KITABU KYAKUA
EZRA
BULONDOLOZI
Kitabu kyakua Ezra ni kyakua Nehemia bilandile palua Baizraeli vibaapeelue nsambu ya kubwelela ku Izraeli pa kyamba kya buzia bubaali bateekelue mu Persia ni mu Babeli. Ezra apoozele maano ku Nghanda yakua Leza ibaakakuulile paakale mu Yeruzalemu. Bantu bengi betabiile nangue Ezra i waalembele ni kukolonghania bitabu bya Milandu ya nsiku, kitabu kya mambo ni kya bubili, pamo ni kitabu kyakua Ezra ni kyakua Nehemia. Kine te Ezra waakitile evio, kuli ni muntu unge waakolonghaniizie bebi bitabu. Kitabu kyakua Ezra kilinga kyaakolonghaniiziwe mu pepi na mwaka wa 440 NK, Inzi nsempu inge ya kitabu yaalembelue pa unge musita.
Kitabu kyakua Ezra, kilangile Leza vi-aamulengele Kiro likolo wa ku Persia kwitabiizia Baizraeli kuti babwelele ku kyalo kyabo, ni kuya kukuula paakale Nghanda yakua Leza. Kabili kwaali kufikilizia mbiko yakua Yeremia (Yeremia 29.10-14). Kwaali balwani bamo baakaaniine kukuula paakale Nghanda yakua Leza, ni ozo mwilo waimeene pa musita uniini, inzi Baizraeli baavindile kukuula paakale Nghanda yakua Leza pantu Leza waabakwasiizie. Kupitila mu bulombozi bwakua Ezra, Baizraeli ni bo baalapiile bibalo byabo. Koku kwaali kwipeela kwabo paakale mu kukonka mizilo yakua Leza.
Bwipi bwa bili mu kitabu kyakua Ezra
1. Mu katue ka 1 ni ka 2 mulandilue palwakua likolo Kiro vi-aitabiizie Baizraeli kuti babwelele ku kyalo kyabo ni butantiko bwa elia nvyalo yaabwelele.
2. Mu katue ka 3 kwita mu katue ka 6, mulondolwelue vyaakuulilue paakale Nghanda yakua Leza mu Yeruzalemu.
3. Mu katue ka 7 ni ka 8, mulandilue palwakua Ezra vi-aabwelele ku Yeruzalemu pamo ni inge nvyalo ya Baizraeli.
4. Mu katue ka 9 ni ka 10, mulondolwelue Ezra vi-aalombwele Baizraeli kuti bakite paakale kipingo kyabo ni Leza.
1
Kiro wabapeela Bayuda nsambu ya kubwelela kwabo
1 ✡1.1: Yer 25.11; 29.10Mu mwaka wa mambo wa kuteeka kwakua Kiro likolo wa ku Persia, Yawe waakoseleziizie mutima wakua likolo wa ku Persia kuti keebo kakua Yawe kaalandilue na kabika Yeremia kafikiliziwe. Waamwanine apunde mu bukolo bwakue bonse ni kulemba nangue:
2 ✡1.2: Isa 44.28Kiro likolo wa ku Persia walanda evi, “Yawe Leza wa mwiulu wakin'mpeela bukolo bonse bwa pa kyalo, ni kunghana kumukuulila nghanda mu Yeruzalemu ya mu Yudea. 3 Kubalua muntu pakati kenu wa mu bantu bakue, Leza aye waali pamo nakue, kabili aye ku Yeruzalemu ya mu Yudea ku kukuula paakale Nghanda yakua Yawe, Leza wakua Izraeli, wene i Leza ali mu Yeruzalemu. 4 Kubalua Muyuda ali mu Babeli konse kwaikeele kine watona kubwelela ku Yeruzalemu, bantu ba ku ezio nkendo bapalile kumukwasiako mutofue, ni oro, ni binge bintu, ni nama, pamo ni bupe bwa kupeela mu Nghanda yakua Leza mu Yeruzalemu.”
5 Kupwako, bakulu ba mu lupua lwakua Yuda ni lwakua Benyamina, ni babitambua, ni Balawi, pamo ni bonse baakoseleziiziwe mu mitima na Leza, baiteaniizie kuya kukuula paakale Nghanda yakua Yawe mu Yeruzalemu. 6 Bonse baali bapalameene nabo baabakwasiizie mutofue, ni oro, ni binge bintu, ni nama, ni bintu bikindeeme, pamo ni bupe bubaali bapeela mutoneene mitima yabo.
7 Ni pakako, Likolo Kiro waafumiizie bintu bya mu Nghanda yakua Yawe byaatwemue na Nebukadneza kufuma ku Yeruzalemu, ni kubibiika mu nghanda ya baleza bakue. 8 Bebio bintu, Kiro likolo wa ku Persia, waamupeele Mitiredati aliwalabukila bukonto, ni kumupendela Sesebasari mulombozi wa Bayuda. 9 Mpendua ya bintu ni ezi: Masaani 30 akata a oro, masaani 1,000 akata a mutofue, myele 29, 10 bibakuli 30 bya oro, bibakuli bya mutofue bikonkelepo pa bukindami 410, ni bintu binge 1,000.
11 Bintu byonse bya oro ni bya mutofue pamo ni binge bintu, byaali 5,400. Bebi byonse Sesebasari waabitwele lolia lwaabweziiziwe balia baali bafuma ku Babeli balimukuya ku Yeruzalemu.