20
1 Divai i kapuni, ni kikolani i mazibo,
ni muntu onse aliwabembua mu bebi bintu tali na mulangue.
2 Kipuki kyakua likolo, kili nga kubuluma kwa nkalamu,
olia aliwamulengia kufiitua, aliwaluvia mutima wakue mwine.
3 Bukindami bwa muntu, kulekela mazibo,
inzi kubalua kipuba aliwatona mazibo.
4 Munanghani tezi kutona kulima pa musita wa kulima,
ni pakako, musita wa buzombozi waya walombelezia bilio pantu tali na kantu.
5 Malanga a mu mutima wa muntu, buziba buzikile,
inzi muntu wa mulangue aliwatapulapo.
6 Kubalua muntu aliwalanda buwame bwakue,
ale muntu wa kisinka alikumonua nani?
7 Kine mulunghami waendela mu bulunghami bwakue,
baana bakue balibapaalua mu kyamba kyakue.
8 Likolo lu-aliwaikala pa kitebe kya bupinguzi,
aliwauluzia bubi bonse na menso akue.
9 Nani alikuvinda kulanda nangue, “Nakiswesia mutima wane,
nakisambika ku bibalo byane?”
10 Mabue a tulingo tulekenkeene, ni bilemo bilekenkeene,
bebi byonse bibili, bilubo kuli Yawe.
11 Mwana ni ye aliwamanika kupitila mu bikitua byakue,
kine biweme, ao kine bilungi.
12 Kutui kulikwaunvua, ni linso lililyamona,
byonse bibili bikitilue na Yawe.
13 Tekutonesia tulo, ukeeza kukula wali mupabi,
labuka, ni we ulikwikuta bilio.
14 “Temuli kantu, temuli kantu!” Nangue musiti,
inzi aliwaitasia wasyaile.
15 Kuli oro ni mabue engi a mutengo,
inzi milomo iliyalanda twebo twa maano, libue lya mutengo.
16 Muntu kine walaya kulipila mizia ya muntu asimanikile, apokueko ngubo yakue nga kikwatizi,
mumukite kuba kikwatizi pa mulandu wa ozo mweni.
17 Kya kulia kya bupoti, kiweme ku muntu,
inzi pa kyamba, kanua kakue kalikaizulamo tubwekese.
18 Kine pali nsokezi mapange aliafikiliziiwa,
kine watona kusakukilana, upalile kulangakananke.
19 Olia aliwapitaana wa-ambana, aliwafyula tufiso,
kansi tekwampana na kilandelande.
20 Olia aliwatiipa se ao nghina,
kisue kya bukose bwakue kyaazimiiwa musita wa nfinzi ikata.
21 Bupyani bulibwalombua ntanzi ya nsita,
ku mpeleezio tebukaba na mapaalo.
22 Tekulanda nangue, “Ndikukita kibwelezi!”
Muswapile Yawe, akupususie.
23 Mabue a tulingo tulekenkeene, kilubo kuli Yawe,
ni bilemo bya bupoti tebifwaniine.
24 Ntanfu ya muntu iliyalombolua na Yawe,
ale muntu kuti wamana syani nzila yakue mwine?
25 Kulanda lubilo lubilo nangue keki ni kya kupeela Leza, muteo,
pantu kuti waiza kwemenamo.
26 Likolo wa mulangue aliwauluzia babi,
aliwabapingula pasili nkumbu.
27 Mweo wa muntu, i musaniko wakua Yawe,
i uliwakebelezia mu nkendo yonse ya mukati ka muntu.
28 Ntono ni bukisinka bilibyamusunga likolo,
ni bukolo bwakue busimpilue na ntono.
29 Bulumba bwa balumendo, maka abo.
Kuwama kwa bakote, mutue wa ndale.
30 Bipumo ni bilonda, ni miti yakupwisia bubi.
Nfimbo iliyaswesia mutima mpaka mukati.