1 Hijeh chun Kiriath-jearim mite chu ahung uvin Pakai Thingkhong chu ahung kilah tauve. Ama hon Pakai Thingkhong chu thinglhang lama Abinadab inah alhut un, achingtup dingin Eleazer achapa ngansena anei tauve. ✡2 Samuel 6:2-4; 1 Thusimbu 13:5-7 2 Thingkhong chu phat sottah kum somni vel Kiriath-jearim mun'a um ahi. Hiche phatsung chun Israel pumpi chu ana lunghem lheh jeng uve, ajeh chu ama hon Pakaijin nampi chu adalhah bang’a agel u ahi.

3 Chuin Samuel in Israel pumpi jah ah, “Nangho na lungthim pumpi uva Pakai heng'a hung kile nom mong nahiu le, nangho lah a um gamchom mite indoi Ashtoreth chu paidoh un. Chule Pakaiya dingin nalung sung’u kigong tup unlang, ama bou jen’un chutileh Aman Philistine mite a konna na huhdoh thei diu ahi,” ati. 4 Hijeh chun Israel miten jong amahoa um Baal chule Ashtoreth gamchom mite indoi chu apaidoh un,Pakai jengbou ahou tauve.

5 Chuin Samuel in, “Israel mite jouse na boncha uvin Mizpah mun’ah hung kikhom un, chutengleh keima nangho dingin taovinge,” ati. 6 Hijeh chun Israel mite jong Mizpah mun’ah akikhom khom’un, Pakai hounan twi agathal uvin Pakai angsunga asung lhauvin, hiche nikho chun an angol uvin, Pakai douna a achonset nau akisih un ahi. (Hiche Mizpah mun'a chu Samuel Israel te thutan vaihom'a ahung panna chu ahi).

7 Philistine lamkai hon Israel mite Mizpah mun’ah akikhom uve tithu ajah phat un, asepai ho akigontup sah un ahi. Philistine miten eihin nai tauve ti ajah phat un Israel mite jong akicha lheh jeng’un ahi. 8 “Pakai iPathen'un Philistine te khut a konna eihuhdohna diuva taona a ilhahsam louhel diu ahi,” tin Samuel kom'ah ngehna ahung neijuve. 9 Chuin Samuel in kelngoinou khat alan Pakai hengah todohna pumgo thilto maicham asem’in ahi. Aman Israel mite taopehna aneijin, Pathen'in ataona asanpeh tan ahi.

10 Samuel in hiche govam thilto abol laijin Philistine te chu Israel te sat dingin ahung naijun ahi. Ahinlah Pakaijin kidangtah in van aginsah in, keh alhah sah in, hiche nikho chun Philistine te boinan alhun den’un, Israel chaten galjona anei tauve. 11 Chuin Israel te chu Mizpah a kon'in apotdoh un Philistine te chu anungdel’un, Beth-car aphah kah seuvin athat toupeh un ahi.

12 Chuin Samuel in songtumlen khat alan Mizpah le Jeshanah kikah ah aphut in, aman hiche mun chu Ebenezer asah in ahi. Ajeh chu, “Hilai mun chan’ah Pathen'in ei kithopiuve,” ati.

13 Hijeh chun phat chomkhat sungin Philistine miten Israel mite ahin nokhum tapouve. Chule Samuel phatlai sungsen, Pathen thahatna jallin Philistine mite anem lhauvin ahi. 14 Chule Philistine miten Israel mite ana lahpeh u, Ekron chule Gath kom'a khopi ho jong Israel te alepeh kittan, chule agam kimvel jouse jong chu Philistine te khut a kon'in Israel ten alelah kit tauvin ahi. Chule Israel mite le Amon mite kah a chamna aumin ahi.

15 Chule Samuel in adamlai sungin Israel mite thu ana tan’in ahi. 16 Akumseh leh gamsung akhol kimvellin, Bethel le Gilgal, chule Mizpah a ache velkol jingin ahi. Aman Israel mite chungah, adeh in hiche munho lah a hin thu anatan jin ahi. 17 Chule Ramah kho a ain aum jeh chun ain’ah ahung kilejin, chule Israel te thu anatan jin ahi. Chule Samuel in Ramah a chun Pakaiya dingin maicham khat asemin ahi.