1 Boazi waile pa kifuka kya kulonghaninapo ni kuya kwikala pa nghingililo ya muzi. Olia kalubula waali walanduapo na Boazi lu-aizile kupita lya papo, Boazi waamwanine evi, “Ewe, iza wikalenke pano.” Ni ye waile kwikala. 2 Boazi waakuutile babikolue lyanondo ba mu muzi ni kubaana bekale papo. Ni bo baikeele. 3 Pa kyamba, waamwanine olia kalubula nangue, “Naomi olia wakibwela kufuma ku kyalo kya Moabu, alimukusisia nkendo ya bulongo bwakua mukwetu Elimeleki. 4 Nene nakimona kuti nkubwileko ozu mulandu ni kukwana usite ezi nkendo ntanzi ya baba bantu bekeele papa ni ntanzi ya masiiko a bantu bane. Kine wewe ulikusita, sita. Inzi kine teusita, landa, pantu tekuli unge apalile kusita ezi nkendo, inga sie wewe. Kine te wewe, ni nene.”

Ni ye waalandile evi, “Ndikusita.”

5 Boazi waalandile evi, “Mana nangue busiku buwakaba kusita ezi nkendo kuli Naomi ni kuli Rutu, i busiku buwakaba kumusita ni Rutu wa ku kyalo kya Moabu, evi akavyale mwana mwalalume waakapyana bintu byakua mulume wakue waafwile.”

6 Ozo kalubula wa-asukile evi, “Nene nsivinda kusita ezi nkendo nkeeza kwinoona bupyani bwane. Kansi nsambu yane ya bukalubula itwamue sie na wewe wenka, pantu nene na-andua.”

7 ✡4.7: Mam 25.9Mu ezio nsiku, Baizraeli baali ni mibeele yabo ya kusininkiziiziako pa kulubula ni kusintuzyania kintu. Muntu waali wavuula nkwabilo yakue ni kumupeela mwinakue. Keki i kyaali kisininkiziizio ku Baizraeli.

8 Ozo muntu waamwanine Boazi nangue, “Sita sie wewe wenka.” Kupwako, kalubula wavuula nkwabilo ni kumupeela Boazi. 9 Boazi ni ye wa-anine bantu bonse pamo ni alia masiiko aalipo nangue, “Mwe bonse bali pano muli basininkizi bakusininkizia nangue, lelo nasita kuli Naomi bintu byonse byaali byakua Elimeleki ni byakua Kilioni pamo ni byakua Maloni. 10 ✡4.10: Mam 25.5-6Kabili ni ozu Rutu wa ku Moabu muka Maloni ni ye kumo namusita kuti aye waali mukazi wane. Nakita evi kuti nsunge liina lya muntu waafwile, pakuti akabe walangulukilue mu muzi wetu ni mu lupua lwetu. Ni evi vyenka lelo muli basininkizi.”

11 ✡4.11: Kut 29.31Masiiko pamo ni bantu baali balipo baalandile evi, “Ee, fwefue tuli basininkizi. Ozu mwanakazi uwatwama kuba mukazi obe, twalomba Yawe amukite kuba nga Rakeli ni Lea, babo baamukuuliile Izraeli nghanda. Kabili twalomba wewe uye walumine mu Efrati ni kuya wamanikile mu Betlehemu. 12 ✡4.12: Kut 38.27-30Baana bawaakapeelua na Yawe mu ozu mukazyana bakalengie lupua lobe lukapalane ni lwakua Perezi lwaavyelue na Tamari kuli Yuda.”

13 Kupwako, Boazi wamutwama Rutu ni kumwalula mukazi. Yawe waamupaalile, waimita ni kuvyala mwana mwalalume. 14 Banakazi baamwanine Naomi nangue, “Yawe atasiiwe! Ozo asikulekeleele lelo kuti uye wali ni kalubula. Twalomba alengie ozu mwana kumanika mu Izraeli. 15 Ozu mwanavyala obe kisinka akutonene, wakikukitila bintu bikata kukila bintu bya kukitilua na baana balalume kilooba. Kabili wakuvyalila ni mwinzikulu, ozo waakaalula bwikazi bobe kuba bwa lenu ni kukusunga mu bukote bobe.” 16 Kupwako, Naomi wabuula mwana wamufukatila ni kutwalilila kumusunga.

17 Banakazi baali bali pepi nakue baamwinikile mwana liina lya Obedi. Baalandile evi, “Naomi wavyalilua mwana mwalalume!”

Obedi i waavyele Yese, ni Yese i waavyele Daudi.

18-22 Bobu i butantiko bwa meena a lupua lwakua Perezi mpaka kuli Daudi.