1 Hiche kut hi akichai jouvin Israel mipite chu Judah khopi jousea acheuvin song khomho, Asherah semthu pathen limho akhense uvin chuleh namdang pathen houna maicham ho jouse asuse sohkeiyun ahi. Ama hon Judah gamsung jouse leh, Benjamin, Ephraim chuleh Manasseh gamsung jousea hiti chun abol sohkeiyun ahi.

2 Hezekiah lengpan thempu ho leh Levi te kimanchah ding dan athahsem kit in hichea hi apanmun'u dungjui cheh a atoh diu toh umtha cheh ahi. Thempu ho leh Levi hon pumgo thilto ato diu, chamna thilto a tohdiu, Hou-In'a Pathen houkhom na a pan alahdiu dan leh, kipana le thangvah chuleh Hou-In'a jat chom-chom'a atoh ding dan hou aboncha ahopsoh ahi 3 Lengpan ama nei le ama thil ho a konna kipehna, pumgo thilto dinga apehdoh ding ho, jingkah nilhah a pumgo thilto ding ahin, Sabbath nikho ho a pumgo thilto ato ding ahin, lhathah nikho a toding ahin, aphat tepsa kut dinga thilto atoding ahin, hitia hi Pakai danthu lekhabu kisun banga chu toding jouse chu atodoh jeng ahi. ✡Minbu 28:1—29:39 4 Hiche ban'a hin, lengpan Jerusalem'a chengho kom'ah thempu ho leh Levi hon dan dungjuiya Pakai kin tohna a akipumpeh theina diuva panhuna thilpeh apeh diuvin thupeh aneijin ahi. ✡Minbu 18:12,13,21

5 Hiche thupeh hi akiphondoh jouvin Israel chaten chang gamasa, lengpithei ju, leh khoiju chuleh alousoh jouseu thil jousea konna hopsom toh bulhingset in ahin choijun ahi. 6 Israel te leh Judah te Judah khopiho a cheng hon bongchal ho leh kelngoichal ho hopsom chuleh Pakai a Pathen diuva thil thenga atodoh hou atam'a tam ahin choijun ahi 7 Kipehna a thilpeh ho lhathum channa a patnin ahunglut panin akit lhali channa geijin ahung lutbe jing jenge tamtah akiset tho jengin ahi 8 Hezekiah lengpa leh anoija natong lamkai hon ijatgei hunglut ham ti amuchen un ahileh Pakai athangvah un chuleh amipi teu jong apahcha uvin ahi.

9 Lengpan thempu ho leh Levi te kom'a chun hiche kiphal dohna thilpeh ho thu hi anaseijin ahi.

10 Chuleh Thempulen Azariah leh Zadok chilhah ho chun ama kom'ah anaseijun “Mipi hon hitobang a kiphaldohna thilpeh ho Hou-In'a ahin pehlut jeh un neh le chah anengin aval leuvin ahi. Hiti ho hi Pakaijin amipite phatthei aboh jeh u ahi,” atiuve.

11 Lengpa thupeh dungjuijin ama hon Hou-In'ah thil koina ana gongtoh un ahi. 12 Hiti chun ama hon kipehna thil ho leh hopsom ho chu abitkeina ding mun'ah ana koitup un ahi. Ama hon Levi mi Cononiah chu hiche vesui dingin ana nganse uvin asopipa Shimei hi ama kithopi din apansah un ahi. 13 Levi te mi som amani noija natong dingin apansah un ahi, Jehiel, Azaziah, Nahath, Asahel, Jerimoth, Jozabad, Eliel, Ismakiah, Mahath, le Benaiah ahiuve. Hitobang tohgon ho hi lengpa Hezekiah leh thempulen Azariah thaneina noija kitungdoh ahi.

14 Levi mi Imnah chapa Kore chu Hou-In kelkot solang panga vengtup pipuipen ahin, ama hin kipehna thilpeh Pakaiya kipeho chu alatup leh ahomdoh a pang ahi. 15 Thempuho chenna khopi dung ho a chun ama chu Levi mi hicheng hin ana kithopi uvin ahi; Eden, Miniamin, Jeshua, Shemaiah, Amariah leh Shecaniah ahiuve. Amaho hin asopiu Levi ho chu anatoh u dungjui cheh in kibang cheh in ana homdoh jiuvin ahi. 16 Phung le chang dungjuiya hilouvin, ama hon pasal ho chu kum thum lhing le achunga ho chu Hou-In'a amopoh nau dungjuijin achan diu ahoppeh un ahi. 17 Thempu ho chun aphung dungjuijin toh ding apeuvin chuleh Levi ho chu kum 20 lhing leh atahjo ho chu anatoh dungjuijin ngansena aneiyun ahi. 18 Amaho chu ajiteu leh achateu chuleh a incheng hou dungjuijin amin u akijihlut in ahi ajeh chu amaho hin itih phat hijongleh a kinthengu tohna akimanchah theina diuva tohgon hija ahi.

19 Khopi a cheng thempu ho lah a kinganse Aaron chilhah ho ahilouleh hiche khopia chengho thinglhang gam'a umho ahin hiche holah a mopohna neiho hin thempu insunga pasal ho leh Levi phungmi amin kijihlut ho jouse kom'ah neh le chah hom'in apangun ahi.

20 Hiti hin, Hezekiah lengpan Judah ho jouse kom'ah Pakai a Pathen mitmua adih jeng abol'in Pathen alung lhaisah in ahi 21 Ama hi atohna jouse alolhingin ahi. Ajeh chu aman Hou-In chung changa atoh ahin chuleh mipin dan ajuija na diuva atoh ahin Pathen’a kitah nanei tah a atoh jeh ahi.