1 Pakaiyin Mose henga thu aseijin, 2 Israel mite hiche hilchahna hi pen: Thilto hoitah natodoh uchu keija dinga gimnamtui tah ahin; hiche ho chu ka an ahi. Hiche ho chu ka hilchah nau banga aphat cha nahinto diu ahi. 3 “Mipi ho seipeh in: Hiche hi nang hon Pakai dinga govam thilto hoitah nisih le nabol diu ahi. Nang hon nolnabei kum khat lhingsa kelngoinou achal ni na todoh diu ahi. 4 Kelngoi khatpen chu jingkah lama nato doh diu, khatma chu nilhah lam'a na todoh diu ahi. 5 Kelngoi khat cheh chutoh lhosohga thilto a pang dia changbong neldisel khon dim khat le olive thao kihehlha khon dim khat toh kihal hi ding ahi. 6 Hiche thilto hi bol jing ding pumgo thilto hoitah Sinai molchunga kibulphu, Pakaiya dia gimnamtui tah ahi. 7 Kelngoi khat cheh chutoh lengpitwi thilto khamna theiya kidon khon dim khat Muntheng'a Pakaiya dia na suhlhah diu ahi. 8 Kelngoi anina pa jong nilhah tengleh chutobangma a lhosoh leh lengpitwi toh nato ding ahi. Hiche, jong chu, thilpeh hoitah ahin, Pakai dinga gimnam tuitah ahi.

9 Cholngah nikho seh le kelngoi achal ni kumkhat lhingsa cheh nolnabei na todoh diu ahi. Hichu lhosohga thilto olive thao a kisunou changbong neldisel khon dim li, chule lengpitwi thilto hi ding ahi. 10 Niseh a pumgo thilto le lengpitwi thilto chung chon a pumgo thilto hi Sabbath niseh a todoh ding chu ahi.

11 Lhaseh a nikho masapen ni leh, Pakai dia thilto bongchalgol ni, kelchal khat, chule kum khat lhingsa kelngoi chal sagi, aboncha nolnabei na todoh diu ahi. 12 Chule bongchal khat cheh toh to tha dinga lhosohga thilto ding olive thao a kisunou changbong neldisel khon dim gup, khon dim li leh kelchal, 13 khon dim ni leh kelngoi khat cheh hi ding ahi. Hiche pumgo thilto hi thilpeh hoitah, Pakai dia lunglhaisah gimnam tui hi ding ahi. 14 Nangman lengpitwi thilto jong na todoh ding: bongchal khat cheh chutoh lengpitwi khon ni, kelchal a dinga twipai thum, kelngoi khat cheh le khon dim khat cheh hi ding ahi. Hiche thilto hi kum lhunga lhaseh le nikho masapen nikho a pumgo thilto na todoh ding ahi. 15 Chule lhaseh a nikho masapen ni leh, kelchal khat Pakai henga chonset thilto a na todoh ding ahi. Hiche hi boljing ding pumgo thilto le lengpitwi thilto chung chon a todoh ding chu ahi.

16 Chule lhamasa pen nisom leh nili lhin nikho leh Pakai Kalchuh Kut nabol ding ahi. ✡Potdohbu 12:1-13; Danbu Ni Na 16:1,2 17 Hiche lha nisom le ninga lhinni hi thanop umtah, nisagi kimang ding kipatni ahin, ahinlah chol kisolou changlhah jeng naneh diu ahi. ✡Potdohbu 12:14-20; 23:15; 34:18; Danbu Ni Na 16:3-8 18 Kut nikho masapen nile khoppi theng kibol ding, hiche nikho teng natoh nabol louhel diu ahi. 19 Pumgo thilto hoitah Pakaiya na todoh nikhou hi ding ___ bongchal ni, kelngoi chal khat, chule kumkhat lhingsa cheh kengoichal sagi, aboncha nolnabei hi ding ahi. 20 Hichengse toh totha ding chu bongchal khat cheh le lhosohga thilto olive thao a kisunou changbong neldisel khon dim gup, kelngoi chal khat dinga khon dim li, 21 chule Kelngoi chal sagi lah a khat cheh chutoh khon dim ni hi ding ahi. 22 Nangma le nangma chonset kithoidamna thilto a pang dinga kelchal khat na todoh ding ahi. 23 Jingkah seh le tantih nei louva thilto sim louva hichengse jong hi todoh ding ahi. 24 Nisagi sunga jingkah seh leh anneh thilto hoitah na todoh uchun agimnam a Pakai alunglhai sah ding ahi. Hiche hi boljing ding pumgo thilto leh lengpitwi thilto chung chon a todoh ding chu ahi. 25 Nisagi lhinni chu khoppi theng adia nikho loupi tah khat hi ding, hiche nikho a chu natoh dang nabol louhel diu ahi.

26 . ✡Potdohbu 23:16; 34:22; Danbu Ni Na 16:9-12 Lholhun Kut teng, Pakai dia na tohga masa na todoh teng, khoppi thenga dinga nikho poimo khat nagon ding, hiche nikho a chu natoh nabol lou diu ahi. 27 Pakai dia lunglhai umtah gimnamtui dinga pumgo thilto hoitah na todoh diu ahi. Hiche lah a chu bongchalgol ni, kelchal khat, chule kelngoi chal kum khat lhing cheh sagi hi ding ahi. 28 Hiche ho nungjuiya chu lhosoh thil ho lah a olive thao a kisunou changbong neldisel khon gup leh bonchalgol khat cheh, kelchal khat leh khon li cheh, 29 chule kelngol sagi ho khat cheh chuleh khon ni cheh hi ding ahi. 30 Chujongle, nangho le nangho Pakaiya na kisuhtheng na diuva kelchal khat na todoh diu ahi. 31 Niseh a thilto ho chung chonin lhosoh thilto ho toh lengpitwi thilto pumin pumgo thilto hoitah ho kigonun. Gancha thilto nato hou chu nolnabei hitei ding ahi.