1 Chuin David in avellin Israel mi gal-hang 30,000 kilhengdoh ho chu akoukhom kit in ahi. 2 David in amaho chu alamkaijin Judah gam'a Baalah kom'a Pathen Thingkhong chu gale poh din ache tauvin, hichu Van Pathen Sepai ho minna kikou, alai a Cherub laltouna um chu ahi. ✡Potdohbu 25:22 3 Hichun Pathen Thingkhong chu bongkang thah chungah aheng'un chule molchung lam'a Abinadab in'a kon ahin pudoh tauvin, chule Abinadab chapa teni Uzzah le Ahio chun bongkang chu ahintol lhon'in ahi. ✡1 Samuel 7:1,2 4 Pathen Thingkhong kipohna chu. Chule Ahio chu thingkong masangah achen ahi. 5 Chuin David le Israel mipi jouse chun Pakai masang'ah la asauvin, chule tumging thei jouse – pengkul, selangdah, khongpi, selki, chule sumlheng jouse suging pumin golnop abol tauvin ahi.

6 Ahinlah ama hon Nacon changphol mun ahin phah uchun bongchal teni chu akipal lhu lhon'in ahileh Uzzah chun akhut ajahdoh gangchal in Pathen Thingkhong chu atuh tan ahi. 7 Hichun Pathen lunghanna chu Uzzah chungah achutan hijeh chun Pathen'in Uzzah chu amun maman Pathen Thingkhong kom'ah chun athat tan ahi.

8 Pathen'in Uzzah chunga alunghan ahin boh lhah jeng jeh chun David alung phamo lheh tan ahi. Hijeh chun aman hiche mun chu Perez–Uzzah asah tan ahi (hichu Uzzah chunga thunoh lhunna mun tina ahi), tuni chanin akisah tan ahi.

9 Hiche thilsoh jouva pat chun David in Pakai chu akicha lheh tan, hijeh chun aman Pakai chu adong tan, “Iti keiman Pakai Thingkhong hi keima vetsuina noiya kahin le choilut thei ding ham?” ati. 10 Hijeh chun David in Pakai Thingkhong chu David khopi a pohlut lou din pha asah tai. Hinlah Gath mi Obed–edom insung joh a apolut tan ahi. 11 Pakai Thingkhong chu Obed–edom insungah lhathum sung aumden nalai in, hijeh chun Obed–edom le a insung pumpi chu Pakaijin phatthei aboh tan ahi. ✡1 Thusimbu 26:4,5

12 Hichun leng David chu hitin akiseipeh tan ahi, “Pakaijin Pathen Thingkhong jeh chun Obed–edom insung pumpi le anei jouse phatthei abohtan ahi.” Hijeh chun David jong achen Pathen Thingkhong chu Obed–edom insunga kon David Khopi lam'ah kipa golnop loupi tah pumin ahin potan ahi. 13 Chuin Pakai Thingkhong puhon kalgup ason jou un, David in bongchal le bongnou thaochet in kilhaina abol tan ahi. 14 Chuin David chun thempu ho sangkhol chol akiah in athaneina jouse pumin Pakai angsung'ah alam tan ahi. 15 Hichun David le Israel mipi jouse chun Pakai Thingkhong chu kipah thong jeju le kelchaki mutging toh thon aputou tauvin ahi.

16 Ahin Pakai Thingkhong chu David khopi alhut tauvin ahileh, Saul chanu Michal chun abang kot akon ahin suhvet tan ahi. Chuin amanun leng David Pakai angsunga akhut alea alam chu amutan ahileh amanu chu David chungah lung himo nan adim tan ahi.

17 Chuin Pakai Thingkhong chu ahinpu uvin David in akoina dia asem ponbuh sungah chun akoi tauvin ahi. Chuin David in Pakai angah kilhainan govam thilto le chamna thilto anei tan ahi. 18 Chuin kilhaina abolchaijin, David in mipi jouse chu Van Pathen Sepai te minin phatthei aboh tauvin ahi. 19 Chuin Israel pasal jouse le numei jouse chu changlhah phengkhat cheh, sachan khat cheh, le lengpi theija kisem changlhah khat cheh ahoppeh un ahi. Chujouvin mipi jouse chu a inlam cheh uva akile tauvin ahi. ✡1 Thusimbu 16:43

20 Hiti chun David in ama insung mite phattheiboh ding tia inlam akile chun, Saul chanu Michal ama kimupi din ahung potdoh in ahi. Amanun jalou tah in hitin aseiye, “Iti jachat um hitam tuni Israel lengpan mingol khat in abol ding tobanga asaguh keuva asoh numeiho masanga aum jeng chu!” ati.

21 Chuin David in Michal chu alethuh in, “Keima Pakai napa te le a insung mite jouse chung vum'a eilhengpa! Pathen mi Israel te chunga lamkai dia einganse pa masanga chu kipah a lam kahi. 22 Henge, hisanga ngoljo a um ding jong kanom'e chule keima mitmu tah a kineosah ding jong! Ahin soh numei na minphah ho vang chun keima hi chingtah a eigel diu ahi!” ati. 23 Hiti chun Saul chanu Michal chu ahinkho lhumkei jin chanei louvin aum tan ahi.