1 Nangman jouthu nasei thei louding, muda jeh a thet umtah hettohsah a napan thei louding ahiye. ✡Potdohbu 20:16; Thempu Dan 19:11,12; Danbu Ni Na 5:20 2 Chule thilse bol dinga mihem chele ho jong najui a najop louhel ding, mipi nung najui louva amaho khat le khat kikah a them achan theina diuva jong hettohsah a napan louding ahiye. 3 Vaichaho thu kitanna jenga jong pan nalah louhel ding, sihnei langneina jeng jong nabol louding ahi. ✡Thempu Dan 19:15 4 Chule na melma khat sangan ahi louleh bongchal vahmang jong nadon peh louding, hiche gancha chu ama heng'a nahin lekailut peh joh ding ahi. ✡Danbu Ni Na 22:1-4 5 Nangma doumah bolpa sangan in apot apohlal tah a aopkhum ma ahile hichu, na dalhah jeng louding, sangan akitho doh theina dinga na panhu teitei ding ahijoi. 6 Vaicha thutanna a adinmun a konna achan ding dolla thudih chu na pampai peh louhel ding ahi. ✡Thempu Dan 19:15; Danbu Ni Na 16:19 7 Jouthu phot a kinilna le kihehtona chu na jamsan jeng ding, themmona beija mihem chu natha louding, ajeh chu keiman kahenai agiloupa chu them kachan sah him him louding ahiye. 8 Nehguh chahguh jong nakilah thei louding, ajeh chu nehguh kiti hi vaihom a pangpan amit aselmang jin chule adih a pangte chu akhup athal'a alekhup jeng ahi. 9 Kholjin mi jong na suhgim louding, ajeh chu kholjin mihon ichanna lunggel anei uvem ti nahe tauve, amaho banga chu nanngho jong Egypt gam'a kholjin mi a nana um'u ahiye. ✡Potdohbu 22:21; Thempu Dan 19:33,34; Danbu Ni Na 24:17,18; 27:19

10 Kumgup sung'a phatah a na gamsung'a ann-ga natu ding, muchi gasoh na kilokhom ding ahi. ✡Thempu Dan 25:1-7 11 Kum sagi alhin teng hiche kum sung'a chu na gamsung nakicholdo sah ding hichu nangma miten avaicha ho chun aneh diu, lou natong loubeh a na kichol damsah thei ding, ama hon aneh joulou aneh moh chengseu vang chu gamsa hon aneh diu ahitai. Hiche bang bang'a chu lengpi leilai le Olive chu nabol cheh cheh diu ahi. 12 Nigup sung'a hi natoh ding chan natoh ding, chule ni sagi lhinni vang le na sangan jeng jong na choldam sah ding, na bongchal ahin sangan jeng jong choldo thei ding, na sohnu chapa ahin najin ho jong kicholdo thei diu ahi. ✡Potdohbu 20:9-11; 31:15; 34:21; 35:2; Thempu Dan 23:3; Danbu Ni Na 5:13,14 13 Naheng uva ka seidoh hi nanit jingjeng diu, chule hichengse hi na kamsung uva jong na potdoh sah louhel diu ahi. 14 Kumkhat sung'a keima dinga kut thumvei chan nabol diu ahi.

15 Chol solou changlhah kut, keiman phat kateppeh dungjuiya hi ding, Abib* lhasung hichu cholsolou changlhah nisagi sung sea naneh ding hiche lhasung hi Egypt gamsung'a konna na hungdohna lha ahiye. Hijeh achu khat cha jong keima angsung'a khutgoh keova hung sunglha thei louding ahi. ✡Potdohbu 12:14-20; Thempu Dan 23:6-8; Minbu 28:17-25 16 Loulaija na lhosoh ga amasapen pen chu nangman lholhun Kut a dinga na katdoh jeng ding, hitobang ma a chu loulai pumpia na lhosoh ga nahin chop khom teng jong le kut nabol ding ahi.” ✡Thempu Dan 23:15-21; Minbu 28:26-31; Thempu Dan 23:39-43 17 Kum khat sung'a namite ho lah a pasal'a kai lhah kiti phot chu Pakai Pathen keima ansung'a thumvei hung kilah cheh diu ahi.” 18 Keima angsung'a kilhaina gancha kithat chu cholsosa changlhah jaona nahin totha thei louding, kaheng'a kilhaina sathao jeng jong khovah geija nakoi den louding ahi. 19 Na leiset ga soh lah a gamasa pen pen chu Pakai na Pathen heng'a nahin pohlut masat pen ding, kelngoi sa kithat jeng jong chu api noitwi mangcha a nahon louding ahi. ✡Danbu Ni Na 26:2; Potdohbu 34:26; Danbu Ni Na 14:21

20 Ven, na chena channa nangma na vengtup ding le na lhonpi jing dingin na masang lama vantil khat ka solpeh in ahi. 21 Vantil khu jabol inlang, athu na palkeh thei louding, ama doumah thei himhim nabol louding ahiye, ajeh chu aman na suhkhel chan u ngaidam intin, ajeh chu ama sung'a khu keima min um jeng'a ahi. 22 Aman asei chan lunglut tah a na ngai jing ding, keiman kasei chan nabol'a ahile, na melmate dia melma a kapan ding, nadou te dinga adouva pang ding kahi. 23 Ka vantil chu na masang lama lamkai jing ding, Amor mite, Hit mite, Periz mite, Canaan mite, Hivi mite, chule Jebus mite jouse abonchauva nahin pui tengleh keima tah in abonchauva ka suhmang hel jeng ding ahi. 24 Chule mihem in asemthu milim doi pathen ho masang kitia na bohkhup louding, hiche ho dinga jong chu na kisahlal louhel ding, anatoh bang bang uva jong ima natoh thei louding aboncha na phuhlhuh ding, a songkhom tincheng jong na lekhup jeng ding ahiye. 25 Na bonchauva Pakai na Pathen nahou uva ama kin jeng nabol diu ahi. Na boncha uva Pakai na Pathen kin jenga na kisahlel diu, ama tah in na changlhah neh diu le na twidon ding jengu jong phatthei aboh ding, chuteng keiman na jalah uva konna phatthei nasatah kahin boh ding ahi. 26 Nangma gamsunga chu koima aching kalval jong um thei louding, amavang nangma hinkho chu kasuh bukim sel joh ding ahi. 27 Na masang tinna mihem ten akichat thei chan kamasol peh ding, kidoupi dinga nahin tup chan lungsung kasuhmol peh jing ding, chuteng nangma nahin doute jam cheh diu nangma nunglam jeng'a bou khodah diu ahi. 28 Na masang'a khoi-ngel te kalha masat peh ding, Hivi mite, Canaan mite, Hit mtie abonchauva khoingel ten adelmang hel diu ahi. 29 Na masang'a vang amaho chu kumkhat sung'a kadel cheh louding ahi, ajeh chu gamsung ahomkeova aum khah le gamsa hungpung lha jeng ding gamsa ten nangma nahin dou khah diu ahi. 30 Nangma na hung punbe jing ding, chuteng amaho khu aloiloija kadel cheh ding ahiuve. 31 Na gamgi chu twipisan a kipat Mediterranean twikhanglen chan hop a ka kaipeh ding, solam gammang lah a kipat Euphrates vadung channa kakai peh ding nahiye, ajeh chu hiche gamsung ana lo jouse keiman nangho khut a kapeh doh ding, amaho chu nangman jong nadel cheh jeng diu ahi. 32 Amite jouse lah hihen asemthu u pathen hijongleh kitepna neocha jong nanei thei louding ahi. 33 Amaho jouse khu khat jeng cha jong na gamsung'a cheng theilou diu ahi, ahinlah amaho pathen limsemthu ho kin nabol khah ngai ngaiya ahile vang, hichea chu nasatah a nangma nakipal lhuh ding ahi.