1 Pakaiyin Mose heng'a aseijin: “Pakai heng lama Aaron, Nadab, Abihu chule Israel upate mi somsagi toh hung kal touvun. Gamla thim'a konna chibai nahin boh diu ahi, ati. 2 Mose bouseh Pakai heng'a hung lut thei ding, adangse vang khat a khat cha jong Pakai heng nahin nailut theilou diu ahiye, hitia chu Mose le mipi aboncha hung kilhon lut thei louding ahi. 3 Chuin Mose jong akumsuh tan Pakaiyin apeh chonna dan thu abonchan mipi ho heng'a aseipeh sohkeiyun ahi. Mipin jong awkhat in adonbut uvin asei uve, “Pakaiyin asei chan chu aboncha kabol diu ahi,” tin asei uve. 4 Mose in jong Pakai thupeh chengse abonchan asundoh sohkeiye. Ajing jingkah matah in athou doh in molbul achun maicham bolna ding mun asemin ahi. Aman maicham phung chu Israel phung dungjuijin som le ni atungdoh tan ahi. 5 Mose'n jong Israel te lah a gollhang phabep asol tan, ama hon abonchauvin Pakaiya din pumgo thilto le chamna thilto din bongchal atohdoh tauvin ahi. 6 Mose'n jong thisan akehkhat pi chu athal in twibel ho sunga chun asunglut in ahi. Chule thisan kehkhat chu maicham maija achap khumin ahi. 7 Chuin Mose'n jong Kitepna Lekhabu chu ahin choiyin mipi angsung'a chun gingtah in asimdoh tan ahi. Mipi'n jong adonbut uvin, “Pakai thupeh chan aboncha kabol kimsohkei diu ahi. Ka jabol diu ahi,” atiuve. 8 Chuin Mose'n jong thisan phasah khat alan mipi ho chu achap khum uvin, aseipeh tauve, “Veuvin, hiche thisan hin Pakai le nangho kah a thupeh ho chu anomdet ahi,” ati. ✡Matt 26:28; Mk 14:24; Lk 22:20; 1 Crth 11:25; Heb 10:29; Heb 9:19,20 9 Chuin Mose, Aaron, Nadab, Abihu le Israel upa som sagi ho mol'a akaltou tauvin ahi. 10 Israel Pathen chu abonchauvin aga mutauve. Pathen kengphang noiya chun Sapphire song jeng keng lampi khat ana um in, athen dan jong van chungvum kihohsel'a theng bep bep in anaum in ahi. 11 Chule Pakaiyin Israel mite chung'a chun doumah abol tapon, Pathen loupina chu nasatah in amu tauvin ahile, kitepna anneh jong Ama umpina in aneuvin adon uve! 12 Chuin Pakaiyin Mose heng'a aseipeh in, “Mol chunga khun keima heng'a hung kaldoh in. Chulaiya chun um in, chule Keiman mipi ho ding thupeh ho le gahchahna ho kasutdoh hi kapeh ding chutenteng mipi ho nahil thei ding ahi,” ati. 13 Mose le alhacha Joshua chu apotdoh lhoinin, chule Pathen molsang chunga chun Mose akaltou tan ahi. 14 Mose'n jong upaho heng'a seipeh uvin, “Keini naheng uva kahung kile kah lhona hiche mun a hin ana umun. Aaron le Hur in naumpi nauve. Ka chedoh kah a kibouna nanei uleh amani toh nakijahto diu ahiye,” ati. 15 Mose jong molsang lama akaltou tan ahile meilhang in mol chu ahin tomlha jeng tan ahi. 16 Hichun Pakai loupina chu Sinai molsang chung'a ahung kingam jeng tan, chule nigup sungin meilhang in atom tai. Nisagi nin meibol sunga konin Pakaiyin Mose ahin kou vin ahi. 17 Mol bul langa um Israel te mitmun, molchung vumma Pakai loupina ahung kilah chu meikong bangin amu tauvin ahi. 18 Mose chu akalsang jep jep tan ahileh meibang lah a chun akimu tapoi. Ama nisomli le jan som li molsang lama chun ahung umden tan ahi. ✡Danbu Ni Na 9:9