1 Musa waakolonghaniizie mabumba onse a Baizraeli. Waabaanine evi, “Totu i twebo twakilandua na Yawe kuti mukabe mwakita: 2 ✡35.2: Kuf 20.8-11; 23.12; 31.15; 34.21; Bal 23.3; Mam 5.12-14Nsiku mutanda ya mu mulungu mwaakaba mwabombamo miilo. Inzi busiku bwa kilooba, bwaakaba bwali busiku buzuuke kuli mwemue, Sabata ya kutuuzia yakua Yawe. Kubalua muntu waakabomba mu busiku bwa kutuuzia, waakeepawa. 3 Mu busiku bwa Sabata tekuti mukabe mwakozia mulilo mu nkendo yonse mumwakaba mwaikala.”

4 Musa wa-anine mabumba onse a Baizraeli nangue, “Twebo twakilanda Yawe kuti muye mwakita ni totu: 5 Mupeele Yawe bupe bwa bunonsi bumuli nabo. Kubalua muntu ali ni mutima wantono apalile kumupeela Yawe oro, ni mutofue, ni mukuba, 6 ni nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni ya kitani kiweme, ni masako a mbuzi, 7 ni kipapa kya mpanga kisubilueko mukumino wa kasi, ni kipapa kya kipomo, ni mbao ya kasiiya, 8 ni mafuta a mizeituni a mu litala, ni manukato a kubiika ku mafuta azuuke, ni ku bubaani buweme, 9 ni mabue a oniksi, pamo ni mabue a kubiika ku efodi ni ku mufuko wa pa nkulo.

10 “Kubalua muntu ali ni maano akukita miilo imo pakati kenu, eze akite bintu byonse byaalandile Yawe: 11 Akite liema lizuuke ni nkupo ya ku liema, ni bipempe, ni bikobo, ni mbao, ni mbango yakue, ni mapumpu akue pamo ni bya kwimikuamo. 12 Akite Lisanduku lya Kipingo pamo ni mipingo ya kupingilako ni ntupiko, ni kipempe kya kukingako, 13 ni meza pamo ni mipingo ya kupingilako, ni bibombelo byonse bya ku meza, ni mikate ya kilangililo, 14 ni kya kuteekapo matala ni bibombelo byakue, ni matala pamo ni mafuta pa mulandu wa kisue, 15 ni kitale kya kufunkiiziapo bubaani, ni mipingo ya kupingilako, ni mafuta azuuke, ni bubaani buweme, ni kipempe kya pa mulyango wa liema lizuuke, 16 ni kitale kya kuziziiziapo ngelelo pamo ni kasaaso ka mukuba, ni mipingo ya kupingilako, ni bibombelo byonse, ni musambilo pamo ni kya kuteekapo, 17 ni bipempe bizyungulukiile musolo wa mukati, ni mapumpu a ku musolo pamo ni bya kwimikuamo, ni kipempe kya pa mulyango wa musolo, 18 ni bikili bya ku liema lizuuke, ni bikili bya ku luuba lwa musolo, ni nkamba yakue, 19 ni ngubo isukilue bwino, ngubo izuuke yakua Haruni ni baana bakue balalume, ngubo ya kuvwala musita wa kubomba mwilo wa bukitambua mu kifuka kizuuke.”

20 Ni pakako, libumba lyonse lya Baizraeli lyaafumine pa ntanzi yakua Musa ni kubwelela ku mitanda. 21 Kubalua muntu kukonkana ni mu-aatoneene mu mutima wakue, waile kuli Musa ni kumutwalila Yawe bupe bwa kubombia pa kukuula Tabernakulo ni bupe bwa mwilo wa kubombela Leza, pamo ni bupe bwa bya kukitilako bivwalo bizuuke. 22 Bonse, balalume ni banakazi, baali ni mutima wa kupeela, baaleetele bikomo, ni ntimbi, ni tuzele twa kusyusyutilako, ni bikano, pamo ni bibombelo byonse bya oro. Kubalua muntu waamuleetele Yawe bupe bwa oro kuti bube bupe bwa kutensia. 23 Kubalua muntu waali ni nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni ya kitani kiweme, ni masako a mbuzi, ni kipapa kya mpanga kisubilueko mukumino wa kasi, pamo ni kipapa kya kipomo, waaleetele. 24 Kubalua muntu waafumiizie mutofue ni mukuba, waamuleeteele Yawe. Kubalua muntu waali ni kimuti kya kasiiya, waakileetele ku mwilo upalile. 25 Banakazi bonse baali ni maano a kusuka, baaleetele ngubo ibaasukile na minue yabo. Ngubo ya mukumino wa lyulu, ni ya mukumino wa bulumbi, ni ya mukumino wa kasi pamo ni ngubo ya kitani kiweme. 26 Ni banakazi baali ni maano a kusuka, baasukile masako a mbuzi. 27 Masiiko a Baizraeli baaleetele mabue a oniksi, pamo ni mabue a mponvu a kubiika ku efodi ni ku mufuko wa pa nkulo, 28 ni manukato, ni mafuta a mizeituni a mu matala, ni mafuta azuuke, ni bubaani bwa bunu buweme. 29 Baizraeli bonse, balalume ni banakazi, baaleetele bupe bwa kupeela Yawe bawamiinue mu mitima yabo pa mulandu wa miilo yonse ya-aninue Musa na Yawe.

30 Pa kyamba, Musa wa-anine Baizraeli nangue, “Yawe wakimusaakula Besaleli wa mu mukowa wakua Yuda, mwana mwalalume mwina Uri, mwinzikulu wakua Huri, 31 ni kumwizuzia Mweo wakue. Wakimupeela maano, ni mulangue, pamo ni kumana kubomba miilo ilekenkeene 32 kuti akite bintu bya maano mu kukita bintu bya oro, ni bya mutofue, pamo ni bya mukuba, 33 ni kukita mabue a kufwanizia, ni kubaza bimuti pa mulandu wa kubomba miilo ilekenkeene. 34 Besaleli ni Aholiabu mwina Ahisamaki wa mu mukowa wakua Dani, baapeelue buvinde na Yawe bwa kusambilizia bange. 35 Yawe waabapeele maano a kubomba miilo ilekenkeene: Mwilo wa kubaaza mabue, ni mwilo wa kufwanizia bivwalo na nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni mwilo wa kukita kitani kiweme, pamo ni mwilo wa kusuka inge ngubo. Baba i bantu bakengeele mu kukita miilo ilekenkeene, kabili i baakaba bakita miilo ya misango yonse iweme.