16
Asa Lengpa Phat Kichailam
1 Asa Lengvai poh kum somthum lhin kumin, Israel Lengpa Baasha chun Judah gam ahin bullu tan ahile Judah gamsunga Asa gamkol a konna koimacha lutle potle aum louna dingin Ramah khopia chun kul agen tan ahi.
2 Asa chun alethuh nai, Pakai Hou-In le leng inpia um gouthil kikoina a um sana le dangka jouse chu aladoh e. Damascus gam vaihom Aram Lengpa Ben-hadad chu thu athot tan ahi:
3 “Kapa le nangpa kah a kinoptona ana um bang chun eini kah a jong umhen. Ven, keiman sana le dangka kahin thotne Israel lengpa Baasha toh na kinoptona lhon chu sutang jengin chutile aman eidalha tante,” ati.
4 Ben-hadad lengpan Asa taona anoppeh in, chule Israel khopi ho bulu dingin a sepai jalamkaipa chu asol tan ahi. Ama hon Ijon, Dan, Abel-beth- maacah khopiho le Naphtali gamsunga thil khol khopi len ho jouse chu ala tauvin ahi. 5 Baasha Israel Lengpan thilsoh ho chu ajahdoh doh chun Ramah khopi kul getna tohgon adalhan anatoh jouse chu anga tan ahi. 6 Chuin Lengpa Asa in Ramah khopi kul semna a man dinga Baasha in akoi songho le thing kiatsa ho pomang ding chun Judah te jouse chu akoudoh tan ahi. Hiche chu Geba le Mizpah khopi kul semnan amangcha tan ahi.
7 Hiche pet hin mitva neipa Hanani chu Lengpa Asa kom'a ahungin, chule hitin asepeh e, “Nangman Pakai na Pathen khella Aram Lengpa chunga tahsanna nakoi tah jeh chun, Aram Lengpa sepai te suhmang na ding phatpha chu na mansah tai. 8 Ethiopia le Libya te chule Sepai tamtah toh akangtalai hou le kangtalai tol ho chunga ipi anasoh ham tichu na geldoh lou hitam? Hiche petna chu nangma Pakaiya naki ngai jeh a aman nangma na pehdoh ahi. 9 Pakaijin leiset pumpia hi ama kom'a alungthim pea kipedoh ho chu athahat theina diuva amit tenia hi ahol le ji ahi. Iti ngol'a ngol nahi hitam! Tua kipat a hi nangman gal nasat jing ding ahitai,” tin aseipeh tan ahi.
10 Hanani in hitiho aseipeh jeh chun Asa chu alunghang behseh in ama chu Songkul'a ahengin bul atuh tan ahi. Hiche pet chun amite phabep jong asugim pan tan ahi.
Asa Leng Vaipoh Sung Lahchom
11 Asa leng vaipoh abul apat achaina chan thilsoh thusim adang ho chu, Judah le Israel te lengho thusimbua akijihlut sohkeijin ahi. 12 Ama Leng vaipoh kum somthum le ko lhin kum chun, Asa chu keng natna khohtah khat aveitan ahi. Chutobang natna khohtah anei jing vang chun, Pakai hol louvin alou them aithem ho joh kithopina ahol jingin ahi. 13 Hichun aleng vaipoh kum somli le khat lhinna kum chun athitan ahi. 14 David khopia chun aman song chunga ana kikhen lhan achun akivui tan ahi. Ama chu gimnamtui le thao namtui kinu lupna achun alupsah un, chuin mipi ho chun ama jana vetsahnan kigona meikong lentah khat ahal uvin ahi.
DRAFT COPY