1 Pakaiyin Mose henga aseiyin, 2 Israel chate jouse heng'a seipeh inlang, keima henglam'a thilto ding adon khom diu, amichang cheh keima dinga thiltoh nom chanin thil hin dongkhom cheh uhen. 3 Israel chate jousea konna nadon diu thil ho chu hicheng hi hi ding ahi: “Sana, dangka, chule sum eng hi ding ahi. 4 A eng-dup, asan dup, asan thim ho leh kelcha vun hose hi ding, 5 Chule akijut jolsa kelngoi chal vun, kelcha vun jaona thinggi thing hi ding ahiye. 6 Thaomei hoa manchah ding thaotwi jong, kinujolna ding thaotwi tah jaona hi ding ahi. 7 Thempu in aki-O ding leh alengkou chunga akikhai ding song mantam chu hi ding ahi. 8 Chujou teng Israel mite lailunga ka chenna ding muntheng tah khat na semdoh ding ahi. 9 Houbuh le asunga thilkeo ding ho aboncha kavet sah ding hiche dungjuiya chu nabol diu ahiye, ati.

10 Israel miten thinggi thinga thingkong khat asem diu hichu, adung inche 45, avai inch 27 le atun inch 27 a asem dingu ahiye. 11 Thingkong chu asung le apo sana a natom jol ding, agei gol jong sana a natom jol ding ahi. 12 Hiche thingkong'a manchah dinga chu sana chaokol li nalhah jun ding, chaokol ni chu thingkong pang langkhat a akeng teni chung'a na khai ding, khat teni machu alangkhat teni chung'a na khai lhah ding ahiye. 13 Nangman thinggi chu mol lhon ni tah nasui ding, hiche mol lhon teni chu anigella sana twiya natom jolsel ding ahi. 14 Hiche mol lhon teni chu kong putna a kimang thing ahin hichu apang lang khat a chaokol teni sung'a chu nathol lut cheh cheh ding ahiye. 15 Mol lhon teni chu thingkong panga chaokol kikhai lha teni sung'a chu aputna dia kikhai den jing ding, hiche mol lhon teni chu koimacha gache a aga sutlhah louhel ding ahiye. 16 Hiche thingkong akichai tengleh asunga chu keiman kapeh ding hettohsahna chu na khumlut ding ahi. 17 Sana touna chu nalah ding hiche a chu ngailut hepi touna khat na semdoh ding, hichu adung inch 45 chule avai inch 27 hi ding ahi. ✡Heb 9:5 18 Nangman jong sana cherub ni nasem ding hichu ngailut hepi touna among lang tenia na khetbeh ding ahiye. 19 Amang lang khat a ding chu cherub khat nasem teitei ding, ngailut hepi touna among lama dinga na boncha uva cherub nasem cheh cheh diu ahi. 20 Cherub lha teni chun ani gel'a achunglam angat lhon ding, alha teni chun ani gel'a ngailut hepi touna chu alekhu teitei lhon ding ahi. 22 Hiche mun na chu keiman nang kahin kimupi ding, ngailut hepi touna le hettohsahna thingkong chung'a um cherub teni kikah a chu keiman Israel chate dinga thil manlutah kasei ding hichu keiman thupeh a kapeh ding nahiye, ati.

23 Thinggi thing na manchah ding hichu dokhang khat nasem ding, adung inch 36, avai inch 18, chule atun inch 27 hi ding ahi. 24 Hiche dokhang chu sana thengsella phatah a natom khum ding, apam jouse aboncha sana keoseh a natom ding ahi. 25 Dokhang kimvel'a chu inch 3 a nakaikol ding, hiche akimvel'a kivei kol jong chu sana a kijem lha ding ahiye. 26 Dokhang'a manchah ding sana chaokol li nasem ding, hiche chaokol li chu dokhang keng ningli hosea chu naba peh ding ahi. 27 Dokhang kol kimvel chule chaokol hose chu kimat sohkei ding, dokhang chu akijon tengleh hiche chaokol ho a chu thingjol thillut ding chuteng kipu ding ahi. 28 Thinggi thing phatah a moljol phasahpi khat nasui nam ding hichengse chu sana a natom jol ding, moljol hosese chu dokhang jonlena a kimang ding ahi. 29 Dolhang adia kong hoitah tah sana a kisem ___ lheng ho, khelhei ho, kongtong ho chule twithei ho___atwi thilto a sunlutna dia nasem ding ahi. 30 Hiche bang bang'a chu nangman jong keima kaum jing nai ti photchetna dinga dokhang chung'a keima changlhah nakoi jing ding ahi. ✡Thempu Dan 24:5-8

31 Sana keu seh a kisem thaomei khom khat nasem ding, thaomei tunna dinga akhom chu sehcha a na khetbeh ding, akhon hose le alulangse chule pahcha a kijem chengse aboncha thakhat chet a kigom khom ding ahi. 32 Thaomei phung ajet le avei apat abah gup hung um doh ding, thaomei pang lang khat a abah thum hung um doh ding chule langkhat ma a chu abah thum hung kisep doh ding ahi. 33 Abah gup ho chu alangtogel’a thaomei khon thum cheh um ding, hichu jonmot pahlhasel’a amum le ana um tobang hi ding ahi. 34 Thaomei khom jong chu jonmot bang bang'a kisem khon li hiding hichu jonmot pahlhasel’a amum le ana um tobang hi ding ahi. 35 Thaomei phung'a kon abah gup chengse dangnoiya chu jonmot mum um ding abah ho chu aphunga konna hung jamdoh cheh diu ahiye. 36 Jonmot mum le abah chu alaiya jol toh thakhat a um ding, hichu apumpia sana thengsel'a konna sehcha a kikheng hi ding ahi. 37 Hichea det kong dinga thaomei sagi nasem ding, amalam salvah dia hiche thaomei sagi ho chu tundoh cheh cheh ding ahi. 38 Ameikong attanna ding choiche ahin adopna kong tong aboncha sana theng'a kisem jol cheh cheh ding ahi. 39 Hiche thaomei khom le angaicha danga manchah dinga chu sana theng pound 75 ngai ding ahi. 40 Hiche ho jouse hi aboncha molchunga alim umdan kavetsah bang banga nasem doh tei tei ding ahi. ✡Act 7:44; Heb 8:5