 28 Naakatuma nzuki yaakamitangilila kuya kukumba Bahivi, ni Bakanaani pamo ni Bahiti. 29 Nsikabakumba bonse mu mwaka umo, evi kyalo tekuti kikasyale kibolia, ni nama ya mu kisonso tekuti ikakile kuvula ni kumikila maka. 30 Naakaba nabakumba baniini baniini mpaka pamukasanduluka ni kupyana kyalo. 31 Kabili naakabiika mupaka wenu kutula ku Lyezi lya Kasi mpaka ku lyezi lya Bafilistini, ni kufuma ku kaseeba mpaka ku Mwenzi wa Efrati. Nene naakababiika bene kyalo mu maboko enu kuti mukabakumbe. 32 Tekuti mukakite nabo kipingo ao kukita kipingo na baleza babo. 33 Tekuti mukabeetabizie kwikala mu kyalo kyenu pantu nga baakamilengia kunduvia, kine mukabombele baleza babo, mwaakakwatua mu muteo wa kupupa mikisi.”