1 Israel te chu Egypt a patna ahung kichon doh jou kum khat ahung lhin chun Sinai lhang a gamthip lah a chun Pakaiyin Mose kom'a thu ahin seiye. Chuche kum'a lha masapen achun aseijin, ✡Potdohbu 12:1-13 2 “Kalchuh Kut kimanna ding phat kitepna a hi aman ding uvin Israel mite chu seipeh tan , 3 hichu lha masapen nisom le nili lhinna a khojin chip chep phat hi ding ahi. Hiche kipa thanop kibol ding dan thupeh ho leh dan umho phate a najui sah ding ahi.” 4 Mose’n jong mipi henga Kalchuh Kut kipa golnop abol ding uvin aseipeh tan 5 Sinai lhang gamthip lah a nisom le nili lhinna khojin chip chep hi ding ahi. Chule Pathen'in Mose athupeh bang bang chun ama hon jong kipa golnop chu abol tauvin ahi. 6 Ahinlah amaho lah a mi phabep chun mithi long ana thamkhah jeh un, chonna ngai bangin akisuboh a ahitauvin, hiche nikho a Kalchuh Kut kipa golnop a chun alha thei tapouve. Hiche nikho chun Mose leh Aaron kom'a ahungun 7 “Keihon mithi long ka tham khah tah jeh un, chonna ngai banga atheng louva kahi tauve. Hijongleh Israel mipin asem lenga keihon jong Pathen anga maicham kasem mo diu ham?” ahung tiuvin ahi. 8 Mose chun adonbut, “Nangho dinga Pathen a konna hilchahna kamu kah in khongai un” ati. 9 Pakaiyin Mose ahin donbutna chu hiche hi ahi. 10 “Hiche hilchahna ho hi Israel mipi te seipeh in: Tukhang hihen lang khang hunglhung ding ho hijongleh chonna ngai banga akisuboh kha hihen, kholgam a chedoh ho hijongleh Kalchuh Kut kipa golnop a pangthei dingu ahi. 11 Kalchuh Kut kipa golnop kichai lhakhat lhin teng Kalchuh Kut maicham thilto abol dingu ahi, hichu lhani lhinna a nisom le nili lhinna khojin chip chep phat hi ding ahi. Hiche teng chuleh Kalchuh Kut kelngoi sa chu anche kha le cholsolou changlhah toh aneh tha dingu ahi. 12 Ama hon kelngoi chu jingkah khovah geija akoi theilou dingu, chuleh hiche agu jong asuhboh theilou dingu ahiye. Kalchuh Kut kimanna chung changa dan umho hi ajui cheh dingu ahi. ✡Potdohbu 12:46; Jn 19:36 13 “Ahin Israel mi hiya chonna ngaiya aboh jong hilou, kholche a jindoh jong hilou, ahivanga Kalchuh Kut nahsah lou miho chu Israel nampi a konna kah lhah a um ding ahi. Pathen maicham jong aphat tah a ahin todoh louleh achonsetna jal a themmo changa um ding ahiuve. 14 Nangho lah a namdang mi Kalchuh Kut golnop a jaonom aum leh, nit ding leh jui dinga kipe jouse hi anit angaiyin, hiche dan hin Israel nam chilhah a kon hihen lang gamdang chilhah a konna koi hijongleh akan sohkei ding ahi.

15 Houbuh ahin phudoh nikho uchun, meilom in Houbuh chu atom tan ahi. Houbuh chunga meilom nilhah apat jingkah geiya um chu meikong lomtoh abang jengin ahi. 16 Hiche meilom Houbuh chunga um, jan tengleh meikong alom a hung kilahji tobang chun aum jing tan ahi. 17 Houbuh chunga meilom chu akihohdal jiteng, Israel mipi ten hiche amaicham ponbuh chu aphelha jiuvin meibol lom chu ajuiji uvin ahi. Chuleh hiche meilom akingah ngahna achun Israel mipi ten ngahmun akisem kit jiuvin ahi. 18 Hiti chun che dinga Pathen thupeh amu dungjuiyun lam ajot un, ngahmun asa jiuvin ahi. chuleh Houbuh chunga meilom aum chan chun ngahmun dalha louvin aum jiuvin ahi. 19 Hiche meilom chu Houbuh chunga nisot tah aumji teng Israel te chu akichol jiuvin Pathen Houna dinga atoh ding umho chu atong jiuvin ahi. 20 Phat khat khat teng Pathen thupeh dungjuijin meilom chu Houbuh chunga ni chomcha bou akingaji in, amaho jong ni chomcha bou akichol jiuve. Chuteng Pathen thupeh dungjuijin ngahmun chu aphe lhauvin achejom kitji tauvin ahi. 21 Phat chomkhat kit teng meilom chu jan khovah in aum'in jingkah teng akichon doh jin ahi. Ahinlah sun hihen jan hita jongleh hiche meilom chu ahung kihodoh teng ngahmun chu aphelha jiuvin achejom jingji un ahi. 22 Houbuh maicham chunga meilom chu ni ni umhen, lhakhat umhen, ahilouleh kumkhat um jongleh Israel mipite chu ngahmun a chun akichol jing jiuvin apotdoh jipouvin ahi. Amavang meilom chu Houbuh chunga ahung kiho dal teng ngahmun chu aphet un achejom kitji tauvin ahi. 23 Hiti chun Pakai thupeh bangtah in akichol un, akalsong jingun ahi, chule Pathen'in Mose a konin athupeh jouse chu abolkim soh jingun ahi.