21
1 Mutima wakua likolo uli mu minue yakua Yawe nga vili tunkolonfua twa menda,
aliwaulombola konse ku atonene.
2 Kubalua nzila ya muntu, iweme ku menso akue mwine.
Inzi Yawe aliwatoosia mitima.
3 Kukita biweme ni bilungi,
kulikwamuwamina Yawe kukila ngelelo.
4 Menso a kiitoni ni mutima wa kwitantamuna,
kilangililo kya bibalo bya bantu babi.
5 Mapange a muntu wa mute, alialeeta bunonsi bwingi,
inzi kubalua muntu aliwakita lubilo lubilo, bupabi bulibwaiza pali wene.
6 Bunonsi bulibwanonkelua mu bufi,
byunsi bilibyaya kiyeyeye.
Balia balibabukeba, balibakeba lufu.
7 Bupoti bwa babi bulibwabatwala kule,
pantu balibakaana kukita bulunghami.
8 Nzila ya muntu emanine nangue ali ni bilubo, ipeteeme,
inzi mibeele ya muntu asili na mulandu ili bwino.
9 Kyawama kwikala mu kafuli ka mutenge wa nghanda,
kukila kwikala mu nghanda pamo ni mukazi wa mazibo.
10 Muntu mubi, aliwakeba bubi,
kabili tezi kunvwila mwinakue nkumbu.
11 Muntu wa kapuni lu-aliwakandua, kipuba aliwa-aluka ni mulangue,
ni wa mulangue lu-aliwasambiliziiwa, aliwalunduluka kuba ni maano.
12 Mulunghami amanine bili mu nghanda ya babi,
kabili aliwabalovia ni kubenoona.
13 Olia aliwakilika matui tekuti onvue kulila kwa mupabi,
ni ye waakalila, inzi takonvwiwa.
14 Bupe bwa mu kafiso bulibwapwisia kikonko,
ni kituulilo kya mu kafiso kilikyapwisia kipuki.
15 Bupinguzi bwa nsambu lubulibwakitika, balunghami balibawaminua,
inzi bankitatubi balibaswapulukua.
16 Olia aliwaemooka ni kusia nzila ya maano,
aliwaisanga walimukutuuzia mu libumba lya bafwile.
17 Olia atonene maliila, aliwa-aluka mupabi.
Olia atonene divai ni mafuta takanonka.
18 Mubi i bupusuko bwa mulunghami,
ni olia aliwakita bupompo, bupusuko bwa muntu wa kisinka.
19 Kyawama kwikala mu kaseeba,
kukila kwikala pamo ni mukazi wa mazibo ni musokozi.
20 Mu bwikazi bwa bantu ba maano muli bukonto bwa mponvu ni mafuta,
inzi kipuba aliwalia byonse.
21 Olia aliwakonka bulunghami ni ntono,
aliwasanga bukose ni bulunghami pamo ni mukinzi.
22 Muntu wa mulangue aliwakwata muzi wa bantu ba maka
ni kutuuta kyubo kya maswapi abo.
23 Olia aliwakilikila kanua kakue ni lulimi lwakue,
aliwapususia mutima wakue ku bukyuzi.
24 Muntu wa kiitoni ni aliwaitantamuna, liina lyakue ni “Mupuni.”
Kwitantamuna kwakue ni kwa kiitoni.
25 Kutokamua kwa munanghani kulikwamwipaya,
pantu maboko akue aliakaana kubomba.
26 Munanghani aliwakeba koba konse,
inzi mulunghami aliwapaana sie pasili kutanana.
27 Ngelelo ya mubi, kilubo kikata.
Paliibufi kine aliwaelela na malanga abi!
28 Musininkizi wa bufi, aliwazeeza,
inzi muntu ali ni matui, aliwalanda twebo tulitwatwalilila.
29 Mubi aliwaumia pa mpala,
inzi mulunghami aliwawamia nzila yakue.
30 Tekuli mulangue ao bukengezi ao nsokezi
iliyavinda kutwalilila musitoneene Yawe.
31 Farasi ateaniziiziwe mbeela mu busiku bwa bului,
inzi Yawe i aliwaleeta bwanzio.