2 CHRONICLES
THUSIMBU NINA
2 Chronicles Sung Thu Umdan
1 Chronicles kipatna lam chu Jabez taona thudol ahin, hiche bang chun 2 Chronicles kipatna lang hi taona thudol ahi. Hiche phatlai hin Pathen'in Solomon adongin, “Ipi ham na ngaichat? Keiman kapeh ding nahi,” ati. Chuin Solomon in chihna athum tan ahi. Ahinlah, achainan Pathen'in Solomon agih in, “Na sopi hon ka thupeh adonselou uva, Pathen dang angsunga abohkhup uva ahileh, ven keiman kapeh gamsung’a kon ka suhmang diu ahi,” ati. Hitia Pathen'in asei bang hin 2 Chronicles lekhabua thusim chedan jong gim hesoh nan akichaijin ahi. Tua Chronicles nasim masang'in hiche hi geldoh in: Hinkho sunga thil khat apatna langa phatah a ibol bouseh hi thupi ahipon, amavang thil khat phatah a achaina chan a panlahna hi athupi joi, ti muchet ahi.
Lekhabu Jihpa, Akijih Kum Chule Koite Dinga Anajih Ham?
Ezra in ajih ahi, tin Judah te chonna dan chun kicheh tah in aseiyin ahi. Hichu 430 BC phat laiya ana jih ahi. Chule hiche lekhabu hi Israel chate dinga ana jih ahi. Ajeh chu Judah gam'a ahung kithah semphat uva, chule achesa phat sunga Pathen'a konna phattheina achan nau avel geldoh kit uva, chule Pathen kom'a akitepna hou ahin tohdoh theina diu ahi. Chule achesa phat sunga Pathen a dinga asuhkhelna hou avel’a anungbol kittah louna ding uva ahilchahna dinga anasut ahi. Israel chaten Pathen dihtah ahou nauva konna Pathen phatthei bohna achan nau hetdoh sahna ding ahi. Chule Judah lengte hon Pathen ging pum'a vai ahin hop nauva agamsunga kikhelna ahung umdoh theina ho muchet sahna dinga jong ahi; chule Judah lengte hon Pathen kicha louva amaho dei dan dan'a vai ahin hop jeh uva Pathen lunghan jeh a Pathen'in achungthu atan dan thu hetchet sahna dinga ana sut ahi.
1
Solomon In Chihna Athum
1 David chapa Solomon chun alenggam dettah in atungdohtai, ijeh inem itileh Pakai a Pathen chun aumpia chuleh sangtah a athanei sah ahitai.
2 Solomon chun Israel lamkaiho galsat sepai asang aja chunga luboh ho thutan vaihom ho, gamsung lamkai hojouse chule phung lamkai ho akoukhomin ahi. 3 Chuin Solomon chun houbung mipi chu Gibeon khoa chun Pathen houkhom dingin alamkaijin ache tauve, ijeh inem itileh hiche khoa Pathen Houbuh chu umma ahi (Hiche lai mun hi Pakai Lhacha Mose’n gamthip laiya Pathen Houbuh asemna mun chu ahi.)
4 David chun Kiriath-Jearim a konna Jerusalem'a Pathen Thingkhong chu Houbuh a ana pohlutsa ahitai. ✡2 Samuel 6:1-17; 1 Thusimbu 13:5-14; 15:25—16:1 5 Ahinlah Uri chapa, Hur tupa Bezalel kitipan asem sum-eng maicham chu Gibeon mun'a Pakai Houbuh maiya chun aum nalaijin ahi. Chuti chun Solomon le mipi chu Houbuh masanga chun akikhom un Pakai chu ahou tauvin ahi. ✡Potdohbu 38:1-7 6 Chukom'a Houbuh masanga chun Solomon chu sum-eng maicham umna achun akal touvin Pakai angsung'ah pumgo thilto 1,000 jen aga lhandoh tan ahi.
7 Chuche jan chun Solomon henga Pathen ahung kilah in hitin ati, “Ipi pentah nadeijem? Thum'in, chule Keiman nangma kapeh ding nahi!” ati.
8 Solomon in Pathen chu adonbutnin, “Nangman kapa David chu lungsetna longlouhel nachan'in, tun keima ama khelin lengin neipan sahtai. 9 O Pakai Pathen, lungset tah in kapa David toh nakitepna koi jingin, ajeh chu nangin mihem atam'a tam leiset a vutdi jat lah a lengin nei pansah tan ahi! ✡Semtilbu 13:16; 28:14 10 Mipi hijat chunga kituptah avaihom thei ding ham? Hijeh chun namite chunga vai kahom them theina dingin chihna le hetna neipen,” ati.
11 Pathen chun Solomon jah a hitin aseijin, “Nei le gou, haona , loupina ahiloule nagal mite thina ding ahiloule na hinkho sotna joh thum louva na ngaichat sangpen na mite kithopi theina ding leh achung uva vaihom them theina nathum tah jeh hin, 12 Keiman nathum pen chihna le hetna chu kapeh ding nahi. Chujongleh nei le gou , haosatna le minthanna jong kapehtha ding, hitobang thil hi na masang leh khonunga leng hungchang ding hon jong aneilou diu ahitai!” ati.
13 Hiti chun Solomon chu Gibeon khoa Pathen Houbuh a kon chun Jerusalem lam'a ahung kinunglen Israel te chunga lengvai ana potan ahi.
14 Solomon chun kangtalai le sakol touthem ho chu akoukhom in ahileh kangtalai sangkhat le jali 1,400 leh sakol touthem 12,000 aneijin ahi. Aman hichengse chu kangtalai khopiho a phabep akoijin chule phabep chu ama kom nai Jerusalem a jong akoijin ahi. ✡1 Lgt 4:26 15 Lengpa chun sana le dangka jong Jerusalem sunga chun atam dan songlheu lah abahsah jengin chuleh Cedar thingtum jeng jong Judah phaicham a theiba thing kehho abang jengin ahi. 16 Solomon sakol ho chu ama dinga kivei hon Egypt gam le Celicia gam'a konna man tamtah a ahin tollut u ahi. ✡Danbu Ni Na 17:16 17 Chuche phatlai chun Egypt gam'a kangtalai ho chu, dangka 600, chule sakol ho chu dangka 150 a ana kicho jouvin ahi. Hiti chun thil ho chu Hit lengte le Aram lengte kom'a ana kitoldoh jin ahi.
✡1:4 2 Samuel 6:1-17; 1 Thusimbu 13:5-14; 15:25—16:1
✡1:5 Potdohbu 38:1-7
✡1:9 Semtilbu 13:16; 28:14
✡1:14 1 Lgt 4:26
✡1:16 Danbu Ni Na 17:16
DRAFT COPY