17
Jehoshaphat In Judah Gam Avaipoh
1 Chuin Asa chapa Jehoshaphat chu abanin lengin ahung pangin, ama chun Israel ten ahin nokhum tengule din jouna dingin Judah te chu ahatsah ben ahi. 2 Judah gamsunga kulpi kigen khopi jousea a sepai ho chu atousah in, chule Judah gam'a apa Asa in ana lah Ephraim gam'a khopiho ngah ding mi anganse be in ahi.
3 Pakaijin Jehoshaphat chu aumpi e ajeh chu apan aleng chan tillai kum hoa vetjui thei ho ajuijeh chun Pakaijin Jehoshaphat chu aumpin, chule aman Baal limsemthu ahou pon ahi. 4 Israel lenggam'a thilse abol uva achonset nau jui louvin apa Pathen ahollin athupeh ho ajuijin ahi. 5 Hiti chun Pakaijin Judah lenggam chunga vaihom dingin Jehoshaphat chu atungdoh tan, Judah mite jousen Jehoshaphat chu kipa thilpeh ahin pohpeh un, hiti chun ama chu haosa tah le sangtah a gin le ja in aum tan ahi. 6 Ama chu giltah in Pakai lampi hoa akipelut jengin ahi. Aman Judah gamsunga milim doi houna Asherah khom ho aladoh sohkei tan ahi.
7 Jehoshaphat Leng chan kal kum thum lhin kum chun Judah khopi jousea amilen amilal ho chu mihil dingin asol'in ahi. Hiche milen milal ho chu Ben-hail, Obadiah, Zechariah, Nathanel chule Micaiah ahiuve. 8 Amaho chengtoh asoltha Levi te chu ahile Shemiah, Nethaniah, Zebediah, Asahel, Shemiramoth, Jehonathan, Adonijah, Tabijah chule To-adonijah ahiuve. 9 Ama hon Pakai danbu chu akipoh un, chuin Judah gamsunga khopi ho jouse achon leuvin miho chu thu ahil'un ahi.
10 Chuti chun akimvel'a lenggam jouse chunga chun Pakai ginna chu achutan hijeh chun Jehoshaphat douna khat beh in jong gal abolnom tapouve. 11 Philistine gam'a mi phabep khat kipa thilpeh le dangka ama jabolna chun ahin pouvin, chule Arab mite chun kelngoi chal 7,700 le kelchal 7,700 ahin pohpeh uvin ahi.
12 Hiti chun Jehoshaphat chu athahat cheh-cheh jengin, chule kulpi le thil kholna khopi ho chu Judah gamsung pumpia chun asahbe jingin ahi. 13 Judah khopi ho achun neh le chah atama tam akoijin, thepna sangtah nei sepai hon ho chu Jerusalem a chun atousah in ahi. 14 A sepai ho chu apu apa lhah a phungkhai dungjuijin amin'u akhumpeh in ahi.
Judah phunga kon'in sepai 300,000, honkhat a 1,000 cheh chu Adnah lamkaina noija aum uvin ahi. 15 Ama noichet a lamkai chu Jehohanan ahin, aman sepai280,000 alamkai in ahi. 16 Abana Zicri chapa Amasiah chu ama chamin Pakai natong dingin ahung kipedoh in, ama lamkaina noiya chun 200,000 aumin ahi.
17 Benjamin phunga kon'in thalpi le pho mangcha sepai 200,000 aum'e. Amaho chu sepai tamtah Eliada lamkaina noiya um ahiuve. 18 Aban a chun Jehozabad chu ahin, aman gal manchah choi mi 180,000 alamkaijin ahi.
19 Sepai hijat hi Jerusalem a lengpan amanchah ahin, hiche chung chonna hin Jehoshaphat chun Judah gam pumpia kulpi kigen khopiho a jong atousah in ahi.
DRAFT COPY