1 Israel gamsunga Jeroboam leng chan kal kum som le get lhin kumin, Abijah chun Judah gamsunga vai ahin hom panin ahi. 2 Aman Jerusalem a kum thum lengvai ahinpon, anu chu Gebiah mi Uriel chanu Maacah ahi.

Chuin Abijah le Jeroboam kah a gal asohdoh tan ahi. 3 Judah te lengpa Abijah chun gal-hang mi 400,000 alhengin, akhom tupmin alamkaiyin; alangkhatna Jeroboam chun Israel gamsunga kon'in sepai 800,000 akhom doh kit in ahi.

4 Judah sepai ho chu Ephraim thinglhang gam ahung lhun phat uchun, Abijah chu Zemorin molchunga adingin Jeroboam le Israel te chu asam in: “Neihin ngaipeh temun! 5 Pakai Israel te Pathen'in David toh kitepna asema ama le achilhah te Israel laltouna atonsotna dinga apeh chu nagel doh lou u hitam? 6 Ahivangin David chapa Solomon lhacha a pang mai-mai Nabet chapa Jeroboam chun apupa adouvin ahi. 7 Chujongleh migilou pumpi chun ama ajopmun, Solomon chapa Rehoboam chapangcha le hetna thepna neiloulai chu athu ngai louvin ding doh theilou khopmin ana lhauvin ahi.

8 “Chule tun David chilhah te khut a um Pakai lenggam dou dingin tohgon nasem kit uvin, nang hon sepai tampi leh Jeroboam in na pathen diuva asem sana Bongnou lim chu nanei maithei u ahinai. 9 Hijongleh nang hon Pakai thempu Levi te chu na delmang tauve (Aaron chilhah) chule pathen neilou namdang ho bangin nang hon nangho ding thempu nakilhen uvin ahi. Tulaijin nang hon mi pou-pou thempun na pansah tauve. Koi hijongleh bongla khat le kelngoi sagi hiche alim semthu na pathen hou kom'a hin pedoh tapou chu thempua na pansah jiu ahi!

10 “Hinlah keiho dinga vang Pakai chu ka Pathen’u ahi, chule keihon ama chu ka dalha pouve. Pakai lhacha a pang thempu ho chu Aaron chapa te bou ahiuvin, Levi ten akithopi jiu ahi. 11 Amaho seh jingkah nilhah seh in Pakai angsunga pumgo thilto le gimnamtui hal abolji uvin ahi. Nilhah seh le dokhang theng chunga chun changlhah agoldoh jiuvin, chule sana thaomei chunga chun thaomei ho avah jiuvin ahi. Keihon Pakai ka Pathen thuhil kajui jingun, ahinlah nang hon ama chu nalha tauve. 12 Chuti chun veuvin Pathen chun eiumpi uve. Ama hi ka lamkai pau ahi, Ama thempu hon asumkon’u amut uva galmun'a nangho douna a eilamkaiju ahi. Vo Israel mite, Pakai napu napa teu dounan galsat hih un, ajeh chu na lolhin lou diu ahi!” ati.

13 Hiche kahlah achun, Jeroboam chun guhthim chan asepai te phabap khat chu, Judah te nung lama konna umkim vella changlhi din asol’in ahi. 14 Judah te chun anung ama a konna ahung kino khumu chu ahetdoh phat uchun, akithopi diuvin Pakai kom'a atao uvin, chuin thempu hon sumkon amut un, 15 chule Judah mite chun kho asampan tauvin ahi. Agalsat khosap ogin husan uchun Pathen'in Jeroboam chu ajopeh un chule Israel te Abijah le Judah te sepaiho masanga chun adelmang tan ahi.

16 Israel sepai ho chu Judah te masanga kon'in ajammang un, chuin Pathen'in Judah te chu Israel mite khut akon ahuhdoh tan ahi. 17 Abijah le sepai te chun amaho chu nasatah in atongkha uvin, hiche ni chun Israel te sepai athem cheh mi 500,000 athi in ahi. 18 Hiti chun hiche thilsoh chunga hin Judah ten Israel te ajou un ahi, ajeh chu amahon Pakai, apu apa teu Pathen chu atahsan'un ahi. 19 Abijah le asepai te chun Jeroboam sepai ho chu aga nungdel peh-un, khopi phabep Bethel, Jeshanah le Ephron jaonan chule akimvella khoneo ho chu aga la tauvin ahi.

20 Chuti chun Abijah dam sungin Jeroboam chu athaneina akinung ledoh kit tapon, chule achaina lam'a Pakaijin ajeplhun athi tan ahi. 21 Ahinlah, Abijah thaneina vang chu akhangtou jingin ahi. Abijah chun ji som le li aneijin; chule chapa somni le ni le chanu som le gup aneijin ahi.

22 Abijah leng vaipoh sunga thilsoh dang ho leh,athusei ho leh athibol ho jouse chu Iddo Themgao Hilchetbu a chun akijih lut sohkeijin ahi.