1 Pagkatapus may naitaw sing sasang angil ang paparanek dang liit tung langit. May nag̱apegsan nang liabi may kadinang durug baked ang yang liabing atia nag̱ipagsiradu tung bulalut ang atiang pinakaadalem*20:1 Yang bulalut ang atia, sinambit ka ni Juan tung 9:1 may 17:8.. 2-3 Pagkaw̱ut na, dayun na rang dineep yang dragun ang ya ka man mismu yang nagpairaw-iraw atiing primirung pisan ang pag̱imu yang Dios tung tau†20:2-3a Sinambit ka ni Juan tung 12:9 ig sinambit ka tung Genesis 3:1-15., ang yang dumang pag̱ingaran tung anya yay maggug̱uuyan tung Diablu ubin tung ni Satanas‡20:2-3b Balikan yang pasanag tung 12:9.. Pagkadeep yang angil, dayun na rang sinaw̱ed-saw̱eran yang kadinang binegkes. Pagkatapus diritsyung ibinugsu na tung bulalut ang pinakaadalem. Dayun na ra kang siniraduan yang purta nang kinandaduan ang pagkatapus kinula na. Dapat duun da magtinir tung seled san liw̱ung takun ug̱ud indi ra malua-lua ang para magpandaya pa rin ang uman tung mga tau tung bilug ang kaliw̱utan mintras indi pa ag̱akumplitu yang san liw̱ung takun ang atia. Piru kung makumplitu ra nganing tia, dapat ang palpasan ka ta gesyeng uras.

4 Pagkatapus may naitaung mga kakarungan ta mga adi pati yang pamansikarung asan ang yay piniaran yang Dios ta katengdanan nirang mamaggaraemen. Ya ra yang mga taung atiing bui pa rin tung kaliw̱utan ang dati, nagkarapug̱usan da ta dikel natetenged tung pag̱urubligaren nira ang ultimu ilem ti Jesus yang nag̱atingara nirang may kagaeman tung nira ig natetenged ka tung pagparakaw̱utun nira yang bitala yang Dios tung mga tau§20:4a Ikumpalar tung 6:9 may 19:10. Tanira ka man yang mga tau ang indi ra ka enged namagtuu tung ayep may tung bultung ipinakbung tung anya. Indi ra ka namagrisibi yang marka na tung kikilayen nira ubin tung mga kalima nira*20:4b Ikumpalar tung 13:8, 15-16; 15:2. Tanirang tanan binui si kang uman yang Dios ig pinampakarung na ra ka tung mga kakarungan ang atia ang para mamaggaraemen tung seled san liw̱ung takun, kasiraan da ka tanira yang pag̱aningen ang Cristo. 5 Yang pagpabui nang atia tung nira ya ray primirung pagpabui na si kang uman tung mga taung nagkarapatay ra. Yang kadaklan, baklu ra pabuiay na, kung mataklib da yang san liw̱ung takun. 6 Kung tinu pay malg̱ud tung primirung pagpabui yang Dios ang atia, durung pisan agkasadya yang mabtangan na ay banal da tanira. Indi ra ka enged sakpen yang pag̱aningen ang yadwang kamatayen, kung indi, may kalelengten enged nira tung Dios ang katulad ka tung mga paring tukaw ang para mamanirbian dang pirmi tung anya durua ni Jesu-Cristo. Magkasiraan da ka tanira ni Jesu-Cristong mamaggaraemen tung seled san liw̱ung takun†20:6 Sinambit ka ni Juan tung 1:6 may tung 5:10..

7 Kung mataklib da nganing yang san liw̱ung takun ang atia, palpasan da ti Satanas tung bulalut ang atiing pinagkulungan tung anya. 8 Kung malua ra nganing, mag̱intra si pagpandaya tung tanan ang mga nasyun tung bilug ang kaliw̱utan ang tung dumang kasulatan ya ray paggug̱uuyan ang Gog may Magog‡20:8 Duun tung kapitulu 38 may 39 yang isinulat ni Ezequiel sinambit na yang paggug̱uuyan ang Gog may Magog ang yay mamagpakigkuntra tung nasyun yang Israel. Ti Gog yay pagmangulu tung mga Magog. Taa tung isinulat ni Juan ang naa, puiding yay binuat nang sasang kapananglitan yang kumpurming pamagberegkes-begkesan ang pamagpakigkuntra tung Dios may tung mga tauan na, maskin tag̱a ay pang banwaay.. Yang katuyuan na magpasagpun da tung nira ang para mamaningayaw ra tung gira. Yang kinadaramelen nira, maning pa tung kenay ang indi mabilang-bilang. 9 Mamagwasak da tanira tung intirung kaliw̱utan ig mamagleseb da tung pag̱atiniran yang binuat yang Dios ang mga tauan na ang ya ka man mismu yang siudad ang nag̱amaal na§20:9 Ikumpalar tung 21:2. Piru tung pagleseb nira, pabungsaran da tanira ta apuy ang ya ray madiaduan nira. 10 Atia, ti Satanas ang atiang nagpandaya tung nira, dayun dang iplek duun tung aw̱uyuk ang atiang pag̱apuy ang yang pag̱aningen ang asupri ya ray nag̱ipagpagkal. Ya ra kang lag̱i ay pinamlekan tung ayep may tung aruman nang ayep ang pulus bukli yang mga bitalang ipinalatay na*20:10 Ikumpalar tung 19:20. Kapurisu kasiraan da ka tanirang tulu ang papinitinsiaan kaldaw law̱ii ang anda enged ang pisan ay katapus-tapusan na.

11 Pagkatapus may naitaung dakulung pagkarungan ang kulit pati yang pagkarung asan naitaw ka. Yang katanekan may yang kalangitan parariu rang napareng tung katalungaan na. Indi rang pisan naitang uman. 12 Asta yang kadaklan ang mga taung nagkarapatay†20:12 Ikumpalar tung sinambit na tung birsikulu 5., naitaw ka. Darakulu kag gereg̱esye, anday nalsik, kung indi, parariung tumalungaan tung pagkarungan na. Numanyan may mga kasulatan ang pinanulw̱ad. Pagkatapus may sam bilug pang sinulw̱ad ka ang ya ra yang listaan yang tanan ang mga taung kumpurming mapagpasapen tung Dios ang asta tung sampang anda enged ay katapus-tapusan. Numanyan pinagsintinsiaan da yang Dios yang mga taung atia. Kumpurming unu pay mga ubra-ubra nira atiing mga bui pa rin ang ya ka man ay isinulat tung mga kasulatan ang atia, ya ray pinatielan yang Dios ang nagsirintinsiaen tung nira sasa may sasa. 13 Baklu sintinsiaay na yang mga taung atia, luw̱us na ra kang lag̱ing pinamui si kang uman. Ay linalangan na yang teeb ang yang mga taung nagkaralemes, dapat ang ipamalik na ra ang para mamanalunga ra tung pagkarungan na. Pati yang tanek ang pinanlebngan tung mga taung nagkarapatay tung banwa linalangan na ka ang ipamalik na ra ka ang para mamanalunga ra ka tung pagkarungan na. Asta yang lugar ang atiang pag̱aningen ang Hades ang ya ray pinagkulungan tung mga ispiritu nira, ya ka. Linalangan na ka ang ipamalik na ra ka ang para mamanalunga ra ka tung pagkarungan na. Purisu sasa may sasa tung nira luw̱us dang pinagsintinsiaan yang Dios ang kumpurming unu pay mga ubra-ubra nira, ya ray pinatielan nang nagsirintinsiaen tung nira. 14 Pagkatapus yang kamatayen may yang lugar ang atiang pag̱aningen ang Hades, dayun da kang ipinamlek tung aw̱uyuk ang pag̱apuy. Yang aw̱uyuk ang atiang pag̱apuy, ya ra yang pag̱aningen ang yadwang kamatayen ang yay malambeg̱an yang kumpurming iplek duun. 15 Kumpurming tinu pay indi ra nasagyapan yang aran na asan tung listaan yang kumpurming mapagpasapen tung Dios ang asta tung sampa, duun da ka iplekay tung aw̱uyuk ang atiang pag̱apuy.