JOHN
JOHN LEKHA THOT KHATNA
Pathen to kiloikhomna dihtah
Ngailut nachan bangin hingin!
1 John lekhabu sung thu umdan
Pakai Yeshua toh phatah'a kivop chule Pakai Yeshua thu hetgilna neipen chu Ngailut John hi ahi, ti geldoh in lang hiche lekhabu hi simpan in. Hiche lekhathot hi bung nga bou ahin, asunga thu-umho jong asaove tia seiding aumpoi. Pathen ngailutna neihon Thutah'a hin ding phatah in hilna eineiyuve. Pathen cha ihi nunguva, leiset ihinkhouva Pakai to kiloikhom jing hinkho iti iman uva chule tahsannei sopi dang hoto jong iti hinkho iman diu ham, tithua hilna eineiyu ahi. Pathen hetgil chehna hinkho iti ineiyuva chule Ama ngailutna neiya vannoiya hi iti hinkho iman diu ham, tihi 1 John thudoi pipen ahi. Pathen I-Pauvin ichan geiya eingailut uva chule eihon jong Ama ichan a ingailut-u ngai hintem, tithua phatah'a hilna eineiyu ahi. Chule Ama ngailutna neihon Ama thenna hinkho ijuiyuva hinkho thenga hing ihi diu thudol eihil-u ahi, 1 Jn 3:1-3.
Lekhathot jihpa chule ajih kum
Hiche lekhathot hi Solchah John'in (Gospel John jihpan) AD 85 leh 89 kichai kon lama ajih hidin, ginchat ahi.
Lekhathot kijihna lo
John hin chuchelai phat'a Ephesus khopi kimvel-a Houbung ho (tua Turkey gamsunga um Houbung ho), chu tilkhouna le tahsanna'a hatsahna dinga ajih ahi.
Hichelai phat chun Rome Lenggam pumpia nam tampi ana umdoh in, chule thuneina lampang le kiloikhomna ho jong chu achamcham'a anaumdoh-a chule kikan gahna ima ana umlou ahi. Hitichun Nero Lengpan Christian te gimbol hesoh thohsah hi ahin panin, Christian ho chu mi asang-sang anathat'in, Peter le Paul jong chu aman anatha ahi. Hitobang tahsan ho gimbolna huipi le gopi kitho bang jeng chu chuche lai phat'a Houbung umho le tahsan chate dinga hiche lekhathot hi Kongkai mun'a Thihhat kiseplha'a kong kihen tobanga panga ahi.
1
Hinna thu
1 Keihon nangho koma kahillhang leu-atil abula pat'a ana umjing, kanakol uva kajahsau, kamit uva kamusau chule kakhut uva kathamsau Hinna Thu chu ahi.✡Jn 1:1 2 Amatah hinna ahi chu keiho henga kiphongdoh ahitai chule keihon Ama chu kamutauve, chule tua hi keihon kahettohsah uva chule Amatah Tonsot Hinna ahi tia kaseiphongu ahi. Ama Pa toh ana umsa chujouva keiho henga hung kiphongdoh'ah ahi.✡Jn 1:14 3 Keiho tah in kamuchet uva chule kajahsau chu nangho henga kahillhangu ahin, hichu keiho toh ikiloikhom theina dingu ahi. Chule keiho toh kiloikhomna hi Pa le AChapa Yeshua Christa toh kiloikhomna ahi.
Pathen chu vah ahi
4 Hicheho chengse kajih uhi nanghon keihoa kipana nanei bulhing-chamkim theina dingu ahi. 5 Keihon Yeshua a kona kajahsau thupoh chule tua nahenguva kaphondoh u chu hichehi ahi-Pathen chu vah ahi, chule Ama a chu muthim umlouhel ahi. 6 Hijeh achu eihon Pathen to kiloikhom kahi itiuva ahia lhagao muthim lah a vahle nalai ihiuleh eiho thutah chu jui jing lou ihiu ahi. 7 Hinlah Pathen vah'a aum banga vah'a chu eiho iumuva ahileh, eiho khat le khat kiloikhom ihitauve, chule Achapa Yeshua thisan chun ichonsetnau jouse a kona eisil thengu ahitai. 8 Eiho chonsetna neilouva ikiseidoh uva ahileh eima hotah kilhemlha ihiuvin, thutah'a hinga ihi lou u ahi. 9 Hinlah eihon ichonset u Ama koma iphondoh uva ahileh, Ama chu ichonsetnau ngaidam dinga tahsan umle kitah ahin, chule gitlouna jousea kona eisil theng theiyu ahi. 10 Eiho chonse khalouva ikiseidoh uva ahileh eihon Pathen jou seiya ingoh u chule Athu chun ilunguva mun aneilou ahi ti ivetsah u ahi.
DRAFT COPY