1 ✡3.1: Nfy 12.9; 20.2Kizoka kyaali kyakengeele kukila nama yonse ya mu kisonso yaalengelue na Yawe Leza. Kizoka kyaamwipuziizie mwanakazi, “Ati, ni kiine Leza waamikaniizie kulia mazabo a ku bimuti byonse bya mu bukaba?”

2 Mwanakazi wa-asukile evi, “Mazabo a ku bimuti byonse bya mu bukaba kuti twalia, 3 inzi Leza waalandile nangue, ‘Tekuti mukalie buzabo bwa ku kimuti kili pa bukata bwa bukaba, anzia kukumiako, pantu nga mwaakafua.’ ”

4 Kizoka kyaamwasukile mwanakazi, “Mwandi, temukafua. 5 Pantu Leza amanine nangue busiku bumwakaba kulia azo mazabo, menso enu akaba kwizuka, ni mwe mwakaba kwaluka nga Leza mu kumana biweme ni bibiipile.”

6 Mwanakazi lu-aamwene nangue mazabo a ku kekio kimuti aali aweme kuliiwa, ni aweme mu kumoneka, kabili apalilile kumuletela mulangue, waakunwineko buzabo, walia, wamupeelako mulume wakue, ni ye walia. 7 Penka papo, menso abo bonse babili aizuka ni kwinika nangue baali bali bwamba. Kupwako, babamba kutunga kumo maani a kimuti kya miku kuti bavwale.

8 Mwalalume ni mwanakazi lubaunvwile Yawe Leza walimukwenda mu bukaba musita wa kyungulo kwasyataleele, baamufyeme mu bimuti bya mu bukaba. 9 Yawe Leza waamukuutile muntu ni kumwipuzia, “Uli pi?”

10 Ni ye wa-asukile evi, “Naunvwanga lizui lyobe mu bukaba, ni ne natiinanga pantu ngiile nali bwamba, kusyali kufyama!”

11 Leza waamwipuziizie evi, “Eba! Nani wakwananga nangue wiile wali bwamba? Eba! Walyanga buzabo bwa ku kimuti kinakikukaania kuliako?”

12 Mwaalume wa-asukile evi, “Ozu mwanakazi uwan'mpeele i wan'mpelanga buzabo, ni ne nalia.”

13 ✡3.13: 2 Bak 11.3; 1 Tim 2.14Kabili Yawe Leza waamwipuziizie mwanakazi, “Ati, wakitilangaki evio?”

Mwanakazi wa-asukile evi, “Kizoka i kyan'mbeepanga, ni ne nalia.”

14 Ni pakako, Yawe Leza waakyanine kizoka nangue, “Pantu wakitanga evio, watiipua pa nama yonse iliyateekua ni ya mu kisonso. Kutula lelo, waya wasyaendela na kavumo ni kuya walia lufunko nsiku yonse ya bukose bobe. 15 ✡3.15: Nfy 12.17Ndikubiika bulwani pakati kobe ni mwanakazi, ni pakati ka luvyalo lobe ni lwa mwanakazi. Luvyalo lwa mwanakazi lwaakasyesyeta mutue obe, ni we waakasuma kasinghino kakue.”

16 Kabili Yawe waamwanine mwanakazi nangue, “Naakakizia maavia mu kuvyala kobe, pa kuvyala baana waakaba wakisua. Kutona kobe kwaakaba kwali ku mulume obe, kabili i waakaba wakuteekele.”

17 ✡3.17 Bae 6.8Yawe waamwanine mwalalume nangue, “Pantu waitabilanga bintu byalandanga mukazi obe ni kulia buzabo bwa ku kimuti kinakikukaania kuliako, bulongo bwatiipua pa mulandu obe. Mu bukose bobe bonse waakaba wabombesia na maka pa kusanga bilio. 18 Mu bulongo mwaakaba mwamena sie lubamba ni myunga, kabili waakaba walia saasa wa mu kisonso. 19 Mu kubombesia ni mu kusulwila kobe i muwaakaba wasangila bilio, mpaka paukabwelela ku bulongo kuwaafumine. Uli lufunko, waakabwelela ku lufunko.”

20 Mwalalume, liina lyakue Adamu, waamwinikile mukazi wakue liina lya Eva, pantu ozo i wa-alukile nghina wa bantu bonse. 21 Kabili Yawe Leza waabakitiile bivwalo bya mpapa ya nama ni kubavwika.

22 ✡3.22: Nfy 22.14 Kabili Yawe Leza waalandile evi, “Evi muntu wa-aluka nga fwefue mu kumana biweme ni bibiipile. Ni pakako, tapalile kupeelua nsambu ya kukununa buzabo bwa ku kimuti kya bukose ni kulia evi akeekalilila muyayaya.” 23 Yawe Leza waamukumbile Adamu mu bukaba bwa mu Edeni, evi aye alime mu bulongo bu-abumbiilueko. 24 Leza lu-aamukumbile Adamu mu bukaba, waabiikile makerubi pa nghingililo ya ku kabanga ka bukaba bwa mu Edeni, ni kipanga kya mulilo kyaali kyazyunguluka konse konse kusakilila nzila ya kuya ku kimuti kya bukose.