10
Dangka Sumkon ho
1 Pakaiyin Mose henga hiti hin aseijin, 2 “Mipi ho koukhomna ding leh ponbuh phetlhahna dinga melchihna a manchah din dangka sehcha a kikhengjol pengkul ni sem doh in. 3 Hiche Pengkul teni chu ahung kimutji teng mipi ho chu Houbuh lutna kotphung a nangma masanga hungkhomji dingu ahi. 4 Ahinlah pengkul khat bou chu ahung kimut tah vang leh lamkai ho bou - Israel phung lamkai jouse atahsa tah uva na masanga hung kilah cheh diu ahi. 5 Nangman hiche gin a chu hetsahna nanei teng Houbuh a kon solam a ngahmun nei phung ho chun angahmun u chu aphet lhah uva malam a chu chejom ding ahiuve. 6 Nangma in hiche gin a hetsahna anivei channa nanei teng lhanglam a ngahmun neihon ajui dingu ahi. Achejom jing dingu hetsahana a chu nangman chomcha a naginsah ding ahi. 7 Ahinlah mipi kikhom khom hen nati teng, pengkul chu awgin chomjep in mut in. 8 Aaron chilhah, thempu ho bou chun pengkul ho amut thei dingu ahiye. Hiche hi nanga dinga akhang akhanga aum den jing ding leh nit jing ding dan chu ahi. 9 “Nangma ho gamsunga na hunglut uva, nangho doujing na melma teho sat dinga na kondoh ding tengu leh pengkul ho kigottupna dia nagin sah diu ahi. Hiche teng chuleh na Pakaiyin nahin geldoh ding, na melmate a konna na huhdoh ding ahi. 10 Na pengkul ho chu kipa thanop phat a jong namut ging ding, kumsunga kipa golnop ho leh lha thah hung kisim pan phat ho a jong namut ging ding ahi. Hiche pengkul ho chu kipana maicham kisem phat hihen, pumgo maicham kibol sih hijongleh hiche maichamho chunga chu namut ging ding ahi. Hiche pengkul ho gin chun na Pathen a na kitepna nahin geldoh sah ding ahi. Keima na Pakai na Pathen chu kahiye.”
Israel ten Sinai adalhah u
11 Kumni jouva Israel te Egypt gam a konna ahungdoh nau alhani channa a nisomni alhinni chun meilom chu kitepna ponbuh akon chun akikhang doh tan ahi. 12 Hijeh chun Israel mipi chun Sinai gamthip lah a kon'in ahungdoh un Paran gamthip lah aphah uva meilom akingah masang sen mun chom chom'ah ana kitolle le un ahi. 13 Mose'n Pakaiya kon hilchahna amu bang tah a Israel mipi ho amasapen a dinga ahung kitol pan u chun, 14 Judah phungin mipi kitol chu alamkaiyun ahi. Aponlap nung uva akitolun, chule alamkai uva chu Amminadab chapa Nahshon ahi. 15 Amaho banjom chu Issachar te ahiuvin, ahin lamkai chu Nathanel kitipa Zuar chapa ahin, 16 chule Zebulun chilhah hon ajom un, Helon chapa Eliab chun ahin lamkaijin ahi. 17 Hichun Houbuh chu aphelha uvin Levi te sunga konna Gershon te le Merari te chun Houbuh apo uvin abanjom in acheuvin ahi. 18 Abanin Reuben te akitol'un, aponlap u nung ajui uve. Shedeur chapa Elizur chun amaho ahin lamkai in ahi. 19 Aban chu Simeon ten ahinjuiyun, amaho Lamkai pa chu Zunishadai chapa Shelumiel ahin, 20 chule Gad phung chu Deuel chapa Eliasaph in ahin lamkaijin ahi. 21 Hiche banjom chu Levi te lah a konna Kohath te ahiuvin Houbuh sunga manchah theng ho jouse ahinpo un ahi. Ngahmun thah a mipi lhun masanga Houbuh chu tundohsaa akoi diu ahi. 22 Hiche banjom'a chun Ephraim te chu ahung kitol uve. Amaho lamkai a hung panga chu Ammihud chapa Elishama ahi. 23 Amaho chu Manasseh phungin ahinjui un, Pedahzur chapa Gamaliel kiti pan ahin lamkai un, 24 chuleh Benjamin phunga mipi chu Gideoni chapa Abidan in ahin lamkaijin ahi. 25 Dan phung mite chu achaina ahiuvin, aponlap u nunga ahung kitolun chule phung jouse nunga angahtup in apang uve. Alamkai pau chu Ammishaddai chapa Ahiezer ahi. 26 Amaho chutoh kilhonin Asher phung mite akitolun Okran chapa Pagiel in alamkaiyun, 27 chuleh Naphtali phung mite jong Enan chapa Ahira in ahin lamkaiyun ahi.
28 Hitia hi agol gol a Israel chilhah te, ama ama kihopkhen dol cheh a hung kitolji ahiuve.
29 Nikhat chu Mose’n ajinu sopipa, Median mipa Reuel chapa Hobab kom'a aseiyin, “Keiho hi Pakaiyin eiteppeh nau lam chu jot jing kahiuve, ajeh chu Pakaiyin ‘ka peh ding nahiuve’ ati ahi. Hungin keihon nangma ngailu tah a kabol diu ahi, ajeh chu Pakaiyin chun Israel dingin kitepna aneijin kidangtah a phatthei aboh ding ahi!” 30 Ahinlah Hobab in adonbut in, “Kanompoi, kache louding ahi. Keima ka gam le ka insung mite henga kile ding kahi,” ati. 31 Mose ataovin, “Lungset tah in nei dalhah hih un,” gamthip a hoilaiya ngahmun kisong ding ham ti nangin nahet ahi. Hungin, nei lamhil uvin.” 32 Kasei nei noppeh leh, Pakaiya kon phattheina kachan jouseu inei khom diu ahi' ati. 33 Pakai molsang adalhah jou uchun nithum sung ana kitol’un, amasang uva Pakai thutep Thingkhong chun hoiya kinga a akichol diu chu avetsah un ahi. 34 Hitia niseh a lam ajot jing lai un, Pakai meibol lom in akhu khum jingun apuile jing uve. 35 Chule thingkong chu akitoldohji teng, Mose’n aw sangtah a, “Kipatdoh tan, O Pakai, na melma te kithe cheh uhen, nangma angsunga kon'in jammang uhen” tia asap ding ahi.✡Labu 68:1 36 Chule thingkong chu akikoi lhah teng, “Simsenlou asang sang umna Israel te henga hung kilekit tan Pakai” tia aman aseikit ding ahi.
DRAFT COPY