2
1 Mu bobo busiku waakakuuta ba kobe nangue Ami, “Bantu bane.” Ni bankaziizo nangue Ruhama, “Batonua bane.”
Kukandua kwakua Izraeli, mukazi mukende
2 Sasilile nghinenue, musasilile,
pantu wene takili mukazi wane,
ni nene nsikili mulume wakue.
Mwane alekele mibeele ya bukende mu monekelo yakue
ni bukende pa bukata bwa mabeele akue.
3 Kine te evio nakaba kumuvuula ngubo yakue,
ni kumusia mu-aavyaliilue.
Nakaba kumukita nga kaseeba,
nakaba kumwalula kuba musili uume,
ni kumwipaya na kyaka.
4-5 Baana bakue nsikabonvwila nkumbu,
pantu ni baana ba mu bukende.
Nghinabo tali na bukisinka,
wakibeemita mu nzila isipalile.
Gomeri waalandile evi, “Ndikukonkelela batonua bane,
balia baliban'mpeela bilio,
ni baliban'mpeela menda.
Baliban'mpeela ngubo ya masako a nama ni kitani, ni mafuta a mizeituni,
pamo ni bikolani.”
6 Ni pakako, ne Leza nakaba kusaka nzila yakue na myunga,
nakaba kumukingilila mukati luuba,
evi tekuti akamone pa kupitila.
7 Gomeri waakakonkelela batonua bakue, inzi takabasanga.
Waakabakeba, inzi takabamona.
Pa kyamba waakalanda nangue,
“Ndikubwela sie ku mulume wane wa mambo,
pantu naali nali bwino kukila lenu.”
8 Gomeri tainikile nangue nene
i waamupeele bintu byonse bi-ali nabio, nghano ni divai ya lenu pamo ni mafuta a mizeituni,
nene i waamunonsiizie mutofue ni oro ibaali babombia
mu kumubombela leza Baali.
9 Ni pakako, nakaba kupokolola nghano yane musita wa kuzombola,
ni divai yane ya lenu pa kyamba kya kutika,
nakaba kupokolola ngubo yane ya masako pamo ni kitani kyane,
bebio byaali byapalile kukupa mubili wakue.
10 Ni evi, naakamuvuula ni kumusia mu-aavyaliilue
ntanzi ya batonua bakue.
Tekuli muntu waakamupokolola mu minue yane.
11 Naakapwisia maliila akue onse,
nsikunkulu yakue ya kubalua mwaka, ni ya kubaluka kwa kwezi,
ni nsiku yakue ya Sabata, nsikunkulu yakue yonse itantikilue.
12 Naakenoona mizabibu yakue ni bimuti byakue bya miku,
bebio bi-aliwalanda nangue i nsazio yakue i-aapeelue na batonua bakue.
Ni ne naakalengia mizabibu ni bimuti bya miku kuba musitu,
ni nama ya mu kisonso yaakalia mazabo abio.
13 Naakamukanda pa mulandu wa ezio nsiku
i aafunkiziizie bubaani kuli leza Baali,
lu-aifwaniizie na tuzele twa ku minue
ni binge bifwanizio bya mutengo,
ni kuya kubembia batonua bakue,
inzi nene wandabile,
koku i kulanda kwakua Yawe.
Ntono yakua Leza pa bantu bakue
14 Ni pakako, nakaba kumubembia,
nakaba kumulombola mu kaseeba
ni kwambaula nakue mubufuuke.
15 ✡2.15: Yos 7.24-26Koko, i kunakaba kumubweziizia makaba akue a mizabibu,
ni lulambe lwa Akori *2.15 Akori I kulanda nangue Lyemo. nakaba kulukita kuba mulyango wa maswapi.
Koko i ku-akaba kwimba lwimbo nga vi-aali waimba ku bukazyana bwakue,
nga mu bolia busiku bu-aafumine ku Misri.
16 Yawe walanda nangue, “Mu bobo busiku,
wewe waakankuuta nangue, ‘Mulume wane.’
Teukikankuuta nangue, ‘leza wane Baali.’
17 Naakafumia meena a baleza baliwakuutua Baali mu milomo yakue,
ni meena abo takika-azimbula.
18 Mu ezio nsiku naakakita kipingo pa mulandu wa Baizraeli,
ni nama ya mu kisonso ni tooni twa mulweleele,
pamo ni bilengua bilibyayibula pansi.
Buta, ni kipanga pamo ni bului,
naakabifumia mu kyalo,
evi bonse bakabe baikeele mu mutende.
19 Naakakusaka we Izraeli kuti ukabe wane muyayaya,
naakakusaka mu nsambu ni mu bulunghami,
mu ntono ni mu nkumbu.
20 Naakakusaka kuti ukabe wane mu kisinka,
ni we waakanghinika nangue nene i Yawe.
21-22 “Mu bobo busiku naakaasuka,”
nangue Yawe,
“naakaasuka myulu,
myulu ni yo yaakaasuka kyalo,
ni kyalo kyaakaasuka mbezu,
ni divai ya lenu ni mafuta a mizeituni,
ni bebi byonse byaakamwasuka Yezreeli.
23 ✡2.23: Bar 9.25; 1 Pet 2.10Naakamulimba Yezreeli mu kyalo.
Naakalanga ntono yane ku olia unainikile Lo-Ruhama.
Balia banainikile Lo-Ami, naakabaana nangue, ‘Muli bantu bane,’
ni bo baakalanda nangue, ‘Uli Leza wetu.’ ”