29
Hezekiah In Judah gam'a Vai Ahom
1 Hezekiah hi kum somni le nga alhinkum chun Judah a leng ahung changin, kum somni le ko sungin Jerusalem'ah vai ana hom'e. Anu hi Zachariah chanu Abijah anahi. 2 Ama hin apa David in anabol bang bangin Pathen deilam ngen ana bol'in ahi.
Hezekiah In Hou-In Athah Hondoh
3 Avaihom kum amasapen leh lha masapenin aman Pakai In chu akot ho jouse ahongin abonin asemphan ahi. 4 Aman thempu ho leh Levi ho jouse chu Hou-In solang hongcha achun akhom'e. 5 Amaho kom'a chun hitin aseije, “Kasei hi ngaijun, nangho Levi te! Tun nangho le nangho kisuthengun chujouleh napu napa teu Pakai Pathen Hou-In suthengun. Thil thenglou jouse chu Hou-In'a kon'in paidoh un. 6 Ajeh chu ipu ipa teuvin Pakai I-Pathen'u mitmun thilse jeng ana bol'un achonkhel tauvin ahi. Pathen anungsun'un Pathen chenna a kon'in amai aheimang tauvin ahi. 7 Ama hon Hou-In kot akhah un thaomeiho amutlih un, chuleh Israel Pathen Hou-In'ah pumgo thilto abol tapouvin gimnamtui jong ahal tapouvin ahi.
8 Hitia hi ana chon tahjeh un Pakai hi Judah nam leh Jerusalem chungah ana lunghangin ahi. Achung uva ichan geiya na anatoh hitam, hiche hin mijouse ana lungdon sah in akichat sahtan ahi. Hiche hi nang hon nahe sohkei uve. 9 Ipateu gal'a ana that un, ijiteu leh ichateu gal hingin ana kaimangun ahi. 10 Tuhin keiman Pakai, Israel Pathen kom'a hin kitepna khat kasem nom'e chutileh ama eiho chungah lunghang taponte. 11 Ka chapate, hiche hi nahsah mon koihih un! Ajeh chu Pakaijin nangho hi a anga ding jinga ama lungdei lam bolding leh akin tong dinga chuleh gimnamtui halnam dinga nalhen u ahi,” ati.
12 Hichun Levi te ahung kipatdoh tauve:
Kohath phungkhai a konin: Amasai chapa Mahath leh Azariah chapa Joel ahi.
Merari phungkhai a konin: Abdi chapa Kish leh Jehallelel chapa Azariah ahi.
Gershon phungkhai a konin: Zimmah chapa Joah leh Joah chapa Eden ahi.
13 Elizaphan insung'a konin: Shimri leh Jeiel ahi.
Asaph insung'a konin: Zechariah leh Mattaniah ahi.
14 Heman insung'a konin: Jehiel leh Shimei ahi.
Jeduthun insung'a konin: Shemaiah leh Uzziel ahi.
15 Hiti chun amaho insung chu akikhom'un amaho leh amaho akisutheng'un lengpa thupeh leh Pakai dei dungjuijin achonun Pakai Hou-In chu asutheng'un ahi. 16 Hichun thempu ho chu Pakai Hou-In sung langa chun alut un asuthengun, chuleh Pakai hongcha chan geijin aboh jouse apodoh uvin ahi. Chu a konin Levi ten Kidron phaicham'ah apodoh un ahi.
17 Natoh chu lhamasa a nikho maspen nikho a chu anapat u ahi, niget nin ana tongchai sohkeiyun ahi. Hichea hin Hou-In'a lutna dan sung jong achai tauvin hichejou chun niget abol beuvin hiche lha sung ni som le gup chan geijin abol'un Hou-In chu houkhomna thei aso tauvin ahi.
Hou-In Kithah Thenso
18 Levi te chun lengpa Hezekiah kom'ah hitin thu alhut un ahi: “Keihon hou dan dungjuiya thenna kin chu Hou-In pumpi ahin, pumgo thiltona maicham phung geijin, chuleh Changlhah Kisemna dokhang leh amanchah ho pum'in kahin sutheng tauve, ” atiuvin ahi. 19 Hiche chung chon chun Ahaz lengpan Pathen doumah abol sunga ana paidoh thilkeo ho jong chu kahin chomkhom'un kasutheng'un manchah thei dingin Pakai maicham masang'ah kakoi tauve,” atiuve.
20 Ajing jingkah matah in Lengpa Hezekiah in khopi sunga lamkaiho jouse akoukhom in Pakai Hou-In langa ache tauve. 21 Lengte insung leh Judah mipite chonsetna suhthengna ding leh Hou-In suhthengna dingin ama hon bongchal sagi, kelngoi sagi chuleh kelchal sagi hicheng hi Aaron chilhah te thempu hon maicham a pumgo thilto a atodoh diuvin aseipeh in ahi.
22 Thempu hon bongchal chu athat masauvin abanin kelngoi chal ho abanin kelngoi ho athat un akitohdoh gancha thisan ho chu maicham chunga atheuvin ahi 23 Kelchal chu lengpa kom leh taona mangho kom'a chun akailutnun ama hon gancha ho chunga chun akhut angam'un ahi. 24 Hijou chun thempu hon kelchal ho chu athat un athisan chun mipite chonsetna apohmang na dinga kitohdoh hi dingin maicham chunga chun atheuvin ahi.
25 Nathan themgao leh lengpa themgao Gad in Pathen’a konna leng David thu ana poh chu Hezekiah lengpa hin phatah in ana juijin ahi. Aman Levi te chu selangdah leh tumging ana kichoi sah in Hou-In'ah pan ana lahsah in ahi. 26 Hiche atumgingu manchah chu leng David in ana choi tobang bang chu ahin, thempu ho jong sumkon kichoi pum'in adingun ahi.
27 Hezekiah in pumgo thilto chu pat dinga thu ahinpeh phat in thilpeh chu ahung kipan tan chuleh mipi chun Pakai thangvahna la asauvin, tumging saithem ho chun sumkon mut toh aging thei jouse ahin sugingun ahi. 28 Mipi aum jouse chu Pathen houna a chun apangun ahi; chuleh pumgo thilto ho chu akah lhah jou kahsen tumging leh la kisa ho chu achelha jingin ahi. 29 Hijou teng chuleh Hezekiah lengpa leh mipi jouse chun adilsu uvin Pathen chibai aboh un ahi. 30 Lengpa Hezekiah leh migun hon themgao Asaph leh David in anasem thangvahna la chu Levi ten asah diuvin thu ana peuvin ahi. Amaho adilsu uvin Pathen chibai aboh un thangvah la chu kipah tah in asauvin ahi.
31 Hezekiah chun aphongdoh in, “Tua hi nangho dan dungjuiya thenga nahi tauvin, hijeh chun Pakai thangvahna in pumgo thilto ding hi tohdoh tauvin,” atin ahi. Ama hon sei angaijun mi phabep chun acham chamin pumgo thilto dingin aganchau ahin kaijun ahi. 32 Mipi hon bongchal 70, kelngoichal 100, leh kelngoi 200 Pakaiya pumgo thilto a dingin ahin tohdoh un ahi. 33 Ama hon Bongchal 600 leh kelngoichal 3000 mipi ho neh dingin atohdoh un ahi.
34 Hiche gancha ho that dingin thempuho alhahsam jeh in natoh chu akichai tokah in Levi ten ana kithopi uvin ahi. Hijou chun thempuho chu ana kithenso beuvin ahi. Levi ho chu thempuho sangin kisuhthengna lam'a chun ana gunchu jo uvin ahi. 35 Pumgo thilto hijat ban a jong hin chamna thilto sathao jong ahi nalaijin, chuleh donthei thilto ho pumgo thilto a manchah ding jong ahi nalaijin ahi.
Hiti hin Pakai Hou-In sunga akin bol ding jouse chu akisutoh sohkei tan. 36 Hiti chun Hezekiah lengpa leh amite chu akipah lheh jengun, ajeh chu Pathen kithopina jallin toh ding jouse chu gangtah in achai tauvin ahi.
DRAFT COPY