1 Rehoboam chu Jerusalem ahunglhun phat chun Judah phung le Benjamin phunga kon'in Israel douna ama lenggam tundoh kitna din mi akhomin, galsat ding Sepai 180,000 alheng doh in ahi.

2 Ahinlah Pakai chun Pathen mipa Shemiah jah a chun aseijin, 3 “Solomon chapa Rehoboam Judah te Lengpa chule Judah le Benjamin gam'a Israel mite jouse jah a chun seipeh in: 4 Pakaijin hiti hin aseije, 'Na inkote dounan galsat hihbeh in, inlama kinunglen ajeh chu thilsoh ho hi keima bol ahi bouve,'” ati. Hiti chun ama hon Pakai thusei chun anung'un Jeroboam dounan gal abol tapouve.

5 Rehoboam chu Jerusalem'a aumden in, Judah te ventupna dingin khopi jouse chu kulpi akai tan ahi. 6 Aman Bethlehem, Etan, Tekoa, 7 Beth-zur, Soco, Adullam, 8 Gath, Mareshah, Ziph, 9 Adorium, Lachish, Azekah, 10 Zorah, Aijalon le Hebron asadoh in ahi. Hiche khopi ho hi Judah le Benjamin gamsunga kulpi akaiho ahitai. 11 Rehoboam chun akiven nau lampang hou chu asuhat in, chule asunga chun gal lamkai ding atousah in chuleh anneh twidon, olive thaotwi le lengpitwi thil ho ninglhing tah in akoipeh in ahi. 12 Chujongleh aban joma kiven tup theina dingin kidalna pho le tengcha ho jong, hiche khopi ho sunga chun akoiyin ahi. Chuti chun Judah le Benjamin gamsung chu ventupna noiya aumin ahi.

13 Ahinlah sahlam gamkai’a Israel phung ho lah a cheng thempu ho leh Levi te chun abon chauvin Rehoboam alangkaipi uvin ahi. 14 Levi te chun akelngoi chin nau hamhing gam anei agou jengu jong ahin dalha uvin, Judah gam le Jerusalem lama ahung chaodoh un ahi; ajeh chu Jeroboam le achateu chun thempu ahinauva Pakai kin abol diu ajahda peh u ahi. 15 Jeroboam chun doiphung le ama hon ahou u, kelcha le bongnou limsemthu ho jen le ding chun atumin thempu akilhenun ahi. 16 Israel phung ho lah a lungthengsel'a Pakai, Israel Pathen hounom jouse chun Jerusalem'a dingin Levi te chu ajui tauvin, chuleh hiche lai mun achun apu apa teu Pakai, Pathen kom'a thilto abolthei u ahi. ✡1 Lgt 12:31 17 Hiche hin Judah lenggam ahatsah ben, chule kum thum sung chu Solomon chapa Rehoboam chu akithopi uvin, David le Solomon chon bang chun kitah tah in ajui tauvin ahi.

18 Rehoboam chun David chapa Jerimoth chanu Mahalath akichenpi in ahi. Amanu hi Jesse chapa Eleah chanu Abihail chanu ahi. 19 Mahalath chun chapa thum Jeush, Shamariah le Zaham ahingin ahi.

20 Chujouvin Rehoboam chun Absalom chanu maacah akichen pin, Macaah chun Abijah , Attai, Ziza le Shelomith ahingin ahi. 21 Rehoboam chun ajite leh athaikem holah a chun Maacah chu alungset penin ahi. Rehoboam chun ji som le get athaikum somgup aneijin, amaho chun chapa somni le get le chanu som gup ahing uve.

22 Rehoboam chun Maacah chapa Abijah chu Leng chapa te lah a alamkai diuvin apansah in, hiche hin kichentah agon chu ahileh ama chu abana leng ding tina ahi. 23 Rehoboam chun achapa dang ho jong chu mopohna apen, Judah leh Benjamin gamsung pumpia kulpi kikai khopi ho achun atousah in ahi. Amaho chu hongphal tah in neh le chah apen chule aji diu jong tamtah apuipeh in ahi.