7
Solomon'in Aleng Inpi Asah
1 Solomon'in ama in ding mong-mongin leng inpi khat ana tungdoh in hiche asahna ahin kum som le thum ana lut in ahi.
2 A insah khat chu Lebanon Gammang Leng Inpi tin amin ana sah in ahi. Hichu adung feet 150, avai feet 75, atun feet 45 ahi. Akisah dan chu Cedar thing khompi golli kigolla, hiche Cedar thingkhom chunga chu Cedar ma-ma inkam a kijam cheh ahi. 3 Kikhopna indan chung chu Cedar thinga kikhu ahi. Khompi ho chunga Cedar inkam kijam ho chunga chun indan kijommat somli le nga aum'in hiche ho khat-khat chun indan som le nga a kihom khen cheh kit ahi. 4 Golthum thum cheh a chun, bangkot chu thum chengin khat le khat aki angngat tocheh in akigolphei jin ahi. 5 Kotpi ho jouse le bangkot ho jouse chun, ningli cheh aneijun bangkot thum ahi in akingato cheh un ahi.
6 Solomon in jong khompi jeng kiphut kikhopna inkhat jong asan, hiche in asao dan chu feet 75 alhing in chule availam feet 45 alhing in ahi, hiche maiya chun hongcha khat akisem in chule tumpi khat jong akitunge.
7 Solomon chun Thutanna In tia kihe vaipohna ding In khat jong asan, hiche mun'a chu lenggam sunga thilsoh ho chunga thutan in ana toujin ahi. Hiche in hi alhong’a pat abiching geija Cedar thing jeng’a kitomjol soh ahi. 8 Hiche in anunglam a chu Solomon in ama chenna ding mongin adang ho asah bang-bang chun akisah in ahi. Aman akichenpi Pharaoh chanu ding jong chu hiche in tobang khatma ana sahpeh in ahi. ✡1 Lgt 3:1
9 Akhombul kitundohna pat a chu kikhuna chan gei a hi songmantam tamtah tah leh lentah tah a adung avai kitohchetna kikheng, songtholna a kitholnal cheh a aninglia ki-at tohchet ahi. 10 Akhombul kitunna songlentah ho chu abang feet 15 asaovin, chule abang feet 12 in asaovin ahi. 11 Abaang kisemna a kimang song manlutah tah le lentah tah ho chu kitohchet a ki-at ngen ahin, chule Cedar thingho jong ajol in akimang in ahi. 12 Indan lhonglaija chun akimvel lhumkeijin song khentohsa golthum'in akigolin chule Cedar thing inkam bangin golkhat in akigolin, Pakai Hou-In bang sungnung leh lutna kot ho banga kibol sohkei ahi.
Hou-In Kijephoi
13 Solomon Lengpan Hiram kitipa chu Tyre a konna hung dingin ahil in ahi. 14 Hiram hi Israel mi Naphtali phunga konna meithai khat cha ahin, apa hi Tyre a konna sum-eng khengthem mi ahi. Ama chu sum-eng khenna lama thepgilna le boltheina thilpeh chang’a ahin, ama chu ahungin Solomon lengpa dingin thih natohna lam jouse tohpeh dingin apang tan ahi.
15 Hiram in sum-eng a kisem khompi ni jen aphut in, khompi khat cheh chu asan dan fett 27 alhing’e, akhom kolkimvel chu feet 18 ahi. 16 Hiche aman feet 7-1/2 a sang khom lujum ni akhengin, khompi teni chunga tun dingin sum-eng kilhajol maman asemin ahi. 17 Khompi jouse luvuma jopna dingin sum-eng gui kipheh bangin ni apheh in akijem in ahi. 18 Chujongleh aman khompi ho jep hoina dingin, kolbuthei pah lim golni jong asemin, ana jemin ahi. 19 Khomlujum lutna asunglam chu lily pahcha lim tobangin akijemin, chule asan chu feet gup a sao cheh in ahi. 20 Khompi lujum kisem teni chu chunga kolbuthei pah jani golni in akigol kimvellin, aning langah chun lencha pheh banga kipheh sum-eng gui kiveina kom'a chun akitat doh e. 21 Chuin khopi chengse chu Hou-In hongcha a atungdoh pai-paijin, lhanglam ajong khompi khat aphutdoh in amin Jakin asah e, chutengleh sahlam'a jong khompi khatma aphutdoh kit in amin Boaz asah in ahi. 22 Khompi teni chungvum achun lily pahcha jem akisem in, hiti hin khompi kibol chu akichai soh tan ahi.
23 Hiram in sum-enga kisem twikong lenpi khat alhan, agei langkhat apat alanggei chan chu feet 15 alhing in, hichu twikhanglen in asah in ahi. Athuh dan feet 7-1/2 ahin chule akollvel pumpi chu feet 45 alhing in ahi. 24 Akonggei noigol’a chun umtam lim tampi gol ni in akijemphei peh in, chule feet khat sung in hiche umtam lim chu gup tobang aum'in, twikong akilhajolpet a chu hichengse chutoh kilhah tha ahitai.
25 Twikong chu sum-enga kisem bongchal som le ni chunga akiluijin, hiche bongchal ho jouse chun polam angat cheh u ahi. Hiti chun, bongchal thum'in sahlam anga in, bongchal thumma in lhanglam angan, bongchal thumma in lhanglam angan chuleh bongchal thum'in nisolam anga in, hiche twikong chu bongchal te chung’a hi kiluija ahi. 26 Twikong sa dan chu inche thum ahin, agei jong khon gei kisempeh banga kisem ahin, pahcha pah bangin akisem in atwikong chun twi tena 11,000 jen adol’e.
27 Hiram in jong sum-eng kangtalai som asemin; chule hiche kangtalai khat chu feet 6 asaovin, feet 6 ma alenin, chule feet 4-1/2 in asang'in ahi. 28 Hiche kangtalai ho chu kolbem a kisem ahin chule amaitom cheh aneiyun, hiche amai tom cheh u chu akolsunga kitung cheh ahi. 29 Hiche kangtalai kol sung dung’a kihenglut hiche amai tom dung’a hin sakei bahkai lim le bongchal lim chule cherub lim tampi akisem in ahi. Akol chung le anoi dunga chun keipi bahkai le bongchal lim kisemhon akijem in ahi. 30 Kangtalai khat cheh chun sum-enga kisem kang li cheh leh sum-eng jol li cheh anei uve. Aninglia chun twikong tunna ding sum-eng khom li akiphut cheh in, hiche akhom ho jong hi ajet aveija pahcha lim toh kilhah tha cheh ahiuve. 31 Kangtalai chungvuma chun kisilna kong sin ding abem khat akikoiyin, aki hondoh’a ahileh chunglam angan, athuh dan chu feet athuh e, akihondohna akam chu abem in, khom tunlutna ding’a kisem ahijeh chun feet 2-1/4 athuh in ahi. Akihonna a jong chun pahcha akisem in, amai tomna jong aning li noija kibol ahin, abem poi. 32 Akangho chu kangtalai kang tobang ahin, Sum-eng chaokol li chu amai tomna noija chun akibat in, chuleh chaokol sunga kithilpai sum-eng jol chengse chu akhom todal chengse chutoh tikhat bangin aum uve, chaokol khat cheh chu a sandol feet 2-1/4 alhinge. 33 Hiche chaokol ho hi kangtalai velkol ho tobang’a khu kisem cheh ahiuvin, ajolpi a pangho ahin, avel tomna ahin, ajolpi kah a kipheh thihjang ho ahin, chule alaija athihjang jouse kisuhtona avel bem ahin aboncha akilhahjol tho jeng ahiuve.
34 Khom todal khat cheh achun aning lia akingapna ding li cheh aum in, akingapna chengse le akhom todal chengse jong chu tikhat tobang bang ahiuve. 35 Khom todal chunga chun akol a kivei khat khao tobangin aum in, tongkeh khat ahung sang doh e, chutengleh khom todal chunga akibuna ding leh amai tomna ho jong chu likhat bangin akisem thai. 36 Akibuna ding amai dung le amai tomna dunga jong chun aman cherub lim ho leh keipi bahkai lim semnan chule tumthing limho semnan amangin, adol le adollou dungjuijin asomin, akimvel’a chun pahcha jeng asem peh in ahi. 37 Chujouvin hitobang asemchai soh phat in akhom todal som asemin aboncha chu kibang cheh a kilhajol ahin, alet le aneo jong aki bangin alim le agong jong akibang cheh e.
38 Kisilna ding jong sum-eng kong somkhat asemin kisilna kongkhat cheh chun twi tena 220 adolin, kisilna kongkhat cheh chu tongli alhing cheh in, khom todal khat cheh ding chun kisilna kongkhat akikoije. ✡Potdohbu 30:17-21 39 Chuin khom todal chengse chu atungdoh sohkeijin, Hou-In lhanglama chun khomtodal nga aphut in Hou-In sahlam a jong khom todal nga ma aphutdoh e, chule lhanglam nisolam Hou-In ninga chun twikong chu ado'n ahi. 40 Hiram chun bel ho jong leilona ho jong twibel ho jong asem sohkeije,
Hiram in Solomon lengpa panpina Pakai Hou-In sahna ding chungchanga atohpeh ding jouse chu abonchan atongsoh tan ahi.
41 Khompi teni ahin;
khompi teni tomna dinga alujum kisem teni ahin;
alujum teni tomna dinga sum-eng chaokol jella kijel teni ahin, lenchapeh a kipheh khompi teni lutomna kimang teni jong ahin,
42 lencha pheh banga kipheh teni dinga kisem kolbuthei pah tobang 400 jen ahin, khompi teni lutomna ding’a kibol lencha pheh banga kipheh khat cheh a pang dia golni’a ding kolbuthei pah kisem chengse chutoh ahin;
43 khomtodal chengse ahin khomtodal chunga pang ding twibel som jong ahin;
44 Chujongleh twikong khat ahin, hiche twikong kisem noija chun bongchal som le ni lim akisem in;
45 bel ahin leilona ho ahin, kisilna kongho ahin Pakai insunga kimang kongle bel jouse hi
Hiram in Solomon lengpa lamhilna dungjuiya ana sema, sum-eng jeng’a ana lhah ahi. 46 Jordan vadung pang phaicham lah a Succoth le Zerethan kikah a bel lei kimuna dinga chu Lengpa’n ana lheh ahiye. 47 Kong le bel atam behseh phat in Solomon in tetoh louvin aban umsah gam tan ahi; hijeh chun sum-eng chengse chu ijat monga gih hi ding ham ti hetdoh louvin aum doh lotai.
48 Solomon in Pakai Hou-In sunga manchah ding thil le lo asem chengse chu hicheng hi ahi:
sana maicham ahin;
kilhaina ding changlhah todohna ding dokhang ahin, ✡Potdohbu 30:1-3; Potdohbu 25:23-30
49 sana thengsel a kisem thaomei khom ahin, insung dan mun theng maija akitung in lhanglam ngan abah nga akitung in, sahlam ngan bah nga ma akitung’e,
pahcha lim kisem le thaomei ho ahin, cheiche chengse chutoh ahin, sana jong ahiuve;
✡Potdohbu 25:31-40 50 akhom chengse le thaomei jeng chengse toh, kisilna kong ho leh gimnamtui halna cheng ahin, khangbel jong ahin, aboncha chu sana jeng’a kisema ahin;
chujongleh Mun Theng Chungnung pen kitilai Hou-In dan sungnung penna kotpi dunga akot bil ding jong sana jeng ahin Hou-In lailunga kotpi kil jouse jong sana ma-ma ahi cheh e.
51 Hitobang hin Pakai Hou-In sahna chung changa Solomon lengpan abol ding jouse chu aboldoh tan akichai sohtai. Chujongleh Solomon chun apa David in ana katdohsa thil jouse ahin polut pai-paijin dangka jong, kong le bel jouse jong abonchan Pakai Hou-In sunga thil kholna insunga akhol khom sahtan ahi. ✡2 Samuel 8:11; 1 Thusimbu 18:11
DRAFT COPY