1 Ahinlah Rehoboam chun dettah a lengam atundoh a chule thanei tah ahung hijou phat chun ama le mipite jouse chun Pakai dan thu chu anungsun tauvin ahi. 2 Pakaiya dinga kitahna anei tahlou jeh uchun Rehoboam Leng chan kal kum nga lhin kum chun, Egypt lengpa Shishak chun Jerusalem ahin bulu tan ahi . 3 Sakol kangtalai 1,200 toh sakol 60,000, chule Libya mite, sukmite chule Ethiopia mite jaonan keng sepai sim joulou chun ahung konun ahi. 4 Shishak chun kulpi kigen Judah khopi ho chu alonkhum in, chuin Jerusalem lam chan gei chun amano kitnun aga bulu uvin ahi.

5 Chuin Shemaiah themgao pa chu Rehoboam le Judah te lamkai ho, Shishak kichat jeh a kikhom ho kom'a chun ahungin ahi. “Pakaijin hiti hin aseije: Nang hon keima nei nungsun tah jeh uva chu keiman jong tua hi nangho hi Shishak kom'a ka dalhah nahi tauve,” ati.

6 Chuin Israel milen ho leh lengpa chu ahung kineosah un, “Pakaijin ichung uva abol hiche hi adih e!” atiuvin ahi.

7 Pakaijin amaho ahung kineosah u amu phat in, Shemaiah kom'a thu hiche hi aseije: “Amaho ahung kineosah tah jeh uchun ka suhmang lou diu ahitai, hiti ahijeh chun gangtah a ahuhdoh diu kahin solpeh diu ahi. Keiman Shishak mangcha’a Jerusalem chunga kalungsatna kabuh lhah louhel ding ahitai. 8 Ahinlah amaho chun keima kin abol'u toh leiset vaipoho kin abol uchu akibah louna ahin het diu ahi,” ati.

9 Egypt lengpa Shishak chun Jerusalem abulua chu Pakai Hou-In thil ho jouse le leng inpi a thil ho chu ana kipoh mang ahitai. Aman Solomon in sana a asem kidalna pho jaona thil ho jouse chu ana kilah doh gam ahitai. ✡1 Lgt 10:16,17; 2 Thusimbu 9:15,16 10 Rehoboam lengpa chun leng inpi lutna kotngah ho, sepai lamkai ho chu sana a kisem kidalna pho khel'a sum-enga pho,asem dingun anganse tan ahi. 11 Pakai Hou-In a lengpa ache phat le ama ngah a pang ho chun kidalna pho achoi jiuva kilhon khom jiuva, chule amaho umna in chan a chu hung kile lhon kitji ahiuve. 12 Rehoboam ama cham'a ahung kineosah tahjeh chun Pakai lunghanna chu ama a kon'in akihei mang tan, hijeh chun ama chu akisumang hel tapoi. Atahbeh a sei ding chun Judah gamsunga thilpha khat ahung umdoh tan ahi.

13 Leng Rehoboam chu ama le ama Jerusalem a akitung det kit in, chuin aleng hina abanjom kittan ahi. Lenga ahung pan chun ama tahsa kum chu kum somli le khat ana hin, Pakaijin amin loupi koina dinga Israel phung jouse lah a ana lhentum Jerusalem khopi achun kum som le sagi vai ana homin ahi. Anu chu Amon mi Naamah kitinu chu ahi. 14 Ahinlah alungthim pumpia Pakai ahol lou jeh chun Rehoboam chu leng phalou tah khat ana hin ahi.

15 Rehoboam vaipoh tilla patna achaina chan geija thilsoh adang ho chu Themgao Shemiah Lekhabu le Mitva Neipa Iddo Lekhabu, achun akisun lut sohkeijin ahi. 16 Rehoboam athi phat chun David khopia chun akivui tai. Chuin achapa Abijah chu ama bantah in leng ahung hitan ahi.