1 Gyeik Sabat la veil, Maria wei Makdala, Maria wei Jems ta, me Salome lal xouv lulul wei xeimangou yo valu is wel en kandek lal na taw lek Yesu neing. 2 Satiboukeing lul lek bouk tiwei tax o eivek Sounda tiyon, ka sayeiv lam tyip le, eno lal la ingwei leiveeng meyeing*16:2 Leiveeng meyeing, eno inyei xel mi kwelexe eivek qakous. (Wei 15:46) nei. 3 Me lal teling wouma, “Eti tyek gwilexe qakous veil leiveeng meyeing mya en ghal?”

4 Ekom gyeik lal yeila punei, lal yei bei qakous wei wilexe me la toungale yon inyei ngandoungateiv. 5 Ka lal la eivek leiveeng meyeing lalei, lal yei tambiy ghavis ti, vunek en teimb ding wei teleing o ti me toundei wou mema payeiv om lal etek.

6 Om moxo neil, “Mal seng detek en inye mal ghe di wimexe Yesu wei Nasaret o, tiwei xel leis lek xax pepeeng o. Moxo qandi lek! Moxo se toundei inye. Mal lam wei beeng wei xel liw e lek o. 7 Dom mal la neil wou e xe xel betiyeing me Petele bei, ‘Moxo la tax en xam me la Galili. Tyek xam ghe gwei e nanghei inyei, nambei kawei neil wou xam o.’ ”

8 Xel vex la myayaing de pek me la veil leiveeng meyeing, is etekeing me woueing nalei ngenong, om xel se neil qayeeng en lulti wou xelti, en nambei xel yaleeng.

9 Gyeik Yesu qandi lek Sounda satiboukeing lul lek bouk ti tax o, moxo la tyip atax wou Maria wei Makdala, tiwei e tiy memo lim yuw veil e yo. 10 Vexo la me neil wou xel wei mi la is e yo, me eti yeiw wei di wo talot me eng o. 11 Gyeik xel ngo bei Yesu toundei mapieing me vex on yei e, eno xel se wongis.

12 Dekalekom Yesu lam tyip wou luw yayuw wei xel o, ekom wo bange om luw se woulek, gyeik ingwei luw di la wou sakwaing me la beyeeng nayak nei. 13 Luw lox me la me neil wou xel betiyeing valu, ekom xel se wongis luw.

14 Kalekom Yesu la tyip wou xel betiyeing xoumeeng ti gyeik xel toundei me di ya yo, moxo luk niseikeing wou xel en xel se wongis me xel wei laleind wo nikanzek en nambei xel embei se bongis eti yeiw wei yei e yo, gyeik ingwei e qandi lek o.

15 Moxo neil wou xel, “Xam la eivek tembuing sapa nei me neil Xoulek Nimza wou xomaxoneing dalus. 16 Xel tiwei wongis me lipek eno tyek Anutu devind xel en xel se mey, ekom eti yeiw wei se wongis eno tyek na qou myaveweeng gyeik ingwei xel bo qayeeng o. 17 Me dee beimambei ne tyek na is eti yeiw wei wongis o. Eivek a leing eno tyek xel a tiy memo na myayaing, de tyek xel baluk eivek vya vako. 18 Tyek xel a zeim myeiy angya memend me gyeik xel anum lul wei wevek eno tyek se bo nol wou xelti, tyek xel a niw memend lek xel wei vanei yo, dom tyek xel bo nimzalek.”

19 Ka Tambiy Ngandoung Yesu luk is xel woy, woyom Anutu qou e me la ghey eivek tyoung gheyapu me e la dei wou Anutu mema payeiv. 20 Woyom xel betiyeing la myayaing me neil xoulek la danghei danghei nei, me Tambiy Ngandoung wo xuk is xel, me byexaxoun e xe qayeeng nangya dee wei di betiwou xuk on.