1 Oded chapa Azariah chunga Pathen Lhagao ahung chun, 2 lengpa Asa galmun’a kon hung vailhung chun, lengpa kimutopi dingin apotdoh tan ahi. “Neihin ngaipeh temin, Asa!” tin agah asamin ahi. “Ngaitemin, nangho Judah le Benjamin phunga mite ho! Pakai chu nang hon naumpi laiseuva aman naumpi diu ahi. Nang hon nahol laiseuva ama chu namu diu, ahinlah nang hon na dalhah uva ahileh aman jong na dalhah diu ahi,” ati. 3 Phat saotahpi Israel chu Pathen dihtah nei louva ahil diu themgao beiya chule ajui dingu danthu beiya anaum'u ahitai. 4 Ahinlah boina hahsatna ahinto phat ule Pakai, Israel Pathen, henga ahung kinung heikit uva, chule ama chu ahin hol phat ule ama hon ama chu amudoh kit jiuve.

5 Chuche lungjinna phat ho sung chun kholjinna chele vahle dingin lungmon aum jipon ahi. 6 Gamkhat in gamkhat dounan gal akisatto jiuvin ahi. Ajeh chu Pathen'in boina tintang jouse toh thoa asuhgim jiu ahi, 7 Ahinlah nangvang hatnin lang hangin, ajeh chu kipaman nasan ding ahi.

8 Asa chun Themgao Azariah a konna hiche thu chu ajahdoh phat hin, ahung hangsan tan Judah le Benjamin gamsunga chule Ephraim thinglhang gam'a analah u khopi hoa thet umtah limsemthu ho chu abonchan asumang tan ahi. Chule Pakai Hou-In maiya um lutle potle na indan sunga Pakai maicham chu athah semphat kit tan ahi.

9 Chuin Asa chun Judah le Benjamin phunga mijouse, amaho to chengkhom Ephraim, Mannaseh le Simeon phunga mijouse chutoh akou khom sohkei tan ahi. Asa vaipoh sung chun amaho Pakai a Pathen un aumpi chu amu doh phat uchun Israel gam'a kon'in mi tamtah Judah gam'a chun ahung kichao lut tauvin ahi. 10 Asa vaipoh sung kum som le nga lhin kum chavang kichai kon chun, mipi chu Jerusalem'a akikhom uvin ahi.

11 Chuche nichun Pakaiya dingin bong 700 le kelngoi 7,000 chule galmun a ahin pohlut u kelcha ho chu Pakai angsunga chun athat un maicham thilton akatdoh tauvin ahi. 12 Chuin amaho alungthim pumpi alhagao pumpi uvin Pakai, a Pathen’u holnan kitepna khat asemdoh tauvin ahi. 13 Koi hileh ateh akhang hijongleh Pakai, Israel Pathen holnom lou chu, thalih jeng dingin akinopto uvin ahi. 14 Sumkon gin peh lah-lah le kelngoi ki kikhet gintoh thon, Pakaiya kitahna nei dingin akihahsel nau aw sangtah in asamun ahi. 15 Alungthim pumpiuva asem'u ahijeh chun Judah gamsunga mijouse chu hiche kitepna chunga alunglhai sohkeiyun ahi. Ngaichatna neitah a Pathen ahol’u ahijeh chun Pakaijin alang langa agalmi teuva kon'in choldona apeuvin ahi.

16 Asa Lengpa chun apinu Maacah jeng tah jong chu Lengnu ahina mun'a kon'in anodoh in ahi ajeh chu amanu chun thujahmo Asherah khom anasem ahi. Asa chu apinun thujahmo khom asem chu asat lhan ajepchip in Kedron phaicham a chun ahalvam tan ahi. 17 Israel gamsunga doikhom, doihouna munho akisuhmang lou vang chun ahinkho lhung keijin Asa lungthim chu kitahna lhingset in aum jinge. 18 Ama le apan ana lhandoh sana le dangka chule thil jat chom-chom ho chu Pathen Hou-In sunga ahin polut in ahi.

19 Hiti chun Asa leng vaipoh kum somthum le kum nga chan chun gal kiti ana um tapoi.