1 Abijah athi phat chun David khopia chun akivui tan ahi. Chuin achapa Asa chu ama banin Lengin ahung pangin, hiti chun gamsunga chun kum som sung chamna le lungmonna anaum'in ahi. 2 Asa chun Pakai a Pathen mitmun alunglhaina ding leh thilpha jeng abol'in ahi. 3 Aman gamchom miho maicham phung le Asherah doikhom ho aphuhlhun aladoh sohkeijin ahi. 4 Aman Judah ten Pakai ahol uva apu apa teu Pakai Pathen chule adan ho leh athupeh a anunna diuvin thu apetan ahi. 5 Asa chun Judah khopi jousea doikhom leh gimnamtui ahal nau maicham phungho jong chu aladoh sohkei tan ahi. 6 Chuche chamna kum sungchun Judah gamsung pumpia khopiho kul thopal ana gendoh jouvin ahi. Hiche phatsung hin ama dounan koima chan gal anabol poi, ajeh chu Pakaijin agal miho a konna akicholdo sah ahi.

7 Asa chun Judah mite chu aseipeh’in, “Khopi ho sau hitin chule bang insang kotpi le thihkhao tothon kulpi gen uhite. Gam hi eihoa ahi jenge, ajeh chu eihon Pakai I-Pathen'u chu ina holjing uva chule aman akimvel jousea hi chamna eina peh u ahi,” ati. Hiti chun ama hon hiche tohgon ho chu ana chepiuvin atongdoh sohkei tauvin ahi.

8 Asa chun tengcha le kidalna pho mangcha Judah phunga kon sepai hangsan 300,000 aneijin ahi. Chujongleh Benjamin phunga kon'in, kidalna pho neoloi le thalpi mangcha a sepai gal-hang 280,000 aneijin, sepai hon ani gella chu galsat jedan phatecha kihil them mi ahiuve.

9 Khatvei chu Ethiopia mi Zerah kiti pa chun sepai mi 1,000,000, chule sakol kangtalai 300 chun Judah te chu ahin nokhum'un ahi. Amaho chun Mareshah khopi chan ahin dellut un 10 chuin Asa chun asepai te chu galsat din sahlam Mareshah phaicham'a chun akoi tan ahi. 11 Chutah chun Asa chun Pakai, Pathen henga atao in, “O Pakai nang tailou koima khatcha hiche thaneilou keima hin thaneitah gal mite douna eikithopi jou ding aumpoi, nei panpi uvin! O Pakai, ka Pathen'u nei kithopi uvin, ijeh-inem itileh nangma jengbou ka tahsan’u nahi. Hiche nangma min'a chu hiche simjoulou dou dinga hung kondoh a kahiuve, O Pakai nangma ka Pathen’u nahin, hiche mihem ho hi nang sangin chungnun sah hih hellin,” ati.

12 Chuti chun Asa le Judah sepai ho masanga Pakaijin Ethiopia mite gal ajopeh in, gal mite chu ajam tauvin ahi. 13 Asa le asepai te chun Gerar chan chu aga dellun, chule hiti chun Ethiopia mite tamtah chun kinung thodoh jou kit dingin akigel tapouve. Amaho chu Pakai le a sepai ten asumangun chuin Judah te Sepai ho chun thilkeo tampi ahin kipoh doh tauvin ahi.

14 Amaho Gerar a aum sungu chun chuche gamkai a khopi ho chu anokhum un ahile Pakai a kon achung uva kichat tijat a chu in, ama hon hiche kho jouse chu achomun ahi. Ajeh chu hiche lai mun a chu mi thil lah ding atam'a tam uma ahi. 15 Ama hon gancha chingho gebuh jong chu anokhum uvin, kelngoi hon kelcha le sangongsao hon ho chu ahin kipuidoh uvin, chuin amaho chu Jerusalem'a ahung kinungle tauvin ahi.