30
Kalchuh Kut Adia Kigotna
1 Hezekiah in Israel leh Judah te jouse chu thu athotnin, chuleh Ephraim leh Manasseh te jong lekha athotnin Jerusalem'a Pakai Hou-In'a ahung na diu leh Israel te Pakai Kalchuh Kut mang dingin akouvin ahi. ✡Minbu 9:9-11 2 Ajeh chu lengpa leh alamkai ho jouse chuleh Jerusalem khoppi a mipi ho jouse chu lhani channa tengleh Kalchuh Kut mang dingin akinopto tauvin ahi. 3 Ama hon ahi ding bangin ana mang thei pouvin ahi, chuleh thempu ho jong ama le ama kithensona a ana lhingjou pouvin ahi. Chuleh mipi jong Jerusalem'ah ana kikhom kim thei pouvin ahi.
4 Hiche thu hin lengpa leh khoppi chu akipa sah lheh jengun ahi. 5 Hiti chun ama hon Beersheba a patna lhang lam'a Dan geija Israel pumpi Jerusalem'a ahung kikhop uva Pakai Israel Pathen anga sottah ahi ding banga ana manjou tah louvu Kalchuh Kut manna dingin aphongdoh tauvin ahi.
6 Hijou chun Judah leh Israel gam pumpia mikou ding asol'un lengpa le lamkai ho a kon'in lekhathot achoijun lengpa thupeh chu asim phongun:
“Vo Israel chate ho, Abraham Isaac le Israel Pakai, Pathen a hung kile kit tauvin chutengleh Assyria lenghoa konna hung jamdoh amoh cheng nangho kom'a Pakai jong hung kile kit ding ahi. 7 Pakai, Pathen doumah a chon napu napa teu bangin chon hih un, nang hon nahet bangun Pathen'in amaho chu nasatah in a engbol'un ahi. 8 Amaho bangin louchal hih un, Pakai thu chu nitjo uvin. Jerusalem'a Pakai Hou-In'a hungun, hichu na Pakai na Pathen uvin a imatih channa dinga asuhtheng ahi. Hungun lang chibai hungboh un chutileh nachung uvah lunghang taponte.
9 “Pakai kom'a nahung kileuva ahileh, na sopite hou gal-hinga man ho chun lungsetna le khotona hin nei untin a inlang uva ahin kile sah diu ahi. Pakai na Pathen'u hi mikhoto them ahi nahung kinungleu leh aman nahin sah diu ahi,” ati.
Kalchuh Kut Kimanna
10 Hiche thupole ho chu Ephraim leh Manasseh phungho chenna gamhoa acheuvin chuleh sahlang Zebulun phungho chenna gam geijin acheuvin ahinla ama hon ana nuisat un ana house uvin ahi. 11 Ahijeng vang'in, Asher, Manasseh le Zebulun phunghoa kon'in mi phabep Jerusalem'ah ahungun ahi.
12 Pathen'in Judah mite lah a na ana tongin ana kipumkhat sah un ahi. Ajeh chu ama hon lengpa leh anoija lamkaiho thu angaijun Pathen lungdei bol dingin lunggel dettah in aneiyun ahi. 13 Lhani channa in mi tamtah Jerusalem'ah ahung kikhom'un cholsolou Changlhah Kut chu amangun ahi. 14 Ama hon Jerusalem'a pumgo thiltona le gimnamtui lhutnam a ana kimang maicham ho chu aladoh un Kidron Phaicham'ah aga lehmangun ahi.
15 Hijou chun lhani channa a ni som le li nikho chun Kalchuh Kut a dingin kelngoi athat un ahi. Thempu ho leh Levi te chu dan dungjuiya ana kisuhtheng lou jeh un ajahcha uvin hijeh chun Pakaiyah amaho le amaho aga kisutheng un ahileh Hou-In'a pumgo thilto kibolna a akimangcha thei tauvin ahi. 16 Aman Pathen mipa Mose dan thupeh dungjuijin ama-ama panmun cheh akilo tauvin ahi. Levi ten gancha kitohdoh thisan chu thempuho khut a apeuvin ama hon hichu maicham chungah atheuvin ahi.
17 Mi atamjo chu dan jungjuiya athenlou jeh un Kalchuh Kut a chun kelngoi athat thei pouvin ahi. Hijeh chun Levi ten amaho khel'in athapeh un kelngoi ho chu Pakaiyah atohdoh un ahi. 18 Ephraim Manasseh, Issachar leh Zebulun phunghoa konna hung atamjo chun dan dungjuiya kisuhthengna chu abol pouve. Ahin Hezekiah Lengpa chun amaho ding chun taona amanpeh in, Dan toh kitohlou hijongleh hiche jal chun Kalchuh an chu aneuvin ahi. Hijeh chun Hezekiah in aseijin, “Pakai, na phatna jallin 19 kin a dinga thengsel hih jongleu, Pakai, apu apa teu Pathen chun, nanung jui dia thulhuh sem ho hi ngaidam'in,” ati. 20 Pakaijin Hezekiah taona asangin mipi ho chu asudam tan ahi.
21 Nisagi sungin mipi ho chu Jerusalem'ah akikhomun Cholsolou Changlhah Kut chu kipahtah le thanom tah in abol'un ani anin Levi te le thempu ho chun lungna chimtah in Pakai athangvah un ahi. 22 Hezekiah in Levi te chu Pakai chibai bohna a alamkai thep jeh un apahcha uvin ahi. Nisagi sunga apu apa teu Pakai Pathen thangvahna a kitohdoh maicham apeuvin ahi.
23 Ama hon abonchauvin nisagi lopbe kit dingin anom sohkeiyun, hiti chun kipah tah in alopbe kit un ahi. 24 Hezekiah lengpan bongchal 1,000, kelngoichal 7,000, mipi hon akithauva aneh diuvin atohdoh in, chuleh lamkai hon bongchal 1,000 leh kelngoichal 10,000 mipi ho din atohdoh un, hiti chun thempu tamtah in dan dungjuijin kithensona aneiyun ahi.
25 Judah mipite leh thempu ho, Levi te, leh Israel a konna hung gamdang miho, chuleh Judah a cheng denjing ho abonchauvin akipah sohkeiyun ahi. 26 Jerusalem khopi chu kipana adimset jengin ahi, ajeh chu David chapa Solomon lengpa nikho laiya pat hitobang hi amukhah lou u ahitai. 27 Chuti chun thempu ho leh Levi te chun mipi phatthei aboh un, chule Pathen'in atao nau chu achenna van theng'a konin ajahpeh un ahi.
DRAFT COPY