1 Phat chomkhat jouvin mipi ho chun hahsat genthei jeh a lunglhai louna ahin phong doh tauvin, chule Pakaiyin aseidoh ho jouseu abonchan ajasohkeiyin ahi. Hiche Pathen lunghanna chu amaho chunga akoujah jengtan, amaho halvam ding meikong asoltan, chule ngahmun polam a um mi phabeppi chu asumang tan ahi. 2 Hichun mite ho chu Mose henga kithopina ngaichan akap un amao tauvin, chuin Mose chun Pathen henga taona anei phat in meikong chu athiptai. 3 Hiche jou chun, hiche lai lhang chu Taberah (Hichu 'mei kouna mun' tina ahi) tin akihetai, ajeh chu Pathen a konna meikong chun amaho lah a mi phabep ahal lhahna mun ahi. 4 Israel mite toh lamjot khom namdang ho chun Egypt gam'a neh le chah ho chu ahin ngaicha tauvin, hichun Israel chate jong ahung kiphin kit tauvin, “Oh, Sa themkhat beh neipe un!” tin a eujah tauvin ahi. 5 “Egypt gamsunga nga aman beija kaneh jiu ka lhangai jun ahi. Chule changmai ho, donkho ho, louthul ho, louthul atil neiho, chule changnam ho kangaicha uve. 6 Ahinlah tuhin ka duchat hou aum tapoi. Phat jousea kamu jingu hiche Manna bou hi ahitai. 7 Manna hi louthul amu neocha cha ho tobang ahin hichu ai-eng tobanga eng dup ahi. ✡Potdohbu 16:31 8 Mipi chun tollhang a hichu akilokhom jiuvin ahi. Amahon hichu asuhbongna thei thil ahilouleh suhdu le kongphal a asubong jiuve. Chuteng ahon uva changlhah pheng ahin sodoh sah jiu ahi. Hiche changlhah pheng chu Olive thao toh kihal a nehthei kisanggep tuitah tobang ahi.✡Potdohbu 16:13-15 9 Manna chu janteng ponbuh chunga chu daitwi toh hung lhahtha ji ahi. 10 Hichun Mose’n mipi ho ama ama ponbuh kotbul’a akiphin nau husa ajan, chule Pakai chu nasatah in alunghang tai. Mose’n jong nopmo asah lheh in ahi. 11 Chuin Mose’n Pakai henga aseijin, “Ipidia nasoh hi hiti lom lom a hi nei gimbol hitam? Ka chunga khotona neijin! Bolkhel ipi kanei a hiche mite pohgih jouse kapoh ding naphal ham? 12 Keiman amaho hi kahindoh sa hiuvem? Hiche vannoiya hi kahin pohlut hiuvem? Minun naosen ajenle banga ipi dia amaho hi kaban a kadople dinga nei seipeh ham? Apu apateu nana pehna gam a chu iti keiman amaho hi ka puilut jou ding ham? 13 Keiman hoilam a hiche mipi ho neh dinga sa kalah ding hitam! Amaho akiphin phin jengun, “Neh ding sa nei peuvin!” atiuve. 14 Keiman hiche mipi ho hi kachangin kajou tapoi! Hiche pohgih hi kapohjou kalval in agihtai! 15 Hitobang tah a hi gimsah ding mong neitileh, kipat inlang nei that doh tan. Neihin khohsah inlang hiche gim genthei ho a kon hin nei hoidoh in!” ati.

16 Hichun Pathen'in Mose kom'a ahin seijin, “Keima angsung a Israel mipi te lamkai leh Upa ho somsagi hin puilut in. Hiche lamkai ho chu Houbuh a nang toh ding khom uhen. 17 Keima hung kumlha ingting kahin houpi ding nahi. Keiman nanga um lhagao phabep khat la ingting amaho chunga hiche lhagao chu ka khumlut peh ding ahi. Ama hon mipi ho pohgih chu apohhu diu, nangin na changa napoh ngai louding ahitai. 18 “Chule mipi ho chu seipeh un, 'Nangho kisutheng un, ajeh chu jing nikho teng nang hon sa neh ding nanei dingu ahitai. Nangho na kiphin un, chuleh Pathen'in naka nau ajatai.' 'Saphe themkhat jeh in Egypt a um kanom jouve! na tiuve' tua hi Pakaiyin nangho nahin peh diu naneh tei dingu ahitai. 19 Hichu nikhat ahilouleh nini tina jong ahi tapon, ni nga, nisom chule nisomni tina jong ahi tapoi, ati. 20 Nanghon lhakhat sunga na chimdeh tokah uva naneh diu ahi. Ajeh chu nang hon nakom uva um jing Pakai na pampai un, chuleh ama kom'a kiphinnan naseiyun, “Idia Egypt gam ihin dalhah mong mong uham” natiuve. 21 Ahin Mose chun Pakai chu adonbut in, “Tua hi mihem sang jagup keima toh um kahiuve, ahin Pakai nangma in 'lhakhat sungse aneh diu kapeh ding ahi! nati.' 22 Ka gancha neihou jouse kithat jongleh mihem hijat chun lung nachim sah nauvin tem? Twikhanglen’a um nga jouse kiman henlang hita jongleh hiche ho jeh a chu lhing mong ding hinam? 23 Hichun Pakaiyin Mose henga thu aseijin, “Ka khut hi atha lhasam aham? Tua hi nangman ka thusei hi atah ahi alhem ahi na hetchen ding ahitai!” ati. 24 Hichun Mose aga potdoh tan Pakaiyin ahenga asei bang chun mipi ho aga hetsah tan ahi. Mose’n Upa ho mi somsagi asukhom in amaho chu Houbuh kimvel'a chun adin sah tan ahi. 25 Chuin meilom lah a kon chun Pakai ahung kumlhan Mose chu akihoulimpi tai. Hichun Upa somsagi ho chu Mose apeh bang bang Lhagao chu amaho jouse chunga apetan ahi. Chule lhagao ho chu mi somsagi ho chunga achuh phat un, gaovin thu aphongdoh tauvin ahi. Ahinlah hiche tobang thil umchan dol chu asohkit tapon ahi. 26 Mipa ni Eldad le Medad chu ngahmun nunglam ah aum lhonin ahi. Amani chu upaho min kijih lutna a ajao lhonin, ahinlah amanin Houbuh chu adalhah lhon lou beh ahitai. Ahijeng vangin amani chunga jong chun Lhagao chu aum tan, hichun amani jong chun gaothu aphongdoh lhon e. 27 Pasal gollhang khat alhaiyin Mose kom'a thu chu agah lhut tan, “Eldad le Medad in ngahmun sunga gaothu aphong doh lhon tai!” ahung ti. 28 Nun chapa Joshua, aneo laiya pat a Mose kithopi a hung pang pa vang chun lunglhai louna aphong doh in “Mose kapu, Eldad le Medad khu suthip tan!” tin aseiye. 29 Ahinlah Mose’n adonbut in, “Keima a ding ngaitona a ipi na thangsetpi ham? Keiman kadei pha kasah vang chu mijouse hi themgao hihen lang chuleh Pakaiyin alhagao chu amaho jouse chunga jong chun koi cheh le kati!” atin ahi. 30 Hichun Mose jong chu Upa ho chutoh ngahmun kom langa akile kit tauve.

31 Hiti chun Pakaiyin Vamin pui dingin twikhanglen a huipi ahin nunsah tan, ngahmun chung leh akimvel jousea vamin akhehsah tan ahi. Amaho umna akon a avetna lamlam u mile phabep a gamla chan a chun tol a kon feet thum sang bou leng thei Vamim adimsoh tan ahi. 32 Hichun mipi chu a potdoh un hiche vamim chu nilhum keijin aman un hiche ni jan khovah keijin jong chuleh ajing gei jong chun aloh khom nalaijun ahi. Bushel somnga chunglam jeng alohdoh uvin ahi! Ngahmun kimvel a chun vamin sa ho chu agotna dingin aphou un ahi. 33 Ahinlah Israel ten saphe chu akam uva alhai’u aval lhah ding kontah u chun Pakai lunghanna achung uva ahung chutan, pul gimneitah alhunsah tan ahi. 34 Hiti ahijeh chun hilaimun chu Kibroth-hattaavah (hichu milop ho lhankhuh) aki sahtai ajeh chu ama hon Egypt lamah saphe ngaicha jing miho avuinau chu ahi. 35 Kibroth-hattaavah apat chun Israel mite chu Hazeroth gei chu ahung kitol un, phat chomkhat hilai mun achun ahung kichol uve.